1, 2. Cua profecia tocante e ultimo dianan lo mester a capta atencion di e discipelnan di Hesus, y dicon?

 HESUS a bisa su discipelnan cu e tempel lo ser destrui. Pedro, Santiago, Juan y Andres a keda masha preocupa tocante esey. (Mar. 13:​1-⁠4) Pues, ora cu porfin nan tabata nan so cu Hesus, nan a puntr’e: “Bisa nos: Ki dia e cosnan aki lo sosode, y kico lo ta e señal di bo presencia y di conclusion di e era aki?” (Mat. 24:​1-⁠3) Como contesta, Hesus no solamente a conta nan tocante cambionan grandi den bida cu lo a tuma luga prome cu destruccion di Jerusalem, sino tambe tocante cosnan cu lo a sosode durante e ultimo dianan di e mundo di Satanas. Un cos cu sigur lo a capta nan atencion tabata cu despues cu Hesus a menciona asuntonan teribel manera guera, scarsedad di cuminda y aumento di maldad, el a profetisa algo positivo cu tambe lo a identifica e ultimo dianan. El a bisa: “E bon noticia aki di e Reino lo ser predica den henter e tera habita, como testimonio pa tur nacion, anto e fin lo yega.”​—⁠Mat. 24:​7-⁠14.

² E discipelnan di Hesus ya a participa den e predicacion di e bon noticia di Reino hunto cu ne. (Luc. 8:⁠1; 9:​1, 2) Y kisas nan a corda cu el a yega di bisa nan: “E cosecha en berdad ta grandi, ma trahador ta poco. Pesey, roga Doño di e cosecha pa e manda trahador na su cosecha.” (Luc. 10:⁠2) Pero casi sigur nan lo a puntra nan mes: ‘Di unda e trahadornan lo bin? Con nan lo predica “den henter e tera habita” y duna un “testimonio pa tur nacion”?’ Si nan por a wak futuro e dia ey, esta, ora nan tabata sinta hunto cu Hesus riba e sero, hamas nan lo por a imagina e manera maraviyoso cu e palabranan aki di Mateo 24:⁠14 lo a ser realisa.

3. Con Lucas 21:⁠34 ta cumpliendo awe, y kico nos mester puntra nos mes?

 ³ E profecia di Hesus ta cumpliendo den nos tempo. Rond mundo tin miyones di hende ta predica e bon noticia di Reino. (Isa. 60:⁠22) Pero Hesus a indica cu pa algun cristian lo no ta facil pa keda pone e trabou di predica na prome luga den nan bida. Nan lo ta asina ocupa haciendo otro cos, cu nan curason lo a bira “demasiado carga.” (Lesa Lucas 21:⁠34.) Awe tambe nos ta mira cumplimento di e palabranan ey, ya cu algun miembro di e pueblo di Dios no ta pone e cosnan mas importante na prome luga. Nos por mira esaki na e decisionnan cu nan ta tuma relaciona cu trabou, estudio avansa y cos material. Otro rumannan ta dedica demasiado tempo na deporte y entretenimento. Y algun ruman a cansa debi na e preocupacionnan di bida di tur dia y a baha man den nan sirbishi na Dios. Puntra bo mes: ‘Con ta bayendo cu mi? Kico mi decisionnan ta indica cu ta importante pa mi den bida?’

4. (a) Kico Pablo a pidi den oracion pa e cristiannan na Filipo, y dicon? (b) Kico nos lo analisa den e articulo aki y esun siguiente, y cu ki meta?

⁴ E cristiannan di prome siglo tabatin cu haci esfuerso pa mantene nan sirbishi na Dios na prome luga den nan bida. Ta pesey apostel Pablo a pidi den oracion pa e rumannan na Filipo “haci sigur kico ta e cosnan mas importante.” (Lesa Filipensenan 1:​9-⁠11.) Mescos cu apostel Pablo, mayoria di e cristiannan tabata “demostra hasta mas curashi pa papia e palabra di Dios sin miedo.” ( Flp. 1:​12-⁠14) Awe ta mescos. Mayoria di nos ta predica e Palabra di Dios cu curashi. Pero asina mes, lo ta un bon animacion pa nos si nos analisa con Jehova ta uza su organisacion awe pa cumpli cu e palabranan di Mateo 24:⁠14. Esaki lo yuda nos traha cu mas entusiasmo den e trabou di predica. Den e articulo aki, nos lo analisa ta riba kico e organisacion di Jehova ta concentra of enfoca, y con esaki por motiva nos y nos famia. Den e siguiente articulo, nos lo analisa kico por yuda nos persevera den e sirbishi di Dios y imita e ehempel di su organisacion activo.

5, 6. (a) Dicon Jehova a duna varios vision di e parti celestial di su organisacion? (b) Kico Ezekiel a mira den vision?

⁵ Tin hopi cos cu Jehova a dicidi di no splica den su Palabra. Por ehempel, e no a duna detaye tocante con e celebro humano ta traha ni con e universo ta funciona aunke e tipo di informacion ey lo tabata masha interesante. Mas bien, Jehova a duna nos informacion cu nos tin mester pa compronde kico ta su boluntad y biba na harmonia cu esaki. (2 Tim. 3:​16, 17) Pesey, ta masha interesante cu Bijbel ta duna nos algun detaye di e parti invisibel di e organisacion di Jehova. E descripcionnan di Jehova su organisacion celestial cu Isaias, Ezekiel, Daniel y Juan (den e buki di Revelacion) a skirbi ta masha emocionante pa lesa. (Isa. 6:​1-⁠4; Eze. 1:​4-⁠14, 22-24; Dan. 7:​9-⁠14; Rev. 4:​1-⁠11) Ta comosifuera Jehova a habri un cortina y permiti nos tira un bista den cielo. Dicon el a duna nos e informacion aki?

⁶ Jehova no kier pa nos lubida nunca cu nos ta forma parti di un organisacion universal. Tin hopi cos cu ta tuma luga pa apoya e boluntad di Jehova, y gran parti di esey nos no ta mira. Por ehempel, Ezekiel a mira un vision den cua e parti invisibel di Jehova su organisacion ta ser representa pa un garoshi celestial inmenso. E garoshi aki tabata move masha lihe mes y por a cambia direccion den un kinipi di wowo.  (Eze. 1:​15-⁠21) Cada biaha cu e wielnan a draai, e garoshi a cubri distancianan largo. Ezekiel a mira tambe Esun cu tabata core e garoshi y a bisa: ‘Mi a mira algo manera brons cu ta lombra, cu tabata parce candela tur rond di dje; y e tabata manera e apariencia di e semehansa di e gloria di Jehova.’ (Eze. 1:​25-⁠28) Ezekiel lo mester a keda masha impresiona cu e vision aki. El a mira cu Jehova tin pleno control riba su organisacion y ta uza su spirito santo pa dirigie. E garoshi ey cu no tabata para keto ta ilustra bon e manera cu e parti invisibel di Jehova su organisacion ta funciona.

7. Con e vision di Daniel ta duna nos confianza den Jehova y Hesus?

⁷ Daniel tambe a mira un vision cu ta duna nos confianza den Jehova y Hesus. El a mira Jehova, representa como “e Anciano di Dianan”, sinta riba un trono tur na vlam di candela. E trono tabata riba wiel. (Dan. 7:⁠9) Jehova tabata kier pa Daniel mira cu Su organisacion ta den movecion, es decir, ta traha pa cumpli cu Su boluntad. Daniel a mira tambe un persona “manera un yiu di hende”, esta Hesus, ricibi “dominio, gloria y un reino.” Cristo su gobernacion perfecto lo no dura pa un par di aña so. Al contrario, e ta “un dominio eterno cu lo no pasa nunca, y su reino ta un cu lo no wordo destrui.” (Dan. 7:​13, 14) E vision aki ta motiva nos pa confia den Jehova y den loke e ta haci. El a duna su Yiu Hesus, kende a demostra su fieldad a pesar di hopi prueba, autoridad riba e parti visibel di su organisacion. Jehova ta confia su Yiu. Pues, nos tambe por confia Hesus como nos Lider.

8. Ki efecto e visionnan di Jehova su organisacion tabatin riba Ezekiel y Isaias, y ki efecto nan mester tin riba nos?

 ⁸ Ki efecto e visionnan aki di e parti invisibel di Jehova su organisacion mester tin riba nos? Mescos cu Ezekiel, nos ta keda masha impresiona ora nos mira loke Jehova ta logrando. (Eze. 1:⁠28) Profeta Isaias tambe a mira den un vision loke tabata pasa den cielo. Ora e oportunidad a presenta pa e conta otro hende loke Jehova ta haciendo, el a probecha di esey sin vacila. (Lesa Isaias 6:​5, 8.) Isaias tabatin sigur cu Jehova a apoy’e, pesey e tabata sa cu nada lo por a strob’e di haci su trabou como profeta. Si nos medita riba Jehova su organisacion, nos tambe, mescos cu Isaias, lo keda masha impresiona cu ne y ser motiva pa haci mas den e sirbishi di Dios. Ta un gran animacion pa sa cu nos ta forma parti di un organisacion cu no ta para keto, cu ta concentra plenamente riba hacimento di e boluntad di Jehova!

9, 10. Dicon Jehova tabatin mester di un organisacion visibel riba tera?

⁹ Mediante Hesus, Jehova a organisa su sirbidornan riba tera pa nan por traha hunto cu e parti invisibel den cielo. Dicon tabatin mester di un organisacion visibel pa cumpli cu loke Mateo 24:⁠14 a profetisa? Laga nos analisa tres motibo.

¹⁰ Di prome, Hesus a declara cu e trabou di predica lo a hiba su discipelnan “te na e parti mas leu di tera.” (Echo. 1:⁠8) Di dos, mester a percura alimento spiritual y animacion pa esnan cu lo a participa den e trabou di predica. ( Juan 21:​15-⁠17) Di tres, mester a percura tambe pa reunionnan caminda esnan cu ta predica e bon noticia por a bin hunto pa adora Jehova y siña con pa predica. (Heb. 10:​24, 25) E siguidornan di Cristo lo no por a logra e metanan aki pa casualidad. Pa nan por tabatin exito, e trabou lo mester tabata bon organisa.

11. Con nos ta demostra cu nos ta apoya Jehova su organisacion?

¹¹ Con nos ta demostra cu nos ta apoya Jehova su organisacion? Un di e maneranan principal cu nos por haci esey ta mustrando confianza den e rumannan cu ta dirigi e trabou di predica. Jehova y Hesus ta confia nan, y nos tambe mester confia nan. E rumannan aki lo por a uza nan tempo y energia pa resolve e problemanan di e mundo aki. Pero nan no ta haci esey. Ta riba kico anto e parti visibel di Jehova su organisacion semper ta concentra?

12, 13. Con ancianonan cristian ta cumpli cu nan asignacion, y dicon esey ta un animacion pa bo?

¹² Na tur parti di mundo tin ancianonan cu experencia cu a ricibi e responsabilidad pa organisa y dirigi e trabou di predica den e pais caminda nan ta sirbi. Ora nan tin cu tuma decision, nan ta busca instruccion den e Palabra di Dios y ta lag’e sirbi como ‘un lampi pa nan pia y un luz pa nan caminda’, y cu fervor nan ta pidi Jehova pa e guia nan.​—⁠Sal. 119:⁠105; Mat. 7:​7, 8.

¹³ Mescos cu e ancianonan di prome siglo, esnan di awe cu ta organisa e trabou di predica e bon noticia ta pone “e sirbishi di e palabra di Dios” na prome luga. (Echo. 6:⁠4, nota) Nan ta keda masha contento di mira e progreso cu tin den e trabou di predica, tanto den nan pais como rond mundo. (Echo. 21:​19, 20) Nan no ta pone un cantidad di regla pa e pueblo di Dios. Mas bien, cu yudansa di e Palabra di Dios y bou di guia di spirito santo, nan ta concentra riba loke mester ser haci pa plama e bon noticia. (Lesa Echonan 15:⁠28.) Di e manera ey, e rumannan responsabel aki ta pone un ehempel excelente pa tur cristian den e congregacionnan local.​—⁠Efe. 4:​11, 12.

14, 15. (a) Kico ta ser haci pa yuda e trabou di predica rond mundo? (b) Kico bo ta pensa di e privilegio cu bo tin di apoya e trabou di predica e Reino?

¹⁴ Hopi di nos no ta mira esey, pero un cantidad di ruman ta traha diligentemente tur dia pa prepara e alimento spiritual pa nos publicacionnan, reunionnan y congresonan. Miles di boluntario ta traha masha duro pa traduci e alimento spiritual aki den mas cu 600 idioma; di e manera ey, mas tanto hende posibel por siña tocante “e obranan magnifico di Dios” den nan propio idioma. (Echo. 2:​7-⁠11) Rumannan hoben, tanto mucha homber como mucha muher, ta traha duro pa produci nos literatura cu yudansa di mashinnan di imprenta di alta velocidad y ekipo di kaft buki. Despues, ta manda e literatura aki na e congregacionnan, hasta na e partinan mas leu di mundo.

¹⁵ Den nos area tambe tin hopi ruman cu ta haci cierto trabou pa yuda nos concentra riba e predicacion di e bon noticia. Por ehempel, miles di ruman ta ofrece nan mes pa yuda traha Salon di Reino y Salon di Asamblea. Otronan ta yuda rumannan afecta pa desaster natural of cu tin mester di asistencia medico urgentemente. Tin rumannan ta organisa nos asambleanan y congresonan, y otronan ta instructor di scolnan di educacion teocratico. Kico ta e proposito di tur e trabou aki cu tin biaha ta tuma luga sin cu nos ta ripara? E rumannan ta hacie pa yuda nos predica e bon noticia, progresa den e berdad y yuda mas hende bira adorador di Jehova. Pues, e parti visibel di Jehova su organisacion definitivamente a keda pone e cosnan mas importante na prome luga.

16. Kico lo ta un bon proyecto di estudio di Bijbel pa bo of pa bo famia?

¹⁶ Nos ta tuma tempo pa de bes en cuando medita riba loke Jehova su organisacion ta haciendo? Tin ruman ta traha tempo pa investiga e asuntonan aki durante nan adoracion como famia of nan estudio personal y pa medita riba nan. Por ehempel, lo ta emocionante pa studia e visionnan di Isaias, Ezekiel, Daniel y Juan. E buki Testigonan di Jehova​—⁠Proclamadornan di e Reino di Dios y otro publicacionnan of DVD cu tin disponibel na un idioma cu bo ta compronde tambe por siña nos hopi cos interesante tocante Dios su organisacion.

17, 18. (a) Con e articulo aki a yuda bo? (b) Kico lo ta bon pa bo puntra bo mes?

¹⁷ Ta bon pa nos medita riba e manera cu Jehova ta uza su organisacion pa efectua e trabou di predica. Mescos cu e organisacion maraviyoso aki, laga nos sigui concentra riba e cosnan mas importante. Esey lo fortifica nos pa ta mes determina cu Pablo, kende a skirbi: “Como cu nos tin e sirbishi aki segun e misericordia cu a ser mustra na nos, nos no ta entrega.” (2 Cor. 4:⁠1) El a anima e rumannan tambe pa “no stop di haci loke ta bon, pasobra na e debido tempo nos lo cosecha si nos no cansa.”​—⁠Gal. 6:⁠9.

¹⁸ Tin cambio cu abo of bo famia mester haci pa boso por pone loke ta mas importante na prome luga den boso bida diario? Boso lo por simplifica boso bida of limita cierto actividadnan pa boso por haci mas den e trabou di predica? Den e siguiente articulo, nos lo analisa cinco cos cu lo yuda nos imita e ehempel di e organisacion activo di Jehova y mantene nos entusiasmo den Dios su sirbishi.