1, 2. Diosan alajjpachankiri ukat aka oraqenkir markapajj kunsa luraski ukanakat lupʼiñajja, ¿kun lurañatakis yanaptʼistu?

JEHOVÁ DIOSAN alajjpachankiri ukat aka Oraqenkir markap taypinkatas yatisajj wal musphartanjja. Ezequiel 1 jaljana ukat Daniel 7 jaljan jikjjataski uka visionanakanjja, kunjamsa Jehová Diosajj amtap phoqhañatakejj markapar irpaski uk sum amuytanjja. Diosan Reinopat suma yatiyäwinakajj jukʼamp yatiyasiñapataki ukat yatiyirinakajj Diosar yupaychañ toqet jukʼamp chʼamañchatäpjjañapataki ukhamarak cheqa yupaychäwin jiltaskakiñapatakejja, Jesusaw Diosan aka oraqenkir markaparojj pʼeqtʼaski. Ukatwa Jehová Diosan markaparojj taqe chuyma confiysna (Mat. 24:45).

² ¿Diosan markapamp chikati sapa maynejj sarasktanjja? ¿Jehová Diosarojj taqe chuymati yupaychasktan jan ukajj aynachtʼjjaktancha? Uka jisktʼanakat lupʼisajja, inas mä jukʼa aynachtʼata jan ukajj jan nayrjam taqe chuym yupaychjjatas amuyastan. Cheqansa, taqeniw ukham uñjassna. Nayrïr patak maranakanjja, apóstol Pablojj Jesusat yateqasipjjañapatakiw akham sasin jilat kullakanakar chʼamañchtʼäna: “Janipun qarjasipjjamti ni pächasipjjamsa” sasa (Heb. 12:3). Pasïr yatichäwinjja, kunsa Jehová Diosan markapajj luraski ukwa yatjjatawaytanjja. Ukat kunjamtï Jesusajj nayrïr cristianonakar jan qarjtañatak yanaptʼkänjja, ukhamarakiw Jehová Diosan markapajj jan qarjtañataki ukat Diosar taqe chuyma yupaychaskakiñatak yanaptʼistu.

3. ¿Kunsa jan qarjtañatakejj lurañasa, ukat kunsa aka yatichäwin yatjjataskañäni?

³ Ukampis jan qarjtañatakejj kunatï askïki ukwa lurañasa sasaw Pablojj qhanañchtʼarakïna (Gál. 6:9). Uk lurañatakejj jiwasaw chʼamachasiñasa. Ukat jan qarjtañataki ukat Jehová Diosan markapamp chika saraskakiñatakejj kunanakas yanaptʼistaspa ukwa aka yatichäwin phesqa toqet yatjjataskañäni. Ukaw kunansa jiwas pachpasa jan  ukajj familiasas jukʼampi chʼamachasiñapa uk amuytʼasiñatak yanaptʼistani.

4. Jehová Diosar yupaychañatakejj tantachasiñajj wali askipuniwa sasajja, ¿kunatsa sissna?

⁴ Jehová Diosan yupaychirinakapatakejj nayratpachaw tantachasiñajj wali askipunïnjja. Alajjpachanjja, Jehová Diosajj angelanakamp tantachasirakiwa (1 Rey. 22:19; Job 1:6; 2:1; Dan. 7:10). Nayra Israel markanjja, ‘leyinak liytʼiri istʼapjjañapataki ukat Diosar jaysaña yateqapjjañapatakiw’ tantachasipjjañapäna (Deu. 31:10-12). Nayrïr patak maranakan jakir judionakajja, sinagoganakaruw Qollan Qellqatanak liytʼañatak sarapjjerïna (Luc. 4:16; Hech. 15:21). Ukat cristiano tamanak uttʼayaskäna ukhajja, tantachasiñajj wali askikïskänwa. Jichhürunakanjja, Jehová Diosar yupaychañatak tantachasiñajj askikïskiwa. Cheqpach cristianonakajja, maynit maynikama munasiñanïñasataki ukat suma luräwinak lurañar chʼamañchtʼasiñatakiw tantachastanjja. Ukat “maynit mayniruw wayttʼasi[skakiñasa], Tatitun jutäwipa jakʼankjjatapa yatisinsti jukʼampïñapawa” (Heb. 10:24, 25).

5. ¿Kunjamsa tantachäwinakan maynit maynikam chʼamañchtʼassna?

⁵ Tantachäwinakanjja, arstʼasaw maynit maynikam chʼamañchtʼastanjja. Ukatakejj akanakwa lursna: jisktʼanakar qhanañchtʼasa, Biblian jiskʼa tʼaqanakapat qhanañchtʼasa jan ukajj kunjamsa Biblian ewjjanakaparjam sarnaqañajj yanaptʼistu uk mä experienciat arstʼasa (Sal. 22:22; 40:9). Jiwasajj qhawqha tiempoy tantachäwinakar saraskstan, ukampis jilat kullakanakan taqe chuyma arstʼapjjatap istʼañajj wal chʼamañchtʼaskakistuwa.

6. ¿Kunanakatakis tantachäwinakasajj yanaptʼistu?

⁶ Tantachäwinakarojj sarapjjañamapuniwa sasajja, ¿kunatsa Jehová Diosajj sispachïstu? Kunattejj tantachäwinakasa, jachʼa tantachäwinakasa, jan ajjsartʼas yatiyañataki ukat yatiyktan uka cheqanakan jan istʼapkistu ukanak aguantañatakiw yanaptʼistu (Hech. 4:23, 31). Ukhamarusa, Bibliat yatjjatañajj iyawsäwis chʼamañchtʼarakistuwa (Hech. 15:32; Rom. 1:11, 12). Ukat tantachäwinakan yatichäwinak katoqtan ukat jilat kullakanakamp maynit maynikam chʼamañchtʼastan ukhajja, wali kusisitaw jikjjatastanjja ukat “tʼaqhesiñ urunakan samarañ katoqa[raktanwa]” (Sal. 94:12, 13). Jehová Diosan markapanjja, Oraqpachan Jilïr Irpirinakat Yatichañ toqet Uñjapki ukanakaw kunanakas tantachäwinakan yatichasiñapa uk uñjapjje. ¡Kuna yatichäwinaktï marpachan sapa semana katoqtan ukanakat wal yuspärtanjja!

7, 8. 1) ¿Kuna amtampis tantachäwinakar sartanjja? 2) ¿Kunjamsa tantachäwinakajj jumar yanaptʼtamjja?

⁷ Tantachäwinakarojj janiw jiwasan askis jikjjatañatakik sarktanti, jan ukasti Jehová Diosar yupaychañatakiw sartanjja (Salmo 95:6 liytʼasiñapawa). Juparu qʼochunakampi jachʼañchañajj wali askipuniwa (Col. 3:16). Jehová Diosajj jan jaytasa Jupar yupaychsna ukat tantachäwinakan arstʼatasampi jachʼañchsna ukwa muni (Apo. 4:11). Ukatwa Jupajj tantachäwinakar sarapjjañamapuniw sasin ewjjtʼpachïstu (Heb. 10:25).

⁸ Tantachäwinakajj Jehová Diosan akapacha tukjañapkam aguantañatakiw yanaptʼistani, ¿uk sumti amuytanjja? Ukhamächi ukhajja, tantachäwinakjja wali askitwa uñjañäni ukat akapachan jan tiemponis sarnaqkstanjja, kunjamatsa tantachäwinakarojj sarapuniñäniwa (Fili. 1:10). Sinti jan walin jikjjatasiñäni ukhakiw jilat kullakanakamp chika Jehová Diosar yupaychirejj jan sarksnati.

9. ¿Kunatsa yatiyañajj wali wakiskiripuni?

⁹ Taqe chuyma yatiyir sarañaw Jehová Diosan  markapampi chika sarañatak yanaptʼarakistu. Jesusajj aka Oraqenkkäna ukhaw yatiyañ qalltawayäna (Mat. 28:19, 20). Ukhatpachaw Jehová Diosan markapajj Jupan Reinopat yatiyaña ukat arkirinak tukuyaña amtampi sarasipkaki. Ukanak lurañatakejj angelanakaw yanaptʼaskistu ukat “khitinakatejj wiñay jakañatak wakichatäpk[i]” jupanakan ukar sarañasatakis irpaskistu, ukwa walja experiencianakan uñjtanjja (Hech. 13:48; Apo. 14:6, 7). Diosan aka oraqenkir markapatakejj uka wakiskir luräwi phoqhañaw nayranki. ¿Jumatakejj ukhamarakiti?

10. 1) Kunjamsa cheqa yatichäwinakarojj jukʼamp munassna uk mä experienciamp qhanañchtʼam. 2) ¿Kunjamsa yatiyir sarañajj jan qarjtañatak yanaptʼawaytamjja?

¹⁰ Taqe chuyma yatiyir sartan ukhajja, cheqa yatichäwirojj jukʼampiw munastanjja. Kuntï Mitchel jilatajj siskäna uka toqet amuytʼañäni, jupasti walja maranakaw precursorjama ukat irpir chuymanjam irnaqtʼaski, jupajj akham siwa: “Cheqa yatichäwinak jaqenakar wal yatichañ muntjja. Yatiyañataki jan ukajj ¡Despertad! revistanakajj jichhak mistki uka yatichäwinakapatwa lupʼta, ukat yatiñampi, amuyumpi ukhamarak wali qhana amuytʼkaña lurtʼatätap uñjasajj wal muspharta. Kamsapjjakinis jaqenakajja ukat kunjamatsa yatjjatañ wal munapjjaspa uk yatiñatakejj wal yatiyir sarañ munta. Ukaw kunatï jakäwijan nayranki uk thaqañataki yanaptʼitu. Ukat kun lurañajas wakisi ukhajja, janïr yatiyir mistkasa jan ukajj yatiyañ tukuyasaw ukanak lurta” sasa. Cheqansa, jan jaytasa yatiyir sarañaw  aka qhepa urunakan jan qarjtañatak yanaptʼistani (1 Corintios 15:58 liytʼasiñapawa).

11. ¿Kunatsa Bibliat apstʼat qellqatanak liyiñasa ukat liyktan ukanakat lupʼiñasa?

¹¹ Chʼamañchtʼañatakejja, Jehová Diosajj Bibliat apstʼat kunayman qellqatanakwa churistu. Uka qellqatanak liytʼasajj inas awisajj akham sirïsta: “¡Nayatakjam qellqanitapuniwa! ¡Jehová Diosas nayatak qellqayasin apayankitaspa ukhamawa!” sasa. Ukajja ukhamapunïskiwa, kunattejj Jehová Diosaw uka qellqatanak toqe yatichistu ukat irparakistu. Jupajj akham sistuwa: “Nayaw yatichaskäma, nayaw amuytʼayaskäma, nayaw sarañamäki uka thak uñachayaskäma” sasa (Sal. 32:8). ¿Bibliat apstʼat qellqatanak liytʼañatakisa ukat kuntï liyktan ukanakat lupʼiñatakis chʼamachasisktanti? Uktï lurañänejja, aka qhepa urunakan aguantañataki ukat Jehová Diosar taqe chuyma serviskakiñatakiw yanaptʼistani (Salmo 1:1-3; 35:28; 119:97 liytʼasiñapawa).

12. ¿Bibliat apstʼat qellqatanak wali askit uñjañatakejj kunas yanaptʼistani?

¹² Bibliat apstʼat qellqatanakajj kunjamsa wakichtʼasi ukanakat lupʼiñäni ukhajja, uka qellqatanak wali askitwa uñjañäni. Oraqpachan Jilïr Irpirinakat khitinakatï Qellqerinakan Uñjirinakapäpki jupanakaw kuna qellqatanakatï apsuskani jan ukajj Internetar uchaskani uk yatjjatasiñapataki, qellqasiñapataki, uñakipasiñapataki, fotonak uchasiñapataki ukat yaqha arur jaqokipasiñapatakis uñjapjje. Ukat kawkïr sucursalanakatï Bibliat apstʼat qellqatanak lurapki uka sucursalanakaw jakʼankir tamanakarusa ukat jayankir tamanakarus apayapjje. ¿Kuna amtampis taqe ukanakajj lurasi? Jehová Diosan markapajj ajay toqet suma chʼamañchtʼatäpjjañapataki (Isa. 65:13). Ukhamajja kuna qellqatanaktï Diosan markapajj apayankistu ukanakat askinak apsupjjapuniñäni (Sal. 119:27).

13, 14. ¿Khitinakas Jehová Diosan uttʼayat markapar alajjpachan yanaptʼasipki, ukat kunjamsa jupanakat yateqassna?

¹³ Apóstol Juanajj mä visionanwa Jesusarojj Jehová Diosar kutkatasirinak contra nuwasiñatakejj mä janqʼo caballor latʼjjatat uñjäna (Apo. 19:11-15). Ukatsti angelanakaru ukat khitinakatï alajjpachar sarañataki ajllitäpki ukanakaruw Jesusan qhepap caballonakar latʼjjatat uñjarakïna, jupanakajj Jesusaruw pʼeqtʼiriparjam yanaptʼapjje (Apo. 2:26, 27). ¡Ukajj wali yateqaskayapuniwa!

¹⁴ Niya ukhamarakiw walja jaqenakjam uñtʼatäpki ukanakajj Jesusan jilanakaparu, mä arunjja, kawkïr ajllitanakatï aka oraqenkasipki ukat Diosan markap pʼeqtʼasipki ukanakar yanaptʼasipki (Zacarías 8:23 liytʼasiñapawa). ¿Kunjamsa sapa maynejj Diosan markapar yanaptʼsna? Khitinakatï pʼeqtʼapki ukanakar istʼasa (Heb. 13:7, 17). Pachpa tamasanwa uk lurañ qalltañasa. Irpir chuymaninakat parlktan ukhajja, ¿jupanakarusa ukat kuntï lurapki ukanakarus respetatasti uñachtʼaytanjja? ¿Wawanakasarojj irpir chuymaninakar respetapjjañapataki ukat jupanakaru yanaptʼa mayipjjañapatakit chʼamañchasktanjja? Ukat ¿kunjamsa oraqpachan yatiyasiñapatakejj qollqempi yanaptʼsna uka toqet utan parltanti? (Pro. 3:9; 1 Cor. 16:2; 2 Cor. 8:12.) ¿Tantachasiñ Uta sum uñjasiñapajj wali askit jiwasatakejja? Kawkhantï respetasiñasa mayachtʼat sarnaqañas utjki ukhaw Jehová Diosajj qollan ajayupampi yanaptʼi. Uka qollan ajayuw aka qhepa urunakan jan qarjtañasatak yanaptʼarakistu (Isa. 40:29-31).

15. ¿Kunatï Diosatakejj askïki uk lurañatakejj kunatsa sapür chʼamachasiñasa?

¹⁵ Ukatjja, Jehová Diosan markapamp chika sarañatakejja, yatiyktan ukarjamaw sarnaqañasa. Mä arunjja, kunatï “Diosatakejj askïki” ukwa lurañasa (Efe. 5:10, 11). Supayana ukat jupan apnaqat akapachan jan walinakar wiytatapata ukat pantjasirïtasatsa kunatï askïki uk lurañajj chʼamakiwa. Yaqhep jilat kullakanakajja, sapüruw Jehová Diosampi sum apasiñatak wal chʼamachasisipki. Ukatwa Diosajj jupanakar wal munasi. ¡Janipun aynachtʼañäniti! Kunapachatï Jehová Diosan munañaparjam sarnaqtan ukhajja, kusisitätanwa ukat Diosar yupaychatasajj janirakiw inamayäkiti (1 Cor. 9:24-27).

16, 17. 1) Jachʼa juchar purtʼasiñäni ukhajja, ¿kuns lurañasa? 2) ¿Kunsa María kullakat yateqsna?

¹⁶ Ukampis jachʼa juchar purtʼasiñäni ukhajja, ¿kun lurañas wakisispa? Jankʼakiw yanaptʼa mayiñasa. Jucha imjjasiñajj jukʼampikiw jan waltʼayjjestaspa. Davitajj juchap imjjasïna ukhajj kunjamsa jikjjatasïna uka toqet amuytʼañäni. Jupajj akham sänwa: “Juchanakajj janïr arsusiñkamajj, janchejjajj kʼachhat kʼachhat aynachtʼaskäna, jaypʼuntañkam ayqotajj layku” sasa (Sal. 32:3). Ukhamawa, khititï juchap imjjaski ukajja, jukʼampikiw chuymapansa ukat Jehová Diosar yupaychañ toqets aynachtʼi, “ukampis khititejj juchap arsusisina jaytanukjjani, ukasti perdonatäjjaniwa” (Pro. 28:13).

¹⁷ Kunatï María * kullakar paskatayna uka toqet amuytʼañäni, jupajj tawaqetäkasaw precursor regularjam irnaqtʼaskäna ukat jamasatwa jan walinak lurañ qalltäna, ukatjja jan walinakaruw purtʼasïna. Jupajj akham siwa: “Concienciajajj sapa kutiw jan wali luratajat amtayitäna. Ukat wali llakitapuniw jikjjatasiyäta” sasa. ¿Kunas uka llakit mistuñatak yanaptʼäna? Mä tantachäwinjja, Santiago 5:14, 15 jiskʼa tʼaqanakatwa qhanañchasïna, ukanwa jupajj yanaptʼatäñ wakisitap amuyasïna ukat tamankir irpir chuymaninakaruw yanaptʼa mayïna. Jupajj saskakiwa: “Uka qellqatanakajja Jehová Diosampi sum apasiñasatak mä qolläkaspas ukhamawa. Uka qolla umtʼañajj chʼamaspawa, ukampis qolltʼiwa. Kuntï uka qellqatan siski uka ewjjtʼarjamaw lurta, ukat yanaptʼawayituwa” sasa. Walja maranakaw pasawayjje, jichhajja María kullakajj wasitatwa Jehová Diosarojj taqe chuyma ukat suma concienciamp yupaychaski.

18. ¿Kun lurañsa amtañasa?

¹⁸ Qhepa urunakan jakañasa ukat Jehová Diosan markapankañas wali askipuniwa. ¡Ukhamajj jan ukhamak qheparañäniti! Jan ukasti, familiasamp chika tantachäwinakar sarañataki, suma chuyman jaqenakar thaqhañataki ukat Bibliat apstʼat qellqatanak liytʼañatakiw chʼamachasiñasa. Ukhamarusa, Diosan markapan sarayapki ukanakar yanaptʼañasawa ukat yatiyktan ukarjamaw sarnaqañasaraki. Ukhamtï lurañänejja, janiw Jehová Diosan markapamp chikakejj sarkañäniti, jan ukasti kunatï Diosatak askïki uk lurasajj janiw qarjkañäniti.