‘Mwitompoka’
‘Mwitompoka’
“Twinenuka ukucita icawama.”—GAL. 6:9.
KUTI MWAYASUKA SHANI?
Finshi ifyo Yehova atupekanishisha ifitwafwa ukutwalilila abacincila?
Bushe ukubika amano ku kupepa Yehova kulenga tulemona shani ukulongana?
Bushe ifyo tupingulapo ukucita kuti fyalanga shani nga tukashipikisha nelyo ukutompoka mu mulimo wesu?
1, 2. Bushe ukutontonkanya pa kuteyanya kwa kwa Yehova ukwaba ku muulu na pe sonde kuti kwalenga twacita cinshi?
NGA twatontonkanya ukuti na ifwe twaba mu kuteyanya ukukalamba nga nshi ukwaba ku muulu na pe sonde, cilatupapusha ica kuti tulafilwa no kusumina. Ifimonwa ifyalembwa muli Esekiele icipandwa 1 na muli Daniele icipandwa 7 filalondolola bwino bwino ifyo Yehova alecita pa kufikilisha ukufwaya kwakwe. Yesu e uletungulula ukuteyanya kwa kwa Yehova ukwa pe sonde mu kushimikila imbila nsuma, mu kusambilisha no kukoselesha ababomba uyu mulimo no kwafwa bambi ukwisa mu kupepa Yehova. Ukwishiba ifi, kulalenga twacetekela sana ukuteyanya kwa kwa Yehova!—Mat. 24:45.
2 Bushe na ifwe tulebombesha nge fyo ukuteyanya kwa kwa Lesa kulebombesha? Bushe tuletemenwako icine nelyo bushe ukutemwa kwesu kulecepelako? Nga twatontonkanya pali aya mepusho, nalimo kuti twasanga ukuti natutendeka ukunenuka nelyo tatuli abacincila nge fyo twali kale. Ica musango uyu kuti cacitika. Mu nshita ya batumwa, umutumwa Paulo akoseleshe Abena Kristu banankwe ukutontonkanya pa fyo Yesu ali uwacincila. Paulo atile ukucita ifi kwali no kubafwa ‘ukukananaka no kukanatompoka.’ (Heb. 12:3) Mu cipande cafumineko twasambilile pa fyo ukuteyanya kwa kwa Yehova kulecita, kanshi na ifwe nga tuletontonkanya pa fyo twasambilile kuti twatwalilila ukushipikisha no kuba abacincila.
3. Finshi twingacita pa kuti tatutompweke, kabili finshi twalasambilila muli cino cipande?
3 Na lyo line, Paulo alandile kuti kwaliba na fimbi ifyo tufwile ukucita pa kuti tatutompweke. Atile tufwile ukutwalilila “ukucita icawama.” (Gal. 6:9) Kanshi tulekabila ukubombesha. Twalalanda pa fintu fisano ifingatwafwa ukutwalilila abacincila no kulaendela pamo no kuteyanya kwa kwa Yehova. Lyena twalamona nga ca kuti pali umo tufwile ukubombela pa lwesu nelyo no lupwa lwesu.
MULELONGANA PA KUTI MULEKOSELESHANYA NO KUPEPA LESA
4. Mulandu nshi twingalandila ukuti ukulongana kwalicindama mu kupepa kwa cine?
4 Ukulongana kwalicindama nga nshi ku babomfi ba kwa Yehova. Mu muulu, Yehova alalongana na bamalaika bakwe. (1 Isha. 22:19; Yobo 1:6; 2:1; Dan. 7:10) Abena Israele balelongana “pa kutila bakutike kabili basambilile.” (Amala. 31:10-12) AbaYuda mu nshita ya batumwa balelongana lyonse mu masunagoge ku kubelenga Amalembo. (Luka 4:16; Imil. 15:21) Na lintu icilonganino ca Bena Kristu capangilwe, ukulongana kwali ukwacindama kabili na muno nshiku mwine, kwalicindama. Fwe Bena Kristu ba cine ‘tulatontonkanya pa banensu ku kucincishanya ku kutemwa kabili ku kubomba imilimo iisuma.’ Tufwile ukutwalilila ‘ukukoseleshanya, maka maka apo tulemona ubushiku bwa kwa Yehova bulepalama.’—Heb. 10:24, 25.
5. Kuti twakoseleshanya shani ilyo tuli pa kulongana?
5 Inshila imo iyacindama iyo tukoseleshanyamo yaba kwasukapo pa kulongana. Kuti twalumbula apabuuta icitetekelo cesu nga twa-asuka icipusho cili muli paragrafu, twalondolola ilembo, nelyo twalanda pa cacitike icilelangilila umulandu cawamina ukukonka ifyo Baibolo ilanda. (Amalu. 22:22; 40:9) Nangu ca kutila twalilongana pa myaka iingi, ifyasuko ifyo bamunyinefwe basuka, nampo baice nelyo bakalamba, filatukoselesha nga nshi.
6. Bushe ukulongana kutwafwa shani ukuba abakosa lwa ku mupashi?
6 Milandu nshi imbi iyo Lesa afwaila ukuti tulelongana lyonse? Ukulongana kwa pa cilonganino no kulongana kukalamba kulatwafwa ukuba abashipa ilyo tuleshimikila na lintu abantu baletukaanya nangu tabalefwaya ukukutika. (Imil. 4:23, 31) Ifyebo fya mu Malembo ifilandwa pali uku kulongana filakosha icitetekelo cesu. (Imil. 15:32; Rom. 1:11, 12) Ukufunda no kukoseleshanya ukuba pali uku kulongana kulalenga twaba ne nsansa sha cine cine kabili kulenga ‘twaba no mutende nangu ni mu nshiku sha kucula.’ (Amalu. 94:12, 13) Komiti ya Kusambilisha iye Bumba Litungulula e ipekanya amaprogramu yonse aya kusambilisha abantu ba kwa Yehova mu calo conse. Ala tulatasha nga nshi pa masambililo ayasuma ayo tusambilila pa kulongana cila mulungu, umwaka fye onse!
7, 8. (a) Mulandu nshi uwacindama sana uo tulonganina? (b) Bushe ukulongana kumwafwa shani?
7 Lelo kwaliba umulandu uwacindamisha uo tulonganina uwacila pa fyo tunonkelamo pa lwesu. No yu mulandu wa kupepa Yehova. (Belengeni Amalumbo 95:6.) Ala lishuko nga nshi ukulalumbanya Lesa wesu, umusuma! (Kol. 3:16) Yehova alilinga ukumulumbanya lyonse ilyo tuli pa kulongana na lintu tuleasukapo. (Ukus. 4:11) E mulandu wine batukonkomesesha ‘ukukanapuswa ku kulongana, filya waba umusango wa bamo!’—Heb. 10:25.
8 Bushe tumona ukulongana ukuti kupekanya uko Yehova abikako ku kutwafwa ukutwalilila ukushipikisha mpaka akonaule cino calo cabipa? Nga e fyo tumona, ninshi ukulongana kukaba pa fintu “ifyacilapo ukucindama” kabili tukalasangwako lyonse nangu twalikwata ifingi ifya kucita. (Fil. 1:10) Tatufwile ukupuswa ku kulongana uko tuba pamo na bamunyinefwe ku kupepa Yehova, kano fye nga ca kuti pali icikalamba icalenga.
MULEFWAYA ABAFWAYA UKUMFWA
9. Twaishiba shani ukuti umulimo wa kushimikila walicindama?
9 Ukushimikila imbila nsuma na ko kulatwafwa ukulaendela pamo no kuteyanya kwa kwa Yehova. Yesu atendeke uyu mulimo ilyo ali pano calo. (Mat. 28:19, 20) Ukutula ilya nshita, ukushimikila pa Bufumu no kulenga abantu ukuba abasambi e mulimo ukuteyanya kwa kwa Yehova kwabikako sana amano. Ifingi ificitika muno nshiku filanga ukuti bamalaika balatungilila uyu mulimo kabili balatutungulula ku ‘baba no mutima uusuma abafwaya umweo wa muyayaya.’ (Imil. 13:48; Ukus. 14:6, 7) Ico ukuteyanya kwa kwa Yehova ukwa pe sonde kwabelako kulapekanya ifya kubomba uyu mulimo wacindama no kulautungilila. Bushe na ifwe tumona ukuti umulimo wa kushimikila walicindama?
10. (a) Langilileni ifyo twingatwalilila abacincila mu cine. (b) Bushe ukushimikila kwamwafwa shani ukukanatompoka?
10 Ukuba abacincila mu mulimo wa kushimikila kulalenga twatemwa sana icine. Natulande pali ba Mitchel, ababomba bueluda na bupainiya pa myaka iingi. Batile: “Nalitemwa ukushimikila abantu icine. Ndatontonkanya pa cipande icili muli magazini ya Ulupungu lwa kwa Kalinda nelyo Loleni! iipya kabili ndapapa ukumona ukuti muli magazini yonse mulaba ifyebo ifingalenga twaba na mano, ifyalondololwa bwino kabili filafwa abantu fye bonse. Ndafwaya ukuya mu kushimikila pa kuti mone abantu ifyo bala-ankulako, ne fyo ningabalenga bafwaya ukumfwa icine. Ukushimikila kulalenga ndebika amano ku fintu ifyacindama. Kabili nshifwaya icili conse ukupumfyanya inshita yandi iya kushimikila.” Na ifwe kuti twatwalilila abashangila muli shino nshiku sha kulekelesha nga ca kuti tuli abacincila muli uyu mulimo wa mushilo.—Belengeni 1 Abena Korinti 15:58.
MULENONKELAMO MU KUBELENGA IMPAPULO
11. Mulandu nshi tufwile ukulabelengela impapulo shesu no kulatontonkanyapo?
11 Yehova alatupekanishisha ifya kulya ifingi ifya ku mupashi ifilenga twaba abakosa. Ukwabula no kutwishika, nalimo kuti mwaibukisha ilyo mwabelengelepo ulupapulo lumo kabili pa numa ya kubelenga, mwatile: ‘Ifi e fyebo ndekabila! Cili kwati Yehova alembeele ine ulu lupapulo!’ Ico mwayumfwilile ifi, mulandu wa kuti Yehova abomfya impapulo ku kutusambilisha no kututungulula. Yehova atila: “Nkakucenjesha no kukusambilisha inshila iyo ufwile ukuyamo.” (Amalu. 32:8) Bushe tulesha apapela amaka yesu ukubelenga impapulo shonse no kutontonkanyapo? Ukucita ifi kukatwafwa ukushipikisha kabili tukatwalilila ukuba abacincila mu mulimo wa kwa Lesa muli shino nshiku sha kulekelesha.—Belengeni Amalumbo 1:1-3; 35:28; 119:97.
12. Cinshi cingatwafwa ukulamona impapulo shesu ukuti shalicindama?
12 Cisuma sana ukutontonkanya pa mulimo uubombwa pa kuti fye bapekanye ifya kulya fya ku mupashi. Ukucita ifi kukalenga tukalemona impapulo shesu ukuti shalicindama sana. Komiti ya kulemba iye Bumba Litungulula e yangalila umulimo wa kusokota ifyebo ifiba mu mpapulo, uwa kulemba, uwa kupitulukamo mu fyebo balembele, uwa kubika ifikope mu mpapulo, uwa kupilibula impapulo ishipulintwa e lyo ne sho babika pa Intaneti. Lyena, aba pa maofeshi apo bapulinta ishi mpapulo balashitwala ku filonganino ifyaba mupepi ne fyaba ukutali. Mulandu nshi imilimo yonse iyi ibombelwa? Ni pa kuti abantu ba kwa Yehova balekwata ifya kulya fya ku mupashi ifibafwa ukuba abakosa. (Esa. 65:13) E ico kanshi natulebikako amano ukubelenga ishi mpapulo isho Yehova atupekanishisha ukupitila mu kuteyanya kwakwe.—Amalu. 119:27.
MULETUNGILILA UKUTEYANYA KWA KWA YEHOVA
13, 14. Ni bani abatungilila ukuteyanya kwa kwa Yehova ku muulu, kabili kuti twabapashanya shani?
13 Umutumwa Yohane mu cimonwa, amwene Yesu nanina pali kabalwe wabuuta kabili aleya mu kucimfya bonse abapondokela Yehova. (Ukus. 19:11-15) Ala icitetekelo cesu cilakoselako ukwishiba ukuti abakonka Yesu muli ubu bulwi ni bamalaika aba cishinka na basubwa abacimfya icalo kabili abapokelela kale icilambu cabo ku muulu! (Ukus. 2:26, 27) Na ifwe natuletungilila abo Yehova asonta ukututungulula nga filya fine bamalaika na basubwa batungilila Yesu!
14 E fyo na ba mwi bumba likalamba nabo bacita, balatungilila bamunyina ba kwa Kristu abasubwa abacili pe sonde. (Belengeni Sekaria 8:23.) Kuti twalanga shani ukuti tulatungilila ukuteyanya kwa kwa Yehova? Inshila imo tulangilamo ici, kulaumfwila abatungulula. (Heb. 13:7, 17) Kabili tufwile ukutendekela mu cilonganino cesu. Bushe ifyo tulanda pali baeluda filanga ukuti twalibacindika no kuti twalicindika no mulimo babomba? Bushe tulakoselesha abana besu ukucindika aba baume ba cishinka no kulaumfwila ukufunda kwabo ukwa mu Malembo? E lyo kabili, bushe tulalanshanyapo no lupwa lwesu ifyo twingatungilila umulimo wa mwi sonde lyonse ukupitila mu misangulo? (Amapi. 3:9; 1 Kor. 16:2; 2 Kor. 8:12) Bushe tulamona umulimo wa kuwamya Ing’anda ya Bufumu ukuti walicindama? Yehova nga amona ukuti tuletungilila ukuteyanya kwakwe muli iyi nshila, alatupeela umupashi wakwe uwa mushilo. Umupashi wa mushilo ulatwafwa ukukanatompoka muli shino nshiku sha kulekelesha.—Esa. 40:29-31.
MULECITA UKULINGANA NE MBILA MUBILA
15. Mulandu nshi tufwile ukulalwishisha lyonse ukulacita ukulingana ne fyo Yehova afwaya?
15 Ica kulekelesha, pa kuti tutwalilile ukushipikisha no kulaendela pamo no kuteyanya kwa kwa Yehova, tufwile ukuba ne mibele iisuma no kushininkisha ukuti ifyo tulecita filesekesha Shikulu. (Efes. 5:10, 11) Pa mulandu wa kuti tatwapwililika kabili Satana ne calo cakwe icabipa balatulwisha, cilafya ukucita ifisuma. Bamunyinefwe na bankashi bamo mulalwisha na maka cila bushiku pa kuti fye mutwalilile ukuba ifibusa fya kwa Yehova. Ifi mucita filenga Yehova ukumutemwa sana. Mwinenuka! Nga tulecita ifisekesha Yehova tukaba ne nsansa nga nshi kabili tukacetekela no kuti akalapokelela ukupepa kwesu.—1 Kor. 9:24-27.
16, 17. (a) Finshi tufwile ukucita nga twacita ulubembu ulukalamba? (b) Finshi twingasambililako ku fyacitikile Anne?
16 Lelo finshi tufwile ukucita nga ca kutila twacita ulubembu ulukalamba? Ilyo line fye, tufwile ukulomba ukuti batwafwe. Ukufisa ulubembu kukalenga fye ifintu ukubipilako. Muleibukisha ukuti ilyo Davidi afwaile ukufisa ulubembu, ‘amafupa yakwe yalipomponteke mu kuteta kwakwe akasuba konse.’ (Amalu. 32:3) Ukufisa imembu kukalenga fye ukuti twikaba ne nsansa kabili tatwakabe ifibusa fya kwa Lesa, lelo nga ‘twasokolola imembu no kushileka tukabelelwa uluse.’—Amapi. 28:13.
17 Tontonkanyeni pa fyacitile Anne. * Ilyo Anne ali umupungwe, ali ni painiya wa nshita yonse. Lelo atendeke ukulacita ifyabipa mu bumfisolo. Ifi alecita fyalengele kampingu yakwe ukulacula sana. Atile: “Nshali ne nsansa kabili naleumfwa sana ububi.” Finshi acitile? Atile, bushiku bumo ilyo ali ku kulongana balilandile pe lembo lya kwa Yakobo 5:14, 15. Anne alikutulwike ukuti alekabila ukumwafwa kabili aebele baeluda ukuti bamwafwe. Anne atile: “Amalembo yaba kwati muti uo Yehova atupeela pa kuti tupole lwa ku mupashi. Umuti tauwama ukunwa, lelo ulaposha. Nalikonkele ukufunda ukwali mu malembo, kabili kwalingafwile.” Pali ino nshita, Anne alicincila na kabili ukubombela Yehova kabili aliba na kampingu iyasanguluka.
18. Finshi tufwile ukupampaminapo ukucita?
18 Ala lishuko nga nshi ukuba mu kuteyanya kwa kwa Yehova muli shino nshiku sha kulekelesha! Kanshi natutwalilile ukubika amano ku fyo Yehova atupekanishisha ifitwafwa ukukanatompoka. Natutwalilile ukulalongana lyonse ne ndupwa shesu, ukulabombesha ukufwaya abantu abafwaya ukumfwa mu cifulo tushimikila, kabili tuletasha na pa fya kulya fya ku mupashi ifyo tupokelela. Na kabili, tufwile ukulatungilila abatutungulula no kuba ne mibele iisuma iyalingana ne mbila tubila. Nga tulecita ifi tukalaendela pamo no kuteyanya kwa kwa Yehova kabili tatwakatompoke!
[Futunoti]
^ para. 17 Te shina lyakwe.
[Ifipusho]
