1, 2. ¿Jamüsü weʼitaaka maʼin waaʼin sünain tü nupueulosekat Jeʼwaa?

TALATSÜ maʼin waaʼin sutuma suluʼuin waya tü nupueulosekat Jeʼwaa. Weʼrüin suluʼu Ezequiel kapiitulo 1 otta Daniel kapiitulo 7, anain maʼin nutuma Jeʼwaa sukuwaʼipa suʼuniria tü nupueulosekat. Nia Jesuu shikiipüʼüka nupueulose Jeʼwaa yaa mmapaʼa süpüla süküjünüinjatüin pütchi, naaʼinmajünüin na anoujüshiikana otta süpüla sütüjaanüin aaʼu tü iküleesia shiimainkat. Makalaka weʼitaain waaʼin sünain tü nupueulosekat Jeʼwaa (Mat. 24:45).

² ¿Wanaawashiiche waya waneʼewai wakua sümaa tü nupueulosekat Maleiwa? ¿Ayatsia keeʼireein waaʼin waküjüin pütchi? ¿Akulajaataapa waaʼin? Jülüjüle waaʼin tia, eesü weʼrüle müin mapüsakai waaʼin jee müin wakulajaakai aaʼin sünain aʼyatawaa nümüin Maleiwa. Eesü süpüla sülatüin tia nümüin wanee anoujüshi. Aashajaashinka chi aluwataaushikai Pablo namaa waneeinnua anoujüshii süchiki nashatüinjatüin nukuwaʼipa Jesuu. Naainjüinjatü tia ‹suulia malainjain naaʼin sünain anoujaa suʼunnaa tü müliaa neʼrakat› (Heb. 12:3). Müsia eera wakuwaʼipa sutuma tü ekirajaaya wekirajaakalüinka anain, sükaaliinjüin waya süpüla nnojoliin wakulajaain aaʼin sünain aʼyatawaa nümüin Jeʼwaa otta süpüla wachecherüin waaʼin.

3. ¿Kasa waainjüinjatka süpüla nnojoliin mapüsain waya? ¿Kasa wekirajaainjatka anain?

³ Nüküjüin Pablo sooʼomüin tü kasa waainjüinjatkat süpüla nnojoliin wakulajaain aaʼin: ayatüinjana waya «sünain aaʼinraa tü anasükat» (Gal. 6:9). Waainjüinjatü tia wapüshuaʼa. Wekirajaa sünain jaʼraisü kasa süpüla nnojoliin wakulajaain aaʼin suulia nupueulose. Sükaaliinjeena waya tia süpüla watüjaain saaʼu sümaa wapüshi tü wanoukteʼerüinjatkat sünain wakuwaʼipa.

4. ¿Jamüsü sünainpünaaka aʼwaajaa Jeʼwaa tü outkajawaakat?

⁴ Choʼujaasü tü outkajawaakat namüin na aʼyataakana nümüin Jeʼwaa. Chayaa iipünaa outkajaʼawaishii na aapieekana nümülatuʼumüin Jeʼwaa (1 Rey. 22:19; Job 1:6; 2:1; Dan. 7:10). Outkajaʼawaliinjana na israeliitakana süpüla nekirajünüin otta naapajüin nünüiki Maleiwa (Deut. 31:10-12). Soʼu nükalia Jesuu, oʼunawaishii na judíokana suluʼumüin tü ekirajüleekat süpüla naashajeʼerüinjatüin tü karaloukta Nüchikimaajatkat Maleiwa (Luc. 4:16; Aluw. 15:21). Otta na nikirajüinkana Jesuu, ayatshiʼiya naya outkajaain sünain aapajaa nünüiki Maleiwa. Müsia neʼe maaʼulu sukuwaʼipa tü outkajawaakat; sünainpünaasü shia tü aʼwaajaakat Maleiwa. Outkajaʼawaishii waya süpüla «kamaneejiraain je [süpüla] waaʼinrüin tü anasükat». Outkajaainjana waya «süpüla wachecherüin waaʼin [...] süka sülüʼülüin nükalia» Jeʼwaa (Heb. 10:24, 25).

5. ¿Kasa waaʼinrajatka süpüla watütüleʼerüin naaʼin na wawalayuukana sünain tü outkajawaakat?

⁵ Wachecherüin waaʼin sünain anoujaa wayalerüle wajapü süpüla asouktaa sünain tü outkajawaakat. Weeʼiyatüin kanoulain waya wanaa sümaa wasouktüin shiʼipajee tü asakinnakalü anain, waküjüin jamaluʼuluin wanee wersiikulo otta waküjüin wanee kasa eeʼiyataka anain aainjaa tü sümakat tü Wiwüliakat (Sal. 22:22; 40:9). Jaʼitainna kakaliainnain waya oʼunüin sünain tü outkajawaakat, ayatsia sütütüleʼerüin waaʼin nanüiki na wawalayuu ataralüinnakana, na jimaʼaliikana otta na majayünnüükana.

6. ¿Jamüsü anaka wanoula sutuma tü outkajawaakat?

⁶ ¿Jamüshi wachiiruaakuʼu wamaka Jeʼwaa süpüla woutkajaainjanain? Shia süka meimmoluin waya sutuma sünain aküjaa pütchi jaʼitairü jashichin wayuu wamüin (Aluw. 4:23, 31). Kooʼomüinsü wanoula sutuma wekirajünüin sünain tü sümakat tü Wiwüliakat (Aluw. 15:32; Roma 1:11, 12). Sutuma wekirajünüin otta süchechennüin wanoula sünain tü outkajawaakat, talatsü waaʼin otta nnojotsü shapaain waaʼin suʼunnaa tü müliaa weʼrakat (Sal. 94:12, 13). Eeshii na Wawalayuu jülüjakana aaʼin tü ekirajünakalü anain nupueulose Jeʼwaa sainküin mmaka. ¡Talatsü maʼin waaʼin sutuma tü ekirajünakalü anain waya semaanawai suluʼu tü outkajaaleekat!

7, 8. (1) ¿Kasapülajatü tü outkajawaakat? (2) ¿Kasa sükaaliinjaka anain pia tü outkajawaakat?

⁷ Nnojoishii outkajaain neʼe waya süpüla anainjatüin wakuwaʼipa, outkajaashii waya süpüla waʼwaajüinjachin Jeʼwaa (paashajeʼera Salmo 95:6). ¡Aʼwaajaa Jeʼwaa shia wanee kasa anakalü maʼin! (Col. 3:16.) Waʼwaajüinjachi nia weinshi, waainjüin tia wanaa sümaa woutkajaain otta wasouktüin shiʼipajee tü asakinnakalü anain (Alat. Map. 4:11). Shiajaʼa maʼin nümaka Jeʼwaa wamüin: «Anakaja müleka nnojoliire müin aka waya naaʼin na wayuu akulajaakana aaʼin sünain jutkatirawaa» (Heb. 10:25).

⁸ ¿Piʼrüitpa choʼujaain maʼin puutkajaain süpüla püchecherüin paaʼin sajaʼttinnaleepa tü kasakalüirua? Mülejeʼeya shia wamüin, yaleerü tü outkajawaakat saʼaka tü kasa anasü waaʼinrajatkat otta nnojoleena makatüin waya suulia jaʼitainna kupaain maʼin waya (Filip. 1:10). Waʼwaaja Jeʼwaa waneepia sünain tü outkajawaakat, aluʼusaʼa isalejeʼeya maʼin wachiki oʼunaa.

9. ¿Jamüshii waküjüinjanaka maʼin pütchi?

⁹ Waʼyataale maʼin sünain aküjaa pütchi wanaaweerü tü waaʼinrakat sümaa tü saaʼinrakat nupueulose Jeʼwaa. Shiapajaʼa naaʼinmaaka maʼin Jesuu ekirajaa otta aküjaa pütchi sümüin wayuu wanaa sümaa yaajachin nia mmapaʼa (Mat. 28:19, 20).  Makalaka shiain saaʼinmaain maʼin nupueulose Jeʼwaa tü aküjaakat pütchi süchiki Nuluwataaya otta ekirajaa wayuu. Tü alatakat namüin na wawalayuukana sünain aküjaa pütchi, shiiʼiyatüin nakaaliinjüin waya na aapieekana otta noʼunirüin wakuwaʼipa nanainmüin na achekakana tü shiimainkat (Aluw. 13:48; Alat. Map. 14:6, 7). Aʼyataasü maʼin waneepia tü nupueulose Jeʼwaa yaakat mmapaʼa süpüla saaʼinrüin tia aʼyatawaakat. ¿Shia paaʼinmaaka maʼin tü aküjaakat pütchi suulia waneeirua kasa?

10. (1) ¿Kasa waaʼinrajatka süpüla kojutüin wamüin tü aküjaakat pütchi? Püküja süchiki tü naainjakat wanee anoujüshi. (2) ¿Jamüsü makulajaainka paaʼin sutuma tü aküjaakat pütchi?

¹⁰ Kojuteerü maʼin wamüin tü pütchi anasükat waküjüle maʼin shia. Jülüjataa waaʼin tü nümakat Mitchel, wanee laülaashi otta kakaliaichi nia sünain pürekutsoolin: «Kamalainsü maʼin tamüin taküjüin tü pütchikat namüin na wayuukana. Ponusü taaʼin wanaa sümaa taashajeʼerüin wanee pütchi eeka ojuʼitüin suluʼu tü rewiisütakat Aapiria Wayuu jee shiale suluʼu ¡Despertad! süka anain tü shikirajakalü anain, tayaawatüin saaʼu tü waaʼinrajatkat otta wanaawain tü shikirajakalü anain. Keeʼireesü taaʼin taküjüin tü pütchikat süka teʼreein wayuu sünain talatüin saaʼin otta taküjeein wanee pütchi eeka natüjaweein maʼin saaʼu. Anasü taaʼin süka taküjüin maʼin tü pütchikat. Eewaire wanee kasa taainjüinjatka, taainjüin shia taleʼejapa süchikijee tü aküjaakat pütchi jee eesüjaʼa taainjüle shia süpülapünaa tojuʼitüin».  Ayatüle waküjüin maʼin tü pütchikat sükaaliinjeena waya süpüla wachecherüin waaʼin sajaʼttaleepa tü kasakalüirua (paashajeʼera 1 Corinto 15:58).

11. ¿Jamüsü waashajeʼerüinjatka tü karaloukta naapakat Jeʼwaa wamüin?

¹¹ Naapüin Jeʼwaa wamüin wainma karaloukta süpüla wachecherüin waaʼin sünain anoujaa. Eesüjaʼa müle wanüiki wanaa sümaa waashajeʼerüin waneeirua pütchi: «Pansaasü maʼin tü pütchikat sümaa takuwaʼipa. Müsü nüshajiralakai saaʼin Jeʼwaa tamüin». Nnojotsü nüshajiralain neʼe Jeʼwaa süpaʼa mmaka süka nikirajüin waya otta nuʼunirüin wakuwaʼipa sükajee tia karalouktakalüirua. Matüjüiya nia: «Kekiijeechi pia tatuma otta tekirajeechi pia sünain tü wopu puʼunüinjatkalü aluʼu» (Sal. 32:8, NM). ¿Waashajeʼerüinche süpüshuaʼa tü karaloukta aapünakat wamüin? ¿Jülüjüsüche waaʼin tü sümakat? Waaʼinrüle tia, wachechereerü waaʼin otta nnojoleerü eemiajaain wanoula maaʼulu (paashajeʼera Salmo 1:1-3; 35:28 otta 119:97).

12. ¿Kasa akaaliinjeenaka waya süpüla kojutüin wamüin tü karalouktakalüirua?

¹² Kojuteerü wamüin tü karaloukta anainjatkalü atuma wanoula watüjaale saaʼu wainmain aʼyatawaa süchiirua. Na Akumajakana tü Ekirajünakalü anain, jülüjüsü naaʼin tü ashajünüinjatkat sünain wanee karaloukta, jamüinjatüin süshajia, sunouktia jee kasain ayaakuaa eeinjatka sünain, sukuwaʼipainjatka sülatinnapa suluʼu wanee anüikii otta tü eʼitaanajatkat suluʼu Internet. Aluwataanüsü namüin na wawalayuukana tia karalouktakalüirua sutuma tü Weteet eʼinprimiijakat shia, jaʼitairü pejein jee wattain tü noutkajaalekat. ¿Jamüsü shiʼyataanaka maʼin achiirua tia? Süpülajatü anain nanoula na suluʼukana nupueulose Jeʼwaa (Is. 65:13). Wekirajaa maʼin sünain tü karaloukta aluwataanakat wamüin sutuma tü nupueulosekat Maleiwa (Sal. 119:27).

13, 14. ¿Jaralii na aʼyataajiraakana sümaa nupueulose Jeʼwaa chaa iipünaa? ¿Kasa waaʼinrajatka süpüla washatüin nakuwaʼipa?

¹³ Naashin chi aluwataaushikai Juan niʼrüin Jesuu saaʼu wanee ama kasuutai süpüla süsalainjatüin saainjala wayuu nutuma (Alat. Map. 19:11-15). Katchinsü waaʼin süka watüjaain saaʼu eein nümaa Jesuu na aapieekana otta na aluwataainjanakana nümaa chaa iipünaa (Alat. Map. 2:26, 27.) Shikirajüin waya tü nakuwaʼipakat sünain waʼyataajiraainjanain sümaa nupueulose Jeʼwaa.

¹⁴ Akaʼaya na wayuu wattakana naalii aʼyataajiraashii naya namaa na aluwataainjanakana nümaa Jesuu chaa iipünaa, na jülüjakana aaʼin tü nupueulose Maleiwa yaakat Mmapaʼa (paashajeʼera Zacarías 8:23). ¿Kasa waaʼinrajatka waneʼewai wakua süpüla waʼyataajiraain sümaa nupueulose Jeʼwaa? Oonooinjana waya sümaa tü namakat na laülaashiikana (Heb. 13:7, 17). Waaʼinrajatü tia suluʼu tü outkajaaleekat. Wamaa sümaa waashajaain nachiki na laülaashiikana, ¿weeʼiyatüinche kojutüin naya wamüin otta kojutüin wamüin tü naʼyataainkat? ¿Aashajaashiiche waya namaa wachonnii süpüla kojutüinjanain naya namüin otta süpüla nachuntüin kaaliinwaa namüin? ¿Aashajaashiiche waya namaa wachonnii süchiki tü nneerü wasülajüinjatkat süpüla süküjünüin maʼin tü pütchikat? (Prov. 3:9; 1 Cor. 16:2; 2 Cor. 8:12.) ¿Weisalajüinche maʼin tü Piichi Outkajaaleekat? Eejeechi chi naaʼinkai Jeʼwaa waaʼu müleka kojutüjiraale otta paaʼinwajiraale waya. Nutuma chi naaʼinkai Maleiwa wachechereerü waaʼin sünain anoujaa maaʼulu (Is. 40:29-31).

15. ¿Jamüshii eejiraainjanaka waya maaʼulu süpüla waaʼinrüin tü keeʼireekat naaʼin Jeʼwaa?

¹⁵ Süpüla wachecherüin waaʼin sümaa waaʼinrüin tü saaʼinrakat nupueulose Jeʼwaa, weʼitaainjatü suluʼu wakuwaʼipa tü pütchi waküjakat. Shiainjatü waaʼinraka «tü nüchekakat chi Senyotkai» wapüleerua (Éf. 5:10, 11). Nutuma Satanaa, sutuma kaainjaraliin waya otta mojuin sukuwaʼipa tü wayuukalüirua, kapüleesü maʼin wamüin waaʼinrüin tü kasa anasükat. Wawalayuu, eeshiijaʼa eejiraale jia waneepia sümaa tia süpüla ayatüin aleewain jia nümaa Jeʼwaa. Sükajee jaaʼinrüin tia, aishii maʼin jia nüpüla Jeʼwaa. ¡Jüchechera jaaʼin wawalayuu! Wanaa sümaa waaʼinrüin tü keeʼireekat naaʼin Jeʼwaa talatsü waaʼin otta watüjaa aaʼu nnojoleerüin amülain neʼe tü waaʼinrakat süpüla waʼwaajüin nia (1 Cor. 9:24-27).

16, 17. (1) ¿Kasa waaʼinrajatka kaainjarale waya? (2) ¿Kasa shikirajaka anain waya tü alatakat sümüin Anne?

¹⁶ ¿Kasa waaʼinrajatka kaainjarale waya? Achuntamaatüinjana waya kaaliinwaa. Mojuleejeeria maʼin wakuwaʼipa müleka wounjulajüle süchiki tü waainjalakat. Müshi David, wanee wayuu ounjulajakai süchiki naainjala: «Wanaa sümaa koʼutüin neʼe taya, matchinsai taya sutuma mojuin maʼin taaʼin waneepia» (Sal. 32:3, NM). Wounjulajüle süchiki tü waainjalakat, mojeerü maʼin waaʼin otta amalajaajeerü wanoula sutuma; aluʼusaʼa waküjüle süchiki sümaa wooʼulaain suulia amüliajüneena waya (Prov. 28:13).

¹⁷ Jülüjataa waaʼin tü alatakat sümüin Anne, * wanee majayülü pürekutsoot rekulaat. Mojusü maʼin sukuwaʼipa sutuma suunjulajüin süchiki tü saainjalakat. Müsü shia: «Mojukuʼu müsü taaʼin waneepia sutuma tü taainjalakat». ¿Kasakaʼa saaʼinrüin? Wanaa sümaa saashajaanüin achiki tü sümakat Santiago 5:14, 15, shiyaawata aaʼu choʼujaain suchuntüin kaaliinwaa, makalaka saashajaain namaa na laülaashiikana. Shiasaʼa sümaka süchiki tia: «Tia piamasükat wersiikulo müsü aka saaʼin wanee wepinase naapaka Jeʼwaa wamüin süpüla waawalaain. Mayaapejeʼe ishin shia, aawalaasü wayuu sutuma. Anaitpa takuwaʼipa sutuma taaʼinrüin tü sümakat tia pütchikat». Maaʼulu, ayatüsia Anne sünain aʼyatawaa nümüin Jeʼwaa süka süpüshuaʼa saaʼin sümaa talatüin saaʼin.

18. ¿Kasa waaʼinrajatka waneʼewai wakua?

¹⁸ Talatsü maʼin waaʼin süka suluʼuin waya maaʼulu tü nupueulosekat Jeʼwaa. Kojuta wamüin tia. Woʼuna waneepia sünain tü outkajawaakat sümaa wapüshi, waküja maʼin tü pütchikat sümüin wayuu otta wekirajaa sünain tü karaloukta anainjatkalü atuma wanoula. Waʼyataajiraa namaa na laülaakana wapüleerua otta weʼitaa suluʼu wakuwaʼipa tü waküjakat. Waainjüle tia, wanaaweerü tü waaʼinrakat sümaa tü saaʼinrakat nupueulose Jeʼwaa otta nnojoleerü akulajaain waaʼin sünain aaʼinraa tü kasa anasükat.