1, 2. Ating ol disaipel i bin tingting planti long wanem tok profet bilong las de? Bilong wanem?

 JISAS i tokim ol disaipel olsem tempel bai bagarap. Ol tok bilong em i mekim Pita, Jems, Jon, na Andru i tingting planti. (Mak 13:1-4) Olsem na taim ol tasol i stap wantaim Jisas, ol i askim em olsem: “Tokim mipela, Wanem taim bai ol dispela samting i kamap? Na wanem sain bai kamap bilong soim olsem yu kam i stap na pinis bilong dispela taim i kamap pinis?” (Mat. 24:1-3) Taim Jisas i bekim askim bilong ol, em i tokim ol long ol samting bai kamap paslain long Jerusalem i bagarap, na tu, em i tokim ol long ol samting bai kamap long pinis bilong dispela haptaim we Satan i bosim. Jisas i tok profet long ol samting nogut tru bai kamap, olsem ol bikpela pait, bikpela hangre, na ol man bai mekim ol pasin i nogut tru. Tasol Jisas i tok profet tu long gutpela samting bai kamap. Em i tok: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”—Mat. 24:7-14.

² Ol disaipel i kirap pinis long wok wantaim Jisas long autim gutnius bilong Kingdom. (Luk 8:1; 9:1, 2) Na ating ol i bin tingim tok bilong Jisas, olsem: “Planti kaikai i mau pinis, tasol i no gat planti wokman. Olsem na askim Bosman bilong bungim kaikai long salim ol wokman i go bilong bungim kaikai bilong en.” (Luk 10:2) Tasol ating ol i tingting olsem: ‘Hau bai mipela i autim tok “long olgeta hap bilong graun na bai olgeta lain man i ken harim”? Na ol wokman bai kam long we?’ I hatwok tru long ol disaipel inap tingim olsem wanem tok bilong Matyu 24:14 bai kamap tru!

3. Bilong wanem tok bilong Jisas long Luk 21:34 i bikpela samting moa long nau? Yumi mas givim wanem askim long yumi yet?

 ³ Tok profet bilong Jisas i wok long kamap tru long taim bilong yumi. Planti milion manmeri i autim gutnius bilong Kingdom long olgeta hap bilong graun. (Ais. 60:22) Tasol Jisas i soim olsem sampela bai hatwok long putim wok autim tok i stap namba 1 samting long laip bilong ol. Ol bai bisi tumas long mekim ol narapela wok na dispela bai “daunim” ol. (Ritim Luk 21:34.) Ol tok bilong Jisas i bikpela samting moa long yumi long nau, long wanem, sampela manmeri bilong God i no putim ol bikpela samting i stap namba 1 long laip bilong ol, nogat. Yumi luksave long dispela taim ol i mekim disisen long sait bilong wok mani, bikpela skul, o mani kago. Sampela narapela i lusim bikpela haptaim tumas long spots na ol samting bilong kisim amamas. Sampela i no mekim bikpela wok tumas olsem ol inap mekim long wok bilong God, long wanem, ol wari bilong olgeta wan wan de i daunim ol. Askim yu yet olsem: ‘Laip bilong mi i olsem wanem? Mi putim laik bilong God i stap namba 1 samting long laip bilong mi?’

4. (a) Taim Pol i beten long helpim ol Kristen long Filipai, em i kolim wanem samting long beten? Bilong wanem em i beten olsem? (b) Bai yumi stori long wanem samting long dispela stadi na long neks stadi? Ol dispela stadi bai helpim yumi olsem wanem?

⁴ Ol Kristen long taim bilong ol aposel i mas wok strong long putim wok bilong God i stap olsem namba 1 samting long laip bilong ol. Olsem na aposel Pol i beten olsem ol Kristen long Filipai i ken “skelim gut wanem ol samting i bikpela samting moa.” (Ritim Filipai 1:9-11.) Wankain olsem aposel Pol, planti Kristen “i strong moa yet long autim tok bilong God na ol i no pret.” (Fili. 1:12-14) Olsem tasol, planti bilong yumi long nau i no pret long autim Tok Bilong God. Maski yumi no pret, dispela stadi bai strongim yumi, long wanem, yumi bai stori long olsem wanem Jehova i yusim oganaisesen bilong em long nau long inapim tok bilong Matyu 24:14. Dispela bai kirapim yumi long givim bel moa yet long mekim wok autim tok. Oganaisesen bilong Jehova i mekim wanem ol wok, na olsem wanem dispela i strongim yumi na famili bilong yumi? Long neks stadi, yumi bai stori long wanem samting inap helpim yumi long stap strong yet long mekim wok bilong God na bihainim ol tok i kam long oganaisesen bilong Jehova.

5, 6. (a) Bilong wanem Jehova i larim ol wokman bilong em long lukim ol visen long ol samting i kamap long heven? (b) Esekiel i lukim wanem samting long visen?

⁵ I gat planti samting em Jehova i no kamapim stori bilong en long Baibel. Olsem: Em i no stori long olgeta liklik samting long kru bilong man na ol samting bilong ples antap i wok olsem wanem. Tasol Jehova i givim ol tok bilong helpim yumi long kliagut long laik bilong em na bihainim tok bilong em. (2 Tim. 3:16, 17) Em narakain tru olsem Jehova i bin stori long yumi long oganaisesen bilong em i stap long heven. Yumi amamas tru long ritim ol dispela stori i stap long ol buk bilong Baibel, olsem Aisaia, Esekiel, Daniel, na Revelesen! (Ais. 6:1-4; Ese. 1:4-14, 22-24; Dan. 7:9-14; Rev. 4:1-11) Bilong wanem Jehova i larim yumi long kisim save long sampela samting i kamap long heven?

⁶ Jehova i laik bai oltaim yumi mas tingim olsem yumi hap lain bilong wanpela oganaisesen we i stap long heven na long graun. Oganaisesen bilong Jehova long  heven i wok strong long inapim laik bilong Jehova. Olsem: Esekiel i lukim visen we wanpela bikpela karis i makim oganaisesen bilong Jehova long heven. Dispela karis i save spit tru, na kwiktaim em inap tanim na spit i go long narapela hap. (Ese. 1:15-21) Na tu, em i lukim Man i sindaun long karis. Esekiel i tok em i lukim wanpela samting “i lait olsem wanpela hap bras i stap insait long paia.” Em i tok moa olsem: “Dispela lait mi lukim, em i olsem bikpela lait i kam long God yet.” (Ese. 1:24-28) Ating Esekiel i bin kirap nogut taim em i lukim dispela visen. Em i lukim olsem Jehova i bosim olgeta wok i kamap insait long oganaisesen bilong em, na em i yusim holi spirit long stiaim oganaisesen. Dispela karis long visen i makim gut olsem wanem oganaisesen bilong Jehova long heven i mekim wok bilong en!

7. Olsem wanem visen bilong Daniel i strongim bilip bilong yumi?

⁷ Daniel tu i lukim wanpela visen we i strongim bilip bilong yumi. Daniel i lukim Jehova, em “Man bilong bipo bipo yet,” i sindaun long sia king we i gat ol wil long en. (Dan. 7:9) Jehova i laik bai Daniel i luksave olsem oganaisesen bilong Jehova i mekim ol wok bilong inapim laik bilong Em. Bihain, Daniel i lukim “wanpela man i wankain olsem yumi man bilong graun,” em Jisas, i kisim namba bilong bosim oganaisesen bilong Jehova long graun. Wok em Jisas i mekim bilong bosim ol lain man i no bilong sampela yia tasol, nogat. “Em bai i stap king i gat strong oltaim oltaim, na wok king bilong en bai i no inap pinis.” (Dan. 7:13, 14) Dispela visen i kirapim yumi long trastim Jehova na helpim yumi long kliagut long ol samting em i mekim.  Jehova i bin givim namba long Jisas long mekim wok bos, olsem na dispela visen i mas kirapim yumi long trastim Jisas olsem Gopas bilong yumi.

8. Esekiel na Aisaia i pilim olsem wanem taim ol i lukim visen long oganaisesen bilong Jehova? Ol dispela visen i mas mekim wanem long yumi?

⁸ Ol dispela visen bilong oganaisesen bilong Jehova i mas mekim wanem long yumi? Olsem Esekiel, yumi mas pilim tru samting em Jehova i mekim. (Ese. 1:28) Profet Aisaia tu i bin lukim wanpela visen long samting i wok long kamap long heven. Taim Jehova i askim em long autim tok long ol samting Em i mekim, kwiktaim Aisaia i bihainim tok na mekim olsem. (Ritim Aisaia 6:5, 8.) Jehova i helpim Aisaia, olsem na Aisaia i save olsem i no gat wanpela samting inap pasim em long mekim wok bilong em olsem profet. Olsem Aisaia, taim yumi givim bel moa long mekim wok bilong God, dispela i makim olsem yumi sapotim oganaisesen bilong Jehova. Taim yumi kisim save olsem yumi hap lain bilong wanpela oganaisesen we i wok oltaim long mekim laik bilong Jehova, dispela i save strongim tru yumi!

9, 10. Bilong wanem i mas i gat oganaisesen bilong Jehova long graun?

⁹ Jehova i yusim Pikinini bilong em long kamapim oganaisesen bilong em hia long graun we i wok bung wantaim oganaisesen bilong em long heven. Dispela samting i mas kamap bilong inapim tok profet i stap long Matyu 24:14. Bilong wanem? Skelim dispela 3-pela samting.

¹⁰ Namba 1, Jisas i tok ol disaipel bilong em bai autim tok “i go inap long olgeta hap bilong graun.” (Apo. 1:8) Namba 2, dispela lain husat i mekim wok autim tok ol i mas kisim tok i kam long Baibel bilong skulim na strongim ol. (Jon 21:15-17) Namba 3, ol i mas i go long ol miting bilong lotuim Jehova na kisim skul long pasin bilong mekim wok autim tok. (Hib. 10:24, 25) Ol disaipel bilong Jisas i mas oganaisim gut ol wok bambai olgeta dispela samting inap kamap.

11. Olsem wanem yumi inap sapotim oganaisesen bilong Jehova?

¹¹ Olsem wanem yumi inap sapotim oganaisesen bilong Jehova? Nambawan samting em long trastim ol brata husat i go pas long mekim wok autim tok. Jehova na Jisas i trastim ol dispela brata, olsem na yumi tu i mas trastim ol. Ol dispela brata inap yusim taim na strong bilong ol long stretim ol hevi bilong dispela haptaim long nau. Tasol ol i no mekim olsem. Orait nau yumi ken stori long nambawan wok em oganaisesen bilong God long graun i save mekim.

12, 13. Olsem wanem ol elda i mekim gut wok bilong ol? Dispela i strongim yu olsem wanem?

¹² Long olgeta hap bilong graun, ol brata husat i mekim wok elda inap planti yia pinis, ol i kisim wok bilong oganaisim na go pas long mekim wok autim tok long ol kantri ol i stap long en. Ol i larim tok bilong Baibel i stiaim ol taim ol i mekim ol disisen. Long dispela rot, ol i larim tok bilong Baibel i stap olsem ‘lam bilong helpim ol long wokabaut stret, na i olsem lait bilong soim rot long ol.’ Na tu, ol i save beten askim Jehova long stiaim ol.—Sng. 119:105; Mat. 7:7, 8.

¹³ Olsem ol elda long taim bilong ol aposel i bin mekim, ol elda husat i oganaisim wok autim tok long nau ol i putim “tok bilong God” i stap namba 1 samting. (Apo. 6:4) Ol i save amamas tru taim ol i lukim wok bilong autim tok i kamap bikpela  long kantri bilong ol na long olgeta hap bilong graun. (Apo. 21:19, 20) Ol i no putim planti lo long ol manmeri bilong God, nogat. Ol i wok strong long bringim gutnius i go long planti hap bilong graun, na tok bilong Baibel na holi spirit i stiaim ol. (Ritim Aposel 15:28.) Long dispela rot, ol dispela brata i soim gutpela pasin tru em olgeta long kongrigesen i ken bihainim.—Efe. 4:11, 12.

14, 15. (a) Wanem ol samting i kamap bilong helpim yumi long autim tok long olgeta hap bilong graun? (b) Yu pilim olsem wanem long wok yu mekim bilong sapotim wok bilong autim tok?

¹⁴ Planti brata bilong yumi i wok olgeta de long redim ol buk na nius, ol miting, na ol kibung. Olsem, planti tausen volantia i wok strong long tanim ol tok bilong ol buk na nius i go long winim 600 tokples. Dispela i opim rot na ol manmeri inap kisim save long “ol strongpela wok bilong God” long tokples bilong ol yet. (Apo. 2:7-11) Ol yangpela brata na sista i wok strong long prinim na wokim ol buk na nius. Bihain, ol i save salim ol dispela buk na nius i go long ol kongrigesen maski sampela kongrigesen i stap longwe tru.

¹⁵ Long hap bilong yumi tu, planti bratasista i mekim wok bilong helpim yumi long tingim wok bilong autim gutnius. Olsem, planti tausen volantia i helpim long wokim ol nupela Haus Kingdom na ol Haus Kibung. Sampela i helpim ol man husat i kisim bagarap long ol disasta na ol bikpela sik. Sampela i oganaisim ol kibung, na sampela i skulim ol narapela long ol Baibel skul. Wanem as bilong ol dispela wok? Ol dispela wok i bilong helpim yumi long autim gutnius, kamap strong long tok i tru, na helpim planti man moa long kam lotuim Jehova. Tru tumas, oganaisesen bilong Jehova long graun i bin putim ol bikpela samting i stap namba 1!

16. Yu ken mekim wok painimaut long wanem ol samting bilong skelim long famili lotu o taim yu mekim stadi bilong yu yet?

¹⁶ Olsem wanem? Yumi save lusim sampela haptaim bilong tingim ol samting oganaisesen bilong Jehova i wok long mekim? Yu ken mekim wok painimaut na kisim sampela save moa long oganaisesen taim yu mekim famili lotu o mekim stadi bilong yu yet, na tingim tingim ol samting yu lainim. Olsem, yu bai amamas long stadi long visen bilong Aisaia, Esekiel, Daniel, na Jon. Buk Jehovah’s Witnesses—Proclaimers of God’s Kingdom na ol narapela buk na nius na DVD tu i skulim yumi long planti narapela samting long oganaisesen bilong God.

17, 18. (a) Dispela stadi i helpim yu olsem wanem? (b) Yu mas givim wanem ol askim long yu yet?

¹⁷ I gutpela long yumi tingim tingim long bel olsem wanem Jehova i yusim oganaisesen bilong em long sapotim wok autim tok. Yumi mas bihainim dispela oganaisesen na putim ol bikpela samting i stap namba 1. Yumi bai kisim wankain tingting olsem Pol, em i tok: “God i marimari long mipela na i givim dispela wok long mipela, olsem na mipela i no givap.” (2 Kor. 4:1) Em i strongim tu ol brata bilong em na tok: “Yumi no ken les long mekim ol gutpela wok, long wanem, long taim stret bilong en bai yumi kamautim kaikai sapos yumi no givap.”—Gal. 6:9.

¹⁸ Olsem wanem? Yu na famili bilong yu inap mekim sampela senis na bai yupela inap putim ol bikpela samting i stap namba 1 long ol samting yupela i mekim long olgeta de? Yu inap lusim sampela mani kago samting na bai yu inap insait moa long wok bilong autim tok? Long neks stadi, yumi bai skelim 5-pela samting we bai helpim yumi long bihainim oganaisesen bilong Jehova na givim bel yet long mekim wok bilong God.