1, 2. O le ā le valoaga i aso e gata ai na taumānatu ai le ʻausoo?

NA MAMAFA i mafaufau o Peteru, Iakopo, Ioane ma Aneterea, le fetalaiga a Iesu o le a faaumatia le malumalu i Ierusalema. (Mare. 13:1-4) Ina ua na o i latou ma Iesu, ona latou fesili lea “pe e oo afea ia mea, ma o le ā foʻi le faailoga o lou faatasi mai, ma le taufaaiʻuiʻuga o le faiga o mea a le lalolagi?” (Mata. 24:1-3) Na taʻu atu e Iesu iā i latou mea o le a tutupu a o leʻi faaumatia Ierusalema, faapea foʻi le iʻuga o le lalolagi a Satani. Na faamatala e Iesu o le a iai taua, oge, ma mea leaga uma. Peitaʻi, na ia faailoa foʻi se mea lelei o le a tupu, ina ua ia fetalai: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.”​—Mata. 24:7-14.

² Na talaʻia e Iesu ma ona soo le tala lelei o le Malo. (Luka 8:1; 9:1, 2) Atonu na latou manatua le fetalaiga a Iesu i le Luka 10:2 e faapea: “E moni, e tele le saito e seleseleina, a ua toʻaitiiti le ʻaufaigaluega. O lea, ia ʻaiʻoi atu ai i le Matai o le seleselega, ina ia aauina mai se ʻaufaigaluega mo lana seleselega.” Ae atonu na latou taumānatu: ʻE faapefea ona oo le talaʻiga i le “lalolagi atoa,” ma avatu se “molimau i atunuu uma”? O fea o le a maua mai ai se ʻaufaigaluega?’ Atonu e maofa le ʻausoo i le auala ua faataunuu ai le Mataio 24:14 i aso nei.

3. (i) Aiseā e talafeagai ai upu a Iesu i le Luka 21:34 i aso nei? (ii) O le ā le iloiloga e tatau ona faia e le tagata lava ia?

³ Ua taunuu upu a Iesu i o tatou aso, auā e faitau  miliona ua talaʻia le tala lelei o le Malo i le lalolagi aoao. (Isa. 60:22) Peitaʻi, na taʻua e Iesu e iai nisi o le a faigatā ona faamuamua le talaʻiga i o latou olaga. E popole isi i mea o le olaga ma lofitūina ai i latou. (Faitau le Luka 21:34.) E talafeagai le fetalaiga a Iesu i aso nei, ona ua lē o toe faamuamua e isi mea e tāua i le olaga. E faamaonia lea tulaga pe a faia a latou filifiliga i galuega, aʻoaʻoga, ma meafaitino. Ua faaalu e nisi le tele o le taimi i faafiafiaga ma taaloga. Ua faaitiitia le maelega o nisi i le auaunaga ona o le popole i meafai o le olaga. O lea, ia fesili ifo le tagata lava ia, ʻPo o oʻu faamuamua le finagalo o le Atua i loʻu olaga?’

4. (i) O le ā na tatalo ai Paulo mo Kerisiano i Filipi, ma aiseā? (ii) O le ā o le a iloiloina i lenei mataupu ma le mataupu e sosoo ai, ma o le ā le aogā iā i tatou?

⁴ Sa galulue mamafa Kerisiano i le uluaʻi senituri e faamuamua mea faaleagaga i o latou olaga. O le māfuaaga lea na tatalo ai Paulo mo Kerisiano i Filipi ina ia ʻfaamautinoa mea e sili ona tāua.’ (Faitau le Filipi 1:9-11.) E pei o Paulo, o le toʻatele foʻi i tuā i inā na ʻatili faamalolosi e tautatala atu ma le lē fefefe i le afioga a le Atua.’ (Fili. 1:12-14) O loo faaalia foʻi e le toʻatele i aso nei le lototele i le talaʻia o le Afioga a le Atua. Peitaʻi e faalaeiauina atili i tatou, i le iloiloina o le auala ua faaaogā ai e Ieova lana faalapotopotoga e faataunuu ai le Mataio 24:14. O le ā o loo faia e le faalapotopotoga a le Atua, ma e faapefea ona aafia ai o tatou aiga? O le a iloiloina i le isi mataupu, po o le ā e fesoasoani iā i tatou e tumau i le auaunaga, ma mulimuli i le taʻitaʻiga a le faalapotopotoga a Ieova.

5, 6. (i) Aiseā ua faailoa mai ai e Ieova i ana auauna mea o loo tutupu i le lagi? (ii) O le ā le faaaliga sa vaaia e Esekielu?

⁵ E leʻi tuuina e Ieova isi faamatalaga i le Tusi Paia, e pei o le auala e gaoioi ai le faiʻai o le tagata, faapea le vateatea. Nai lo o lea, ua ia aumaia faamatalaga e tatou te malamalama ai i lona finagalo ma usiusitaʻi iā te ia. (2 Timo. 3:16, 17) E mataʻina faamatalaga ua faailoa mai e Ieova e faatatau i le vaega lē vaaia o lana faalapotopotoga, e ala mai i tusi o Isaia, Esekielu, Tanielu ma le Faaaliga. (Isa. 6:1-4; Eseki. 1:4-14, 22-24; Tani. 7:9-14; Faaa. 4:1-11) Aiseā ua faailoa mai ai e Ieova iā i tatou nisi o mea o loo tutupu i le lagi?

⁶ E finagalo Ieova e tatou te iloa, o i tatou o se vaega o lana faalapotopotoga i le aoao o mea. O loo galue malosi le vaega lē vaaia o le faalapotopotoga a Ieova e faia Lona finagalo. I le vaaiga na iloa e Esekielu, na ia vaaia ai le vaega faalelagi o le faalapotopotoga a Ieova o loo faaātaina e se kariota telē. E saoasaoa lenei kariota, ma e faigofie ona fesuiaʻi itulagi e agaʻi i ai. (Eseki. 1:15-21) Na ia faapea mai e faatatau i Lē o loo tiʻetiʻe i le kariota: “Ua ou vaai ai i se mea e pei o le pupula o le auro ua fefiloi ma le siliva, e pei o le afi ua faataamilo ai i totonu.” Na ia faapea atili mai: “E foliga mai  e pei o le mamalu o Ieova.” (Eseki. 1:25-28) Na matuā maofa Esekielu i le vaaiga na ia vaaia. Na ia iloa ai o loo faatonutonu e Ieova lana faalapotopotoga e ala i lona agaga paia. O le auala e gaoioi ai lenei kariota, ua faataʻitaʻi mai ai le auala o loo gaoioi ai le vaega lē vaaia o lana faalapotopotoga.

7. E faapefea i le vaaiga a Tanielu ona aumaia se uiga mautinoa iā i tatou?

⁷ E tatou te maua foʻi le mautinoa i se vaaiga na iloa e Tanielu. Na ia vaaia ai Ieova o “Lē e mai anamuā ona aso,” o loo afio i se nofoālii e iai ona uili. (Tani. 7:9) Na finagalo Ieova e iloa e Tanielu o loo gaoioi lana faalapotopotoga e faia lona finagalo. Na iloa foʻi e Tanielu “se tasi e pei o le atalii o le tagata” po o Iesu, ua tuuina i ai le pule o le vaega vaaia o le faalapotopotoga a Ieova. E lē pule Iesu mo sina taimi puupuu. Peitaʻi, o lana pulega “e tumau e lē mavae atu, e lē faaumatia foʻi lona malo.” (Tani. 7:13, 14) Ua uunaʻia e lenei vaaiga i tatou e faatuatuaina Ieova, faapea lo tatou Taʻitaʻi o Iesu, ona ua tuuina e Ieova iā te ia le pule.

8. (i) Na faapefea ona aafia Esekielu ma Isaia i vaaiga na laʻua vaaia? (ii) E faapefea ona tatou aafia ai?

⁸ E faapefea i nei vaaiga ona tatou aafia ai? E pei o Esekielu, e tatou te lagona le faagaeetia ona o mea ua faataunuuina e Ieova. (Eseki. 1:28) Na vaaia foʻi e Isaia se vaaiga o mea o loo  tutupu i le lagi. O lea na ia lotomalie ai e talia le valaaulia e faailoa atu i isi na vaaiga. (Faitau le Isaia 6:5, 8.) O le fesoasoani a Ieova, na mautinoa ai e Isaia e leai se mea e taofia lana galuega faaperofeta. I se tulaga talitutusa, e tatou te lagolagoina le faalapotopotoga a Ieova e ala i le faatele o lo tatou sao i le auaunaga. E faalaeiauina foʻi i tatou i le iai i se faalapotopotoga o loo faia le finagalo o Ieova.

9, 10. Aiseā e manaʻomia ai se vaega vaaia o le faalapotopotoga a Ieova?

⁹ Na faavaeina foʻi e Ieova e ala iā Iesu le vaega faalelalolagi o Lana faalapotopotoga, ina ia galulue faatasi ma le vaega faalelagi. Na ia faia lea fuafuaga ina ia faataunuu ai le galuega o loo taʻua i le Mataio 24:14. Aiseā? Seʻi o tatou iloiloina ni māfuaaga se tolu.

¹⁰ Muamua, na taʻua e Iesu o le a talaʻi atu ona soo i “tuluʻiga uma o le lalolagi.” (Galu. 1:8) Lona lua, e manaʻomia e i latou e faia le galuega talaʻi taʻiala mai le Tusi Paia ma faalaeiauga. (Ioa. 21:15-17) Lona tolu, e manaʻomia ona latou auai i sauniga ina ia tapuaʻi ai iā Ieova, ma faaauupegaina i latou mo le galuega. (Epe. 10:24, 25) Ina ia faataunuu nei vala uma, e tatau ona maopoopo soo o Iesu.

11. E faapefea ona tatou lagolagoina le faalapotopotoga a Ieova?

¹¹ O se tasi auala e tatou te lagolagoina ai le faalapotopotoga a Ieova, o le maufaatuatuaina lea o uso o loo taʻimua i le talaʻiga. E tatau ona maufaatuatuaina i latou, auā ua maufaatuatuaina foʻi i latou e Ieova ma Iesu. Atonu e mafai ona faaalu e nei uso o latou taimi ma le malosi i meafai a le lalolagi. Peitaʻi, e latou te lē o faia faapea. O lea, seʻi o tatou iloiloina le taulaʻiga autū o le vaega faalelalolagi o le faalapotopotoga a Ieova.

12, 13. Ua faapefea ona faataunuu tiute tauave o toeaina, ma e faapefea ona faalaeiauina ai i tatou?

¹² Ua iai i toeaina i le lalolagi aoao le tiute tauave o le faamaopoopo ma taʻimua i le talaʻiga i atunuu o loo galulue ai. E latou te mulimuli i taʻiala mai le Tusi Paia e avea ma ʻsulu i o latou vae ma malamalama i o latou ala.’ E latou te tatalo foʻi i le taʻitaʻiga a Ieova, pe a faia a latou faaiʻuga.​—Sala. 119:105; Mata. 7:7, 8.

¹³ E pei o toeaina i le uluaʻi senituri, o loo faamuamua foʻi e toeaina o loo taʻimua i le talaʻiga le “faiva e tusa ai ma le afioga a le Atua.” (Galu. 6:4) E faafiafiaina i latou i le agaʻigaʻi i luma o le talaʻiga i o latou lava atunuu ma le lalolagi aoao. (Galu. 21:19, 20) E latou te lē faia ni tulafono faasāsā naʻuā mo tagata o Ieova. Nai lo o lea, e latou te uaʻi atu i vala e faalautele ai le feʻau e tusa ma taʻiala o le Tusi Paia, faapea le taʻitaʻiga a le agaga paia. (Faitau le Galuega 15:28.) O le faia faapea, ua latou faataatia ai se faaaʻoaʻoga lelei mo uso ma tuafāfine.​—Efe. 4:11, 12.

14, 15. (i) O ā sauniuniga ua fesoasoani iā i tatou i le talaʻiga? (ii) O ā ou faalogona i le faaeaga o le lagolagoina o le galuega talaʻi?

 ¹⁴ E galulue o tatou uso i aso taʻitasi i le sauniunia o lomiga, faapea mataupu mo sauniga ma tauaofiaga. O se faataʻitaʻiga, e galulue mamafa le toʻatele o ē tauofo e faaliliu lomiga i le silia ma le 600 gagana. O le iʻuga, ua iloa e le toʻatele “mea matagofie a le Atua,” i a latou lava gagana. (Galu. 2:7-11) E galulue mamafa uso ma tuafāfine i le lomia ma le tuufaatasia o lomiga. E auina atu nei lomiga i faapotopotoga, e oo lava i nofoaga maotua.

¹⁵ I o tatou lava vaipanoa, e galulue le toʻatele i galuega e fesootaʻi atu i le talaʻia o le tala lelei o le Malo. O se faataʻitaʻiga, e toʻatele e galulue i le fausiaina o Maota mo Sauniga ma Maota mo Fonotaga. E fesoasoani nisi i vaipanoa na afātia i mala faalenatura ma mataupu faafomaʻi. E faamaopoopo e isi fonotaga ma tauaofiaga, ae avea nisi ma faiaʻoga i aʻoga faale-Tusi Paia. Ua fesoasoani nei galuega iā i tatou i le talaʻia o le tala lelei. E lē gata i lea, o lo tatou tuputupu aʻe faaleagaga, faapea le fesoasoani i isi e avea ma tagata tapuaʻi o Ieova. O loo faamuamua e le vaega faalelalolagi o le faalapotopotoga a Ieova, mea e tatau ona faamuamua.

16. O ā mataupu e mafai ona suʻesuʻeina i le tapuaʻiga a le aiga ma suʻesuʻega a le tagata lava ia?

¹⁶ Pe e te faaalu se taimi e manatunatu ai i le auala o loo faagaoioi ai le faalapotopotoga a Ieova? Ia faia ni au saʻiliʻiliga pe a faia le tapuaʻiga a le aiga, po o au lava suʻesuʻega ma manatunatu i ai. O se faataʻitaʻiga, ia suʻesuʻe vaaiga o loo i tusi a Isaia, Esekielu, Tanielu ma le Faaaliga. E tatou te aʻoaʻoina foʻi le tele o vala e faatatau i le faalapotopotoga a Ieova, e ala mai le Jehovah’s Witnesses—Proclaimers of God’s Kingdom, faapea DVD ma isi lomiga faale-Tusi Paia.

17, 18. (i) O le ā le aogā o lenei mataupu iā te oe? (ii) O ā fesili e tatau ona iloiloina e le tagata lava ia?

¹⁷ E tāua le manatunatu i le auala o loo faaaogā ai e Ieova lana faalapotopotoga e lagolagoina le galuega talaʻi. Ia tatou faataʻitaʻi i lenā faalapotopotoga, i le faamuamua lea o mea e sili ona tāua. O le a tutusa ai o tatou faalogona ma le aposetolo o Paulo ina ua ia tusi: “Matou te lē faavaivai ai, talu ai ua tuuina mai iā i matou lenei faiva, e tusa ma le alofa mutimutivale na faaalia mai iā i matou.” (2 Kori. 4:1) Na ia faalaeiau foʻi ona uso e faapea: “Aua neʻi o tatou fiu e faia le mea lelei, auā e iai le taimi e tatou te selesele mai ai, pe a tatou lē faavaivai.”​—Kala. 6:9.

¹⁸ Pe e iai ni fetuutuunaʻiga e manaʻomia ona tatou faia po o tatou aiga foʻi ina ia faamuamua ai mea e sili ona tāua i le olaga? Pe e mafai ona faafaigofie o tatou olaga ina ia faatele ai lo tatou sao i le talaʻiga? O le a iloilo i le isi mataupu vala e lima e fesoasoani iā i tatou e piiama ai i le faalapotopotoga a Ieova.