1, 2. Mɛni gbami nɛ kɔɔ nyagbe ligbi ɔmɛ a he ma nyɛ maa pee Yesu kaseli ɔmɛ nyakpɛ, nɛ mɛni heje?

YESU sɛ hlami nɛ e de e kaseli ɔmɛ kaa a ma kpata sɔlemi we ɔ hɛ mi. Enɛ ɔ hao Petro, Yakobo, Yohane, kɛ Andrea. (Mar. 13:1-4) Enɛ ɔ he ɔ, benɛ e piɛ a kɛ Yesu pɛ ɔ, a bi lɛ ke: “Mɛni be ní nɛ ɔmɛ tsuo maa ba mi? Mɛni okadi maa tsɔɔ o bami be, kɛ je nɛ ɔ nyagbe be?” (Mat. 24:1-3) Yesu ha mɛ heto nɛ e de mɛ níhi nɛ maa ya nɔ loko a ma kpata Yerusalem hɛ mi, kɛ níhi nɛ maa ba ngɛ Satan je nɛ ɔ nyagbe ɔ mi. Eko ɔ, Yesu kaseli ɔmɛ a bua jɔ nɔ́ kake ko nɛ e de ɔ he. Benɛ Yesu wo níhi nɛ a ngɛ gbeye kaa ta, hwɔ, kɛ yiwutso ní peepeehi a ta se ɔ, e tsɔɔ hu kaa nɔ́ kpakpa ko hu ma kadi nyagbe be ɔ. E de ke: “sane kpakpa nɛ ɔ nɛ kɔɔ matsɛ yemi ɔ he ɔ, a maa fiɛɛ kɛ kpa je ɔ mi tsuo, bɔnɛ pee nɛ je ma amɛ tsuo nɛ a nu; nɛ lɔɔ se loko nyagbe ɔ maa ba.”—Mat. 24:7-14.

² Yesu kɛ e kaseli ɔmɛ tsuo bɔni Matsɛ Yemi ɔ he sane kpakpa a fiɛɛmi momo. (Luka 8:1; 9:1, 2) Eko ɔ, Yesu kaseli ɔmɛ ma kai kaa Yesu de ke: “Ngmɔ ɔ ba ní saminya, se nihi nɛ ma bua nya a, a he pi. Lɔɔ he ɔ, nyɛ kpa ngmɔtsɛ ɔ pɛɛ, nɛ e tsɔ nihi kɛ ba ngmɔ ɔ nɔ, nɛ a ba bua ní nya.” (Luka 10:2) Se kɛ e kaseli ɔmɛ ma plɛ kɛ “fiɛɛ kɛ kpa je ɔ mi tsuo” konɛ “je ma amɛ tsuo nɛ a nu” ha kɛɛ? Jije ni ɔmɛ maa je kɛ ba? Atsinyɛ jemi ko be he kaa kaseli ɔmɛ li bɔnɛ ngmami nɛ ngɛ Mateo 24:14 ɔ ma plɛ kɛ ba mi ha!

3. Mɛni blɔ nɔ ngmami nɛ ngɛ Luka 21:34 ɔ ngɛ mi bae mwɔnɛ ɔ, nɛ mɛni sanehi e sa nɛ wa bi wa he?

³ Yesu gbami ɔ ngɛ mi bae ngɛ wa be nɛ ɔ mi. Nimli ayɔhi abɔ ngɛ Matsɛ Yemi ɔ he sane kpakpa a fiɛɛe ngɛ je kɛ wɛ. (Yes. 60:22) Se Yesu tsɔɔ hu kaa e maa ye kɛ ha ni komɛ kaa a kɛ fiɛɛmi nítsumi ɔ  maa pee nɔ́ titli ngɛ a si himi mi ngɛ nyagbe ligbi nɛ ɔmɛ a mi. Ní komɛ ma nyɛ ma je a juɛmi kɛ je fiɛɛmi nítsumi ɔ nɔ, nɛ a ma “ya di” jamɛ ní ɔmɛ a se. (Kane Luka 21:34.) Munyu nɛ ɔ hu ngɛ mi bae. Ní komɛ ngɛ Mawu webi ɔmɛ a kpɛti ni komɛ a juɛmi jee ngɛ fiɛɛmi nítsumi ɔ nɔ. Wa ma nyɛ maa na enɛ ɔ ngɛ yi mi kpɔ nɛ a mwɔɔ kɛ kɔ helo nya nítsumi, sukuu yami kɛ ya tsitsaa, helo nya níhi a nya buami, kɛ be nɛ a puɛɔ ngɛ hɛja jemi he ɔ mi. Daa ligbi si himi mi haomihi ha nɛ ni komɛ hu gbɔjɔ ngɛ Mawu sɔmɔmi mi. Mo bi o he ke: ‘Kɛ i peeɔ ye ní ha kɛɛ? Anɛ i kɛ Mawu suɔmi nya ní peemi pee nɔ́ titli ngɛ ye si himi mi lo?’

4. (a) Mɛni sɔlemi Paulo sɔle kɛ ha Kristofoli nɛ a ngɛ Filipi ɔ, nɛ kɛ a ti nihi fuu pee a ní ngɛ sɔlemi nɛ ɔ he ha kɛɛ? (b) Mɛni he wa ma susu ngɛ nikasemi nɛ nyɛɛ enɛ ɔ se ɔ mi, nɛ mɛni se wa ma ná?

⁴ Kristofoli nɛ a hi si blema a bɔ mɔde wawɛɛ loko a nyɛ nɛ a kɛ Mawu sɔmɔmi pee nɔ́ titli ngɛ a si himi mi. Enɛ ɔ heje ɔ, bɔfo Paulo na kaa e he hia kaa e sɔle kɛ ha Kristofoli nɛ a ngɛ Filipi ɔ konɛ “a le níhi nɛ a he hia wawɛɛ ɔ.” (Kane Filipibi 1:9-11. *) Kristofoli nɛ a hi si jamɛ a be ɔ mi ɔ kɛ ‘kã fiɛɛ Mawu sɛ gbi ɔ’ kaa bɔnɛ bɔfo Paulo pee ɔ. (Filip. 1:12-14) Jã nɔuu kɛ̃ nɛ mwɔnɛ ɔ, wa kpɛti nihi babauu ngɛ Mawu Munyu ɔ fiɛɛe kɛ kã. Amlɔ nɛ ɔ, Yehowa ngɛ e we asafo ɔ nɔ gue kɛ ha nɛ ngmami nɛ ngɛ Mateo 24:14 ɔ ngɛ mi bae. Loloolo ɔ, ke wa susu nɔ́ nɛ ɔ he ngɛ munyu nɛ wa ngɛ kasee nɛ ɔ mi ɔ, e maa wo wɔ he wami. Enɛ ɔ maa ye bua wɔ konɛ waa fiɛɛ kɛ kã pe bɔnɛ wa peeɔ ɔ. Ngɛ munyu nɛ wa maa kase nɛ ɔ mi ɔ, wa ma susu blɔ nya nɛ Yehowa to konɛ e ha ngmami nɛ ngɛ Mateo 24:14 ɔ nɛ ba mi ɔ he. Mɛni Yehowa asafo ɔ ngɛ pee, nɛ kɛ nɔ́ nɛ ɔ maa wo waa kɛ wa weku ɔ he wami ha kɛɛ? Wa ma susu nɔ́ nɛ ma ha nɛ waa to wa tsui si kɛ nɔ́ nɛ ma ha nɛ waa ya nɔ nɛ waa kɛ Yehowa blɔ nya tomi ɔ nɛ nyɛɛ ɔ he ngɛ munyu nɛ wa maa kase kɛ nyɛɛ enɛ ɔ se ɔ mi ɔ.

5, 6. (a) Mɛni heje nɛ Yehowa je nina kpo kɛ tsɔɔ e sɔmɔli kɛ kɔɔ níhi nɛ ngɛ nɔ yae ngɛ hiɔwe ɔ he ɔ? (b) Mɛni Ezekiel na ngɛ nina mi?

⁵ Níhi fuu ngɛ nɛ Yehowa nitsɛ ha we nɛ a ngma ngɛ Baiblo ɔ mi. Kaa nɔ hyɛmi nɔ́ ɔ, e tsɔɔ we wɔ níhi fitsofitso kɛ kɔ bɔnɛ kalegbɔ ɔ tsuɔ ní ha aloo bɔnɛ je ɔ ngɛ ha a he! Mohu ɔ, Yehowa ha wɔ nɔ́ nɛ e he hia kaa waa le konɛ waa nu e si womi ɔmɛ a sisi, nɛ waa ba wa je mi saminya. (2 Tim. 3:16, 17) E ngɛ nyakpɛ kaa Yehowa nitsɛ je blɔ de wɔ nɔ́ ko kɛ kɔ e blɔ nya tomi ɔ fã nɛ ngɛ hiɔwe ɔ he! Ke wa kane níhi nɛ Yesaya, Ezekiel, Daniel, kɛ Kpojemi nɛ Yohane ngma kɛ kɔ Yehowa hiɔwe blɔ nya tomi ɔ he ɔ, wa bua jɔɔ. (Yes. 6:1-4; Eze. 1:4-14, 22-24; Dan. 7:9-14; Kpoj. 4:1-11) Mɛni heje nɛ Yehowa ha nɛ wa le ní komɛ nɛ ngɛ nɔ yae ngɛ hiɔwe ɔ?

⁶ Yehowa suɔ nɛ waa le kaa wa piɛɛ e blɔ nya tomi nɛ ngɛ je mluku ɔ mi ɔ he. Nihi nɛ a ngɛ Yehowa blɔ nya tomi ɔ fã nɛ ngɛ hiɔwe ɔ mi ɔ ngɛ mɔde bɔe wawɛɛ nɛ a ngɛ Yehowa suɔmi nya ní pee. Kaa nɔ hyɛmi nɔ́ ɔ, Ezekiel na Yehowa blɔ nya tomi ɔ fã nɛ ngɛ hiɔwe ɔ kaa tlɔɔke ngua ko. Tlɔɔke nɛ ɔ he sɔɔ, nɛ e nyɛɔ poɔ e he kɛ yaa he saisaa nɛ e suɔ. (Eze. 1:15-21) Ezekiel na nɔ nɛ e ngɛ tlɔɔke ɔ kudɔe. Ezekiel de ke:  ‘Nɔ́ nɛ i na a pee kaa ayawa ngɛ la mi, nɛ e ngɛ kpɛe plamplam. Bɔnɛ Yehowa hɛ mi nyami kpɛmi nɛ a be nyɛe maa kale ɔ je e he kpo ji nɛ ɔ nɛ.’ (Eze. 1:25-28) Nɔ́ nɛ ɔ ma nyɛ maa pee Ezekiel nyakpɛ wawɛɛ! E na kaa Yehowa nitsɛ gu e mumi klɔuklɔu ɔ nɔ kɛ ngɛ e blɔ nya tomi ɔ kudɔe. Tlɔɔke ɔ nɛ Ezekiel na nɛ e ngɛ nyɛɛe ngɛ nina a mi ɔ tsɔɔ bɔnɛ Yehowa blɔ nya tomi ɔ fã nɛ ngɛ hiɔwe ɔ tsuɔ ní ha!

7. Mɛni blɔ nɔ Daniel nina a ha nɛ wa ná hɛ kɛ nɔ fɔmi ngɛ?

⁷ Daniel hu na níhi fuu nɛ haa nɛ wa náa hɛ kɛ nɔ fɔmi. E na Yehowa nɛ ji, “nɔ nɛ ngɛ daa a” nɛ e hii si ngɛ matsɛ sɛ nɛ ngɛ tsoe gegeege ɔ nɔ. Matsɛ sɛ ɔ ngɛ nanehi. (Dan. 7:9) Yehowa suɔ nɛ Daniel nɛ le kaa e blɔ nya tomi ɔ ngɛ hɛ mi yae, nɛ e ngɛ lɛ Yehowa a yi mi tomi ɔ he ní tsue. Daniel na nɔ ko hu “kaa nɔmlɔ adesa,” nɛ ji Yesu, nɛ a ngɛ lɛ he blɔ hae kaa e ye Yehowa blɔ nya tomi ɔ fã nɛ ngɛ zugba a n ɔ ɔ nɔ. Tsa pi jeha bɔɔ ko kɛkɛ nɛ Yesu kɛ maa ye adesahi a nɔ. Mohu ɔ, ‘e nɔ yemi ɔ maa hi si kɛ ya neneene, nɛ e matsɛ yemi ɔ se be poe gblegbleegble.’ (Dan. 7:13, 14) Nina nɛ ɔ ha nɛ wa ná hemi kɛ yemi ngɛ Yehowa mi, nɛ wa na nɔ́ nɛ e ngɛ tsue. Akɛnɛ Yehowa lɛ ha Yesu he blɔ heje ɔ, nina nɛ ɔ woɔ wɔ he wami konɛ wa ná hemi kɛ yemi ngɛ Yesu nɛ ji wa Hɛ Mi Nyɛɛlɔ ɔ mi.

8. Kɛ ninahi nɛ Ezekiel kɛ Yesaya na kɛ kɔ Yehowa blɔ nya tomi ɔ he ɔ ha nɛ a pee a ní ha kɛɛ, nɛ kɛ e sa kaa nina nɛ ɔmɛ nɛ ha nɛ wɔ hu waa pee wa ní ha kɛɛ?

⁸ Kɛ e sa kaa nina nɛ ɔmɛ nɛ kɔɔ Yehowa blɔ nya tomi ɔ fã nɛ ngɛ hiɔwe ɔ  he ɔ nɛ ná wa nɔ he wami ha kɛɛ? Kaa bɔnɛ Ezekiel pee ɔ, wɔ hu e sa nɛ níhi nɛ Yehowa ngɛ tsue ɔ nɛ pee wɔ nyakpɛ. (Eze. 1:28) Ke wa susuɔ bɔnɛ Yehowa blɔ nya tomi ɔ ngɛ hɛ mi yae ha a he ɔ, e sa nɛ lɔɔ nɛ wo wɔ he wami konɛ waa pee wa ní kaa bɔnɛ Yesaya hu pee ɔ. Benɛ Yehowa ha Yesaya he blɔ kaa e de nihi níhi nɛ lɛ Yehowa a ngɛ pee ɔ, Yesaya tsu he ní amlɔ nɔuu. (Kane Yesaya 6:5, 8.) Yesaya ngɛ nɔ mi mami kaa Yehowa fi e se, enɛ ɔ he ɔ, e le kaa e ma nyɛ ma tsu nítsumi nɛ a kɛ wo e dɛ kaa gbalɔ ɔ. Kaa bɔnɛ Yesaya pee ɔ, wɔ hu wa fĩɔ Yehowa blɔ nya tomi ɔ se nɛ wa peeɔ babauu ngɛ Mawu sɔmɔmi ɔ mi. Wa bua jɔ wawɛɛ kaa wa piɛɛ blɔ nya tomi ko nɛ peeɔ Yehowa suɔmi nya ní daa a he!

9, 10. Mɛni heje nɛ e he hia nɛ Yehowa nɛ to blɔ nya ngɛ zugba a nɔ ɔ?

⁹ Yehowa gu e Bi ɔ nɔ kɛ to blɔ nya ko ngɛ zugba a nɔ konɛ e kɛ e blɔ nya tomi ɔ fã nɛ ngɛ hiɔwe ɔ nɛ pee kake kɛ tsu ní. E to blɔ nya nɛ ɔ konɛ a nyɛ nɛ a tsu nítsumi nɛ a gba fɔ si ngɛ Mateo 24:14 ɔ he ní. Mɛni heje? Nyɛ ha wa susu yi mi tomi etɛ a heje nɛ e pee jã ngɛ ɔ he nɛ waa hyɛ.

¹⁰ Kekleekle ɔ, Yesu gba kɛ fɔ si kaa e kaseli ɔmɛ ma tsu fiɛɛmi nítsumi ɔ ‘kɛ ya su je ɔ nyagbe he tɔɔ.’ (Níts. 1:8) Nɔ́ nɛ ji enyɔ ɔ, e maa hia nɛ a kɛ Baiblo ɔ nɛ tsɔse nihi nɛ a ma tsu fiɛɛmi nítsumi ɔ nɛ́ a wo mɛ he wami. (Yoh. 21:15-17) Nɔ́ nɛ ji etɛ ɔ, e he maa hia nɛ a kpe kɛ ja Yehowa konɛ a kase blɔ nɔ nɛ a maa gu kɛ fiɛɛ sane kpakpa a. (Heb. 10:24, 25) Kristo se nyɛɛli ɔmɛ be nyɛe ma tsu nítsumi nɛ ɔmɛ ke blɔ nya tomi kpakpa ko be.

11. Mɛni blɔ nɔ wa maa gu kɛ fĩ Yehowa blɔ nya tomi ɔ se?

¹¹ Mɛni blɔ nɔ wa maa gu kɛ fĩ Yehowa blɔ nya tomi ɔ se? Blɔ kake nɛ wa maa gu nɔ kɛ pee enɛ ɔ ji, nɛ́ wa ma ná hɛ kɛ nɔ fɔmi ngɛ nihi nɛ a nyɛɛ fiɛɛmi nítsumi ɔ hɛ mi ɔ a mi. Yehowa kɛ Yesu tsuo ngɛ hɛ kɛ nɔ fɔmi ngɛ nyɛmimɛ nyumu nɛ ɔmɛ a mi. Nyɛmimɛ nyumu nɛ ɔmɛ bɔɛ mɔde kaa a kɛ a be kɛ a he wami ma dla níhi ngɛ je nɛ ɔ mi. Nyɛ ha nɛ wa susu níhi nɛ Yehowa blɔ nya tomi ɔ fã nɛ ngɛ zugba a nɔ ɔ ngɛ tsue ɔ he nɛ waa hyɛ.

12, 13. Mɛni blɔ nɔ asafo mi nikɔtɔmahi tsuɔ a blɔ nya nítsumihi ngɛ, nɛ mɛni heje nɛ lɔɔ woɔ mo he wami ɔ?

¹² A ngɔ blɔ nya nítsumi kɛ wo asafo mi nikɔtɔmahi nɛ a ngɛ je kɛ wɛ, nɛ a ngɛ níhi a si kpami ɔ a dɛ kaa a hyɛ fiɛɛmi nítsumi ɔ nɔ ngɛ mahi nɛ a ngɛ mi ɔ mi. Loko nyɛmimɛ nyumu nɛ ɔmɛ maa ma a juɛmi nya si ngɛ nɔ́ ko he ɔ, a hlaa blɔ tsɔɔmi kɛ je ɔ Mawu Munyu ɔ mi. A haa nɛ Mawu Munyu ɔ peeɔ ‘kane nɛ a kɛ hyɛɔ a nane nya, kɛ la nɛ haa a blɔ mi tɛ̃ɛ,’ nɛ a sɔleɔ wawɛɛ kɛ biɔ Yehowa blɔ tsɔɔmi.—La 119:105; Mat. 7:7, 8.

¹³ Kaa bɔnɛ asafo mi nikɔtɔmahi nɛ a hi si ngɛ kaseli ɔmɛ be ɔ mi ɔ pee ɔ, asafo mi nikɔtɔmahi nɛ a ngɛ mwɔnɛ ɔ hu ngɔɔ a be tsuo kɛ ‘fiɛɛɔ Mawu munyu ɔ.’ (Níts. 6:4) Ke a na bɔnɛ fiɛɛmi nítsumi ɔ ngɛ yiblii woe ngɛ ma nɔ he nɛ a ngɛ ɔ kɛ je kɛ wɛ ɔ, a náa bua jɔmi. (Níts. 21:19, 20) A kɛ a juɛmi maa blɔ tsɔɔmihi nɛ je Ngmami ɔ mi, kɛ nɔ́ nɛ mumi klɔuklɔu ɔ kɛ ha konɛ a nyɛ nɛ a fiɛɛ sane kpakpa a nɔ mohu pe nɛ a maa wo nyɛmimɛ ɔmɛ mlaahi fuu. (Kane Bɔfo Ɔmɛ A Nítsumi 15:28.) Kɛ gu enɛ ɔ nɔ ɔ, nyɛmimɛ nyumu nɛ ɔmɛ  peeɔ nɔ hyɛmi nɔ́ kpakpa kɛ ha nyɛmimɛ kpahi ngɛ asafo ɔ mi.—Efe. 4:11, 12.

14, 15. (a) Mɛni blɔ nya a to konɛ e ye bua wɔ nɛ waa fiɛɛ sane kpakpa a ngɛ je kɛ wɛ? (b) Kɛ o he nɛ o kɛ woɔ Matsɛ Yemi fiɛɛmi nítsumi ɔ mi ɔ ha nɛ o nuɔ he ha kɛɛ?

¹⁴ Wa nyɛmimɛ fuu tsuɔ ní wawɛɛ daa ligbi kɛ ngmaa womihi, nɛ a toɔ asafo mi kpehi, kɛ kpe nguahi a he blɔ nya. Kaa nɔ hyɛmi nɔ́ ɔ, nimli akpehi abɔ ngɔ a he kɛ ha nɛ a tsɔɔ womihi a sisi kɛ yaa gbihi nɛ hiɛ pe 600 mi. Enɛ ɔ he ɔ, nihi babauu ngɛ “Mawu ní nguangua amɛ” a he ní kasee ngɛ a je gbi mi. (Níts. 2:7-11) Nihewi kɛ yihewi kɛ Klamahi nɛ a he sɔɔ nɛ a kɛ fiaa womihi tsuɔ ní wawɛɛ kɛ peeɔ womihi. A haa nɛ asafohi nɛ a ngɛ tsitsaa po nine suɔ womi nɛ ɔmɛ a nɔ.

¹⁵ Ngɛ hehi nɛ wa ngɛ ɔ hu ɔ, nyɛmimɛ babauu tsuɔ ní konɛ wa nyɛ nɛ waa kɛ wa juɛmi nɛ ma sane kpakpa a fiɛɛmi nɔ. Kaa nɔ hyɛmi nɔ́ ɔ, nimli akpehi abɔ ngɔ a he kɛ ha konɛ a ma Matsɛ Yemi Asahi kɛ Kpe Peemi Asahi. Ni kpahi hu yeɔ bua nihi nɛ adebɔ mi oslaahi ná mɛ kɛ nihi nɛ a be he wami. Ni komɛ hu toɔ kpe wawi kɛ kpe nguahi a he blɔ nya, nɛ ni komɛ hu tsɔɔ ní ngɛ Baiblo kasemi sukuuhi nɛ asafo ɔ peeɔ ɔ a mi. Mɛni heje nɛ a tsuɔ nítsumi nɛ ɔmɛ ɔ? A tsuɔ nítsumi nɛ ɔmɛ konɛ wa nyɛ nɛ waa fiɛɛ, nɛ waa ya wa hɛ mi ngɛ anɔkuale ɔ mi, konɛ wa nyɛ nɛ waa ye bua nihi nɛ a ba sɔmɔ Yehowa. Yehowa blɔ nya tomi ɔ fã nɛ ngɛ zugba a nɔ ɔ kɛ e juɛmi ma níhi nɛ a he hia wawɛɛ ɔ a nɔ!

16. Mɛni he o ma nyɛ maa pee níhi a mi hlami kɛ kɔ ke nyɛ ngɛ nyɛ weku Mawu jami ɔ pee aloo o ngɛ o dɛhe nikasemi pee?

¹⁶ Anɛ be komɛ ɔ, wa ngɔɔ be kɛ susuɔ nɔ́ nɛ Yehowa blɔ nya tomi ɔ ngɛ pee ɔ he lo? Ni komɛ ngɔɔ be nɛ́ a kɛ peeɔ weku Mawu jami ɔ aloo a dɛhe nikasemi ɔ eko kɛ hlaa níhi a mi kɛ kɔɔ Yehowa blɔ nya tomi ɔ he, nɛ a susuɔ níhi nɛ a kaseɔ ɔ he. Kaa nɔ hyɛmi nɔ́ ɔ, ke o kase ní kɛ kɔ ninahi nɛ a je kpo kɛ tsɔɔ Yesaya, Ezekiel, Daniel, kɛ Yohane ɔ he ɔ, o bua maa jɔ he wawɛɛ. Womi nɛ ji Jehovah’s Witnesses—Proclaimers of God’s Kingdom kɛ womi kpahi loo DVD komɛ nɛ ngɛ o je gbi ɔ mi ɔ maa ye bua mo konɛ o le Yehowa blɔ nya tomi ɔ he ní fuu.

17, 18. (a) Kɛ o ná munyu nɛ wa kase nɛ ɔ he se ha kɛɛ? (b) Mɛni sane bimihi a he e sa kaa wa susu?

¹⁷ Ke wa susu bɔnɛ Yehowa gu e blɔ nya tomi ɔ nɔ nɛ e ha nɛ fiɛɛmi nítsumi ɔ ngɛ nɔ yae ɔ he ɔ, e maa ye bua wɔ. E sa nɛ wɔ hu wa hla níhi nɛ a he hia wawɛɛ ɔ a se blɔ kekle kaa bɔnɛ Yehowa blɔ nya tomi ɔ peeɔ ɔ. Ke wa pee jã a, lɔɔ ma ha nɛ wa ma ná kã kaa bɔnɛ Paulo pee ɔ. E ngma ke: “Akɛnɛ Mawu naa mɔbɔ heje ɔ, e ha wɔ nítsumi nɛ ɔ ke wa tsu. Lɔɔ he ɔ, wa kɔni mi jɔ̃ we.” (2 Kor. 4:1) E wo e nyɛmimɛ Kristofoli ɔmɛ he wami hu ke: “Wa ko ha nɛ kpakpa peemi nɛ gbe wa nya; ejakaa ke wa kɔni mi wui nyu ɔ, ní kpami be ɔ, wa ma ná he se.”—Gal. 6:9.

¹⁸ Anɛ tsakemi komɛ ngɛ nɛ e sa kaa waa pee kaa ni kakaakahi aloo kaa weku konɛ wa nyɛ nɛ waa di níhi nɛ a he hia wawɛɛ ɔ a se lo? Anɛ wa ma nyɛ maa pee wa si himi kpokploo konɛ nɔ́ ko nɛ ko je wa juɛmi kɛ je fiɛɛmi nítsumi nɛ he hia wawɛɛ ɔ nɔ lo? Ngɛ munyu nɛ nyɛɛ se nɛ wa maa kase ɔ mi ɔ, wa ma susu níhi enuɔ nɛ maa ye bua wɔ konɛ waa ya nɔ nɛ waa pee kã ngɛ Yehowa blɔ nya tomi ɔ mi ɔ he.