1, 2. Nĩ ũrathi ũrĩkũ wĩgiĩ matukũ ma kũrigĩrĩria arutwo a Jesu mangĩkorũo nĩ mendaga mũno kũmenya ũhoro waguo, na nĩkĩ?

JESU aakoretwo era arutwo ake atĩ hekarũ nĩ ĩngĩkanangwo. Ũhoro ũcio nĩ wamakirie Petero, Jakubu, Johana, na Andarea. (Mar. 13:1-4) Nĩ ũndũ ũcio, rĩrĩa maarĩ oiki hamwe na Jesu makĩmũũria ũũ: “Twĩre, rĩrĩa maũndũ macio magakinya nĩ rĩ? O na kĩmenyithia kĩa rĩrĩa ũgoka, o na gĩa ithirĩro rĩa mahinda maya, nĩ kĩrĩkũ?” (Mat. 24:1-3) Jesu akĩambĩrĩria kũmeera ũrĩa gũgakorũo kũhaana, kana maũndũ mangĩgekĩka na marehe ũgarũrũku mũnene ũtũũro-inĩ na monanie matukũ ma kũrigĩrĩria ma mũtabarĩre wa Shaitani. No kũhoteke harĩ ũmwe wa maũndũ macio mendaga kũmenya mũno. Thutha wa kũgweta maũndũ ma kũmakania ta mbaara, ng’aragu, na kwongerereka kwa uuni watho, Jesu nĩ ameerire atĩ harĩ na ũndũ mwega ũngĩkonania matukũ ma kũrigĩrĩria. Oigire ũũ: “Naguo Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe; na hĩndĩ ĩo nĩrĩo ithirĩro rĩgakinya.”—Mat. 24:7-14.

² Arutwo a Jesu nĩ maakoretwo makĩhunjia ũhoro ũrĩa mwega wa Ũthamaki hamwe na Kristo. (Luk. 8:1; 9:1, 2) No gũkorũo nĩ maaririkanire ũrĩa oigĩte atĩ: “Magetha nĩ maingĩ, no aruti wĩra nĩ anyinyi: nĩ ũndũ ũcio thaithai Mwathani mwene magetha atĩ atũme aruti wĩra mathiĩ magetha-inĩ make.” (Luk. 10:2) No mangĩahotire atĩa kũhunjia “thĩ yothe” na ‘marute ũira kũrĩ ndũrĩrĩ ciothe’? Aruti a wĩra mangĩoimire kũ? Na arĩ korũo nĩ mangĩahotire kũmenya ũhoro wa ihinda rĩũkĩte hĩndĩ ĩyo maarĩ hamwe na Jesu! Nĩ mangĩagegire kuona kũhinga kwa ũrathi wa ciugo icio nini tũthomaga rĩu thĩinĩ wa Mathayo 24:14.

3. Rĩandĩko rĩa Luka 21:34 rĩrahinga atĩa ũmũthĩ, na nĩ ciũria irĩkũ tũngĩĩyũria?

 ³ Tũratũũra ihinda-inĩ rĩrĩa ũrathi ũcio wa Jesu ũrahinga. Andũ milioni nyingĩ nĩ marahunjia ũhoro ũrĩa mwega wa Ũthamaki thĩ yothe. (Isa. 60:22) No Jesu nĩ onanirie atĩ nĩ ũngĩgakorũo ũrĩ ũndũ mũritũ harĩ amwe kũiga wĩra wa kũhunjia mbere ũtũũro-inĩ wao. Ngoro ciao ingĩgakorũo “ititikithĩtio” maũndũ mangĩ, kwoguo mahĩngĩcĩke. (Thoma Luka 21:34.) O na ithuĩ nĩ tũreyonera kũhinga gwa ciugo icio. Amwe gatagatĩ-inĩ ka andũ a Ngai nĩ maraga gũkũũrana maũndũ marĩa magĩrĩire kũrĩ marĩa mangĩ. Ũndũ ũcio nĩ wonekaga kũgerera matua mao megiĩ wĩra, gĩthomo, gwetha indo cia kĩĩmwĩrĩ, o hamwe na mahinda marĩa mahũthagĩra mathako-inĩ na maũndũ ma gwĩkenia. Angĩ nao nĩ morĩtwo nĩ hinya nĩ ũndũ wa hatĩka na mĩtangĩko ya ũtũũro. Ta wĩyũrie ũũ: ‘Hihi niĩ haana atĩa? Hihi nĩ ndĩraiga wendi wa Ngai mbere ũtũũro-inĩ wakwa?’

4. (a) Paulo aahoire ũndũ ũrĩkũ nĩ ũndũ wa Akristiano thĩinĩ wa Filipi, na nĩkĩ? (b) Gĩcunjĩ-inĩ gĩkĩ na kĩrĩa kĩrũmĩrĩire tũkwarĩrĩria ũndũ ũrĩkũ, na muoroto nĩ ũrĩkũ?

⁴ Akristiano a karine ya mbere no mũhaka mangĩerutanĩirie mũno nĩguo mahote kũiga maũndũ ma kĩĩroho mbere. Mũtũmwo Paulo nĩ onire arĩ wega kũhoya atĩ arĩa maaikaraga Filipi ‘mahotage gũkũũrana maũndũ marĩa maagĩrĩire kũrĩ marĩa mangĩ.’ (Thoma Afilipi 1:9-11.) O ta mũtũmwo Paulo, andũ aingĩ nĩ ‘maakĩragĩrĩria kũũmĩrĩria kwaria Ũhoro wa Ngai matarĩ na guoya.’ (Afil. 1:12-14) O tao, aingĩ aitũ ũmũthĩ nĩ mahunjagia Kiugo kĩa Ngai marĩ na ũmĩrĩru. O na kũrĩ ũguo, gwĩcũrania maũndũ marĩa ithondeka rĩa Jehova rĩrahingia ũmũthĩ-rĩ, hihi no gũtũtethie kũiga wĩra ũyũ wa bata wa kũhunjia mbere makĩria ũtũũro-inĩ witũ? Ĩĩ no gũtũteithie! Gĩcunjĩ-inĩ gĩkĩ, nĩ tũkwarĩrĩria mĩbango ĩrĩa Jehova ekĩte nĩguo atigĩrĩre atĩ rĩandĩko rĩa Mathayo 24:14 nĩ rĩahinga. Muoroto wa ithondeka rĩake hihi nĩ ũrĩkũ, na kũũmenya kũngĩtũtindĩka gwĩka atĩa hamwe na famĩlĩ citũ? Thĩinĩ wa gĩcunjĩ kĩrĩa kĩrũmĩrĩire, nĩ tũkaarĩrĩria kĩrĩa kĩngĩtũteithia gũkirĩrĩria na gũtwaranaga na ithondeka rĩa Jehova.

5, 6. (a) Nĩ kĩĩ gĩatũmire Jehova aheane cioneki ciĩgiĩ ithondeka rĩake kũrĩa igũrũ? (b) Nĩ maũndũ marĩkũ Ezekieli onire thĩinĩ wa kĩoneki?

⁵ Kũrĩ maũndũ maingĩ Jehova ataandĩkithirie thĩinĩ wa Kiugo gĩake. Kwa ngerekano-rĩ, ndaandĩkithirie ũhoro wa ũrĩa tombo kana igũrũ na thĩ irutaga wĩra, o na gũtuĩka ũhoro ta ũcio ũngĩarĩ wa gũcanjamũra mũno! Ithenya rĩa ũguo-rĩ, Jehova aaheanire ũhoro ũrĩa tũrabatara nĩguo tũtaũkĩrũo nĩ mĩoroto yake na tũhote kũmwathĩkĩra. (2 Tim. 3:16, 17) Ĩ nĩ wega atĩa, kuona atĩ Bibilia nĩ ĩtũheaga ũhoro mũnini wĩgiĩ ithondeka rĩake kũrĩa igũrũ! Nĩ tũkenagĩra mũno gũthoma ũrĩa mĩbango ya Jehova kũrĩa igũrũ ĩtaarĩirio nĩ Isaia, Ezekieli, na Danieli o hamwe na Johana thĩinĩ wa Kũguũrĩrio. (Isa. 6:1-4; Ezek. 1:4-14, 22-24; Dan. 7:9-14; Kũg. 4:1-11) Jehova nĩ ta aaguũririe gĩtambaya agĩtũhe mweke tũcũthĩrĩrie kũrĩa igũrũ. Hihi aaheanire ũhoro ũcio nĩkĩ?

⁶ Jehova eendaga tũtikanariganĩrũo atĩ tũrĩ thĩinĩ wa ithondeka rĩa igũrũ na thĩ. Kũrĩ maũndũ maingĩ marekĩka ma kũnyita mbaru mĩoroto ya Jehova marĩa tũtangĩhota kuona. Kwa ngerekano, Ezekieli onire ithondeka rĩa Jehova kũrĩa igũrũ  rĩhaananĩtio na ngari nene. Ngari ĩyo nĩ yahotaga gũthiĩ ihenya mũno na kwĩgarũra o rĩmwe. (Ezek. 1:15-21) O yathiũrũrũkia magũrũ, ngari ĩyo yakoragwo ĩthiĩte kũndũ kũnene mũno. Ezekieli ningĩ nĩ aahotire kuona ũrĩa Wamĩtwarithagia. Oigire ũũ: “Ngĩcoka ngĩona ta gũtunĩhĩte ta [“gĩcango,” NW] o ta arĩ kũgĩa kũgĩĩte na mwaki . . . Naguo ũtheri ũcio ũkonagwo ta arĩ mũhianĩre wa ũrĩa Jehova arĩ riri.” (Ezek. 1:25-28) No mũhaka Ezekieli akorũo nĩ aagegire mũno ona kĩoneki kĩu! Onire Jehova agĩtwarithia ithondeka rĩake, akĩrĩtongoria kũgerera roho wake mũtheru. Githĩ ũhoro ũcio wĩgiĩ mũthiĩre wa ithondeka rĩa Jehova kũrĩa igũrũ ti wa kũgegania mũno!

7. Kĩoneki kĩrĩa Danieli onirio gĩkĩraga wĩtĩkio witũ hinya atĩa?

⁷ Danieli o nake nĩ onire maũndũ maingĩ mekagĩra wĩtĩkio witũ hinya. Nĩ onire Jehova, “Ũrĩa-ũtũire-ho-kuuma-o-tene” aikarĩire gĩtĩ kĩa ũthamaki kĩarĩ na magũrũ, kĩrigicĩirio nĩ nĩnĩmbĩ cia mwaki. (Dan. 7:9) Jehova eendaga Danieli one atĩ ithondeka rĩake nĩ rĩrathiĩ na mbere rĩkĩhingagia muoroto Wake. Danieli ningĩ nĩ onire “mũndũ wahaanaga ta mũrũ wa mũndũ,” nĩwe Jesu, akĩheo ũrũgamĩrĩri wa ithondeka rĩa Jehova gũkũ thĩ. Wathani mũkinyanĩru wa Kristo ti wa o mĩaka mĩnini tu. Ithenya rĩa ũguo, nĩ wa “mĩndĩ na mĩndĩ, na ndũgathira o rĩ, o rĩ. Naguo ũthamaki ũcio wake ndũkonũhĩka o na atĩa.” (Dan. 7:13, 14) Ũndũ ũcio nĩ ũtũmaga twĩhoke Jehova na maũndũ marĩa arahingia. Na tondũ Jesu ahetwo wathani nĩ Jehova, kĩoneki kĩu ningĩ nĩ gĩtũmaga tũmwĩhoke arĩ we Mũtongoria witũ.

8. Cioneki iria Jehova onirie Ezekieli na Isaia ciamahutirie atĩa, na ciagĩrĩire gũtuma o na ithuĩ twĩke atĩa?

 ⁸ Hihi cioneki icio ciĩgiĩ ithondeka rĩa Jehova kũrĩa igũrũ ciagĩrĩirũo gũtũtindĩka twĩke atĩa? O ta Ezekieli, nĩ tũkenagĩra mũno maũndũ marĩa Jehova arahingia. (Ezek. 1:28) Gwĩcũrania igũrũ rĩgiĩ ithondeka rĩa Jehova no gũtũme tuoe ikinya o ta ũrĩa Isaia eekire. Rĩrĩa mweke weyumĩririe wa kwĩra andũ igũrũ rĩgiĩ maũndũ marĩa Jehova arahingia, Isaia eekire ũguo atekũrĩa marĩĩgu. (Thoma Isaia 6:5, 8.) Isaia aarĩ na ma atĩ Jehova e hamwe nake, nĩ angĩatooririe moritũ o mothe angĩacemanirie namo. O ta Isaia, cioneki icio itũmaga twende kũnyita mbaru ithondeka rĩa Jehova na njĩra ya kuongerera kĩyo gitũ ũtungata-inĩ wake. Nĩ ũndũ wa gwĩkĩra ngoro mũno kũmenya atĩ tũrĩ thĩinĩ wa ithondeka rĩkoragwo hĩndĩ ciothe rĩgĩĩka wendi wa Jehova!

9, 10. Ithondeka rĩa Jehova gũkũ thĩ rĩbataranagia nĩkĩ?

⁹ Jehova kũgerera Mũrũwe, nĩ aathondekire kũgĩe na gĩcunjĩ kĩa ithondeka gũkũ thĩ kĩrĩa gĩtwaranaga na ithondeka rĩake kũrĩa igũrũ. Hihi gũkũ thĩ kũbataraga ithondeka rĩa kũhingia wĩra ũrĩa ũtaarĩirio thĩinĩ wa Mathayo 24:14 nĩkĩ? Ta wĩcirie itũmi ici ithatũ.

¹⁰ Mbere, Jesu oigĩte atĩ arutwo ake mangĩahunjirie “kinya ituri ciothe cia thĩ.” (Atũm. 1:8) Kerĩ, nĩ kũngĩabataranirie mĩbango ya kũhe irio cia kĩĩroho na kũrũmbũiya arĩa mangĩgakorũo makĩruta wĩra ũcio. (Joh. 21:15-17) Gatatũ, nĩ mangĩabatarire gũcemanagia nĩguo mathathaiye Jehova na marutwo ũrĩa mangĩruta wĩra ũcio. (Ahib. 10:24, 25) Maũndũ macio matingĩahingirio hatarĩ na mĩbango. Nĩguo arũmĩrĩri a Kristo magaacĩre wĩra-inĩ ũcio, nĩ maabataraga mĩbango mĩega.

11. Tũngĩnyita mbaru atĩa mĩbango ya ithondeka rĩa Jehova?

¹¹ Tũngĩnyita mbaru atĩa mĩbango ya ithondeka rĩa Jehova? Ũndũ ũmwe wa bata nĩ kwĩhokaga hĩndĩ ciothe arĩa Jehova na Jesu marahũthĩra gũtũtongoria wĩra-inĩ witũ wa kũhunjia. Kũrĩ maũndũ maingĩ thĩinĩ wa thĩ ĩno ariũ acio a Ithe witũ mangĩka magerie kũniinĩra andũ mathĩna. Ĩndĩ-rĩ, muoroto wa ithondeka rĩa Jehova gũkũ thĩ ũkoretwo ũrĩ ũrĩkũ?

12, 13. Athuri Akristiano mahingagia mawĩra marĩa mehokeirũo atĩa, na ũndũ ũcio ũgwĩkagĩra ngoro nĩkĩ?

¹² Athuri a kĩũngano marĩ na ũmenyeru thĩ yothe nĩ maamũragwo nĩguo marũgamĩrĩre na matongoragie wĩra wa kũhunjia Ũthamaki mabũrũri-inĩ marĩa matungataga. Rĩrĩa maratua matua, nĩ macaragia ũtongoria wa Kiugo kĩa Ngai magagĩtua ‘tawa wa kũmũrĩkĩra makinya mao, na ũtheri wa kũmonia njĩra,’ na makahoya Jehova na kĩyo amateithie.—Thab. 119:105; Mat. 7:7, 8.

¹³ O ta arĩa maatongoragia karine-inĩ ya mbere, athuri Akristiano arĩa marũgamagĩrĩra wĩra wa kũhunjia ũmũthĩ makoragwo merutĩire “kũheana ũhoro.” (Atũm. 6:4) Nĩ makenagĩra mũno kuona ũrĩa wĩra wa kũhunjia ũhoro ũrĩa mwega ũrathiĩ na mbere gĩcigo-inĩ kĩao na thĩinĩ wa thĩ yothe. (Atũm. 21:19, 20) Matigagĩra andũ mawatho na mĩtaratara mĩingĩ. Ithenya rĩa ũguo, mehokaga ũtongoria wa Maandĩko na wa roho mũtheru rĩrĩa marabanga maũndũ marĩa marabatarania nĩguo  wĩra wa kũhunjia ũthiĩ na mbere. (Thoma Atũmwo 15:28.) Rĩrĩa meka ũguo, ariũ acio a Ithe witũ nĩ maigagĩra andũ othe ciũngano-inĩ kĩonereria kĩega.—Ef. 4:11, 12.

14, 15. (a) Nĩ wĩra ũrĩkũ ũrarutwo gũteithĩrĩria wĩra wa kũhunjia thĩ yothe? (b) Hihi wee wonaga atĩa mweke ũrĩa ũkoragwo naguo wa gũteithĩrĩria wĩra wa kũhunjia Ũthamaki?

¹⁴ Kũrĩ wĩra mũingĩ mũno ũrutagwo kũhaarĩria irio cia kĩĩroho thĩinĩ wa mabuku, mĩcemanio na irũrũngano. Makiri ma erutĩri marutaga wĩra mũingĩ gũtaũra irio icio cia kĩĩroho na thiomi ta 600 nĩgetha andũ aingĩ o ũrĩa kwahoteka merute ũhoro wĩgiĩ “maũndũ marĩa manene mekĩtwo nĩ Ngai” na rũthiomi rwao. (Atũm. 2:7-11) Aarĩ na ariũ a Ithe witũ ethĩ nĩ marutaga wĩra mũingĩ makĩhaarĩria mabuku macio makĩhũthĩra macini cia gũcaba na kũnyitithania maratathi. Mabuku macio macokaga magatwarĩrũo ciũngano nginya iria irĩ kũndũ kũraihu mũno thĩinĩ wa thĩ.

¹⁵ Kũrĩ maũndũ maingĩ mekagwo matũteithagia kũiga mbere wĩra wa kũhunjia ciũngano-inĩ citũ. Kwa ngerekano, erutĩri aingĩ nĩ mateithagĩrĩria gwaka Nyũmba cia Ũthamaki na cia Igomano, gũteithia arĩa magũmĩirũo nĩ icanjama cia ndũire kana arĩa marabatara ũteithio wa hi na hi wa ũrigitani, kũbanga igomano na irũrũngano, gũthomithia cukuru cia Gĩkristiano, na maũndũ mangĩ maingĩ. Muoroto wa wĩra ũcio wothe ũkoragwo ũrĩ ũrĩkũ? Gũtũteithia kũhunjia ũhoro ũrĩa mwega, kũrũmbũiya mabataro maitũ ma kĩĩroho, na gũteithia andũ aingĩ maingĩre ũthathaiya-inĩ wa ma. Hihi ithondeka rĩa Jehova gũkũ thĩ nĩ rĩkoretwo rĩgĩthingata maũndũ marĩa magĩrĩire kũrĩ marĩa mangĩ? Hatarĩ nganja, nĩguo rĩkoretwo rĩgĩĩka!

16. Nĩ maũndũ marĩkũ ũngĩthuthuria hĩndĩ ya wĩruti wa waku kana ya ũthathaiya wa famĩlĩ?

¹⁶ Hihi rĩmwe nĩ woyaga kahinda gwĩcũrania maũndũ marĩa ithondeka rĩa Jehova rĩreka? Amwe nĩ mahũthagĩra ihinda hĩndĩ ya ũthathaiya wa famĩlĩ kana wa mũndũ kĩũmbe gwĩka ũthuthuria na gwĩcũrania maũndũ macio. Gũthuthuria cioneki iria Isaia, Ezekieli, Danieli, na Johana moonirio no gũkorũo kũrĩ gwa gũcanjamũra mũno. Ibuku rĩa Mashahidi wa Yehova—Wapiga-Mbiu wa Ufalme wa Mungu na mabuku mangĩ kana DVD iria cionekaga na rũthiomi rwanyu ikoragwo na maũndũ maingĩ tũngĩĩruta megiĩ ithondeka.

17, 18. (a) Wagunĩka atĩa kuumana na maũndũ marĩa twarĩrĩria? (b) Nĩ ciũria irĩkũ twagĩrĩirũo kwĩyũria?

¹⁷ Nĩ wega twĩcũranagie maũndũ marĩa Jehova arahingia kũgerera ithondeka rĩake. Tũkĩnyitanĩra na ithondeka rĩrĩ rĩa magegania, rekei tũtue itua rĩa gũthiĩ na mbere gũthingata maũndũ marĩa ma bata kũrĩ marĩa mangĩ. Gwĩka ũguo nĩ kũrĩtwĩkĩraga hinya kwĩhotora o ta Paulo, ũrĩa waandĩkire ũũ: “Kuona atĩ tũrĩ na ũtungati ũcio nĩ ũndũ wa ũrĩa twaiguĩrĩirũo tha, nĩkĩo tũtoragwo nĩ hinya ngoro.” (2 Kor. 4:1) Ningĩ nĩ eekĩrire Akristiano arĩa angĩ ngoro akĩmera: “Tũtikananogio nĩ gwĩkaga wega: nĩ ũndũ twaaga kũũrũo nĩ hinya, nĩtũkagetha hĩndĩ ĩrĩa yerekereire yakinya.”—Gal. 6:9.

¹⁸ Hihi nĩ harĩ mogarũrũku tũrabatara gwĩka tũrĩ mũndũ kĩũmbe kana tũrĩ famĩlĩ nĩguo tũkũranage maũndũ marĩa magĩrĩire kũrĩ marĩa mangĩ mĩhang’o-inĩ itũ ya o mũthenya? Hihi no tũhũthie mũtũũrĩre witũ kana maũndũ marĩa mangĩtũhĩngĩca nĩguo tũige mbere wĩra ũrĩa wa bata makĩria wa kũhunjia? Gĩcunjĩ-inĩ kĩrĩa kĩrũmĩrĩire, nĩ tũkaarĩrĩria maũndũ matano marĩa marĩtũteithagia gũtwarana na ithondeka rĩa Jehova.