1, 2. Genwa medde nining ka walwodo lok i kom dul pa Jehovah ma kwako polo ki lobo?

 PUD dong yomo cwinywa adada me lwodo pi mot ma watye kwede me bedo i dul madit ma kwako polo ki lobo. Ginanyuta ma tye i Ejekiel cura 1 ki Daniel cura 7 ginyuto ka maleng kit ma Jehovah tye ka tic kwede wek yubbe ocobbe. Yecu tye ka telo but dul pa Jehovah ma i lobo wek oti tic me tito kwena maber-ri, ogwok i yo me cwiny jo ma gitye ka timo tic man ki dok oil malo woro me ada. Man pud dong miyo wabedo ki gen i kom dul pa Jehovah!​—Mat. 24:45.

² Tika wan ki acel acel watye ka medde anyim kacel ki dul man mwonya tutwal-li? Tika mitiwa pi lok me ada tye ka medde ameda kece tye ka dok adoka piny? Ka wabedo ka lwodo lok i kom lapeny magi, ci watwero niang ka ce wacako ol woko nyo mit komwa tye ka dok piny. Meno twero timme. I cencwari me acel, lakwena Paulo ocuko cwiny Lukricitayo luwote me tam matut i kom arima ma Yecu obedo kwede. Paulo owacci man bikonyogi ‘wek pe guol woko ki dok cwinygi pe otur.’ (Ibru 12:3) I yo acel-lu bene, ka wabedo ka lwodo pwony mukato angec, ma nyuto jami ma dul pa Jehovah tye ka timogi, ci man bikonyowa me bedo ki mit kom kun wacung matek.

3. Gin ango ma mitte wek pe waol woko, ki dok gin ango ma wabinyamo ipwony man?

³ Ento, Paulo owacci tye jami mukene ma myero watim wek pe waol woko. En owacci mitte ni myero wabed ka “tiyo gin maber.” (Gal. 6:9) Man nyuto ni omyero watim gin mo. Kong dong wanenu jami abic ma gitwero konyowa wek pe waol woko kun wamedde anyim kacel ki dul pa Jehovah. Man bikonyowa nyo jo me odiwa me moko tam i kom kabedo mogo ma mito ayuba.

4. Pingo watwero wacone ni cokke kacel obedo gin ma pire tek i woro me ada?

⁴ Nicakke wacon, cokke tye gin ma pire tek adada bot lutic pa Jehovah. I polo, kilwongo lumalaika wek gubin gucung inyim Jehovah ka ninone oromo. (1 Luker 22:19; Yubu 1:6; 2:1; Dan. 7:10) I kare macon, rok me Icrael onongo myero gucokke kacel ‘wek guwiny ci gunong pwony.’ (Nwo. 31:10-12) Lujudaya i cencwari me acel onongo guloko odoko kitgi me wot i kacokke wek gikwan Ginacoya. (Luka 4:16; Tic 15:21) Cokke omedde ki bedo gin ma pire tek kadi wa i kare ma kicako kacokke pa Lukricitayo, dok pud tye but yub ma pire tek i worowa. Lukricitayo me ada ‘gitugo cwinygi kekengi i mar ki i tiyo tic mabeco.’ Omyero bene wamedde ki ‘cuko cwinywa kekenwa, makatone kit macalo nino pa Jehovah dong onyiko cok-ki.’​—Ibru 10:24, 25.

5. Watwero cuko cwiny luwotwa i cokkewa nining?

⁵ Yo acel ma pire tek ma watwero cuko kwede cwiny luwotwa aye ka wamiyo lagam i cokkewa. Watwero nyuto niyewa i dye lwak ka wamiyo lagam pi lapeny ma kipenyo, watito kit ma watwero keto ginacoya moni i tic, wamiyo lapor mo ma nyuto kit ma keto cik me Baibul konyowa kwede, nyo yo mukene. (Jab. 22:22; 40:9) Labongo akalakala, kadi bed ni wabedo ka bino i cokke pi mwaki mapol, cokkewa pud tye ka ma wanongo iye cuko cwiny ka wawinyo lagam ma jo muteggi ki matino gimiyo kun a ki i cwinygi.

6. Cokkewa konyowa me bedo ki mit kom i yo me cwiny nining?

⁶ Tyen lok mukene ango mumiyo Lubanga tero cokkewa kacel kare ki kare-ni calo gin ma pire tek? Cokkewa, gurewa me adwol nyo me nino acel ki dok gure madito gikonyowa me lok ki tekcwiny ki dong kit me tero kwede jo ma giunowa nyo pe gimito winyo lokwa i wang ticwa mapat pat. (Tic 4:23, 31) Nyamo lok me Ginacoya jingo cwinywa dok miyo wacung matek i niyewa. (Tic 15:32; Rom. 1:11, 12) Cuko cwiny kacel ki pwony ma wanongo i gurewa konyowa me nongo yomcwiny me ada ma ‘weko waywe i kare me can.’ (Jab. 94:12, 13) Komitti me Pwony pa Lukiko Madit yubo pwony ducu ma kipwonyo ki jo pa Jehovah i wi lobo-ni lung. Pud dong watye ki pwoc madit ya pi mic me cam me cwiny ma kiminiwa i cokkewa cabit ki cabit, mwaka ki mwaka!

7, 8. (a) Gin ango ma pire tek adada muweko wacokke kacel i kacokkewa? (b) Cokkewa konyi nining i yo me cwiny?

⁷ Ento, tye gin mukene bene ma pire tek adada makato adwogi mabeco ma wanongo ki i cokkewa. Tyen lok ma pire tek loyo ma oweko wacokke kacel aye me woro Jehovah. (Kwan Jabuli 95:6.) Pud dong watye ki mot madit ya me pako Lubanga! (Kol. 3:16) Jehovah opore me nongo worowa kare ki kare dok man timme ka wabedo tye i cokkewa kun wamiyo lagam. (Yabo 4:11) Man aye gin mumiyo kicuko cwinywa ni ‘pe waweku cokke kacel, kit macalo jo mogo dong guloko odoko kitgi-ni’!​—Ibru 10:25.

⁸ Tika watero cokkewa calo mic ma konyowa me cung matek wang ma Jehovah okelo agikki me yub marac me jami me kare-ni? Ka tye kumeno, ci cokkewa bibedo i kin “jami ma pigi tego” ma pe wakeng kadi bed tic odiyowa adada. (Pil. 1:10, NW) Gin ma pire tek adada aye myero ogengwa pe me ribbe kacel ki utmegiwa i woro Jehovah.

9. Wangeyo nining ni ticwa me tito kwena-ni pire tek?

⁹ Tic matek ki cwinywa ducu i tito kwena bene konyowa me medde anyim kacel ki dul pa Jehovah. Yecu ocako tic man i kare ma en tye i lobo kany. (Mat. 28:19, 20) Cakke i kare meno, tito kwena me Ker-ri ki dong loko dano me doko lupwonye pa Yecu aye gin ma pire tek ma dul pa Jehovah ma i polo ki lobo tye ka timone. Tye labol mapol i kare-ni ma gimoko atir ni lumalaika gitye ka konyowa i tic man kun gitelowa bot ‘jo ducu ma gimyero me nongo kwo ma pe tum.’ (Tic 13:48; Yabo 14:6, 7) I kare-ni, but dul pa Jehovah ma i lobo tye me yubo ki dok konyo kor tic man ma pire tek-ki. Tika ticwa me pwony-nyi bene tye gin ma pire tek i kwowa?

10. (a) Mi lapor ma nyuto kit ma watwero gwoko kwede mitiwa pi lok me ada wek pe okwe woko. (b) Ticwa me pwony-nyi okonyi nining wek pe iol woko?

¹⁰ Tiyo ticwa me pwony-nyi ki mit kom konyowa wek mitiwa pi lok me ada pe okwe woko. Tam kong i kom lok pa Mitchel, ma dong otiyo pi kare malac macalo laelda ki dok painia. En owaco ni: “Amaro tito lok me ada bot dano. Ka atamo i kom pwony mo manyen ma tye i Wi lubele nyo Awake! ci abedo ki ur pi ryeko, ngec, kacel ki kit ma kicoyo kwede magajin acel acel i yo mupore. Man weko abedo ki cwiny me wot woko i ticwa me pwony wek aniang kit ma dano  gibiwinyo kwede i nge kwanone ki kit ma aromo tugo kwede mitigi. Ticca me tito kwena konya me cung matek. Atemme ki teka me timo jami ducu con nyo i nge cawa ma ayubo me cito i ticwa me pwony.” I yo acel-lu, ka wan bene watye ki tic mapol me atima i tic pa Lubanga, man bikonyowa me cung matek i kare me agikki-ni.​—Kwan 1 Jo Korint 15:58.

11. Pingo omyero wakwan bukkewa ma Jehovah miniwa?

¹¹ Jehovah ominiwa cam me cwiny mapol adada me konyowa wek wacung matek i niyewa. Labongo akalakala, wii romo po i kom kare mo ma i nge kwano bukkewa, i waco ni, ‘Man aye gin ma onongo amito kikome! Bedo calo i wacci Jehovah oweko kicoyo pira!’ Meno pe obedo gin ma ocom acoma. Jehovah tiyo ki bukkewa me pwonyo ki dok me tirowa. En owacci: “Abipwonyi dok abicimmi yo ma myero ilubi.” (Jab. 32:8) Tika watute me kwano bukke magi ducu kun walwodo lok iye? Timo meno bikonyowa me nyako nyig mabeco ki bene pe me ol woko i kare man me agikki-ni.​—Kwan Jabuli 1:1-3; 35:28; 119:97.

12. Gin ango ma twero konyowa me tero bukkewa calo gin ma pire tek?

¹² Pi bukkewa bedo tek adada ka watamo pi tic matek ma kitimo me goyogi wek wanong cam me cwiny kare ki kare. Ma peya kigoyo nyo kiketo bukkewa i kabedowa me Intanet, pire tek ni omyero kong kikwed lok iye, kico, kikwan me neno ka tye maber, kiyer cal ma kibitiyo kede, ka dong kigony. Komitti me Pwony pa Lukiko Madit aye neno kit ma tic magi ducu tye ka wot kwede. Jang gang kal ma gigoyo bukke magi gicwalo i kacokke ma gitye ka macok ki ka maboco. Pingo kitimo tic magi ducu? Wek jo pa Jehovah gunong cam muromo i yo me cwiny. (Ic. 65:13) Myero dong watute wunu matek me nongo adwogi maber ki i cam me cwiny ma dul pa Jehovah miniwa.​—Jab. 119:27.

13, 14. Angagi ma gitye ka cwako dul pa Jehovah ki i polo, ki bene wan watwero nyuto cwak acel-li nining i lobo kany?

¹³ I ginanyuta, lakwena Jon oneno Yecu tye ka ringo ki aguragura matar wek elo lweny i kin en ki jo ma gijemo i kom Jehovah. (Yabo 19:11-15) Pud dong jingo niyewa adada me ngeyone ni i nge Yecu, tye lumalaika ma gin lugen kacel ki jo ma kiwirogi ma dong guloyo lobo dok gunongo motgi me kwo i polo! (Yabo 2:26, 27) Man pud dong tye lanen maber ma nyuto ni omyero wacwak dul pa Jehovah!

¹⁴ I yo acel-li bene, lwak dano mapol ata-ni gicwako ki cwinygi ducu tic pa omegi pa Kricito ma pud gitye i lobo dok gitye ka telo dul pa Jehovah i kare-ni. (Kwan Jekaria 8:23.) Wan watwero nyutone nining ni wacwako dul pa Jehovah? Yo acel aye ka wabedo luwiny bot jo ma gitelowa. (Ibru 13:7, 17) Man cakke ki i kacokkewa. Tika kit ma waloko kwede i kom luelda cuko cwiny jo mukene me worogi ki dok lubo telagi? Tika wacuko cwiny lutinowa me woro co magi ma gin lugen-ni kun gipenyo pi tam ma a ki i Ginacoya ki botgi? Medo i kom meno, tika wanyamo kacel macalo jo me ot kit ma myero wati kwede ki limwa pi konyo kor tic ma mako wi lobo ducu? (Car. 3:9; 1 Kor. 16:2; 2 Kor. 8:12) Tika watero mot me gwoko Ot me Ker wek obed maleng calo gin ma pire tek? Cwiny pa Jehovah tiyo labongo ayela i kacokke ma woro kacel ki note tye iye. Cwiny meno maleng ma wanongo-ni miniwa teko wek pe waol woko i kare man me agikki-ni.​—Ic. 40:29-31.

15. Pingo omyero walweny matek ma pe wailo cingwa wek wakwo i yo ma yomo cwiny Jehovah?

¹⁵ Me agikkine, wek wacung matek ki dok wamedde anyim kacel ki dul pa Jehovah, omyero wakwo kwo ma rwatte ki kwena ma watito-ni kun watimo gin ma “yomo cwiny Rwot.” (Ep. 5:10, 11) Catan, lobo man marac-ci kacel ki roc ma watye kwede giweko bedo tek tutwal botwa me timo gin matir. Jo mogo i kinwu omege ki lumege gilwenyo matek adada ki ariya nino ducu wek gigwok wat maber i kingi ki Jehovah. Man miyo Jehovah marowu adada. Pe wuil cingwu woko! Kwo i yo ma yomo cwiny Jehovah bikeliwa yomcwiny madit adada ki bene worowa bot Jehovah pe bibedo me nono.​—1 Kor. 9:24-27.

16, 17. (a) Gin ango ma myero watim ka watimo bal madit? (b) Labol pa Anne-ni twero konyowa nining?

¹⁶ Ento, gin ango ma myero watim ka watimo bal madit? Omyero wapeny pi kony oyotoyot. Pien ka iling woko, ci ibalo abala. Wii myero opo ni Daudi owacci i kare ma pe etuco balle, ‘kome oballe woko pi cur ma ebedo ka cur dyeceng jwi.’ (Jab. 32:3) Ada, kwero tuco balwa rwenyo yomcwinywa dok waol woko i yo me cwiny, ento “ngat ma tuco balle ka bwoto timogi matwal aye kica bimako Lubanga i kome.”​—Car. 28:13.

¹⁷ Nen kong labol pa Anne. * I kare ma mwaka pa Anne dong cok romo pyeraryo, en otiyo macalo painia marii. Ento en ocako kwo kwo laiye aryo. Man okelle adwogi marac. En owacci: “Cwinya ocako pida adada. Cwinya onongo pe yom wacel dok cawa ducu abedo ma cwinya otur.” Gin ango ma en otimo? En owacci, i nino mo acel kinyamo Yakobo 5:14, 15 i cokke. Anne oniang ni kara onongo emito kony, ci en ocito bot luelda wek gukonye. Ma lubbe ki gin mutimme angec, en owaco ni: “Wang Baibul man tye yat ma Jehovah aye ocoyo me cangowa i yo me cwiny. Pe yot me mwonyo yat man ento cango two. Aketo tira me wang Baibul man i tic dok okonya adada.” Mwaki mogo dong okato, Anne kombeddi-ni odwogo malyet i bar kun tiyo pi Jehovah ki mit kom ma cwinye pe bedo ka pidde.

18. Gin ango ma myero wamok tamwa me timone?

¹⁸ Pud dong tye twon mot madit ya me kwo i kare man me agikki-ni ki dok me bedo ngat acel i dul pa Jehovah! Wamoku tamwa pe me tero mot ma watye kwede i yo me tuko. Ma ka meno, watiyu kacel macalo jo me ot wek wabed tye i cokkewa kare ki kare, wayeny jo ma cwinygi atir ma gitye i wang ticwa, ki dok water cam me cwiny ma wanongo kare ki kare-ni calo gin ma pire tek. Omyero bene waten kor jo ma gitelowa ki dok wakwo i yo ma rwatte ki kwena ma watito-ni. Ka watimo meno, wabimedde anyim kacel ki dul pa Jehovah ki dok pe wabiol ki timo gin maber!