ចូរ«ពិចារណាឲ្យដឹងប្រាកដថាការអ្វី ដែលសំខាន់ជាង»
«ពិចារណាឲ្យដឹងប្រាកដថាការអ្វីដែលសំខាន់ជាង»។—ភី. ១:១០
១, ២. តើទំនាយអ្វីស្ដីអំពីគ្រាចុងក្រោយបង្អស់ដែលច្បាស់ជាបានធ្វើឲ្យអ្នកកាន់តាមលោកយេស៊ូចង់ដឹង ហើយហេតុអ្វី?
អ្វីដែលលោកយេស៊ូទើបតែមានប្រសាសន៍ស្ដីអំពីការបំផ្លាញវិហារធ្វើឲ្យពេត្រុស យ៉ាកុប យ៉ូហាន និងអនទ្រេព្រួយចិត្ដ។ (ម៉ាក. ១៣:១-៤) ទីបំផុតពួកគេនៅជាមួយលោកម្ចាស់របស់ពួកគេដោយឡែកពីអ្នកឯទៀត ដូច្នេះពួកគេបានសួរលោកថា៖ «សូមប្រាប់យើង តើការទាំងនេះនឹងកើតឡើងនៅពេលណា? ហើយតើអ្វីជាសញ្ញាសម្គាល់ដែលបញ្ជាក់វត្ដមានរបស់លោក និងគ្រាចុងបញ្ចប់នៃរបៀបរបបពិភពលោក?»។ (ម៉ាថ. ២៤:១-៣) ពេលលោកយេស៊ូតបឆ្លើយនឹងសំណួររបស់ពួកគេ លោកមិនត្រឹមតែបានប្រាប់ពួកគេអំពីអ្វីដែលនឹងកើតឡើងមុនការបំផ្លាញក្រុងយេរូសាឡិមប៉ុណ្ណោះទេ ប៉ុន្ដែលោកក៏ប្រាប់ដែរអំពីអ្វីដែលនឹងកើតឡើងនៅគ្រាចុងក្រោយបង្អស់នៃពិភពលោករបស់សាថាន។ លោកយេស៊ូបានទាយថានឹងមានព្រឹត្ដិការណ៍អាក្រក់ដូចជា សង្គ្រាម ការអត់ឃ្លាន និងអំពើអាក្រក់ជួជាតិ។ ប៉ុន្ដែលោកយេស៊ូក៏បានទាយអំពីព្រឹត្ដិការណ៍ល្អដែរ។ លោកបានមានប្រសាសន៍ថា៖ «ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ រួចទីបញ្ចប់នឹងមកដល់»។—ម៉ាថ. ២៤:៧-១៤
២ អ្នកកាន់តាមលោកយេស៊ូមានអំណរក្នុងការផ្សព្វផ្សាយដំណឹងល្អអំពីរាជាណាចក្រព្រះជាមួយនឹងលោក។ (លូក. ៨:១; ៩:១, ២) ពួកគេប្រហែលជានឹកចាំនូវពាក្យរបស់លោកយេស៊ូដែលថា៖ «ផលដំណាំដែលត្រូវប្រមូលមានច្រើនមែន តែកម្មករមានតិចទេ។ ដូច្នេះ ចូរអង្វរសុំម្ចាស់នៃកិច្ចការប្រមូលផលដំណាំ ចាត់កម្មករថែមទៀតឲ្យចូលរួមកិច្ចការរបស់លោក»។ (លូក. ១០:២) ប៉ុន្ដែតើពួកគេនឹងផ្សព្វផ្សាយ«នៅគ្រប់ទីអាស្រ័យនៅផែនដី» និងដល់«ប្រជាជាតិទាំងឡាយ»យ៉ាងដូចម្ដេច? តើកម្មករនឹងមកពីកន្លែងណា? អ្នកកាន់តាមលោកយេស៊ូមិនអាចនឹកស្មានដល់អំពីរបៀបដ៏អស្ចារ្យដែលពាក្យទាំងនេះនៅម៉ាថាយ ២៤:១៤បានសម្រេចនោះទេ!
៣. តើពាក្យនៅលូកា ២១:៣៤កំពុងសម្រេចយ៉ាងណានាពេលសព្វថ្ងៃនេះ ហើយតើយើងគួរសួរខ្លួនយើងនូវសំណួរអ្វីខ្លះ?
៣ យើងកំពុងរស់នៅគ្រានៃការសម្រេចបទទំនាយរបស់លោកយេស៊ូ។ មនុស្សរាប់លាននាក់បានចូលរួមផ្សព្វផ្សាយដំណឹងល្អអំពីរាជាណាចក្រព្រះនៅពេញផែនដីទាំងមូល។ (អេ. ៦០:២២) ប៉ុន្ដែលោកយេស៊ូបានបញ្ជាក់ថា គ្រិស្ដសាសនិកខ្លះនឹងពិបាកផ្ចង់អារម្មណ៍ទៅលើកិច្ចផ្សព្វផ្សាយនៅគ្រាចុងក្រោយបង្អស់នេះ។ អ្វីផ្សេងៗនឹងបំបែរអារម្មណ៍ ហើយ«ពង្វក់ចិត្ដ»ពួកគេ។ (សូមអាន លូកា ២១:៣៤) យើងក៏កំពុងឃើញការសម្រេចនៃទំនាយទាំងនោះដែរ។ រាស្ដ្រខ្លះរបស់ព្រះបានត្រូវបំបែរអារម្មណ៍។ យើងប្រហែលជាឃើញអំពីរឿងនេះពេលពួកគេសម្រេចចិត្ដជ្រើសរើសការងារ ការរៀននៅសាកលវិទ្យាល័យ និងការប្រមូលទ្រព្យសម្បត្ដិ ព្រមទាំងពេលវេលាដែលពួកគេចំណាយក្នុងការលេងកីឡានិងការកម្សាន្ដ។ អ្នកឯទៀតអស់កម្លាំងដោយសារការបង្ខិតបង្ខំនិងកង្វល់ក្នុងជីវិតប្រចាំថ្ងៃ។ សូមសួរខ្លួនអ្នកថា ‹តើខ្ញុំកំពុងសម្រេចចិត្ដបែបណា? តើការសម្រេចចិត្ដរបស់ខ្ញុំបង្ហាញថាខ្ញុំផ្ដោតអារម្មណ៍ទៅលើអ្វីក្នុងជីវិត?›។
៤. (ក) តើប៉ូលបានអធិដ្ឋានអំពីអ្វីស្ដីអំពីគ្រិស្ដសាសនិកនៅក្រុងភីលីព ហើយហេតុអ្វី? (ខ) តើយើងនឹងពិចារណាអ្វីក្នុងអត្ថបទនេះនិងក្នុងអត្ថបទបន្ទាប់ ហើយតើអត្ថបទទាំងនេះមានគោលដៅអ្វី?
៤ គ្រិស្ដសាសនិកដែលរស់នៅសតវត្សរ៍ទី១បានខំប្រឹងយ៉ាងខ្លាំងដើម្បីបន្ដចាត់ទុកការគោរពប្រណិប័តន៍ព្រះជាអាទិភាពក្នុងជីវិត។ នេះជាមូលហេតុដែលសាវ័កប៉ូលអធិដ្ឋានសុំឲ្យបងប្អូននៅក្រុងភីលីពអាច«ពិចារណាឲ្យដឹងប្រាកដថាការអ្វីដែលសំខាន់ជាង»។ (សូមអាន ភីលីព ១:៩-១១) ដូចសាវ័កប៉ូល បងប្អូនភាគច្រើននៅសម័យនោះ«មានចិត្ដក្លាហានជាងមុន ដើម្បីប្រកាសបណ្ដាំរបស់ព្រះដោយចិត្ដអង់អាច»។ (ភី. ១:១២-១៤) ស្រដៀងគ្នាដែរ បងប្អូនភាគច្រើនសព្វថ្ងៃនេះផ្សព្វផ្សាយបណ្ដាំរបស់ព្រះដោយចិត្ដក្លាហាន។ ប៉ុន្ដែយើងនឹងទទួលការលើកទឹកចិត្ដពេលពិភាក្សាអត្ថបទនេះ អំពីរបៀបដែលព្រះយេហូវ៉ាប្រើអង្គការរបស់លោកនៅសព្វថ្ងៃនេះដើម្បីធ្វើឲ្យពាក្យរបស់លោកនៅម៉ាថាយ ២៤:១៤បានសម្រេច។ នេះនឹងជួយយើងឲ្យមានចិត្ដខ្នះខ្នែងថែមទៀតក្នុងកិច្ចផ្សព្វផ្សាយ។ តើអង្គការរបស់លោកផ្ដោតអារម្មណ៍ទៅលើអ្វី ហើយតើតាមរបៀបណាការដឹងអំពីរឿងនេះអាចជំរុញចិត្ដយើងនិងក្រុមគ្រួសាររបស់យើង? នៅអត្ថបទបន្ទាប់ យើងនឹងពិចារណាអំពីអ្វីដែលនឹងជួយយើងឲ្យស៊ូទ្រាំ ហើយបន្ដតាមទាន់អង្គការរបស់ព្រះយេហូវ៉ា។
ផ្នែកនៅស្ថានសួគ៌នៃអង្គការរបស់ព្រះកំពុងឈានទៅមុខ
៥, ៦. (ក) ហេតុអ្វីព្រះបើកឲ្យឃើញក្នុងគំនិតអំពីផ្នែកនៅស្ថានសួគ៌នៃអង្គការរបស់លោក? (ខ) តើអេសេគាលបានឃើញអ្វីក្នុងគំនិត?
៥ មានអ្វីៗជាច្រើនដែលព្រះយេហូវ៉ាសម្រេចចិត្ដមិនឲ្យគេកត់ទុកក្នុងបណ្ដាំរបស់លោក។ ជាឧទាហរណ៍ លោកមិនបានរៀបរាប់លម្អិតអំពីដំណើរការនៃខួរក្បាល ឬដំណើរការនៃសកលលោកឡើយ ទោះជាព័ត៌មានបែបនោះនឹងធ្វើឲ្យយើងចាប់អារម្មណ៍យ៉ាងខ្លាំងក៏ដោយ! ផ្ទុយទៅវិញ ព្រះយេហូវ៉ាបានផ្ដល់ព័ត៌មានដែលយើងត្រូវការ ដើម្បីយល់អំពីគោលបំណងរបស់លោក និងដើម្បីរស់នៅស្របតាមគោលបំណងនោះ។ (២ធី. ៣:១៦, ១៧) គួរឲ្យចាប់អារម្មណ៍មែនដែលគម្ពីរជួយយើងឲ្យដឹងអំពីផ្នែកដែលយើងមើលមិនឃើញនៃអង្គការរបស់ព្រះយេហូវ៉ា! យើងរំភើបចិត្ដពេលអានព័ត៌មានទាំងនេះក្នុងគម្ពីរនៅសៀវភៅអេសាយ អេសេគាល ដានីយ៉ែល និងការបើកបង្ហាញ។ (អេ. ៦:១-៤; អេស. ១:៤-១៤, ២២-២៤; ដាន. ៧:៩-១៤; បប. ៤:១-១១) នេះហាក់ដូចជាព្រះយេហូវ៉ាបានបើកវាំងននដើម្បីឲ្យយើងអាចឃើញស្ថានសួគ៌។ ហេតុអ្វីបានជាលោកបានផ្ដល់ព័ត៌មាននេះ?
៦ ព្រះយេហូវ៉ាមិនចង់ឲ្យយើងភ្លេចថាយើងរួមចំណែកក្នុងអង្គការមួយដែលគ្រប់គ្រងសកលលោក។ ផ្នែកដែលយើងមើលមិនឃើញនៃអង្គការរបស់ព្រះកំពុងខំប្រឹងប្រែងដើម្បីធ្វើតាមបំណងប្រាថ្នារបស់លោក។ ជាឧទាហរណ៍ អេសេគាលបានឃើញរទេះដ៏ធំមួយនៅស្ថានសួគ៌ដែលជាតំណាងផ្នែកដែលយើងមើលមិនឃើញនៃអង្គការរបស់ព្រះយេហូវ៉ា។ រទេះនេះអាចធ្វើដំណើរយ៉ាងរហ័ស ហើយអាចប្ដូរទិសបានមួយរំពេច។ (អេស. ១:១៥-២១) គាត់ ក៏បានឃើញអ្នកជិះរទេះនេះដែរ។ គាត់បាននិយាយថា៖ «ខ្ញុំក៏ឃើញពណ៌ដូចជាលង្ហិនខាត់យ៉ាងភ្លឺ ដែលមើលទៅដូចជាភ្លើង . . . នៅជុំវិញ . . . នេះជាគំរូពីភាពនៃសិរីល្អរបស់ព្រះយេហូវ៉ា»។ (អេស. ១:២៥-២៨) អេសេគាលច្បាស់ជាបាននឹកអស្ចារ្យក្នុងចិត្ដមែនដោយបានឃើញអ្វីទាំងនេះក្នុងគំនិត! គាត់បានឃើញព្រះយេហូវ៉ាគ្រប់គ្រងទាំងស្រុងលើអង្គការរបស់លោក ហើយបានដឹកនាំអង្គការនេះតាមរយៈសកម្មពលបរិសុទ្ធរបស់លោក។ រទេះដែលកំពុងធ្វើដំណើរក្នុងការបើកឲ្យឃើញក្នុងគំនិតនោះ គឺជាឧទាហរណ៍ដ៏អស្ចារ្យអំពីរបៀបដំណើរការនៃផ្នែកដែលយើងមើលមិនឃើញនៃអង្គការរបស់ព្រះយេហូវ៉ា!
៧. តើតាមរបៀបណា អ្វីដែលព្រះបានបើកបង្ហាញឲ្យដានីយ៉ែលឃើញក្នុងគំនិតនាំឲ្យយើងមានទំនុកចិត្ដ?
៧ ដានីយ៉ែលក៏បានមើលអ្វីដែលព្រះយេហូវ៉ាបានឲ្យគាត់ឃើញក្នុងគំនិតដែលពង្រឹងទំនុកចិត្ដយើង។ ព្រះយេហូវ៉ាបានឲ្យគាត់ឃើញលោកជា«ព្រះដ៏មានព្រះជន្មពីចាស់បុរាណ»អង្គុយលើបល្ល័ង្កមួយដែលសុទ្ធតែជាអណ្ដាតភ្លើង។ បល្ល័ង្កនោះគឺនៅលើកង់។ (ដាន. ៧:៩) ព្រះយេហូវ៉ាចង់ឲ្យដានីយ៉ែលឃើញថាអង្គការរបស់លោកកំពុងមានសកម្មភាព ហើយកំពុងសម្រេចគោលបំណងរបស់លោក។ ដានីយ៉ែលក៏បានឃើញ«១អង្គដូចជាមនុស្សជាតិ»ដែលជាលោកយេស៊ូ កំពុងត្រួតពិនិត្យផ្នែកនៅផែនដីនៃអង្គការរបស់ព្រះយេហូវ៉ា។ ការគ្រប់គ្រងដ៏ល្អឥតខ្ចោះរបស់គ្រិស្ដមិនមានតែមួយរយៈពេលខ្លីប៉ុណ្ណោះទេ។ ផ្ទុយទៅវិញការគ្រប់គ្រងនេះគឺ«ស្ថិតស្ថេរនៅអស់កល្ប ឥតដែលកន្លងបាត់ឡើយ ហើយរាជ្យរបស់ទ្រង់នឹងបំផ្លាញមិនបានផង»។ (ដាន. ៧:១៣, ១៤) យើងបានត្រូវជំរុញឲ្យទុកចិត្ដព្រះយេហូវ៉ានិងឲ្យទទួលស្គាល់អ្វីដែលលោកកំពុងសម្រេច។ ដោយសារលោកយេស៊ូបានទទួលអំណាចពីព្រះយេហូវ៉ា ការឃើញក្នុងគំនិតនេះក៏បានជំរុញយើងដែរឲ្យទុកចិត្ដលើលោកយេស៊ូដែលជាអ្នកដឹកនាំរបស់យើង។
៨. តើអ្វីដែលព្រះយេហូវ៉ាបានបើកបង្ហាញឲ្យអេសេគាល និងអេសាយឃើញមានឥទ្ធិពលយ៉ាងណាមកលើពួកគាត់ ហើយតើនេះគួរមានឥទ្ធិពលយ៉ាងណាមកលើយើង?
៨ តើអ្វីដែលព្រះយេហូវ៉ាបានបើកបង្ហាញអំពីផ្នែកដែលយើងមើលមិនឃើញនៃអង្គការរបស់លោក គួរមានឥទ្ធិពលយ៉ាងណាមកលើយើង? ពេលពិចារណាអំពីអ្វីដែលព្រះយេហូវ៉ាកំពុងសម្រេច នោះយើងប្រាកដជាកោតស្ងើចហើយមានចិត្ដរាបទាបដូចអេសេគាល។ (អេស. ១:២៨) ការរំពឹងគិតអំពីអង្គការរបស់ព្រះយេហូវ៉ាអាចជំរុញយើងឲ្យមានចិត្ដខ្នះខ្នែងដូចអេសាយដែរ។ ពេលអេសាយមានឱកាសប្រាប់អ្នកឯទៀតអំពីអ្វីដែលលោកកំពុងធ្វើ គាត់បានឆ្លៀតឱកាសនោះដើម្បីធ្វើដូច្នេះដោយឥតស្ទាក់ស្ទើរ។ (សូមអាន អេសាយ ៦:៥, ៨) អេសាយមានទំនុកចិត្ដថា ដោយមានការគាំទ្រពីព្រះយេហូវ៉ា គាត់អាចយកឈ្នះការពិបាកទាំងអស់ដោយជោគជ័យ។ ស្រដៀងគ្នាដែរ ការឃើញយ៉ាងខ្លីនូវផ្នែកដែលយើងមើលមិនឃើញនៃអង្គការព្រះយេហូវ៉ាគួរធ្វើឲ្យយើងនឹកអស្ចារ្យក្នុងចិត្ដ ហើយជំរុញយើងឲ្យមានសកម្មភាព។ យើងពិតជាទទួលការលើកទឹកចិត្ដយ៉ាងខ្លាំងដោយដឹងថាយើងរួមចំណែកក្នុងអង្គការមួយដែលជាប់រវល់ជានិច្ចក្នុងការធ្វើតាមបំណងប្រាថ្នារបស់ព្រះយេហូវ៉ា!
ផ្នែកនៅផែនដីនៃអង្គការរបស់ព្រះ
៩, ១០. ហេតុអ្វីត្រូវមានផ្នែកដែលយើងមើលឃើញនៃអង្គការរបស់ព្រះយេហូវ៉ា?
៩ តាមរយៈបុត្ររបស់លោក ព្រះយេហូវ៉ាបានរៀបចំផ្នែកនៅផែនដីនៃអង្គការរបស់លោកដែលសហការជាមួយនឹងផ្នែកនៅស្ថានសួគ៌។ ការរៀបចំនេះគឺចាំបាច់ដើម្បីឲ្យកិច្ចការរបស់លោកដែលបានទាយទុកនៅម៉ាថាយ ២៤:១៤អាចសម្រេច។ ហេតុអ្វី? សូមពិចារណាអំពីមូលហេតុបីយ៉ាង។
១០ មូលហេតុទី១ លោកយេស៊ូបានមានប្រសាសន៍ថា អ្នកកាន់តាមលោកនឹងផ្សព្វផ្សាយ«រហូតដល់កន្លែងឆ្ងាយបំផុតនៅផែនដី»។ (សកម្ម. ១:៨) ទី២ ពួកអ្នកដែលនឹងបំពេញកិច្ចផ្សព្វផ្សាយនឹងត្រូវការការណែនាំ និងការលើកទឹកចិត្ដពីគម្ពីរ។ (យ៉ូន. ២១:១៥-១៧) ទី៣ ពួកគេនឹងត្រូវការកិច្ចប្រជុំដែលពួកគេអាចជួបជុំគ្នាដើម្បីគោរពប្រណិប័តន៍ព្រះយេហូវ៉ា ហើយរៀនរបៀបផ្សព្វផ្សាយ។ (ហេ. ១០:២៤, ២៥) គោលដៅទាំងនេះមិនអាចសម្រេចបានដោយចៃដន្យឡើយ។ ដើម្បីឲ្យអ្នកកាន់តាមគ្រិស្ដអាចទទួលបានជោគជ័យ កិច្ចការនេះតម្រូវឲ្យមានការរៀបចំយ៉ាងល្អ។
១១. តើយើងអាចបង្ហាញថាយើងគាំទ្រការរៀបចំរបស់អង្គការព្រះយេហូវ៉ាយ៉ាងដូចម្ដេច?
១១ តើយើងអាចបង្ហាញថាយើងគាំទ្រការរៀបចំរបស់អង្គការព្រះយេហូវ៉ាយ៉ាងដូចម្ដេច? របៀបដ៏សំខាន់មួយគឺការទុកចិត្ដជានិច្ចលើពួកបុរសដែលព្រះយេហូវ៉ានិងលោកយេស៊ូទុកចិត្ដថានឹងនាំមុខយើងក្នុងកិច្ចផ្សព្វផ្សាយ។ បងប្រុសៗទាំងនេះអាចប្រើពេលវេលានិងកម្លាំងរបស់ពួកគាត់ដើម្បីព្យាយាមដោះស្រាយបញ្ហាក្នុងពិភពលោកនេះ។ ប៉ុន្ដែពួកគាត់មិនធ្វើដូច្នេះឡើយ។ យើងនឹងពិចារណាអំពីអ្វីដែលផ្នែកដែលយើងអាចមើលឃើញនៃអង្គការរបស់ព្រះយេហូវ៉ាតែងតែផ្ដោតអារម្មណ៍ទៅលើ។
ពួកគេបានផ្ដោតអារម្មណ៍ទៅលើ«អ្វីដែលសំខាន់ជាង»
១២, ១៣. តើអ្នកចាស់ទុំបំពេញភារកិច្ចរបស់ពួកគាត់យ៉ាងដូចម្ដេច ហើយហេតុអ្វីនេះធ្វើឲ្យអ្នកទទួលការលើកទឹកចិត្ដ?
១២ អ្នកចាស់ទុំដែលមានបទពិសោធន៍ជុំវិញពិភពលោកបានត្រូវតែងតាំងឲ្យត្រួតពិនិត្យ និងឲ្យជំរុញកិច្ចផ្សព្វផ្សាយអំពីរាជាណាចក្រព្រះនៅប្រទេសដែលពួកគាត់បម្រើ។ ដូច្នេះ ពេលបងប្រុសទាំងនេះធ្វើការសម្រេចចិត្ដ ពួកគាត់ស្វែងរកការណែនាំពីបណ្ដាំរបស់ព្រះ រួចឲ្យការណែនាំនោះធ្វើជា‹ចង្កៀងដល់ជើងពួកគាត់ ហើយជាពន្លឺបំភ្លឺផ្លូវពួកគាត់› ព្រមទាំងអធិដ្ឋានអស់ពីចិត្ដសុំការដឹកនាំពីព្រះយេហូវ៉ា។—ទំនុក. ១១៩:១០៥; ម៉ាថ. ៧:៧, ៨
១៣ ដូចពួកអ្នកដឹកនាំនៅសតវត្សរ៍ទី១ អ្នកចាស់ទុំដែលត្រួតពិនិត្យកិច្ចផ្សព្វផ្សាយសព្វថ្ងៃនេះព្យាយាម«ក្នុងកិច្ចបម្រើដែលទាក់ទងនឹងបណ្ដាំរបស់ព្រះ»។ (សកម្ម. ៦:៤) ពួកគាត់សប្បាយរីករាយយ៉ាងខ្លាំងពេលកិច្ចផ្សព្វផ្សាយនៅប្រទេសរបស់គាត់និងនៅទូទាំងពិភពលោកបានជឿនទៅមុខ។ (សកម្ម. ២១:១៩, ២០) ពួកគាត់មិនបង្កើតច្បាប់និងបែបបទមិនចេះចប់មិនចេះហើយ។ ផ្ទុយទៅវិញ ពួកគាត់ធ្វើតាមបទគម្ពីរ ហើយធ្វើតាមការដឹកនាំពីសកម្មពលបរិសុទ្ធរបស់ព្រះពេលពួកគាត់រៀបចំកិច្ចការផ្សេងៗដែលចាំបាច់ដើម្បីជួយកិច្ចផ្សព្វផ្សាយឲ្យជឿនទៅមុខ។ (សូមអាន សកម្មភាព ១៥:២៨) ដោយធ្វើដូច្នេះ បងប្រុសដែលជាអ្នកទទួលខុសត្រូវទាំងនេះធ្វើជាគំរូល្អសម្រាប់បងប្អូនទាំងអស់ក្នុងក្រុមជំនុំ។—អេភ. ៤:១១, ១២
១៤, ១៥. (ក) តើមានការរៀបចំអ្វីខ្លះដើម្បីគាំទ្រកិច្ចផ្សព្វផ្សាយទូទាំងផែនដី? (ខ) កាលដែលអ្នកគាំទ្រកិច្ចផ្សព្វផ្សាយអំពីរាជាណាចក្រព្រះ តើអ្នកមានអារម្មណ៍យ៉ាងណា?
១៤ បងប្រុសៗរបស់យើងជាច្រើននាក់ធ្វើការជារៀងរាល់ថ្ងៃដើម្បីរៀបចំសៀវភៅផ្សេងៗ កិច្ចប្រជុំ និងមហាសន្និបាត។ បងប្អូនរាប់ពាន់នាក់ធ្វើការស្ម័គ្រចិត្ដដោយមិនខ្លាចនឿយហត់ដើម្បីបកប្រែសេចក្ដីបង្រៀនដែលប្រៀបដូចជាអាហារ ប្រហែលជា៦០០ភាសា ដើម្បីឲ្យមនុស្សច្រើនបំផុតអាចរៀនអំពី«ការដ៏រុងរឿងរបស់ព្រះ»ក្នុងភាសារបស់ពួកគេ។ (សកម្ម. ២:៧-១១) បងប្អូនវ័យក្មេងទាំងប្រុសទាំងស្រីបោះពុម្ពសៀវភៅរបស់យើងដោយប្រើម៉ាស៊ីនដែលមានល្បឿនលឿន និងសម្ភារសម្រាប់បិតក្របសៀវភៅ។ ក្រោយមកសៀវភៅទាំងនេះបានត្រូវចែកចាយដល់ក្រុមជំនុំផ្សេងៗ សូម្បីតែនៅតំបន់ឆ្ងាយជាងគេនៅផែនដី។
១៥ មានការរៀបចំជាច្រើនដើម្បីឲ្យយើងអាចផ្ដោតអារម្មណ៍លើកិច្ចផ្សព្វផ្សាយដំណឹងល្អជាមួយបងប្អូនក្នុងក្រុមជំនុំរបស់យើង។ ជាឧទាហរណ៍ បងប្អូនធ្វើការស្ម័គ្រចិត្ដជាច្រើននាក់ជួយសង់សាលប្រជុំនិងសាលសន្និបាត ហើយជួយពួកអ្នកដែលជួបប្រទះនឹងមហន្ដរាយធម្មជាតិ ឬពួកអ្នកដែលត្រូវការការព្យាបាលជាបន្ទាន់ ជួយរៀបចំសន្និបាតនិងមហាសន្និបាត ហើយបង្រៀននៅសាលាកិច្ចបម្រើព្រះ ទាំងនេះជាសកម្មភាពខ្លះៗដែលបងប្អូនបានធ្វើដែលយើងមិនបានឃើញ។ តើកិច្ចការទាំងនេះធ្វើឡើងក្នុងគោលបំណងអ្វី? គឺដើម្បីជួយយើងឲ្យផ្សព្វផ្សាយដំណឹងល្អ ជួយយើងឲ្យជឿនទៅមុខក្នុងសេចក្ដីពិត ហើយជួយមនុស្សកាន់តែច្រើនឲ្យក្លាយជាអ្នកគោរពប្រណិប័តន៍ព្រះយេហូវ៉ា។ តើផ្នែកនៅផែនដីនៃអង្គការរបស់ព្រះយេហូវ៉ានៅតែប្រមូលអារម្មណ៍លើការអ្វីដែលសំខាន់ជាងឬទេ? ប្រាកដជាដូច្នេះមែន!
ចូរធ្វើតាមគំរូនៃអង្គការរបស់ព្រះយេហូវ៉ា
១៦. តើអ្នកអាចស្រាវជ្រាវអ្វីខ្លះសម្រាប់ការគោរពប្រណិប័តន៍ជាក្រុមគ្រួសារនិងការសិក្សាផ្ទាល់ខ្លួន?
១៦ ជួនកាលតើយើងចំណាយពេលដើម្បីរំពឹងគិតអំពីអ្វីដែលអង្គការព្រះយេហូវ៉ាកំពុងធ្វើឬទេ? បងប្អូនខ្លះបានសម្រេចចិត្ដស្រាវជ្រាវហើយរំពឹងគិតអំពីរឿងនេះ ពេលគោរពប្រណិប័តន៍ជាក្រុមគ្រួសារ និងពេលពួកគាត់សិក្សាគម្ពីរផ្ទាល់ខ្លួន។ យើងនឹងរំភើបចិត្ដពេលយើងសិក្សាអ្វីដែលព្រះបានបើកឲ្យអេសាយ អេសេគាល ដានីយ៉ែលនិងយ៉ូហានឃើញ។ សៀវភៅដែលមានចំណងជើងថា សាក្សីព្រះយេហូវ៉ា ពួកអ្នកប្រកាសរាជាណាចក្ររបស់ព្រះ ជាភាសាអង់គ្លេស និងសៀវភៅឯទៀត ឬឌីវីឌីជាភាសារបស់អ្នក ជួយអ្នកឲ្យយល់កាន់តែច្បាស់អំពីអង្គការរបស់ព្រះ។
១៧, ១៨. (ក) តើអ្នកបានទទួលប្រយោជន៍អ្វីខ្លះពីអត្ថបទនេះ? (ខ) តើយើងគួរពិចារណាអំពីសំណួរអ្វីខ្លះ?
១៧ ការរំពឹងគិតអំពីអ្វីដែលព្រះយេហូវ៉ាបានសម្រេចតាមរយៈអង្គការរបស់លោកគឺល្អសម្រាប់យើង។ សូមឲ្យយើងរួបរួមជាមួយនឹងអង្គការដ៏អស្ចារ្យនេះ ដោយតាំងចិត្ដបន្ដប្រមូលអារម្មណ៍ទៅលើការអ្វីដែលសំខាន់ជាង។ ការធ្វើដូច្នេះនឹងធ្វើឲ្យយើងកាន់តែមានការតាំងចិត្ដដូចប៉ូល ដែលបានសរសេរថា៖ «ដោយសារយើងមានកិច្ចបម្រើនេះស្របទៅតាមសេចក្ដីមេត្ដាករុណាដែលបានត្រូវបង្ហាញចំពោះយើង នោះយើងមិនឈប់តស៊ូទេ»។ (២កូ. ៤:១) គាត់ក៏បានលើកទឹកចិត្ដអ្នករួមការងារជាមួយគាត់ថា៖ «យើងមិនត្រូវឈប់ព្យាយាមធ្វើអ្វីដែលល្អប្រសើរឡើយ ព្រោះនៅពេលកំណត់យើងនឹងទទួលផល បើយើងមិនរសាយចិត្ដទេ»។—កាឡ. ៦:៩
១៨ តើយើងឬក្រុមគ្រួសាររបស់យើងត្រូវធ្វើការកែប្រែអ្វីខ្លះដើម្បីអាចចាត់ទុកការអ្វីដែលសំខាន់ជាងជាអាទិភាពក្នុងទម្លាប់ប្រចាំថ្ងៃ? តើយើងអាចធ្វើឲ្យជីវិតរបស់យើងទៅជាសាមញ្ញជាងឬកាត់បន្ថយអ្វីៗដែលបំបែរអារម្មណ៍យើង ដើម្បីឲ្យយើងអាចប្រមូលអារម្មណ៍ច្រើនជាងទៅលើកិច្ចផ្សព្វផ្សាយដែលជាកិច្ចការសំខាន់បំផុតឬទេ? នៅអត្ថបទបន្ទាប់យើងនឹងពិចារណាអំពីអ្វីប្រាំយ៉ាងដែលនឹងជួយយើងឲ្យអាចតាមទាន់អង្គការរបស់ព្រះយេហូវ៉ា។
