1, 2. Ehunganeko lini li na ko nasha nomasiku gahugunina li na okukala lya li lye etele aalongwa yaJesus omaipulo ogendji, nomolwashike?

PETRUS, Jakob, Johannes nosho wo Andreas osho ya mono ompito yokukala oyo ayeke naMwene gwawo. Shoka Jesus a li e ya lombwele kombinga yehanagulo lyotempeli osha li she ya etele omaipulo ogendji. (Mark. 13:1-4) Onkee ano, oya li ye mu pula ya ti: “Tu lombwela, uunake ano tashi ka ningwa, nendhindhiliko olini tali holola, uuna to ya nehulilo lyuuyuni?” (Mat. 24:1-3) Jesus okwa li a tameke oku ya lombwela kombinga yiiningwanima nenge yoonkalo ndhoka kaadha li owala tadhi ka etitha omalunduluko ogendji mokukalamwenyo, ihe odha li wo tadhi ka ndhindhilikitha mo omasiku gahugunina gonkalelo ya kolokosha yiinima yaSatana. Oshiningwanima shimwe oshi na okukala sha li sha pendutha ohokwe maalongwa yaJesus. Konima sho a popi kombinga yiinima yiyemateka ngaashi iita, oondjala nosho wo uulunde mboka wa li tawu ka lunda pombanda, Jesus okwa hunganeke kombinga yoshinima oshiwanawa shoka sha li tashi ka kala wo endhindhiliko lyomasiku gahugunina. Okwa ti: ‘Onkundana ndjika ombwanawa yuukwaniilwa otayi ku uvithilwa uuyuni awuhe yi ningile iigwana ayihe uunzapo; notaku ya ihe ehulilo.’—Mat. 24:7-14 yelekanitha NW.

² Aalongwa yaJesus Kristus oya li ya nyanyukilwa okuuvitha onkundana ombwanawa pamwe naye. (Luk. 8:1; 9:1, 2) Otashi vulika ya li ya dhimbulukwa oohapu ndhoka a popile ta ti: “Iilya oyi li po oyindji, ihe aalongi oyo aashona. Galikaneni ano mwene gwiilya, a tume aalongi keteyo lye.” (Luk. 10:2) Ihe ongiini mbela ya li taye ku uvithila ‘uuyuni awuhe’ nokupa ‘iigwana ayihe uunzapo’? Aalongi oya li taya ka za peni? Ando oya li taya vulu okumona shoka sha li tashi ka ningwa monakuyiwa sho ya kuutumba naJesus esiku ndyoka, nopwaahe na omalimbililo, ando oya kuminwa noonkondo kokumona nkene oohapu ndhoka dhi li muMateus 24:14 tadhi gwanithwa.

3. Ehunganeko ndyoka li li muLukas 21:34 otali gwanithwa ngiini kunena, notu na okwiikonakona nelalakano lyashike?

 ³ Otu li pethimbo ndyoka ehunganeko lyaJesus tali gwanithwa. Aantu omamiliyona oyi imbwanga mumwe ya andjaganeke evi alihe nonkundana ombwanawa yUukwaniilwa. (Jes. 60:22) Ihe Jesus okwa li e shi popi kutya osha li tashi ka kala oshidhigu kuyamwe okuukitha eitulomo kiilonga yokuuvitha momasiku ngaka gahugunina. Oya li taya ka piyaganekwa kiimpwiyu nomadhiladhilo gawo oga li taga ‘ka luudhikwa’ kuyo. (Lesha Lukas 21:34.) Natse otu wete kunena egwanitho lyoohapu ndhoka. Yamwe yomoshigwana shaKalunga oye li taya piyaganekwa kiinima yomuuyuni. Shika otashi vulu okwiimonikila momatokolo ngoka haya ningi shi na ko nasha niilonga yokwiikongela omboloto, nelongo lyopombanda, nokwiilikolela iinima yopamaliko nosho wo nethimbo ndyoka haya longitha momaudhano nomomainyanyudho. Yalwe inayi ipyakidhila we omolwomathiminiko nosho wo iimpwiyu yonkalamwenyo yakehe esiku. Ipula to ti: ‘Mbela otandi shi enditha ngiini? Omatokolo ngoka handi ningi monkalamwenyo otagu ulike shike kombinga yaashoka ndu ukitha eitulomo lyandje?’

4. (a) Paulus okwa li a galikana kombinga yashike shi na ko nasha nAakriste yomuFilippi, nomolwashike? (b) Moshitopolwa shika nomwaashoka tashi landula ko otatu ka konakona kombinga yashike, nonelalakano lyashike?

⁴ Aakriste mboka ya li ko methelemumvo lyotango oya li ye na okuninga oonkambadhala dha mana mo opo ya kale ya pititha komeho iinima yopambepo. Omuyapostoli Paulus okwa li a mono sha pumbiwa a galikane opo mboka ya li muFilippi ya ‘yoolole iinima mbyoka yi na oshilonga.’ (Lesha Aafilippi 1:9-11.) Ngaashi omuyapostoli Paulus, pethimbo ndyoka oyendji oya li taya ‘uvitha nuulaadhi yaa na uumbanda.’ (Fil. 1:12-14) Momukalo gwa faathana, oyendji yomutse kunena otatu uvitha nuulaadhi Oohapu dhaKalunga. Ihe mbela okukonakona kwaashoka tashi longwa ngashingeyi mehangano lyaJehova otaku vulu ngaa oku tu kwathela tu kale tu ukitha eitulomo nokuli shi vulithe shito kiilonga ya simanenena yokuuvitha? Eeno otaku vulu! Moshitopolwa shika otatu ka konakona elongekidho ndyoka Jehova a ninga opo ehunganeko ndyoka li li muMateus 24:14 li gwanithwe nuupu. Ehangano lyaJehova olyu ukitha eitulomo kushike, nokukala tu shi shi otaku ke tu ladhipika ngiini nosho wo uukwanegumbo wetu? Moshitopolwa tashi landula otatu ka konakona shoka tashi vulu oku tu kwathela tu idhidhimike notu kale tatu endele pamwe nehangano lyaJehova.

5, 6. (a) Omolwashike Jehova a gandja omamoniko goshitopolwa shomegulu shehangano lye? (b) Hesekiel okwa li a mono shike memoniko?

⁵ Opu na iinima oyindji mbyoka Jehova a hogolola keeyi kwatele mOohapu dhe. Pashiholelwa, ina gandja uuyelele kombinga yankene uuluyi nenge ewangandjo hayi longo nonando uuyelele mboka owa li tawu vulu okukala uukumithi noonkondo. Pehala lyaashono, okwa gandja owala uuyelele mboka twa pumbwa opo tu uve ko omalalakano ge nokukaleka oonkalamwenyo dhetu metsokumwe nago. (2 Tim. 3:16, 17) Kashi shi tuu oshihokithi sho Ombiimbeli ya gandja omawilowilo kombinga yoshitopolwa ihaashi monika shehangano lyaJehova! Ohatu kala twa tuntukwa uuna tatu lesha kombinga yankene iinima yu unganekwa megulu kuJehova, mbyoka ya nyolwa kuJesaja, kuHesekiel, kuDaniel nosho wo kuJohannes mEhololo. (Jes. 6:1-4; Hes. 1:4-14, 22-24; Dan. 7:9-14; Eh. 4:1-11) Osha fa owala Jehova e egulula eholodeyina noku tu pitika tu tale shoka shi li megulu. Omolwashike Jehova a gandja uuyelele mbuka?

⁶ Jehova ina hala tu dhimbwe nando kutya tse otu li oshitopolwa shehangano lye lyomeshito alihe. Opu na oshindji shoka hashi ningwa okuyambidhidha omalalakano gaJehova kaashi shi owala shoka tu wete. Pashiholelwa, Hesekiel okwa li a mono memoniko oshitopolwa ihaashi monika shehangano lyaJehova tashi thanekwa ketemba lyomegulu hali adhima. Etemba ndika ohali endelele nohali tanauka nziya. (Hes.  1:15-21) Nomagulu galyo ngoka haga tanaukile kombinga kehe ohali ende iinano iile methimbo efupi. Memoniko, Hesekiel okwa li a mono omawilowilo Omulondi gwetemba ndyoka. Okwa ti: ‘Onda mono ko olupe lwe lwa fa eadhimo lyoshikushu shi li meziko lya hanya. Osho sha li olupe lweadhimo lyOMUWA.’ (Hes. 1:25-28, yelekanitha NW.) Kasha li tuu sha kumitha Hesekiel sho a mono emoniko ndyoka! Okwa li a mono Jehova oye mwene ta wilike ehangano lye, note li enditha okupitila mombepo ye ondjapuki. Kashi li tuu ethano ekumithi lyoshitopolwa shomegulu shehangano lyaJehova shoka tashi pula komeho!

7. Ongiini emoniko ndyoka lya li lya pewa Daniel tali tu pe einekelo?

⁷ Daniel naye okwa li a mono oshindji shoka tashi tu pe einekelo. Okwa li a mono Jehova tu ulikwa e li “Omusamane gwomimvo” a kuutumba koshipangelapundi tashi lilima omulilo. Oshipangelapundi shoka osha li sha londekwa komagulu. (Dan. 7:9, OB-1954) Jehova okwa li a hala Daniel a mone kutya ehangano Lye otali pula komeho mokugwanitha elalakano Lye. Daniel okwa li wo a mono “gumwe a fa omunagwomuntu,” (OB-1954) Jesus, ta pewa a tonatele oshitopolwa shokombanda yevi shehangano lyaJehova. Elelo lyaKristus lya gwanenena itali kala po owala uule woomvula oonshona. Pehala lyaashono, “otali ka kala sigo aluhe, nuukwaniilwa we kau na mpoka tau hulu po sigo aluhe.” (Dan. 7:13, 14) Shoka oshe tu inyengitha tu kale twi inekela muJehova nokudhimbulula shoka ta longo. Jehova okwa li a gandja “epangelo, esimano noonkondo dhuukwaniilwa” komwana Jesus ngoka li a yelekwa nokwa li a talika a gwana a pwa. Jehova okwi inekela Omwana. Onkee ano, otatu vulu okukala wo tu na einekelo mewiliko lyaJesus.

8. Omamoniko ngoka Jehova a li a gandja kuHesekiel naJesaja oga li ge ya gumu ngiini, noge na oku tu guma ngiini?

⁸ Etaloko lya tya ngaaka lyoshitopolwa ihaashi  monika shehangano lyaJehova oli na oku tu guma ngiini? Ngaashi Hesekiel, natse ohatu kala twa kuminwa shoka Jehova ta longo nohashi tu ningitha tu kale tu na eifupipiko. (Hes. 1:28) Okutedhatedha kombinga yehangano lyaJehova otaku vulu oku tu inyengitha tu katuke oonkatu ngaashi Jesaja a li a ningi. Sho pwa holoka ompito yokulombwela yalwe kombinga yaashoka Jehova ta longo, okwe yi taamba ko nopwaahe na okukwatakwata. (Lesha Jesaja 6:5, 8.) Jesaja okwa li e na einekelo kutya ota ka sinda eshongo kehe molwaashoka Jehova okwa li te ke mu kwathela. Sha faathana, okumona omawilowilo oshitopolwa ihaashi monika shehangano lyaJehova huka oku na oku tu kumitha noku tu inyengitha tu katuke oonkatu. Shoka itashi tu ningitha tuu tu dhiladhile kombinga yehangano ndyoka tali pula komeho, notali ukitha eitulomo kokugwanitha po omalalakano gaJehova!

9, 10. Omolwashike pwa pumbiwa oshitopolwa shokombanda yevi shi wetike shehangano lyaJehova?

⁹ Okupitila momwana, Jehova okwa li a tula po elongekidho kombanda yevi ndyoka hali longo metsokumwe noshitopolwa ihaashi monika shehangano lye. Omolwashike pwa li pwa pumbiwa oshitopolwa shokombanda yevi shi wetike opo oshilonga shoka shi li mu Mateus 24:14 shi gwanithwe po? Natu taleni komatompelo gatatu taga landula.

¹⁰ Lyotango, Jesus okwa li a popi kutya iilonga mbika yokuuvitha otayi ka fala aalongwa ye “sigo omiilongo ayihe yombanda yevi.” (Iil. 1:8) Etiyali, opwa li tapu ka pumbwa okuningwa omalongekidho gokugandja iikulya yopambepo nokusila oshimpwiyu mboka taya longo iilonga mbika. (Joh. 21:15-17) Etitatu, opwa li pu na okutulwa omasiloshimpwiyu opo mboka taya uvitha onkundana ombwanawa ya vule okukala haya gongala pamwe ya longele Jehova noya longwe nkene ye na okugwanitha po iilonga mbyoka. (Heb. 10:24, 25) Okugwanitha po omalalakano ngaka kashi shi oshinima shoka sha li tashi ka ningwa ombaadhilila. Opo aalanduli yaKristus ye shi pondole, iilonga oya li yi na okukala yu unganekwa nawa.

11. Ohatu ulike ngiini kutya otatu ambidhidha omalongekidho ngoka ga tulwa po kehangano lyaJehova?

¹¹ Ohatu ulike ngiini kutya otatu ambidhidha omalongekidho ngoka ga tulwa po kehangano lyaJehova? Omukalo gumwe gwa simana ogwo okukala aluhe twi inekela mboka yi inekelelwa oku tu wilika miilonga yetu yokuuvitha kuJehova naJesus. Opu na omaipyakidhilo ogendji nenge oonkalo muuyuni ndhoka hashi vulika dhi piyaganeke iilonga yaamboka taye tu wilike. Ihe mbela, oshitopolwa shi wetike shehangano lyaJehova osha kala tashi ukitha eitulomo kushike?

12, 13. Aakuluntugongalo ohaya gwanitha po ngiini oshinakugwanithwa shawo, nomolwashike shoka tashi ku tsu omukumo?

¹² Aakuluntugongalo mboka ya pyokoka muuyuni awuhe oya langekwa po ya tonatele noya kwatele komeho iilonga yokuuvitha Uukwaniilwa miilongo moka ye li opo yi longwe neendelelo. Uuna aamwatate mbaka taya ningi omatokolo, ohaya kongo ewiliko mOohapu dhaKalunga, nokungawo otaye dhi ningi ‘onyeka mokweenda kwawo nuuyelele moondjila dhawo,’ nohaya galikana wo kuJehova ya mana mo e ya wilike.—Eps. 119:105; Mat. 7:7, 8.

¹³ Ngaashi owala mboka ya li ya kwatele komeho methelemumvo lyotango, aakuluntugongalo mboka taya tonatele iilonga yokuuvitha kunena oyi igandja ‘moshilonga sheuvitho lyoohapu dhaKalunga.’ (Iil. 6:4) Ohaya nyanyukilwa ehumokomeho ndyoka tali ningwa mokuuvitha onkundana ombwanawa miilongo yawo nomuuyuni awuhe. (Iil. 21:19, 20) Ihaya tula po oompango nomilandu odhindji dhindji. Ihe pehala lyaashono, ohaya landula shoka shi li mOmanyolo newiliko lyombepo ondjapuki sho taya ningi omalongekidho ngoka ga pumbiwa ya  ambidhidhe iilonga yokuuvitha yi pule komeho. (Lesha Iilonga 15:28.) Mokuninga ngaaka, aakuluntugongalo mbaka ohaya tulile po ayehe mboka ye li momagongalo gawo oshiholelwa oshiwanawa.—Ef. 4:11, 12.

14, 15. (a) Opwa ningwa omalongekidho geni gokwaambidhidha iilonga yokuuvitha muuyuni awuhe? (b) Owu uvite ngiini sho wu na uuthembahenda wokwaambidhidha iilonga yUukwaniilwa yokuuviitha?

¹⁴ Iilonga mbyoka ihaayi monika koyendji hayi longwa esiku kehe, oyokulongekidha iikulya yopambepo mbyoka hayi gandjwa okupitila miileshomwa, mokugongala nomiigongi. Aaiyambi omayuvi ohaya longo iilonga mbika kaapu na oluthuwo ya tolokele iikulya yopambepo momalaka 600 lwaampo opo aantu oyendji yi ilonge kombinga ‘yiilonga iinene yaKalunga’ momalaka gawo. (Iil. 2:7-11) Aamwatate naamwameme aagundjuka ohaya longo nomashina gokunyanyangidha iileshomwa hage endelele nogokutula omambo kumwe. Nokonima, iileshomwa mbika ohayi tuminwa komagongalo nokuli nokwaangoka ge li kiitopolwa yokomikandi.

¹⁵ Opwa ningwa omalongekidho ogendji opo tu vule okukala tu ukitha eitulomo kiilonga yokuuvitha onkundana ombwanawa pamwe nomagongalo getu. Pashiholelwa, aaiyambi omayuvi ogendji ohaya kwathele miilonga yokutunga Iinyanga yUukwaniilwa nosho wo Iinyanga yIigongi, ya kwathele mboka ya dhengwa kiiponga yopaunshitwe nenge mboka ye li meulumompumbwe lyopaunamiti, yu unganeke iigongi yetu iishona niinene, noya longe koosikola dhelongo lyopakalunga, okutumbula po owala yimwe yomiinima mbyoka hayi longwa ihaayi monika koyendji. Mbela elalakano lyiilonga ayihe mbika olyashike? Olyokuhumitha komeho okuuvithwa kwonkundana ombwanawa, okusila oshimpwiyu uupambepo waamboka taya longo iilonga mbika nokuhumitha komeho elongelokalunga lyashili. Mbela oshitopolwa shokombanda yevi shehangano lyaJehova osha kala ngaa shu ukitha eitulomo kiinima mbyoka ya simanenena? Eeno, osho lela!

16. Oshike tamu vulu okukala hamu ningi pelongelokalunga lyeni lyuukwanegumbo nenge pekonakono lyopaumwene?

¹⁶ Mbela ethimbo nethimbo ohatu dhiladhila ngaa kombinga yiilonga yehangano lyaJehova? Yamwe oya hogolola okulongitha ethimbo ya kale haya ningi omapekapeko kombinga yiinima mbyoka pelongelokalunga lyuukwanegumbo nenge pekonakono lyopaumwene nokutedhatedha kuyo. Omamoniko ngoka ga li ga pewa Jesaja, Hesekiel, Daniel nosho wo Johannes ohaga kala omahokithi uuna tatu ga konakona. Embo Jehovah’s Witnesses — Proclaimers of God’s Kingdom nosho wo iileshomwa yilwe nenge uu-DVD mboka wu li momalaka getu ohawu gandja uuyelele tawu hokitha kombinga yehangano.

17, 18. (a) Shoka twa zi nokukonakona oshe ku kwathela ngiini? (b) Omapulo geni tatu vulu okwiipula?

¹⁷ Ohashi kala oshiwanawa kutse okutedhatedha kombinga yaashoka Jehova ta gwanitha po okupitila mehangano lye. Natu kaleni twa tokola toko tu kale tu ukitha eitulomo lyetu kiinima mbyoka ya simana tatu endele pamwe nehangano ndika ewanawa. Okuninga ngaaka otaku ke tu koleka tu kale twa tokola toko ngaashi Paulus ngoka a nyola a ti: “Kalunga okwe tu pe eyakulo ndika molwesilohenda lye, onkee itatu si uunye.” (2 Kor. 4:1) Okwa li wo a ladhipike aalongi pamwe naye a ti: “Inatu vulweni okulonga uuwanawa, oshoka ngele itatu seni uunye, nena ethimbo otali ke ya, uuna tatu ka teya iiyimati.”—Gal. 6:9.

¹⁸ Mbela opu na omalunduluko ngoka twa pumbwa okuninga pauhandimwe nenge tu li uukwanegumbo opo tu kale hatu yoolola iinima mbyoka yi na oshilonga miinima mbyoka hatu ningi kehe esiku? Mbela itatu vulu okukaleka onkalamwenyo yetu yanathangwa nenge tu ethe po iinima mbyoka hayi tu piyaganeke opo tu vule okugandja eitulomo lya gwana kiilonga ya simanenena yokuuvitha? Moshitopolwa tashi landula, otatu ka konakona iinima itano mbyoka tayi ke tu kwathela tu kale tatu endele pamwe nehangano lyaJehova.