1, 2. Ka hanma kwaghôron u profeti u sha kwagh u ayange a masejime, adooga yange una doo mbahenen mba Yesu, man ka sha ci u nyi?

YANGE Yakobu man Yohane man Anderia mase shin vea Orvesen ve Yesu tseegh. Mkaanem ma Yesu vande ôron a ve sha kwagh u mtim u Yerusalem la na asema yuhwa ve ker. (Mar. 13:1-4) Tsô ve kaa ér: “Kera kaa ase se yôô, ka hanma shighe man akaa ne aa ere? Man ka nyi ia lu ikyav i sha mve Wou la man i mkurtara?” (Mat. 24:1-3) Yesu maa hii u ôron ve akaa a aa er cii man mtim u Yerusalem la, kua akaa a aa er ken ayange a masejime a tar u Satan ne kpaa. A̱ shi nan kpa, kwagh ugen u Yesu ôr ve la yange una doo ve u ungwan. Yesu er ve kwagh u ityav mbi nôngon man ijen man mseer u mvende u vendan atindi cii yô, a tsengaôron kwagh u injaa u una er ken ayange a masejime yô. A kaa ér: “Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”—Mat. 24:7-14.

² Yange doo mbahenen mba Yesu u pasen loho u Tartor u Aôndo vea na kpen kpen. (Luka 8:1; 9:1, 2) Alaghga yange vea umbur kwagh u ôr ve sha kwagh u sunda la, ér: “Sunda yô, ngee, kpa mbatomov yô, gema mba ciôn tsô; nahan yô, sôn nen Ter u sunda A̱ tindi mbatomov ken sunda Na.” (Luka 10:2) Kpa a er nan man vea pase kwagh ‘á tser tar, sha u u̱ lu mpase hen akuraior ciilii’? Á zua a mbatomov mba kwagh gba sha a ve la hana? Yange vea fe kwagh u una va er ken hemen, zum u ve tema vea Yesu sha iyange la yô, ma kpiligh ve iyol a mkur u mkaanem ma se ôron ken Mateu 24:14 nyian la!

3. Luka 21:34 ngu kuren sha mi nyian nena, man doo u se tôv ayol a ase nena?

³ Se mba ken shighe u kwagh u Yesu tsengaôron la a lu kuren sha mi yô. Ior umiliôn umiliôn zua imôngo  sha u pasen loho u dedoo u Tartor u Aôndo sha tar cii. (Yes. 60:22) Nahan kpa, Yesu yange tese ér a taver mbagenev u nan ishima sha tom ne ken ayange a masejime. ‘Asema a ve aa yuhwa,’ sha ci u akaa agen aa dan ve. (Ôr Luka 21:34.) Se mba nengen a mkur u mkaanem man kpaa. Akaa nga danen mbacivir Aôndo mbagenev. Se fa nahan sha ci u akaa a ka ve tsua u eren sha kwagh u tom u uke man u zan makeranta u vesen, man u keren akaa a iyolough kua shighe u ve vihin sha u eren anumbe kua akaa agen a nan ve msaanyol la. Mbagenev mba vôron sha ci u akaa a nyian ishima a uma ne. Pine iyol you wer: ‘M ngu eren nena? Akaa a m tsough u eren la nga tesen ér ka nyi i hembe gban kwagh ken uma wama?’

4. (a) Paulu yange sôn nyi sha ci u Mbakristu mba ken Filipi la, man lu sha ci u nyi? (b) Ka nyi sé time sha mi ken ngeren ne man u una dondo la, man awashima wase ka nyi?

⁴ Yange gba u Mbakristu mba hiihii mbara, vea nôngo kwagh ve vea za hemen u nan ishima sha akaa a ken jijingi hemban hanma kwagh ugen cii ye. Apostoli Paulu yange nenge wener ka hange hange u sônon sha ci u Mbakristu mba ken Filipi, sha er vea ‘kar vea fa akaa a a hembe lun a inja yô.’ (Ôr Mbafilipi 1:9-11.) Mbakristu kpishi sha ayange la ‘hemba cihin u ôron kwaghôron u Aôndo, ve kera cia ga,’ er Paulu nahan. (Fil. 1:12-14) Nyian ne kpa, kape iyenge i se mba se lu pasen Mkaanem ma Aôndo la i hembe ngeen je la. Nahan kpa, aluer se time sha tom u nongo u Yehova u lu eren nyian la nahan, kwagh ne una wase se se hemba nan ishima sha tom u ú lu hange hange i hembe hanma tom ugen cii ne je he? Een. Ken ngeren ne, sé time sha kwagh u Yehova a er sha er kwagh u i er ken Mateu 24:14 la una kure sha mi yô. Ka nyi nongo u Yehova u hembe veren ishima sha mini, man sé fa kwagh ne nahan una wase se man icombor yase nena? Ken ngeren u una dondo la, sé time sha kwagh u una wase se u wan ishima, shi zan hemen u dondon kwagh u nongo u Yehova u lu tesen se la yô.

5, 6. (a) Yehova yange tese mpase u sha mnenge u sha kwagh u vegher u nongo na, u a lu sha la sha ci u nyi? (b) Lu nyi Esekiel nenge a mi ken mpase u sha mnenge?

⁵ Akaa nga kpishi a Yehova a tsough u ngeren ken Mkaanem nam ga yô. U tesen ikyav yô, a pase se gbenda u mhirinim asem kua sha man tar ve eren tom la ga, shin er akaa ne ma a sase se iyol u fan nahan kpaa! Yehova gema pase se kwagh u una wase se u kaven ishima na shi eren i yô. (2 Tim. 3:16, 17) Kpa doo se er Yehova a tese se ajinge a vegher u nongo na, u a lu sha la yô. Ka sea ôr kwagh u akum a sha, a Yehova a kohol a ver vough vough la ken takerada u Yesaia man u Esekiel man u Daniel kua Mpase u Yohane nger la nahan, i doo se kpen kpen! (Yes. 6:1-4; Esek. 1:4-14, 22-24; Dan. 7:9-14; Mpa. 4:1-11) Ka inja er Yehova torough alebele, nahan a na se ian i nengen aren sha ape a lu la nahan. Kpa er nan ve a pase se akaa nee?

⁶ Yehova soo ér mayange i de hungur se er se lu ken nongo na ú ú lu sha won cii la ga. Vegher u nongo u Yehova u a lu sha la ngu nôngon kwagh kpoghuloo sha u eren ishima na. U tesen ikyav yô, yange i tese Esekiel vegher u nongo u Yehova, u a lu sha la, lu er ka ikyekyeutya i lun a akaver nahan. Ikyetyeutya la lu yemen fele er inyiar nahan, shi lu geman pe a soo cii. (Esek. 1:1-21) Akaver a ikyekyeutya la aa ningir kwa môm tseegh kpa, a kôrcio u yemen ica. Shi Esekiel nenge a ajinge a Or u hendan ikyekyeutya la kpaa. A kaa  ér: “M nenge kwagh engem er iyôgh nahan; . . . lu er mluashe u usu nahan ningir tser . . . Kape m-ande u mluashe u icivir i TER a lu la.” (Esek. 1:25-28) Kwagh u Esekiel nenge ne yange una ta un hindi iyol je a zua ga! Yange nenge a Yehova, lu hemen nongo na, tesen u kwagh u ua er la sha ikyev i icighan jijingi na. Kwagh ne tese gbenda u vegher u nongo u Yehova, u a lu sha la a eren tom la, sha gbenda u kpiligh iyol kpen kpen!

7. Mpase u sha mnenge u Daniel nenge a mi la na se ishimataver nena?

⁷ Daniel kpa yange nenge a mpase u sha mnenge u a ne se ishimataver yô. Yange nenge a Yehova lu er ka “or u tsan sha won” nahan, tema sha ikyônough ki torough ki lun a inyomborusu. Ikyônough ki torough kira lu a akaver. (Dan. 7:9) Yehova yange soo ér Daniel a̱ nenge er nongo Na u lu yemen hemen hemen, nahan ú lu kuren awashima Na yô. Shi Daniel nenge a ‘or lu er ka wan u or nahan,’ i na or la hemen sha vegher u nongo u Yehova u a lu shin tar la. Or la ka Yesu. Hemen u Yesu u vough la, ua lu sha ayangem kpuaa tseegh ga. Kpa “Mtemtor Na ka mtemtor u tsôron, u una kar kera mayange ga, man tartor Na kpaa ka u timin kera mayange ga.” (Dan. 7:13, 14) Ishima mgbegha se u nan Yehova jighjigh shi kaven kwagh u a lu kuren sha ci wase la kpaa. Yehova kar Wan na, Yesu, kpa a tile sha jighjigh, nahan a na un “tor sha won cii man icivir man tartor.” Er Yehova a ne Wan na Jighjigh yô, se fatyô u nan hemen u Yesu la kpa jighjigh.

8. Mpase u sha mnenge u Esekiel nenge a mi, man u Yesaia kpa nenge a mi la, yange bende a ve nena?

⁸ Doo u mpase u sha mnenge u sha  kwagh u vegher u nongo u Yehova u a lu shin tar la una bende a vese nena? Sha mimi yô, kwagh u Yehova a lu kuren la ta se ihindi iyol kpen kpen, vough er Esekiel nahan. (Esek. 1:28) Aluer se mba gbidyen kwar sha kwagh u nongo u Yehova yô, ishima ia tsue se ker u eren kwagh er Yesaia nahan. Yange ian ngi dugh i una pase mbagenev kwagh u Yehova yô, a kar a kar a mi. (Ôr Yesaia 6:5, 8.) Yesaia yange lu a vangertiôr ér, una̱ tagher a nyi mtaver je kpa, Yehova una wase un u kuren tom na doo doo. Se kpa, kwagh u se fe sha kwagh u vegher u nongo u Yehova, u a lu shin tar la, a mgbegha se u suen nongo u Yehova. Ka kwagh u taver se ishima kpishi u fan er se lu ken nongo u Yehova, ú ú lu eren ishima i Yehova hanma shighe la nahan.

9, 10. Er nan ve i gbe u vegher u nongo Yehova una lu shin tar ne?

⁹ Yehova ver vegher u nongo na u a lu shin tar la sha ikyev i wan na; man vegher ne ngu eren tom ken mzough vea vegher u a lu sha la. Er nan ve i gbe u vegher u shin tar ne kpa una lu, ve a kure kwagh u i er ken Mateu 24:14 laa? Nenge ase atôakyaa a atar ne.

¹⁰ Hiihii yô, Yesu yange kaa ér mbahenen nav vea er tom u pasen kwagh la “á ar ken ikighir i tar je.” (Aer. 1:8) Kwagh u sha uhar yô, a gba u a ver gbenda u a naan mba ve lu eren tom ne kwaghyan u ken jijingi shi a nengen sha a ve yô. (Yoh. 21:15-17) Kwagh u sha utar yô, shi a gba u mba ve lu pasen loho u dedoo la vea kohol imôngo sha u civir Yehova, shi a tese ve er vea er tom u pasen kwagh la yô. (Heb. 10:24, 25) Cii man i er akaa a atar ne yô, a gba u a wa iyol tsembelee, ka nahan ve mbadondon Kristu vea kure tom ne doo doo ye.

11. Sé sue kwagh u nongo u Yehova u lu eren la nena?

¹¹ Se tese ser se mba suen nongo u Yehova nena? Gbenda môm yô, ka u nan mba Yehova man Yesu ve ver ve ér ve hemen tom u pasen kwagh la jighjigh. Akaa nga ken tar kpishi, a aa fatyô u danen mba ve lu hemen tom ne la yô. Nahan kpa, ve lumun ér ma kwagh a dan ve ga. De se nenge nen kwagh u vegher u nongo u Yehova, u a lu shin tar ne la a hembe veren ishima sha mi yô.

12, 13. Mbatamen mba ken tiônnongo ka ve er tom ve nena, man kwagh ne na u ishimataver sha ci u nyi?

¹² I ver mbatamen mba ve tse ken tom la yô, sha ajiir kposo kposo sha tar, ér ve nengen sha tom u pasen kwagh la shi ve taver mbapasenkwagh asema ken ityar i ve lu la. Anmgbianev mban ka vea tsuan kwagh u vea er yô, ve dondo kwagh u i tese ken Mkaanem ma Aôndo la, ve de ma hingir ‘imenger i angahar a ve, man iwanger i gbenda ve,’ shi ve sôn Yehova ér a hemen ve kpaa. Sha nahan yô, mba dondon hemen u vegher u nongo u Yehova, u a lu sha la.—Ps. 119:105; Mat. 7:7, 8.

¹³ Mbatamen mba ve nengen sha tom u pasen kwagh nyian ne, ve taver ishima “sha tom u kwaghôron ne,” er mba sha shighe u mbaapostoli la kpa ve er nahan. (Aer. 6:4) Saan ve iyol kpishi er mzehemen a lu van ken tom u pasen kwagh ne sha ajiir a ve lu la kua sha tar cii nahan. (Aer. 21:19, 20) Mba we ior mba Aôndo atindi kpete kpete ga, kpa ka ve dondo kwaghwan u Bibilo man kwagh u icighan jijingi a tese la, nahan ve er kwagh u una na ve  loho u dedoo la ua hemba samber yô. (Ôr Aerenakaa 15:28.) Sha nahan yô, anmgbianev mban ver ikyav i dedoo sha ci u hanma or cii ken atôônanongo ve cii.—Ef. 4:11, 12.

14, 15. (a) Ka nyi i er sha u suen tom u pasen kwagh la sha tar ciilii? (b) U nengen ian i u lu a mi i suen tom u pasen kwagh sha tar cii la nena?

¹⁴ Anmgbianev mbagenev kpishi mba eren ityom i ior ve nengen a mi ga yô. Ka ve nger akaa a i gberen ken ityakerada yase la, shi ve sôr ian i nyôron mbamkombo shi eren mbamkohol. Anmgbianev udubu imôngo ka ve na ayol a ve u eren tom kpogholoo sha u geman kwaghyan u ken jijingi ne ken ijô i kuman er 600 nahan, sha er ior kpishi vea fatyô u henen “uzegembaakaav mba Aôndo” ken ijô ve yô. (Aer. 2:7-11) Anmgbianev mba nomso man mba kasev mba ve lu agumaior yô, ka ve er tom u gberen ityakerada sha akekeke a gberen ityakerada ioo, shi ve wa i igbende kpaa. Ka i tindi a ityakerada ne hen atôônanongo, kua sha ajiir a hemban gban ica sha tar la je kpaa.

¹⁵ I sôr aan vough vough, sha er se ver ishima sha u pasen loho u dedoo vea tiônnongo wase yô. U tesen ikyav yô, anmgbianev udubu imôngo na ayol a ve sha u eren tom u maan Ayou a Tartor man Ayou a Mkohol, man u wasen mba aahe a er ve la, man mba ve gbe iangev mbi i gbe u a er twer u vesen aburabur la, man mba ve sôron akaa vough vough sha er a er mbamkohol mba kiriki man mba vesen la, kua mba ve tesen ken imakeranta i nongo u Yehova u ver la, kua ityom igen nahan, i se fe i ga yô. Awashima u ityom ne cii yô, ka nyi? Ka u suen tom u pasen loho u dedoo la, man u wasen mba ve lu eren tom ne la sha er vea seer taver ken jijingi yô, kua u samber a mcivir u mimi. Sha kpôô yô, vegher u nongo u Yehova, u a lu shin tar ne la hemba veren ishima sha akaa a a hembe lun a inja la!

16. Ka nyi u fatyô u tôvon sha mi ken ityakerda yase shighe u ú lu henen kwagh sha tseeneke wou shin u lu eren mcivir u hen tsombor wou laa?

¹⁶ U tee shighe u gbidyen kwar sha gbenda u nongo u Yehova u lu eren tom la kpa? Mbagenev sôr ian ver sha er vea tôvon sha akaa ne ken ityakerada yase, shighe u ve lu eren mcivir u hen tsombor shin ve lu henen kwagh sha tseeneke ve yô. Mpase u sha mnenge u yange i tese Yesaia man Esekiel man Daniel man Yohane la, doo u henen sha mi kpen kpen. Takerada u Jehovah’s Witnesses—Proclaimers of God’s Kingdom la, kua ityakerada igen shin tser u DVD u ken zwa wou la, ia wase u kpishi u fan kwagh u nongo u Yehova.

17, 18. (a) Ngeren ne wase u nena? (b) Ka mbampin mba han i doo u ú pine iyol you-we?

¹⁷ Doo u se henen sha kwagh u Yehova a lu eren sha ikyev i nongo na la. Se kpa i̱ lu gbashima wase u hemban nan ishima sha akaa a a hembe lun a inja la, er nongo u Yehova u kpiligh iyol ne nahan. Se eren nahan yô, kwagh la una wa se ago iyol, nahan se lu a gbashima er Paulu nahan. Yange nger ér: “Er se lu a tom ne sha mhôônom ma i zungu se la yô, asema kera nga yinan se ga.” (2 Kor. 4:1) Shi yange taver mba ve lu eren tom a na imôngo la ishima ér: “Sé gba nen uwer u eren akaa a dedoo ga, gadia shighe á va kuma yô, sé sunda aluer se yina ishima ga yô.”—Gal. 6:9.

¹⁸ A gba u we shin tsombor wou cii ne de akaa agen ken akaa a ne eren ayange ayange la, sha er ne hemba nan ishima sha akaa a a hembe lun a inja la yôô? Se fatyô u den u eren akaa kumba kumba ken uma wase sha er se pande akaa a danen se ishima, nahan se hemba nan ishima sha tom u pasen kwagh u u hembe lun a inja cii la kpa? Ken ngeren u dondon ne, sé time sha akaa ataan, a aa wase se u dondon ikyav i nongo u Yehova u ver se la yô.