1, 2. Ngusiphi siphrofetho lesimayelana netikhatsi tekuphela lebesitawumangalisa bafundzi baJesu, futsi yini lebeyitawubangela loko?

BOPHETRO, Jakobe, Johane na-Andreya bagcine sebahleli bodvwa neNkhosi yabo. Emavi aJesu lamayelana nekubhujiswa kwelithempeli abesolo abahlupha etingcondvweni tabo. (Mak. 13:1-4) Ngako babuta batsi: “Sitjele kutsi letintfo tiyakwenteka nini, kuyakwentekani lokuyawukhombisa kutsi sesikhatsi sekubuya kwakho nekutsi sekuphela kwetikhatsi?” (Mat. 24:1-3) Jesu wacala kubatjela ngetintfo lebetitawenteka nobe timo lebetingeke tigcine ngekushintja kuphila kwebantfu kodvwa lebetitawukhombisa kutsi sikhatsi sekuphela kwalelive laSathane lelibi sesisondzele. Lokunye Jesu lakutjela bafundzi bakhe kwabamangalisa kakhulu. Ngemuva kwekubatjela letintfo letibuhlungu letifaka ekhatsi timphi, kusweleka kwekudla nekwandza kwekungalungi, Jesu wabiketela lokunye lokuhle lebekutawukhombisa kutsi emalanga ekugcina sewasondzele. Watsi: “LeliVangeli ngembuso liyawushunyayelwa emhlabeni wonkhe, kuze kube bufakazi etiveni tonkhe, bese-ke kuyefika kuphela.”—Mat. 24:7-14.

² Bafundzi baJesu bebakujabulela kushumayela tindzaba letimnandzi teMbuso bakanye naKhristu. (Luk. 8:1; 9:1, 2) Kungenteka bawakhumbula emavi lawasho latsi: “Kuvuna kukhulu, kodvwa tisebenti tincane. Thandazani kumnikati wekuvuna kutsi atfumele letinye tisebenti tekuvuna.” (Luk. 10:2) Kodvwa bebatawushumayela njani “emhlabeni wonkhe, kuze kube bufakazi etiveni tonkhe”? Betitawuchamuka kuphi tisebenti? Kube mane nabo bebanelikhono lekubona loko lokutawenteka esikhatsini lesitako njengobe bebahleli naJesu. Nakanjani bebatawumangala kubona kugcwaliseka kwalamavi lesiwafundza kuMatewu 24:14.

3. Lukha 21:34 ugcwaliseka njani lamuhla, futsi ngukuphi kutihlola lokufanele sikwente?

³ Siphila esikhatsini sekugcwaliseka kwesiphrofetho  saJesu. Tigidzi tebantfu tibe nencenye kute letindzaba letimnandzi teMbuso tishunyayelwe emhlabeni wonkhe. (Isa. 60:22) Nobe kunjalo, Jesu waveta kutsi esikhatsini sekuphela labanye bebatakutfola kumatima kwenta lomsebenti ute kucala ekuphileni kwabo. ‘Bebatawutifaka kakhulu’ kuletinye tintfo futsi babe matasatasa ngato. (Fundza Lukha 21:34.) Siyakubona nekugcwaliseka kwalawo mavi. Labanye bantfu baNkulunkulu baphatamiseka kakhulu. Loku singakubona etincumeni labatentako letimayelana nemsebenti wekutiphilisa, imfundvo lephakeme, sifiso sekuba netintfo talelive nesikhatsi labasisebentisa emidlalweni futsi batijabulisa. Labanye baphelelwa ngemandla ngobe bakhatsateka baphindze bacindzetelwe kuphila kwamalanga onkhe. Tibute: ‘Mine ngenta njani kuloku? Tincumo lengitentako titsi yini leta kucala ekuphileni kwami?’

4. (a) Yini Pawula layithantazela ngemaKhristu aseFiliphi, futsi wakwentelani loko? (b) Yini lesitawucoca ngayo kulesihloko nakulesilandzelako, futsi sinamuphi umgomo?

⁴ EmaKhristu labephila ngelikhulu lekucala bekudzingeka ente imetamo yekubeka imisebenti yaNkulunkulu ite kucala ekuphileni kwawo. Kungaleso sizatfu umphostoli Pawula athantazela kutsi baseFiliphi ‘baciniseke ngetintfo letibaluleke kakhulu.’ (Fundza Filiphi 1:9-11, NW.) Njengemphostoli Pawula, bantfu labanyenti bangaleso sikhatsi bebakhombisa “sibindzi lesikhulu eNkhosini sekukhuluma livi laNkulunkulu ngekungesabi.” (Fil. 1:12-14) Nalamuhla, linyenti letfu lishumayela liVi laNkulunkulu ngesibindzi. Nobe kunjalo, kucabanga ngetintfo letentiwa yinhlangano yaJehova lamuhla kungasisita yini kutsi siwunake kakhulu lomsebenti wekushumayela lobaluleke kangaka? Yebo, kungasisita. Kulesihloko, sitawuhlola emalungiselelo Jehova lawentile kute asite ekugcwalisekeni kwemavi lakuMatewu 24:14. Yini leyentiwa ngulenhlangano, futsi kukwati loko kutasikhutsata njani tsine nemindeni yetfu? Esihlokweni lesilandzelako, sitawucoca ngaloko lokungasisita kutsi sikhutsatele futsi sichubeke sihambisana nenhlangano yaJehova.

5, 6. (a) Yini leyenta Jehova wasinika imibono lemayelana nencenye yenhlangano yakhe yasezulwini? (b) Yini leyabonwa nguHezekeli embonweni?

⁵ Tinyenti tintfo Jehova lakhetse kungatifaki eVini lakhe. Sibonelo saloku kutsi akazange asitjele imininingwane lemayelana nekutsi ingcondvo nemhlaba kusebenta njani, ngisho nobe kwati loko bekungasijabulisa kakhulu. Esikhundleni saloko, Jehova usinike imininingwane lesiyidzingako kute sicondze tinjongo takhe nekutsi siphile ngekuvumelana nato. (2 Thim. 3:16, 17) Kujabulisa kakhulu kwati kutsi kunalokutsite liBhayibheli lelisitjela kona ngencenye yenhlangano yaJehova lesingayiboni. Sivele sibambe wangentasi nasifundza imininingwane lemayelana nemalungiselelo enhlangano yaJehova yasezulwini, lebhalwe ngu-Isaya, Hezekeli naDanyela naleyo lesencwadzini yeSembulo leyabhalwa nguJohane. (Isa. 6:1-4; Hez. 1:4-14, 22-24; Dan. 7:9-14; Semb. 4:1-11) Kushengatsi Jehova ususe inkhungu lebeyisisitsa futsi wasivumela sabona loko lokwenteka ezulwini. Yini leyente Nkulunkulu wasinika lolwati?

⁶ Jehova ufuna sihlale sikhumbula kutsi siyincenye yenhlangano yemhlaba wonkhe. Kunyenti lokwentiwako kute kusekelwe tinjongo taJehova kunaloko tsine lesikubonako. Nasi sibonelo: Hezekeli wabona incenye yenhlangano yaJehova lengabonakali ifananiswa nenkhalishi lenkhulu yasezulwini. Lenkhalishi ingagijima kakhulu iphindze yente lushintjo nobe nini. (Hez. 1:15-21) Indlela lisondvo ngalinye lelijikeleta ngayo lenta  lenkhalishi ihambe libanga lelidze. Hezekeli waphindze wabona lokutsite ngeMgibeli walenkhalishi. Utsi: “Ngabona kutsi kusukela kuloko lokwakubonakala shangatsi kulukhalo lwakhe kuya ngenhla kwalo abefanana nelitfusi lelimanyatelako, kube shangatsi ligcwele umlilo . . . Loku bekukubonakala lokwakubonakalisa bukhosi baSimakadze.” (Hez. 1:25-28) Kungenteka kutsi kwayitsintsa kakhulu inhlitiyo yaHezekeli kubona lemibono. Wabona Jehova acondzisa inhlangano yakhe nendlela lesebenta ngayo ngelusito lwemoya wakhe longcwele. Iyamangalisa indlela lefanekiswe ngayo incenye yenhlangano yaJehova yasezulwini lesebentako.

7. Loko lokwabonwa nguDanyela kusenta njani sibe nelitsemba?

⁷ NaDanyela wabona lokunyenti lokungasenta sibe nelitsemba. Wabona Jehova afananiswa ‘naLophila Phakadze Naphakadze’ lohleli esihlalweni lesivutsa emalangabi. Lesihlalo besinemasondvo. (Dan. 7:9) Jehova abefuna Danyela abone kutsi inhlangano yaKhe iyachubeka isebenta futsi ifeza injongo yaKhe. Danyela waphindze wabona lomunye “labenjengendvodzana yemuntfu,” Jesu, anikwa emandla ekubusa incenye yenhlangano yaJehova lesemhlabeni. Kubusa kwaKhristu lokuphelele angeke nje kutsatse iminyaka lembalwa. Kodvwa “kubusa kwakhe kukubusa kwaphakadze naphakadze lokungasoze kwaphela, nembuso wakhe ngulowo longasoze wacitfwa.” (Dan. 7:13, 14) Loku kusikhutsata kutsi setsembele kuJehova sinake naloko lakwentako. Unike iNdvodzana yakhe levivinyiwe futsi leyetsenjwako, lenguJesu “emandla ekubusa, nenkhatimulo, nebukhosi.” Jehova uyayetsemba iNdvodzana yakhe. Ngako singakwetsemba nekubusa kwaJesu.

8. Lemibono levela kuJehova yamtsintsa njani Hezekeli na-Isaya, futsi kufanele isitsintse njani tsine?

 ⁸ Lemibono lemayelana nencenye yenhlangano yaJehova lengabonakali isitsintsa njani? NjengaHezekeli, loko Jehova lakwentako kusishiya simangele futsi sitsintseke tinhlitiyo. (Hez. 1:28) Kuzindla ngenhlangano yaJehova kungaba nemiphumela lefana naleyo leyabakhona ku-Isaya. Ngesikhatsi kuvela litfuba lekutsi atjele bantfu loko lokwentiwa nguJehova, walisebentisa ngekungangabati. (Fundza Isaya 6:5, 8.) Isaya abenelitsemba lekutsi Jehova utamsekela futsi utawuphumelela kunobe ngutiphi tinsayeya latawuhlangabetana nato. Ngendlela lefananako, lemininingwane lemayelana nenhlangano yaJehova lengabonakali kufanele isimangalise futsi isikhutsate kutsi sente lokutsite. Kuzuzisa kakhulu kufundza ngalenhlangano lechubeka itfutfuka futsi umgomo wayo ukwenta tinjongo taJehova.

9, 10. Yini leyenta idzingeke incenye lebonakalako yenhlangano yaJehova?

⁹ Asebentisa iNdvodzana yakhe, Jehova wenta emalungiselelo alapha emhlabeni latawuhambisana nencenye yenhlangano yakhe lengabonakali. Yini leyenta lenhlangano lebonakalako idzingeke kute ifeze lomsebenti lochazwe kuMatewu 24:14? Cabanga ngaletizatfu letintsatfu.

¹⁰ Sekucala, Jesu watsi lomsebenti wekushumayela utawuhambisa bafundzi bakhe “kuze kube ngusekugcineni kwemhlaba.” (Imis. 1:8) Sesibili, lamalungiselelo atawudzingeka kute labo labenta lomsebenti batfole ticondziso teliBhayibheli futsi bakhutsatwe. (Joh. 21:15-17) Sesitsatfu, lamalungiselelo bekutawudzingeka entiwe kute labo labashumayela letindzaba letimnandzi bahlangane ndzawonye kute bakhonte Jehova futsi bafundziswe tindlela tekwenta lomsebenti. (Heb. 10:24, 25) Bekungeke kumane kwenteke simangaliso kutsi lemisebenti iphumelele. Kute balandzeli baKhristu baphumelele, bekutawudzingeka kutsi lomsebenti uhlelwe kahle.

11. Sikhombisa njani kutsi siyawasekela emalungiselelo lentiwa yinhlangano yaJehova?

¹¹ Sikhombisa njani kutsi siyawasekela emalungiselelo lentiwa yinhlangano yaJehova? Lenye indlela lebalulekile kutsi sibetsembe labo lababekwe nguJehova naJesu kutsi basicondzise kulomsebenti wekushumayela. Tinyenti tintfo lamuhla letenta bantfu kulelive bancintisane nalabo labaphetse live labo. Nobe kunjalo, bewusolo uyini umgomo walencenye lebonakalako yenhlangano yaJehova?

12, 13. Labadzala labangemaKhristu bawenta njani umsebenti wabo, futsi loko kukukhutsata njani?

¹² Labadzala labangemaKhristu labanalokuhlangenwe nako labasemhlabeni wonkhe, bakhetfwe kutsi bachubeke banaka futsi batfutfukise indlela umsebenti wekushumayela ngeMbuso lowentiwa ngayo endzaweni labahlala kuyo. Njengobe labazalwane benta tincumo, bafuna sicondziso eVini laNkulunkulu futsi balente ‘sibane etinyaweni tabo nekukhanya endleleni yabo,’ bathantaze ngebucotfo kuJehova bamcele abacondzise.—Hla. 119:105; Mat. 7:7, 8.

¹³ Njengalabo labebacondzisa emabandleni ngelikhulu lekucala, labadzala labangemaKhristu labanakekela umsebenti wekushumayela lamuhla, bayatinikela “nasemsebentini wekushumayela livi.” (Imis. 6:4) Bajabula kakhulu ngentfutfuko leba khona emsebentini wekushumayela tindzaba letimnandzi endzaweni yakubo nasemhlabeni wonkhe. (Imis. 21:19, 20) Ababeki imitsetfo lengapheli netincumo letilukhuni. Esikhundleni saloko,  basebentisa imiBhalo balandzele nesicondziso semoya longcwele waNkulunkulu njengobe benta emalungiselelo ladzingekako kute asite umsebenti wekushumayela uchubekele embili. (Fundza Imisebenti 15:28.) Ngekwenta njalo, lamadvodza labekiwe ababekela sibonelo lesihle bonkhe labasemabandleni endzawo yabo.—Ef. 4:11, 12.

14, 15. (a) Ngumaphi emalungiselelo lentiwe ekusekela umsebenti wekushumayela emhlabeni wonkhe? (b) Utiva njani ngencenye lonayo ngekusekela umsebenti wekushumayela ngeMbuso?

¹⁴ Bantfu labanyenti abatiboni tisebenti letenta tincwadzi tetfu, letihlela imihlangano yelibandla nalemikhulu. Letisebenti tekutitsandzela letinyenti tisebenta ngenkhutsalo kute tihumushe tincwadzi ngetilwimi letingaba ngu-600 kute bantfu labanyenti bafundze “ngemisebenti lemikhulu yaNkulunkulu” ngelulwimi lwabo. (Imis. 2:7-11) Bazalwane nabodzadze labasebasha benta umsebenti wekukhicita tincwadzi tetfu ngemishini yekunyatselisa neyekuhlanganisa tincwadzi lesebenta ngelitubane lelisetulu. Letincwadzi tibese titfunyelwa emabandleni ngisho nakulawo lakhashane kakhulu.

¹⁵ Kwentiwe emalungiselelo lamanyenti kute sinake umsebenti wekushumayela tindzaba letimnandzi nemabandla etfu. Nasi sibonelo: Tinkhulungwane tebantfu tiyavolontiya kute tisite ekwakheni emaHholwa eMbuso nemaHholwa eMihlangano lemikhulu, tisita labo labehlelwe tinhlekelele temvelo, labasetimeni letiphutfumako tetemphilo, tihlele imihlangano yetfu lemincane nalemikhulu tiphindze tifundzise etikolweni temaKhristu, simane nje sibala lokumbalwa kwaloko lokwentiwako. Iyini injongo yalemisebenti? Kutfutfukisa umsebenti wekushumayela tindzaba letimnandzi, kusita labo labenta lomsebenti kutsi babe nebuhlobo lobuhle naNkulunkulu nekutfutfukisa kukhonta kweliciniso. Lencenye yenhlangano yaJehova lesemhlabeni iyachubeka yini inake tintfo letibaluleke kakhulu? Yebo iyachubeka.

16. Ngumiphi imisebenti longayenta nawutichubela sifundvo seliBhayibheli nobe ekukhonteni kwemndeni?

¹⁶ Siyatinika yini sikhatsi sekubuka imisebenti yenhlangano yaJehova? Labanye bakhetse kucwaninga nobe kuzindla ngaloku ekukhonteni kwabo kwemndeni nobe esifundvweni labatichubela sona. Lemibono leyanikwa Isaya, Hezekeli, Danyela naJohane ingenta sifundvo lesihle kakhulu. Incwadzi letsi “OFakazi BakaJehova—Abamemezeli BoMbuso KaNkulunkulu” naletinye tincwadzi nobe ema-DVD latfolakala ngelulwimi lwakho, angakunika lwati loluhle kakhulu ngalenhlangano.

17, 18. (a) Loko lesicoce ngako kukuzuzise njani wena? (b) Ngumiphi imibuto lokufanele sicabange ngayo?

¹⁷ Kuzindla ngaloko Jehova lakwentako enhlanganweni yakhe kungakusita kakhulu. Shengatsi singakhetsa kuchubeka sinake tintfo letibaluleke kakhulu sikanye nalenhlangano lemangalisako. Kwenta njalo kungasinika emandla ekutimisela njengaPawula, lowabhala watsi: “Nkulunkulu ngemusa wakhe wasiniketa lenkonzo; ngiko nje singadzinwa.” (2 Khor. 4:1) Waphindze wakhutsata tisebenti lakanye nato ngekutsi: “Asingadzinwa kwenta lokuhle; ngobe nasingadzinwa, siyawuvuna ngesikhatsi lesifanele.”—Gal. 6:9.

¹⁸ Tikhona yini tingucuko lokudzingeka tsine sitente nobe njengemindeni kute siciniseke ngetintfo letibaluleke kakhulu ekuphileni kwetfu kwamalanga onkhe? Singakwenta yini kuphila kwetfu kube melula nobe sinciphise tintfo letisiphatamisako kute sinake umsebenti lobaluleke kakhulu wekushumayela? Esihlokweni lesilandzelako, sitawucoca ngetintfo letisihlanu letingasisita kutsi sichubeke sihambisana nenhlangano yaJehova.