1. ¿Baʼaxten unaj k-kʼubik k-óol tiʼ le Bibliaoʼ?

LE ANCIANOʼOBOʼ utiaʼal u yilkoʼob wa jeʼel u páajtal u jóokʼol kʼaʼaytaj juntúul j-xoknáaleʼ, ku tuklikoʼob: «Ken tsikbalnak le j-xoknáaloʼ, ¿ku yeʼesik wa jach ku creertikeʼ le Bibliaoʼ u Tʼaan Dios?». * Le máaxoʼob taak u jóokʼloʼob kʼaʼaytaj bey xan tuláakal le máaxoʼob meyajtik Diosoʼ unaj u creertikoʼobeʼ le Bibliaoʼ u Tʼaan Dios. ¿Baʼaxten? Tumen wa ku kʼubik u yóoloʼob tiʼ le Biblia yéetel ku meyajtiʼob tubeel ken jóokʼkoʼob kʼaʼaytajeʼ yaan u yáantkoʼob u maasil u kʼaj óoltoʼob Jéeoba utiaʼal u salvarkubaʼob.

2. ¿Baʼaxten maʼ unaj ‹u xuʼulul k-tsʼáaik k-óol tiʼ le baʼaxoʼob tsʼoʼok k-kanikoʼ›?

² Apóstol Pabloeʼ utiaʼal u yeʼesik u kʼaʼanaʼanil le Bibliaoʼ tu yaʼalaj tiʼ Timoteo: «Maʼ u xuʼulul a tsʼáaik a wóol tiʼ le baʼaxoʼob ta kanaj yéetel oksaʼab ta tuukul a creertoʼ». «Le baʼaxoʼob» tu kanaj Timoteooʼ letiʼe kaʼansajoʼob yaan teʼ Biblia beet u kʼubik u yóol tiʼ le maʼalob péektsiloʼ. Bejlaʼaʼ xaneʼ le kaʼansajoʼob yaan teʼ Bibliaoʼ ku beetik k-kʼubik k-óol tiʼ le maʼalob péektsiloʼ yéetel ku tsʼáaiktoʼon «naʼat utiaʼal [k-salvartikba]» (2 Tim. 3:14, 15). Utiaʼal k-eʼesik tiʼ le máakoʼob tiʼ Dios u taal le Bibliaoʼ u suukileʼ k-xokiktiʼob le baʼax tu yaʼalaj Pabloaʼ. Baʼaleʼ toʼoneʼ k-ilik yaan uláakʼ utsiloʼob ku taasik (xok 2 Timoteo 3:16). Koʼoneʼex maas xakʼaltik le baʼax ku yaʼalik le tekstoaʼ, tumen beyoʼ yaan k-maas creertik tuláakal u kaʼansajoʼob Jéeobaeʼ tojtakoʼob (Sal. 119:128).

3-5. 1) ¿Baʼax tu beetaj yaʼab máakoʼob ka tsʼoʼok u yuʼubikoʼob u kaʼansaj Pedro teʼ Pentecostesoʼ, yéetel baʼaxten? 2) ¿Baʼaxten yaʼab máakoʼob tu kaajil Tesalónicaeʼ tu kʼamoʼob u jaajil? 3) ¿Baʼax beetik u jaʼakʼal u yóol yaʼab máak ken k-kʼaʼayt le maʼalob péektsil tiʼoboʼ?

³ Jesuseʼ tu yaʼalaj tiʼ le israelitaʼoboʼ: «Táan in túuxtikteʼex  profetaʼob, máakoʼob yaan u naʼatoʼob yéetel máakoʼob ku kaʼansajoʼob» (Mat. 23:34). Letiʼeʼ táan u tʼaan kaʼach tiʼ u disipuloʼob, le máaxoʼob tu kaʼansaj bix unaj u meyajtiʼob le Biblia teʼ kʼaʼaytajoʼ. Teʼ Pentecostés tu jaʼabil 33 tsʼoʼokok u taal Jesusoʼ, Apóstol Pedro, juntúul tiʼ le «máakoʼob ku kaʼansajoʼ», tu kʼaʼaytaj le maʼalob péektsil tiʼ yaʼab máakoʼob tu kaajil Jerusalén. Teʼ kʼiinoʼ tu chʼaʼchiʼitaj yaʼab tekstoʼob tiʼ le Kiliʼich Tsʼíiboʼob ich Hebreooʼ. Yaʼab tiʼ le máaxoʼob uʼuyoʼ «yaachaj u yóol u puksiʼikʼaloʼobeʼ» ka arrepentirnajoʼob. Le oʼolal kex tres mil u túulaleʼ tu kʼáatoʼob tiʼ Dios ka perdonartaʼakoʼob tsʼoʼoleʼ tu beetubaʼob u disipuloʼob Jesús (Bax. 2:37-41).

⁴ Apóstol Pablo, uláakʼ juntúul máax ku kaʼansaj kaʼacheʼ, tu kʼaʼaytaj le maʼalob péektsil tiʼ uláakʼ luʼumiloʼoboʼ. Tu kaajil Tesalónicaeʼ kʼaʼaytajnaj tiʼ junpʼéel sinagoga. «Ichil óoxpʼéel Sabadoʼob túuneʼ tsikbalnaj tu yéeteloʼob tiʼ le baʼax ku yaʼalik le Kiliʼich Tsʼíiboʼoboʼ, táan u tsolik yéetel táan u yeʼesik yaniliʼ u muʼyaj le Cristooʼ yéetel yaniliʼ u líiʼsaʼal ichil le kimenoʼoboʼ.» ¿Baʼax úuch ka tsʼoʼoki? «Jujuntúul tiʼ le máakoʼoboʼ tu beetubaʼob disipuloil tiʼ Cristo» bey xan «yaʼab tiʼ le griegoʼo[boʼ]» (Bax. 17:1-4).

⁵ Bejlaʼeʼ yaʼab máak ku jaʼakʼal u yóol ken u yil bix u meyaj le Biblia tiʼ le máaxoʼob meyajtik Dios utiaʼal u kaʼansajoʼoboʼ. Juntúul máak kajaʼan Suizaeʼ le ka tu yuʼubaj u xoʼokol junpʼéel teksto tiʼ le Biblia tumen juntúul kiikeʼ, tu yaʼalaj: «¿Máakalmáak a religioneʼex?». Le kiikoʼ tu yaʼalaj: «Toʼoneʼ u j-jaajkunajoʼon Jéeoba». Le máakoʼ tu yaʼalaj: «Tin waʼajiliʼeʼ. ¿Máax uláakʼ jeʼel u taal tin wotoch u xok le Biblia in wuʼuyoʼ?».

6, 7. 1) ¿Bix jeʼel u meyaj maʼalob le Biblia tiʼ le máaxoʼob ku kaʼansajoʼob teʼ múuchʼuliloʼ? 2) ¿Bix jeʼel u meyajtoʼon tubeel le Biblia ken k-tsʼáa xookoʼ?

⁶ ¿Bix uláakʼ jeʼel u meyajtoʼon le Biblia ken kaʼansajnakoʼonoʼ? Meyajnaktech le Biblia ken kaʼansajnakech teʼ múuchʼuliloʼ. Maʼ a chéen chʼaʼchiʼitik le tekstoʼoboʼ, mix a xokik tiʼ junpʼéel juʼun a imprimirtmaj wa tiʼ junpʼéel tableta electrónica, baʼaxeʼ kaxt teʼ Bibliaoʼ yéetel xoke. Tsʼoʼoleʼ aʼal tiʼ u maasil ka u beetoʼob xan beyoʼ. Utiaʼal a wáantkoʼob náatsʼal tiʼ Jéeobaeʼ eʼestiʼob bix jeʼel u tsʼáaikoʼob ichil u kuxtaloʼobeʼ. Tu lugar a ketik yéetel junpʼéel baʼax talam u naʼataʼal wa a tsikbaltik junpʼéel experiencia chéen tumen jatsʼuts u yuʼubaʼaleʼ, meyajnaktech le tiempo utiaʼal a tsolik baʼax ku yaʼalik le Bibliaoʼ.

⁷ Ken a tsʼáa xook yéetel junpʼéel jóoʼsaʼanileʼ, maʼ u tuʼubultech a xokik le tekstoʼoboʼ. Aʼal tiʼ le j-xoknáal ka u xok tuláakal le tekstoʼob ken u líiʼsubaoʼ yéetel áant u naʼate. Tu lugar a sen tsolik yaʼab baʼaloʼob ka tak pʼáatak bey táan a máansik junpʼéel tsoltʼaaneʼ, aʼal tiʼ le j-xoknáal ka u yaʼal baʼax ku naʼatikoʼ. Maʼ a waʼaliktiʼ baʼax unaj u creertik wa baʼax unaj u beetik, baʼaxeʼ beet kʼáatchiʼob maʼ talamtak utiaʼal u séeb kaxtik u núukil. *

8. ¿Baʼax talamil yaan kaʼach tiʼ Pablo?

⁸ U suukileʼ k-tuklikeʼ chéen le ancianoʼob jeʼel u páajtal u yaʼalikoʼob u nuʼuk tiʼ máakoʼ. U jaajileʼ letiʼobeʼ unaj u beetkoʼob utiaʼal u yáantkoʼob «le máaxoʼob táan u kʼebantaloʼoboʼ» (1 Tim. 5:20; Tito 1:13). Kex beyoʼ unaj xan k-nuʼuktikba t-juunal. Jeʼex Pabloeʼ tu meyajtaj Dios yéetel junpʼéel maʼalob conciencia (2 Tim. 1:3). Baʼaleʼ tu tsʼíibtaj: «Kin tsʼáaik cuentaeʼ tin wíinklileʼ yaan uláakʼ ley ku baʼateʼel tu contra le ley yaan tin tuukuloʼ, yéetel ku bisken bey palitsil tiʼ u leyil le kʼeban[oʼ]». Koʼoneʼex ilik baʼax tu beetaj Pablo utiaʼal u baʼateʼel tu contra u leyil le kʼeban yaan tu wíinkliloʼ (xok Romailoʼob 7:21-25).

9, 10. 1) Maʼ xaaneʼ, ¿tu contra baʼax ku baʼateʼel kaʼach Pablo? 2) Maʼ xaaneʼ, ¿baʼax ku beetik kaʼach utiaʼal u baʼateʼel tu contra le kʼebanoʼ?

 ⁹ ¿Tu contra baʼax ku baʼateʼel kaʼach Pablo? Letiʼeʼ maʼ tu jach aʼaliʼ, baʼaleʼ tu yaʼalaj tiʼ Timoteo, teneʼ «minaʼan in suʼtal» kaʼachi (1 Tim. 1:13). Táanil tiʼ u káajal u tsaypachtik Jesuseʼ tu chʼaʼpachtaj tu jaajil u yóol le máaxoʼob meyajtik Diosoʼ. Tu yaʼaleʼ: «Jach táaj pʼujaʼanen kaʼach tu contraʼob» (Bax. 26:11). Kex tu kanaj u controlartuba utiaʼal maʼ u séeb tsʼíikileʼ, maʼ xaaneʼ yaan kʼiineʼ talamchaj u controlartik bix u yuʼubikuba wa bix u tʼaan (Bax. 15:36-39). ¿Baʼax áante?

¹⁰ Letiʼeʼ tu yaʼalaj tiʼ le sukuʼunoʼob yaan Corinto baʼax ku beetik kaʼachoʼ (xok 1 Corintoiloʼob 9:26, 27). Bey ku loʼoloxik u kʼeban wíinklil utiaʼal maʼ u beetik baʼax kʼaaseʼ. Maʼ xaaneʼ ku kaxtik u nuʼuktaj le Bibliaoʼ, ku kʼáatik tiʼ Jéeoba ka áantaʼak u tsʼáa ichil u kuxtal yéetel ku yilik u maas maʼalobkíintik u modos. * Le baʼax tu beetoʼ jach jeʼel u yáantkoʼoneʼ, tumen k-baʼateʼel xan tu contra le baʼaxoʼob maʼ maʼalob k-tsʼíiboltikoʼ.

11. ¿Bix jeʼel u xíixtik máak u kuxtal utiaʼal u yilik wa táan u beetik baʼax uts tu tʼaan Dioseʼ?

¹¹ Maʼ u xuʼulul a baʼateʼel tu contra le baʼaxoʼob maʼ maʼalob ka tsʼíiboltikoʼ. Baʼaxeʼ xíixt mantatsʼ a kuxtal utiaʼal a wilik wa táan a beetik baʼax uts tu tʼaan Dios (2 Cor. 13:5). Ken a xok tekstoʼob jeʼex Colosasiloʼob 3:5 tak 10, tukulte: «¿Kin baʼateʼel wa yéetel u jaajil in wóol tu contra le baʼaxoʼob maʼ maʼalob kin tsʼíiboltikoʼ, wa tsʼoʼok u káajal in náaysik in wóol yéetel baʼaloʼob ku yaʼalik Jéeoba maʼ maʼalobiʼ? Jeʼex wa táan u meyajten Internet ku chíikpajal junpʼéel baʼax maʼ maʼalobeʼ, ¿tu séebaʼanil wa kin kʼalik? ¿Teen wa kaxtik baʼaloʼob maʼ maʼalob ich Internetiʼ?». Wa ka beetik baʼax ku yaʼalik le Bibliaoʼ mantatsʼ yaan a pʼil ich yéetel maʼ kun saʼatal a wóol tiʼ baʼaloʼob beyaʼ (1 Tes. 5:6-8).

12, 13. 1) ¿Baʼax unaj k-kaxtik le ken k-tojkíint wa baʼax, yéetel bix jeʼel k-beetik jeʼex Jesuseʼ? 2) ¿Baʼax tʼaaniloʼob maʼ unaj u meyajtoʼon ken k-tojkíint wa baʼaxiʼ?

¹² Le tʼaan ich griego ku suʼutul «tojkíina[joʼ]» u kʼáat u yaʼal u tojkíintaʼal wa u yutskíintaʼal wa baʼax. Yaan kʼiineʼ unaj k-utskíintik junpʼéel baʼax t-aʼalaj wa t-beetaj tumen jelaʼan bix naʼataʼabik. Jeʼex úuchjeakileʼ u nuuktakil le judíoʼoboʼ joʼopʼ u tsʼíikiloʼob tumen Jesuseʼ maʼalob tu kʼamil «le j-kʼam impuestoʼoboʼ» bey xan «uláakʼ j-kʼeban máakoʼob». Le oʼolal Jesuseʼ tu yaʼalajtiʼob: «Le máaxoʼob toj u yóoloʼoboʼ maʼ kʼaʼabéettiʼob juntúul doctoriʼ, baʼaleʼ le máaxoʼob kʼojaʼanoʼoboʼ kʼaʼabéettiʼob. Xeeneʼex túun, ka a kaneʼex baʼax u kʼáat u yaʼal lelaʼ: ‹In kʼáat ka a chʼaʼex óotsilil, maʼ ka a kʼubeʼexten kíimsbil baʼalcheʼobiʼ›» (Mat. 9:11-13). Letiʼeʼ yéetel chúukaʼan óolal tu tsolaj baʼax uts tu tʼaan Dios, le oʼolal le máaxoʼob kabal u yóoloʼoboʼ tu kanoʼobeʼ Jéeobaeʼ «muun u puksiʼikʼal[,] ku chʼaʼ óotsilil, chúukaʼan yóol, nojoch u yaakunaj bey xan u jaajil» (Éxo. 34:6). Tumen Jesús tu yilaj u tojkíintik yaʼab baʼaloʼobeʼ, yaʼab máaxoʼob tu kʼubaj u yóoloʼob tiʼ le maʼalob péektsiloʼ.

¹³ Le baʼax tu beetaj Jesusoʼ ku yeʼesiktoʼon bix jeʼel k-áantik k-éet máakileʼ. Juntúul máax táan u tsʼíikileʼ jeʼel u yaʼalikeʼ: «¡Uʼuy baʼax ken in waʼaltech!». Baʼaleʼ 2 Timoteo 3:16, maʼ bey u yaʼalik ka beetaʼakoʼ. Le Bibliaoʼ maʼ tu yaʼalik ka k-kʼey mix máakiʼ. Le tʼaanoʼob ku ‹beetik looboʼ› jeʼel u beetik u jach yaatal u yóol wa máaxeʼ yéetel óoliʼ maʼatech u taasik utsil (Pro. 12:18).

14-16. 1) Ken yanak talamil tiʼ le sukuʼunoʼoboʼ, ¿baʼax maʼalob ka u beet le ancianoʼob utiaʼal u tojkíintikoʼob le baʼax ku yúuchloʼ? 2) ¿Baʼaxten unaj u meyaj le Biblia utiaʼal u tojkíintaʼal le paalaloʼ?

¹⁴ ¿Bix jeʼel k-eʼesik chúukaʼan óolal yéetel  utsil ken k-tojkíint wa baʼaxeʼ? Tukulteʼ juntúul sukuʼun yéetel u yataneʼ ku kʼáatkoʼob áantaj tiʼ juntúul anciano utiaʼal u xuʼulul u sen baʼateloʼob. ¿Baʼax unaj u beetik le ancianooʼ? Yáaxeʼ maʼ unaj u tsʼáaikuba tu tséel mix juntúuliʼ, tsʼoʼoleʼ maʼalob ka u xoktiʼob jujunpʼéel baʼax ku yaʼalik le Bibliaoʼ, maʼ xaaneʼ letiʼe tekstoʼob yaan teʼ xook 3 tiʼ le libro Le baʼax jeʼel u beetik u yantal kiʼimak óolal ichil le familiaoʼ. Le táan u tsikbal le anciano yéeteloʼoboʼ, cada juntúuleʼ unaj u tuukul tiʼ le tekstoʼob maas unaj u tsʼáaik ichil u kuxtaloʼ. Tsʼoʼoleʼ le ancianooʼ jeʼel u páajtal u kʼáatik bix u bintiʼobeʼ utiaʼal u yáantkoʼob wa kʼaʼabéet.

 ¹⁵ Le taatatsiloʼoboʼ, ¿bix jeʼel u tojkíintikoʼob baʼax ku beetik u paalal utiaʼal u maas meyajtikoʼob Jéeobaeʼ? Tukleʼ taak a wáantik a hija táan u x-lóoʼbayantal utiaʼal maʼ u biskuba yéetel máax maʼ unajiʼ. Yáaxeʼ unaj a wojéeltik jach baʼax ku yúuchul. Tsʼoʼoleʼ wa kʼaʼabéeteʼ tsikbalnen tu yéetel, maʼ xaaneʼ jeʼel u meyajtech le baʼax ku yaʼalik le libro Lo que los jóvenes preguntan. Respuestas prácticas (volumen 2). Maʼalob xan ka a máans yaʼab tiempo tu yéetel utiaʼal a wilik bix u yuʼubikuba ken jóokʼok kʼaʼaytaj wa ken a náays a wóoleʼex ich familia. Wa ku chúukpajal a wóol yéetel ka weʼesik a wutsil tiʼ a hijaeʼ, letiʼeʼ yaan u tsʼáaik cuenta a yaabiltmaj yéetel táan a kaxtik u yutsil. Maʼ xaaneʼ yaan u taaktal u beetik baʼax ta waʼalajtiʼ, beyoʼ maʼ kun bin kʼaasil tiʼ, tumen maʼ ken u bisuba yéetel máaxoʼob maʼ unajiʼ.

¹⁶ Unaj xan u yantaltoʼon chúukaʼan óolal yéetel k-eʼesik utsil ken k-líiʼs u yóol le máaxoʼob kʼojaʼanoʼoboʼ, le máaxoʼob chiʼichnakoʼob tumen pʼáat minaʼan meyajtiʼoboʼ yéetel le máaxoʼob maʼ u jach naʼatoʼob junpʼéel baʼax ku kaʼansik le Bibliaoʼ. Jeʼex k-ilkoʼ ken meyajnaktoʼon le Biblia utiaʼal k-tojkíintik wa baʼaxoʼ ku taasiktoʼon yaʼab utsil.

17. ¿Baʼaxten unaj k-kʼamik maʼalob le tsolnuʼukoʼoboʼ?

¹⁷ «Mix junpʼéel castigo ku kiʼimakkúuntik u yóol máak, baʼaxeʼ ku beetik u yaatal u yóol; baʼaleʼ le máaxoʼob ku kaanbaloʼob tiʼ le castigooʼ, ken tsʼoʼokkeʼ ku yantal jeetsʼelil tiʼob tu yoʼolal le toj kuxtal ku biskoʼoboʼ.» (Heb. 12:11.) U maas yaʼabil le máaxoʼob meyajtik Diosoʼ tsʼoʼok u yilkoʼobeʼ le tsolnuʼukoʼob tsʼaʼabtiʼob tu paaliloʼob tumen u taataʼoboʼ tu taasaj utsil tiʼob. K-kʼamik xan le tsolnuʼukoʼob ku tsʼáaik Jéeoba, tu yoʼolal le ancianoʼoboʼ, ku yáantkoʼon utiaʼal k-seguer tu bejil le kuxtaloʼ (Pro. 4:13).

18, 19. 1) ¿Baʼaxten Proverbios 18:13, jach maʼalob utiaʼal «tsolnuʼuk jeʼex u yaʼalik Dios ka beetaʼa[koʼ]»? 2) U suukileʼ, ¿baʼax utsil ku taasik le u yeʼesik le ancianoʼob jeetsʼel óolal yéetel yaabilaj tiʼ le máaxoʼob ku kʼebantaloʼoboʼ?

¹⁸ Maʼ chéen chʼaʼabil u tsʼaʼabal junpʼéel tsolnuʼuk ka u taas utsiloʼobiʼ. Jéeobaeʼ ku yaʼalikeʼ unaj k-tsolnuʼuk «jeʼex u yaʼalik [...] ka beetaʼak[oʼ]» (2 Tim. 3:16). ¿Bix u beetaʼal? Unaj k-chʼaʼik en cuenta baʼax ku yaʼalik le Bibliaoʼ, jeʼex Proverbios 18:13, ku yaʼalik: «J-maʼ ojéelaj yéetel junpʼéel baʼal suʼtsil u núukaʼal junpʼéel tʼaan wa maʼ tu yuʼubaʼal baʼax ku yaʼalaʼal». Le oʼolaleʼ le ancianoʼoboʼ táanil tiʼ u tsolnuʼuktikoʼob juntúul sukuʼun ku yaʼalaʼal tsʼoʼok u lúubul tiʼ junpʼéel nojoch kʼebaneʼ, unaj u jach ilkoʼob baʼax uchaʼan (Deu. 13:14). Chéen jaʼaliʼ bey jeʼel u «tsolnuʼuk[oʼob] jeʼex u yaʼalik Dios ka beetaʼa[koʼ]».

¹⁹ Le Bibliaoʼ ku yaʼalik xaneʼ le ancianoʼoboʼ unaj u tsolnuʼuktikoʼob máak «yéetel jeetsʼel óolal» (xok 2 Timoteo 2:24-26). Maʼ xaaneʼ yaan máax tsʼoʼok u pʼatik kʼaasil u kʼaabaʼ Jéeoba yéetel tsʼoʼok u beetik u muʼyaj uláakʼ máakoʼob. Kex beyoʼ wa juntúul anciano táan u tsʼíikil le táan u tsolik u nuʼuk tiʼoʼ, maʼ kun béeytal u yáantik. Baʼaleʼ wa ku yeʼesik utsil jeʼex u yeʼesik Dioseʼ, maʼ xaaneʼ jeʼel u arrepentir le máax kʼebanchajoʼ (Rom. 2:4).

20. ¿Baʼaxoʼob ku yaʼalik le Biblia unaj u chʼaʼik en cuenta le taatatsiloʼob utiaʼal u tsolnuʼuktikoʼob u paalaloʼ?

²⁰ Le taatatsiloʼoboʼ unaj u meyajtiʼob le baʼax ku yaʼalik le Biblia utiaʼal u líiʼskoʼob u paalal yéetel «kaʼansaj bey xan yéetel u tsolnuʼuk Jéeoba» (Efe. 6:4). Maʼ unaj u jáan castigartikoʼob u paalal chéen tu yoʼolal baʼax ku yaʼalaʼaliʼ. U jach pʼuʼujul máakeʼ maʼ utiaʼal máaxoʼob meyajtik Diosiʼ. «Jéeobaeʼ jach nojoch u yaabilaj yéetel ku chʼaʼik óotsilil», le oʼolaleʼ le máaxoʼob tsʼaʼan u páajtalil u tsolnuʼuktikoʼob le paalaloʼ unaj u yeʼeskoʼob le jatsʼuts modosaʼ (Sant. 5:11).

21, 22. Tiʼ le baʼax ku yaʼalik Salmo 119:97 tak 104, ¿baʼax tʼaanil jach ku yeʼesik le bix a wilik le Bibliaoʼ?

²¹ Juntúul máax chúukpaj u yóol u meyajt Dioseʼ tu yaʼalaj baʼaxten u yaabiltmaj u Ley Jéeoba (xok Salmo 119:97-104). Anchaj u naʼat ka tu xakʼalxoktaj le Leyoʼ yéetel béeychaj u naʼatik yaʼab baʼaloʼob. Úuchik u beetik baʼax ku yaʼalik le Leyoʼ maʼ lúub tiʼ le kʼebanoʼob suuk u beetik u maasiloʼ. Letiʼeʼ jatsʼuts u yilik u xakʼalxoktik le Leyoʼ tumen ku taasik yaʼab utsil tiʼ. Le oʼolal u chʼaʼtukultmaj u beetik baʼax uts tu tʼaan Dios.

²² ¿Ka wilik wa bukaʼaj u yáantaj le Bibliaoʼ? Le Bibliaoʼ jeʼel u yáantkech a maas kʼub a wóol yaan u beetik Dios le baʼax u yaʼalmoʼ. Tumen tiʼ Dios u taaleʼ ku kanáantkech tiʼ le nukuch talamiloʼob ku taasik le kʼebanoʼ. Wa ku meyajtech tubeel ken kaʼansajnakecheʼ, yaan a wáantik a wéet máakil utiaʼal u bin tu bejil le kuxtaloʼ yéetel utiaʼal u pʼáatal mantatsʼiʼ. Le oʼolaleʼ ken k-meyajt Jéeoba, u Diosil yaabilaj yéetel naʼatil minaʼan u xuuleʼ, meyajnaktoʼon le Biblia jeʼex tsʼoʼok k-ilkoʼ.