1, 2. Kua profesia tokante e último dianan lo mester a kapta atenshon di e disipelnan di Hesus, i dikon?

HESUS a bisa su disipelnan ku e tèmpel lo ser destruí. Pedro, Santiago, Huan i Andres a keda masha preokupá ku esei. (Mar. 13:1-4) Pues, ora ku por fin nan tabata nan so ku Hesus, nan a puntr’é: “Bisa nos: Ki dia e kosnan akí lo sosodé, i kiko lo ta e señal di bo presensia i di konklushon di e era akí?” (Mat. 24:1-3) Komo kontesta, Hesus a konta nan tokante kambionan grandi den bida ku lo a tuma lugá promé ku e destrukshon di Herúsalèm i tambe tokante kosnan ku lo a sosodé durante e último dianan di e mundu di Satanas. Un kos ku sigur lo a kapta nan atenshon tabata ku despues ku Hesus a menshoná asuntunan teribel manera guera, skarsedat di kuminda i oumento di maldat, el a profetisá algu positivo ku tambe lo a identifiká e último dianan. E di: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.”—Mat. 24:7-14.

² E disipelnan di Hesus ya a partisipá den e predikashon di e bon notisia di Reino huntu kuné. (Luk. 8:1; 9:1, 2) I kisas nan a kòrda ku el a yega di bisa nan: “E kosecha en bèrdat ta grandi, ma trahadó ta poko. P’esei, roga Doño di e kosecha pa e manda trahadó na su kosecha.” (Luk. 10:2) Pero kasi sigur nan lo a puntra nan mes: ‘Di unda e trahadónan lo bini? Kon nan lo prediká “den henter e tera habitá” i duna un “testimonio pa tur nashon”?’ Mare e dia ei, ora nan tabata sintá huntu ku Hesus riba e seru, nan por a wak futuro! Hamas nan lo por a imaginá e manera maravioso ku e palabranan akí di Mateo 24:14 lo a ser realisá!

3. Kon Lukas 21:34 ta kumpliendo awe, i kiko nos mester puntra nos mes?

³ E profesia di Hesus ta kumpliendo den nos tempu.  Rònt mundu tin miónes di hende ta prediká e bon notisia di e Reino. (Isa. 60:22) Pero Hesus a indiká ku pa algun kristian lo no tabata fásil pa keda pone e trabou di prediká na promé lugá den nan bida. Nan lo tabata asina okupá hasiendo otro kos, ku nan kurason lo a bira “demasiado kargá.” (Lesa Lukas 21:34.) Awe tambe nos ta mira kumplimentu di e palabranan ei, ya ku algun miembro di e pueblo di Dios no ta pone e kosnan mas importante na promé lugá. Nos por mira esaki na e desishonnan ku nan ta tuma relashoná ku trabou, estudio avansá i kosnan material. Otro rumannan ta dediká demasiado tempu na deporte i entretenimentu. I algun ruman a kansa debí na e preokupashonnan di bida di tur dia i a baha man den nan sirbishi na Dios. Puntra bo mes: ‘Kon ta pará ku mi? Kiko mi desishonnan ta indiká ku ta importante pa mi den bida?’

4. (a) Kiko Pablo a pidi den orashon pa e kristiannan na Filipo, i dikon? (b) Kiko nos lo konsiderá den e artíkulo akí i esun siguiente, i ku ki meta?

⁴ E kristiannan di promé siglo tabatin ku hasi esfuerso pa mantené nan sirbishi na Dios na promé lugá den nan bida. Ta p’esei apòstel Pablo a pidi den orashon pa e rumannan na Filipo “hasi sigur kiko ta e kosnan mas importante.” (Lesa Filipensenan 1:9-11.) Meskos ku apòstel Pablo, mayoria di e kristiannan tabata “demostrá asta mas kurashi pa papia e palabra di Dios sin miedu.” (Flp. 1:12-14) Awe ta meskos. Mayoria di nos ta prediká e Palabra di Dios ku kurashi. Pero asina mes, lo ta un bon animashon pa nos si nos konsiderá kon Yehova ta usa su organisashon awe pa kumpli ku e palabranan di Mateo 24:14. Esaki lo yuda nos traha ku mas entusiasmo den e trabou di prediká. Den e artíkulo akí nos lo analisá ta riba kiko e organisashon di Yehova ta konsentrá òf enfoká, i kon esaki por motivá nos i nos famia. Den e siguiente artíkulo, nos lo konsiderá kiko por yuda nos perseverá den e sirbishi di Dios i imitá e ehèmpel di su organisashon aktivo.

5, 6. (a) Dikon Yehova a duna vários vishon di e parti selestial di su organisashon? (b) Kiko Ezekiel a mira den vishon?

⁵ Tin hopi kos ku Yehova a disidí di no splika den su Palabra skirbí. Por ehèmpel, e no a duna detaye tokante kon e selebro humano ta traha ni kon e universo ta funshoná, aunke e tipo di informashon ei lo tabata masha interesante. Mas bien, Yehova a duna nos informashon ku nos tin mester pa komprondé kiko ta su boluntat i biba na armonia ku esaki. (2 Tim. 3:16, 17) P’esei, ta masha interesante ku Beibel ta duna nos algun detaye di e parti invisibel di e organisashon di Yehova! E deskripshonnan di Yehova su organisashon selestial ku Isaías, Ezekiel, Daniel i Huan (den e buki di Revelashon) a skirbi ta masha emoshonante pa lesa. (Isa. 6:1-4; Eze. 1:4-14, 22-24; Dan. 7:9-14; Rev. 4:1-11) Ta komo si fuera Yehova a habri un kortina i permití nos tira un bista den shelu. Dikon el a duna e informashon akí?

⁶ Yehova no ke pa nos lubidá nunka ku nos ta forma parti di un organisashon universal. Tin masha kos ta tuma lugá pa apoyá e boluntat di Yehova, i gran parti di esei nos no ta mira. Por ehèmpel, Ezekiel a mira un vishon den kua e parti invisibel di Yehova su organisashon ta ser representá pa un garoshi selestial inmenso. E garoshi akí tabata move masha lihé mes i por a kambia direkshon den un fregá di wowo. (Eze. 1:15-21) Kada biaha ku e wilnan a  drei, e garoshi a kubri distansianan grandi. Ezekiel a mira tambe Esun ku tabata kore e garoshi i a bisa: ‘Mi a mira algu manera bròns ku ta lombra, ku tabata parse kandela tur rònt di dje; i e tabata manera e aparensia di e semehansa di e gloria di Yehova.’ (Eze. 1:25-28) Ezekiel lo mester a keda masha impreshoná ku e vishon akí! El a mira ku Yehova ta den pleno kontrol di su organisashon i ta usa su spiritu santu pa dirigié. E garoshi ei ku no tabata para ketu ta un bon ilustrashon di e manera ku e parti invisibel di Yehova su organisashon ta funshoná!

7. Kon e vishon di Daniel ta duna nos konfiansa den Yehova i Hesus?

⁷ Daniel tambe a mira un vishon ku ta duna nos konfiansa den Yehova i Hesus. El a mira Yehova, representá komo “e Ansiano di Dianan,” sintá riba un trono tur na vlam di kandela. E trono tabata riba wil. (Dan. 7:9) Yehova tabata ke pa Daniel mira ku Su organisashon ta den moveshon, es desir, ta traha pa kumpli ku Su boluntat. Daniel a mira tambe un persona “manera un yu di hende,” esta Hesus, risibí “dominio, gloria i un reino.” Kristu su gobernashon perfekto lo no dura pa un par di aña so. Al kontrario, e ta “un dominio eterno ku lo no pasa nunka, i su reino ta un ku lo no wòrdu destruí.” (Dan. 7:13, 14) E vishon akí ta motivá nos pa konfia den Yehova i den loke e ta hasi. El a duna su Yu Hesus, kende a demostrá su fieldat apesar di hopi prueba, outoridat riba e parti visibel di su organisashon. Yehova ta konfia su Yu. Pues, nos tambe por konfia Hesus komo nos Lider.

8. Ki efekto e vishonnan di Yehova su organisashon tabatin riba Ezekiel i Isaías, i ki efekto nan mester tin riba nos?

 ⁸ Ki efekto e vishonnan akí di e parti invisibel di Yehova su organisashon mester tin riba nos? Meskos ku Ezekiel, nos ta keda masha impreshoná ora nos mira loke Yehova ta logrando. (Eze. 1:28) Profeta Isaías tambe a mira un vishon di loke tabata pasa den shelu. Ora e oportunidat a presentá pa e konta otro hende loke Yehova ta hasiendo, el a probechá di esei sin vasilá. (Lesa Isaías 6:5, 8.) Isaías tabatin sigur ku Yehova a apoy’é, p’esei e tabata sa ku nada lo por a strob’é di hasi su trabou di profeta. Si nos meditá riba Yehova su organisashon, nos tambe, meskos ku Isaías, lo keda masha impreshoná kuné i ser motivá pa hasi mas den e sirbishi di Dios. Ta un gran animashon pa sa ku nos ta forma parti di un organisashon ku no ta para ketu, ku ta konsentrá plenamente riba hasimentu di e boluntat di Yehova!

9, 10. Dikon Yehova tabatin mester di un organisashon visibel riba tera?

⁹ Mediante Hesus, Yehova a organisá su sirbidónan riba tera pa nan por traha huntu ku e parti invisibel den shelu. Dikon tabatin mester di un organisashon visibel pa kumpli ku loke Mateo 24:14 a profetisá? Laga nos konsiderá tres motibu.

¹⁰ Di promé, Hesus a deklará ku e trabou di prediká akí lo a hiba su disipelnan “te na e parti mas leu di tera.” (Echo. 1:8) Di dos, mester a perkurá alimento spiritual i animashon pa esnan ku lo a partisipá den e trabou di prediká. (Huan 21:15-17) Di tres, mester a perkurá tambe reunionnan kaminda esnan ku ta prediká e bon notisia por a bini huntu pa adorá Yehova i siña kon pa prediká. (Heb. 10:24, 25) E siguidónan di Kristu lo no por a logra e metanan akí pa kasualidat. Pa nan por tabatin éksito, e trabou lo mester tabata bon organisá.

11. Kon nos ta demostrá ku nos ta apoyá Yehova su organisashon?

¹¹ Kon nos ta demostrá ku nos ta apoyá Yehova su organisashon? Un di e maneranan prinsipal ku nos ta hasi esei ta ora nos ta konfia e rumannan ku ta dirigí e trabou di prediká. Yehova i Hesus ta konfia nan, i nos tambe mester konfia nan. E rumannan akí lo por a usa nan tempu i energia pa resolvé e problemanan di e mundu akí. Ma nan no ta hasi esei. Pues, riba kiko e parti visibel di Yehova su organisashon semper a konsentrá?

12, 13. Kon ansianonan kristian ta kumpli ku nan asignashon, i dikon esei ta un animashon pa bo?

¹² Na tur parti di mundu tin ansianonan ku eksperensia ku a risibí e responsabilidat pa organisá i dirigí e trabou di prediká den e pais kaminda nan ta sirbi. Ora nan tin ku tuma desishon, nan ta buska instrukshon den e Palabra di Dios i ta lag’é sirbi komo ‘un lampi pa nan pia i un lus pa nan kaminda,’ i ku fervor nan ta pidi Yehova pa e guia nan.—Sal. 119:105; Mat. 7:7, 8.

¹³ Meskos ku e ansianonan di promé siglo, esnan djawe ku ta organisá e trabou di prediká e bon notisia ta pone “e sirbishi di e palabra di Dios” na promé lugá. (Echo. 6:4, nota) Nan ta keda masha kontentu di mira e progreso ku tin den e trabou di prediká, tantu den nan pais komo rònt mundu. (Echo. 21:19, 20) Nan no ta pone un kantidat di regla pa e pueblo di Dios. Mas bien, ku yudansa di e Palabra di Dios i bou di guia di spiritu santu, nan ta konsentrá riba loke mester hasi pa plama e bon  notisia. (Lesa Echonan 15:28.) Di e manera ei, e rumannan responsabel akí ta pone un ehèmpel ekselente pa tur kristian den e kongregashonnan lokal.—Efe. 4:11, 12.

14, 15. (a) Kiko ta ser hasí pa yuda e trabou di prediká rònt mundu? (b) Kiko bo ta pensa di e privilegio ku bo tin di apoyá e trabou di prediká e Reino?

¹⁴ Hopi di nos no ta mira esei, pero un kantidat di ruman ta traha diligentemente tur dia pa prepará e alimento spiritual pa nos publikashonnan, reunionnan i kongresonan. Míles di boluntario ta traha masha duru pa tradusí e alimento spiritual akí den mas ku 600 idioma, ya asina mas tantu hende posibel por siña tokante “e obranan magnífiko di Dios” den nan propio idioma. (Echo. 2:7-11) Rumannan hóben, tantu mucha hòmber komo mucha muhé, ta traha duru pa produsí nos literatura riba mashinnan di imprenta di alta velosidat i ekiponan di kaft buki. Despues, ta manda e literatura akí na e kongregashonnan, asta na e partinan di mas leu di mundu.

¹⁵ Den nos área tambe tin hopi ruman ta hasi sierto trabou ku ta yuda ku nos por konsentrá riba e predikashon di e bon notisia. Por ehèmpel, míles di ruman ta ofresé nan mes pa yuda traha Salòn di Reino i Salòn di Asamblea. Otronan ta yuda rumannan afektá pa desaster natural òf pa emergensia médiko. Tin rumannan ta organisá nos asambleanan i kongresonan, i otronan ta instruktor di skolnan di edukashon teokrátiko. Kiko ta e propósito di tur e trabou akí ku tin biaha ta tuma lugá sin ku nos ta ripará? E rumannan ta hasié pa yuda nos prediká e bon notisia, progresá den e bèrdat i yuda mas hende ainda bini na adorashon berdadero. Pues, e parti visibel di Yehova su organisashon definitivamente a keda pone e kosnan mas importante na promé lugá.

16. Kiko lo ta un bon proyekto di estudio di Beibel pa bo òf pa bo famia?

¹⁶ Nos ta tuma tempu pa de bes en kuando meditá riba loke Yehova su organisashon ta hasiendo? Tin ruman a traha tempu pa durante nan adorashon komo famia òf nan estudio personal nan investigá e asuntunan akí i meditá riba nan. Por ehèmpel, lo ta emoshonante pa studia e vishonnan di Isaías, Ezekiel, Daniel i Huan. E buki Testigunan di Yehova—Proklamadónan di e Reino di Dios i otro publikashonnan òf DVD ku tin disponibel na un idioma ku bo ta komprondé tambe por siña nos hopi kos interesante tokante Dios su organisashon.

17, 18. (a) Kon e artíkulo akí a yuda bo? (b) Kiko lo ta bon pa bo puntra bo mes?

¹⁷ Ta bon pa nos meditá riba e manera ku Yehova ta usa su organisashon pa efektuá e trabou di prediká. Meskos ku e organisashon maravioso akí, laga nos sigui konsentrá riba e kosnan mas importante. Esei lo fortifiká nos pa ta mes determiná ku Pablo, kende a skirbi: “Komo ku nos tin e sirbishi akí segun e miserikòrdia ku a ser mustrá na nos, nos no ta entregá.” (2 Kor. 4:1) El a animá e rumannan tambe pa “no stòp di hasi loke ta bon, pasobra na e debido tempu nos lo kosechá si nos no kansa.”—Gal. 6:9.

¹⁸ Tin kambio ku abo òf bo famia mester hasi pa boso por pone loke ta mas importante na promé lugá den boso bida diario? Boso lo por simplifiká boso bida òf limitá sierto aktividatnan pa boso por hasi mas den e trabou di prediká? Den e siguiente artíkulo, nos lo konsiderá sinku kos ku lo yuda nos imitá e ehèmpel di e organisashon aktivo di Yehova i mantené nos entusiasmo den Dios su sirbishi.