Loi e ‘Tupathe Hnei Nyipunie La Nöjei Ewekë Ka Tru Aliene Catre Kö’
Loi e ‘Tupathe Hnei Nyipunie La Nöjei Ewekë Ka Tru Aliene Catre Kö’
“Matre tupathe hnei nyipunie la nöjei ewekë ka isa pengöne kö [ka tru aliene catre kö].”—FIL. 1:10.
ITRE EWEKË NYINE TROA SINE THEL
Nemene la aqane thue mejiune së hnene la itre hna meköle goeëne hnei Isaia, me Ezekiela, me Daniela?
Nemene la ini nyine tro sa kapa qa ngöne la tulu ne la götrane gaa mama ne la organizasio i Iehova?
Nemene la aqane xatua së hnene la taane mekune celë?
1, 2. Nemene jë la ketre hna perofetane kowe la itre drai hnapine ka ajolëne la hni ne la itretre dreng, nge pine nemen?
HNEI Iesu hna qaja kowe la itretre drei nyidrë ka hape, tro ha thëtrije la ēnē. Hane hi lai ka ajolëne la hni Peteru, me Iakobo, me Ioane, me Anederea. (Mar. 13:1-4) Ame hë la angatre a lapa casi ju pe hi me Iesu, angatre a hnyinge ju koi nyidrë me hape: “Da ulatinejë koi huni jötëtia hlepëti eue la ite ewekë cili ? nge nemenëti la hatene la hlepëti hmaca enëtilai, meminëti la puatine la fewatin?” (Mat. 24:1-3) Ame la Iesu a sa koi angatr, tha hnei nyidrëti kö hna qaja hmekuje hi la itre ewekë ka troa traqa qëmekene troa thëtrije e Ierusalema, ngo hnei nyidrëti fe hna qaja la itre ewekë ka troa traqa ngöne la itre drai tixenuë ne la fene i Satana. Hnei Iesu hna qaja amë la itre ewekë hna xouene ka troa traqa, tune la itre isi, me jiin, me itre iangazo ka tru. Ngo hetre ketre ewekë ka loi fe hnei nyidrëti hna qaja amë. Öni nyidrë: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.”—Mat. 24:7-14.
2 Hnene hë la itretre drenge hna ce cainöjëne me Iesu la maca ka loi ne la Baselaia. (Luka 8:1; 9:1, 2) Nge tha thëthëhmine kö angatre lo Iesu a qaja ka hape: “Atraqate la meledrai, ngo xalaithe hi la angete huliwa ; qa ngöne lai thithijë nyipunie kowe la Joxu ne la meledrai, mate tro nyidëti a upe la angete troa huliwane la meledrai i nyidë.” (Luka 10:2) Ngo hnei angatre jë hna isa hnyinge me hape: ‘Tro jë huni elanyi a cainöje tune kaa “e cailo fene nyine anyipicine kowe la nöjei nöj”? Troa xulu qaa kaa la itre ka huliwa?’ Tha ka hmaloi kö kowe la itretre drenge troa mekune la aqane troa eatre la hna qaja ngöne Mataio 24:14!
3. Pine nemene matre ka nyipi ewekë catre enehila koi së la itre trenge ithanata i Iesu ngöne Luka 21:34? Nemene la aqane tro sa sipu waipengö së?
3 Haawe, eatre hë lo hna perofetane hnei Iesu ngöne la hneijine së. Kola cainöjëne la maca ka loi ne la Baselaia hnene la itre milio lao atr ngöne la fene asë. (Is. 60:22) Ngo hnei Iesu fe hna amamane ka hape, troa jole koi itre xane e troa amë panëne la huliwa ne cainöje ngöne la mele i angatr. Tru hnei nöjei pengöne ewekë ka troa ajolë angatr, ame hna “hacepi la ite hni” angat. (E jë la Luka 21:34.) Ka nyipi ewekë catre koi së enehila la itre trenge ithanata i Iesu, pine laka ame la itre xa hlue i Akötresie, tha amë panëne hë angatre la itre ewekë ka sisitria ngöne la mele i angatr. Kola mama hnyawa lai ngöne la aqane ië huliwa i angatr, me aqane iëne angatre troa tro kowe la itre hna ini ka tru, me ië mo. Ame itre xan, tru la hnei angatre hna kuci elo me kuci madrin. Tha catre kö itre xane ngöne la huliwa i Akötresie hnene laka, tru la hna hnehengazone menune la itre ejolene la mel. Isa waipengö së ju me hape: ‘Nemene la aqane ië ewekëng? Eni kö a amë panëne la aja i Akötresie ngöne la meleng?’
4. (a) Nemene la hna thithi fë hnei Paulo thatraqane la itre Keresiano ne Filipi, nge pine nemen? Nemene la hna kuca hnene la itre Keresiano ka ala nyim? (b) Nemene la hne së hna troa ce wange ngöne la taane mekune celë memine fe la ka troa xulu?
4 Ka nyipi ewekë catre kowe la itre pane Keresiano ekö troa amë panëne pala hi la huliwa i Akötresie ngöne la mele i angatr. Hane hi lai kepine matre thithi fë jë Paulo la angetre Filipi matre tro angatr a ‘tupathe la nöjei ewekë ka tru aliene catre kö.’ (E jë la Filipi 1:9-11.) Tui Paulo aposetolo, hnene la itre Keresiano ka ala nyimu ekö hna “cate titije troa qaja la tenge ewekë nge tha qou kö.” (Fil. 1:12-14) Ka ceitu hi lai me enehila, ala nyimu fe së angetre catre cainöjëne la Wesi Ula i Akötresie. Ngo, ketre ixatua ka tru koi së troa ithanatane ngöne la taane mekune celë, la aqane huliwane Iehova enehila la organizasio i Nyidrë matre eatre jë la itre trenge ithanata ngöne Mataio 24:14. Tro fe lai a xatua së troa huliwa catre hmaca kö ngöne la hna cainöje trootro. Nemene la hna kuca hnene la organizasio i Iehova, nge kola thuecatre së me hnepe lapa së tune kaa? Ame ngöne la taane mekune ka troa xulu, tro sa ce wange la ka xatua së troa cile huti ngöne la huliwa i Akötresie, me ka xatua së fe troa ce huliwa memine la organizasio i Iehova.
GÖTRANE KA THA MAMA KÖ NE LA ORGANIZASIO I IEHOVA
5, 6. (a) Pine nemene matre Iehova a amamane jëne la hna meköle goeëne hnene la itre hlue i Nyidrë la itre ewekë ka eje e hnengödrai? (b) Nemene la ewekë hna meköle goeëne hnei Ezekiela?
5 Nyimu ewekë tha hnei Iehova kö hna mekune troa amë hnine la Tusi Hmitrötr. Hanawange la ketre ceitun, ame la atuatu ne la atr, maine hnengödrai me fene hnengödrai, tha hna qeje pengöne atrune kö itre ej. Ngo hnei Iehova pe hna hamë së la itre ithuemacanyi ka nyipi ewekë göi tro sa trotrohnine la aja i Nyidrë, me trongën. (2 Tim. 3:16, 17) Ewekë ka tru la Iehova a mekune troa qeje pengöne koi së la götrane la organizasio i Nyidrë ka tha mama kö. Easa madrine atraqatre la easa e la itre ithuemacanyi cili ngöne la itre itusi ne la Tusi Hmitrötr ngöne Isaia, me Ezekiela, me Daniela, me Hna Amamane! (Is. 6:1-4; Ezek. 1:4-14, 22-24; Dan. 7:9-14; Hna ama. 4:1-11) Pine nemene matre Iehova a aijijë së troa atre pengöne la itre ewekë ka eje e hnengödrai?
6 Aja i Iehova tro pala hi sa mekune ka hape, atrene fe së la organizasio i Nyidrë e celë fene me e hnengödrai. Tru la huliwa hna kuca hnene la götrane ka tha mama kö ne la organizasio i Nyidrë troa eatrëne la aja i Nyidrë. Hanawange la ketre ceitun, hnei Ezekiela hna meköle goeëne la götrane ka tha mama kö ne la organizasio i Iehova hna nyi hatrene hnene la ikariota atraqatr. Ame la ikariota cili, tre ka nyinyape catre ej, nge sameke hi la eje a fezi jea kowe la nöjei pengöne götran. (Ezek. 1:15-21) Öhne fe hi angeice lai Atre ti ikariota. Öni Ezekiela: “Hnenge hna öhne tune la ngöne kopa ka palulu kösë eë hnin’ eje xöteith.” Qaja hmaca ju hi angeice ka hape: “Celë hi ngön’ acei tunëne memine la lolo i Iehova.” (Ezek. 1:25-28) Sesëkötre jë kö Ezekiela hnene la ewekë hnei angeice hna meköle goeën. Öhne hi angeice laka, Iehova la ka musi hune la organizasio i Nyidrë, nge Nyidrëti a xomiujine eje jëne la uati hmitrötre i Nyidrë. Ame la aqane nyinyapene la ikariota, tre kolo hi lai a amamane hnyawa la aqane huliwa ne la götrane ka tha mama kö ne la organizasio i Iehova!
7. Nemene la aqane thue mejiune së hnene la hna meköle goeëne hnei Daniela?
7 Hnei Daniela fe hna meköle goeëne la ketre ewekë ka thue mejiune i angeic. Hnei angeice hna öhnyi Iehova, “qate ate ka hekö,” a lapa ngöne la therone hna atë hune lo itre otrue, ene la itre wil. (Dan. 7:9) Aja i Iehova tro Daniela a trotrohnine laka, ame la organizasio i Nyidrë, tre, ka enij, kola hape ka huliwa catre troa kuca la aja i Iehova. Daniela a öhne hmaca ju “la kete tune la Nekö i ate,” kola qeje Iesu, nyidrëti a kapa la musi ngöne la götrane ka tha mama kö ne la organizasio i Iehova. Ame la musi Iesu kowe la atr, tre, tha koi itre macatre ka xalaithe kö. Ngo, “ka cile huti la musi anganyidë, nge tha tro kö a pate ; nge tha tro kö a ase la baselaia i anganyidë.” (Dan. 7:13, 14) Hnene la ewekë hna meköle goeëne celë hna upi së troa mejiune koi Iehova me atrehmekune la hna eatrëne hnei Nyidrë. Nge pine laka, Iesu a kapa la musi qaathei Iehova, kolo fe a upi së hnene la hna meköle goeëne celë troa mejiune koi Iesu, lo Atre Elemekene la nöje i Iehova.
8. Hna ketri Ezekiela me Isaia tune kaa lo nyidroti a meköle goeën la organizasio i Iehova? Hna hane ketri së tune kaa hnene la itre hna meköle goeëne cili?
8 Tune kaa fe la aqane ketr la hni së lo kola mama la organizasio i Iehova jëne la itre ewekë hna meköle goeën? Tui Ezekiela, hna ketri së hnyawa fe hnene la itre huliwa i Iehova. (Ezek. 1:28) Hnei Isaia perofeta fe hna hane meköle goeëne la ewekë ka mama e hnengödrai. Hnei angeice hna kapa la ihë göi troa thuemacanyi itre xane la ewekë celë. (E jë la Isaia 6:5, 8.) Jëne la ixatua qaathei Iehova, atre hnyawa hi Isaia laka, pëkö ka atreine troa thingijë i angeice troa kuca la huliwa ne perofeta. Tui Isaia, kola huli së troa ce huliwa memine la organizasio i Iehova, ene la troa huliwa catre koi Akötresie. Ketre ithuecatre ka tru koi së la easa atre ka hape, easë fe e hnine la organizasio ka tha mano kö kuca la aja i Iehova!
GÖTRANE GAA MAMA NE LA ORGANIZASIO I IEHOVA
9, 10. Pine nemene matre nyipi ewekë troa hetrenyi la götrane ka mama ne la organizasio i Iehova?
9 Jëne la Hupuna i Nyidrë, hnei Iehova hna eköthe e celë fene la organizasio i Nyidrë, kola ce huliwa memine la götrane ka tha mama kö e hnengödrai. Ka nyipi ewekë catre lai matre eatre jë lo huliwa hna qaja amë ngöne Mataio 24:14. Pine nemen? Tro sa ce wange la köni kepin.
10 Ame la ewekë hnapan, hnei Iesu hna qaja ka hape, tro la itretre drei nyidrë a cainöje uti hë “la cane la fene hnengödrai.” (Ite hu. 1:8) Ame la hnaaluen, tre, ene la enyipiewekëne la troa hamëne la itre ini me itre ithuecatre koi angetre troa xome la huliwa ne cainöje trootro. (Ioane 21:15-17) Ame la hnaakönin, ene la enyipiewekëne koi angatre troa ce sine la itre icasikeu matre ce atrunyi Iehova, me inine troa cainöj. (Heb. 10:24, 25) Troa eje la itre ewekë celë e hetre organizasio ne la itretre drei Iesu.
11. Nemene la aqane tro sa ce huliwa memine la organizasio i Iehova?
11 Nemene la aqane tro sa ce huliwa memine la organizasio i Iehova? Ame la ketre ewekë ka nyipi ewekë catr, ene la troa mejiune kowe la itre trejine ka elemekene la huliwa ne cainöj. Iehova me Iesu a mejiune kowe la itre trejine cili, haawe, tro fe hi së lai a hane mejiune koi angatr. Maine ju tro la itre trejine cili a xome la traeme i angatre me trenge catre i angatre troa thele nyin la itre jole ka traqa kowe la fene celë. Ngo tha hnei angatre kö hna huliwa tune lai. Haawe, loi e tro sa pane ce wange la ewekë hna amë panëne pala hi hnene la götrane gaa mama ne la organizasio i Iehova.
ANGATR A AMË PANËNE ‘LA NÖJEI EWEKË KA TRU ALIENE CATRE KÖ’
12, 13. Nemene la hna kuca hnene la itre qatre thupe ka maca göi huliwa matre atreine jë angatre troa eatrëne la itre hnëqa i angatr? Pine nemene matre ketre ithuecatre fe lai koi së?
12 Hna acile la itre qatre thupe ka maca göi huliwa ngöne la fene hnengödrai matre troa eköthe la huliwa ne cainöje me cilë mekene eje ngöne la itre nöje hnei angatre hna huliwa ngön. Tro angatre a atreine tune kaa? Hnene la itre atr cili ka mele nyipici me ipië hna mejiune kowe la ixatua i Iehova me Iesu matre troa atrepengöne hnyawa la itre hna ajane ka nyipi ewekë catre hnene la itre atr ngöne la itre götrane nöje hnei angatre hna huliwa ngön. Ame la angatr a ameköti ewekë, tre angatr a xomi meköti qa hnine la Tusi Hmitrötr, me thithi koi Iehova troa ameköti angatr. Celë hi hna kuca hnei angatre matre ce huliwa memine la götrane gaa tha mama kö ne la organizasio i Iehova.—Sal. 119:105; Mat. 7:7, 8.
13 Tune lo itre qatre thupe ngöne lo hneijine ne lo itre pane Keresiano, hnene fe la itre qatre thupe enehila, angetre cilë mekene la huliwa ne cainöje hna amë panëne “la huliwa ne la wesi ula.” (Ite hu. 6:4) Tru la madrine i angatre la kola wange la aqane kökötre ne la huliwa ne cainöje ngöne la nöje i angatr, me e cailo fen. (Ite hu. 21:19, 20) Ame la ka tru koi angatr, tre, ene la troa huliwa catre göi troa haöthe la fene hnene la maca ka loi jëne la ixatua ne la Tusi Hmitrötr, me jëne la uati hmitrötr, ngo tha hnei angatre kö hna thele troa acili wathebo kowe la itre hlue i Akötresie. (E jë la Ite Huliwa 15:28.) Hane hi lai tulu ka lolo hna amë pe hnene la itre trejine celë thatraqane la nöjei trejine ngöne la itre ekalesia ne la isa nöje së.—Efe. 4:11, 12.
14, 15. (a) Nemene la aqane xatua së troa cainöjëne la maca ka loi e cailo fen? (b) Tune kaa fe epun, nemene fe la hnei epuni hna kuca matre troa hane sajuëne la huliwa ne cainöj?
14 Ala nyimu la itre trejine ka huliwa e nöjei drai troa hnëkëne la itre itus, me itre icasikeu, me itre asabele. Ame la ketre ceitun, tre, ene la itre thauzane lao trejine ka saen, nge ka huliwa catre göi troa ujëne la itre itus ngöne la 600 lao qene hlapa nge hetre munën. Ame hë la thangane lai, ijije fe hë kowe la itre atr ka nyimutre troa atrepengöne “la ite huliwa ka mene i Akötesie” ngöne la isa qene hlapa i angatr. (Ite hu. 2:7-11) Itre trejine thöth, trahmanyi me jajinyi a huliwa catre troa kuca la itre itusi ngöne la itre masine ka fejane me cane la itre itus. E thupene hë, iupi fë pi hë la itre itusi cili kowe la itre ekalesia asë, goi kapa fe hnene lo itre götrane nöje gaa nanyi catr.
15 Ame fe ngöne la nöje së, nyimu huliwa hna kuca hnene la itre xa trejine nyine xatua së matre catre jë së cainöjëne la maca ka loi. Drei la ketre ceitun, nyimu thauzane lao trejine ka saene göi troa xupe la itre Uma Ne Baselaia ka hnyipixe, me itre Uma Ne Asabele. Itre xane fe a xatuane lo itre hna lepe hnene la itre hulö, tune la wene maine sa, maine di, nge itre xane a xatuane la itre hna tithe hnei mec. Itre xane a hnëkëne la itre huliwa ne asabele, nge itre xan a hamë ini kowe la itre trejine trene hnëqa ngöne la itre ekalesia. Nemene la kepine matre kuca jë la itre huliwa cili? Ame la aliene tre, kola xatua së troa cainöjëne la maca ka loi, nge matre tro sa kökötre ngöne la nyipici, me troa xatuane la itre atr ka nyimutre matre itre hlue i Iehova jë fe angatr. Hane hi lai aqane amë panëne hnene la götrane gaa mama ne la organizasio i Iehova la nöjei ewekë ka tru aliene catre kö!
XÖTRETHENGE JË LA TULU HNA HAMËNE HNENE LA ORGANIZASIO I IEHOVA
16. Nemene la itre ithuemacanyi nyine tro epuni a thele thatraqane la hmi ne la lapa maine thatraqane la isa ini tusi së?
16 Hne së kö hna majemine xomi ijine troa lapa mekune la itre hna kuca koi së hnene la organizasio i Iehova? Atreine hi tro sa thele troa atrepengöne la organizasio i Iehova matre nyine ce ithanatane ngöne lo easa hmi ne la hnepe lapa me wange pena ngöne la easa isa ini Tus, nge loi e tro fe sa thele troa trotrohnine hnyawa la aliene la itre ini cili. Drei la ketre ceitun, tru la madrine së la easa inine lo itre hna meköle goeëne hnei Isaia, me Ezekiela, me Daniela, me Ioane. Hnene fe la itus Les Témoins de Jéhovah : Prédicateurs du Royaume de Dieu me itre xa itusi ju kö, maine itre DVD hna hamë së la itre ithuemacanyi ka nyimutre ka qaja la organizasio i Akötresie.
17, 18. (a) Nemene la aqane xatua epuni hnene la taane mekune celë? (b) Nemene la itre mekune nyine tro sa isa sipu hnyingë së kö?
17 Ka nyipi ewekë tro sa mekune catrëne la aqane huliwane Iehova la organizasio i Nyidrë göi troa sajuëne la huliwa ne cainöj. Cememine la organizasio ka lolo celë, epi hane fe së amë panëne la nöjei ewekë ka tru aliene catre kö. Ce mekuna së hi memine la qaja hnei Paulo la kola hape: “Hetenyi hë huni la huliwa celë, nge hna hnimi hun, celë hi mate tha kucakuca kö hun.” (2 Kor. 4:1) Hnei angeice fe hna ithuecatre kowe la itre trejine me hape: “The kucakuca kö shë ngöne la huliwa ka loi ; ke tro ha sha menuëne ngöne la nyipi ijin, e tha kucakuca kö shë.”—Gal. 6:9.
18 Tune kaa fe epuni me hnepe lapa i epun, hetre ewekë kö nyine tro epuni a saze göi troa amë panëne la nöjei ewekë ka tru aliene catre kö ngöne la nöjei drai ne la mele i epun? Ijije fe kö tro epuni a melëne hi la ka ijije matre tru hnei ijine tro epuni a cainöje trootro? Ame ngöne la taane mekune ka troa xulu, tro sa ce wange la faifi lao ewekë nyine xatua së troa xötrethenge la tulu ne la organizasio i Iehova matre tro pala hi së a catre huliwa koi Akötresie.
[Thying]
