1, 2. ¿Mbaʼérepa ñanepytyvõiterei jajepyʼamongetáramo Jehová organisasión rehe?

¡AJÉPA javyʼaite ñaime haguére Jehová organisasión tuichaitévape! Umi visión oĩva Ezequiel kapítulo 1 ha Daniel kapítulo 7-pe, ohechauka Jehová oisãmbyhyha opaite mbaʼe oikóva ikatu hag̃uáicha oñekumpli porã hembipota. Jesús omoakã Ñandejára organisasión yvy arigua ojepredikave hag̃ua pe marandu porã, umi maranduhára ojerovia mbareteve hag̃ua, ha pe rrelihión añetegua okakuaave hag̃ua. Koʼã mbaʼe ohechauka ñandéve ikatuha jajerovia ñande pyʼaite guive Jehová organisasión rehe (Mat. 24:45).

² Péro, ¿jasegípa ñambaʼapo Jehová organisasión ndive? ¿Ojekuaápa ñanderehe ñanekyreʼỹveha koʼág̃a jajapo hag̃ua Ñandejára rembipota, térãpa oime ñandekaigueve? Jajepyʼamongetávo koʼã porandúre, ikatu hína jahechakuaa ñanekaneʼõha jaikóvo, térã nañañehaʼãveimaha ymave guaréicha. Ha añetehápe ningo upéva ikatu oiko oimeraẽ kristiánore. Síglo primérope, tekotevẽ kuri apóstol Pablo omokyreʼỹ umi ermánope ojesareko hag̃ua Jesús ehémplore. ¿Mbaʼérepa? ‘Ani hag̃ua ikaneʼõ ni ikangy’ hikuái (Heb. 12:3, NM). Péicha avei, ñahesaʼỹijo rire pe artíkulo ohasa vaʼekue oiméne katuete ñanepytyvõ ñanekyreʼỹve ha jasegi hag̃ua ñaaguanta, jaikuaa rupi mbaʼépa ohupyty ohóvo Jehová organisasión.

3. ¿Mbaʼépa tekotevẽ jajapo ani hag̃ua ñanekaneʼõ, ha mbaʼépa ñahesaʼỹijóta ko artíkulope?

³ Pablo ohechauka tekotevẽha avei jajapo ambue mbaʼe nañanekaneʼõséiramo. Haʼe heʼi ñañehaʼã vaʼerãha “jajapo iporãva” (Gál. 6:9). Upéva heʼise káda uno okumpli vaʼerãha oñehaʼarõva chugui. Jahechamína cinco jopói Jehová omeʼẽva ñandéve ñanembarete ha ñambaʼapo meme hag̃ua iñorganisasión ndive. Koʼã mbaʼe ñanepytyvõta jaikuaa hag̃ua mbaʼépepa tekotevẽ ñakambia ñande térã ñane família.

4. ¿Mbaʼérepa jaʼekuaa tekotevẽha ñañembyaty ñamombaʼeguasu hag̃ua Jehovápe?

⁴ Ymaite guive, umi rreunión iñimportanteterei vaʼekue Jehová rembiguaikuérape g̃uarã. Por ehémplo, entéro umi ánhel oĩva yvágape oñepresenta vaʼerã jepi Ñandejára renondépe (1 Rey. 22:19; Job 1:6; 2:1; Dan. 7:10). Umi isrraelíta oñembyaty vaʼekue “ohendu ha oikuaa hag̃ua” Ñandejára heʼíva (Deut. 31:10-12, ÑÑB). Síglo primérope hudiokuéra ojepokuaámi oho umi sinagógape olee hag̃ua Ñandejára Ñeʼẽ (Luc. 4:16; Hech. 15:21). Kongregasión kristiána oñepyrũ rire, umi ermáno ojapo avei umi rreunión. Ñane tiémpope tekotevẽterei ñañembyaty ñamombaʼeguasu hag̃ua Jehovápe. Umi rreunión rupive “ñañomokyreʼỹ japorohayhu ha jajapo hag̃ua iporãva”. Ñande kristiáno ningo “ñañomokyreʼỹ vaʼerã, koʼýte koʼág̃a jahechávo [Jehová] ára hiʼag̃uimbaitemaha” (Heb. 10:24, 25, NM).

5. ¿Mbaʼéichapa ikatu ñañomokyreʼỹ umi rreunionhápe?

⁵ Ñande avei ñañomokyreʼỹ umi rreunionhápe ñameʼẽvo ñane komentário. Por ehémplo, ikatu jahechauka ñande jerovia ñambohováivo peteĩ porandu, jaʼévo mbaʼéichapa ikatu jajapo heʼíva peteĩ téxto térã ñamombeʼúvo peteĩ tembiasakue mbykymíva ohechaukáva ideprovechoha jasegi umi konsého oĩva Ñandejára Ñeʼẽme (Sal. 22:22; 40:9). Oimérõ jaha ramónte umi rreunionhápe térã yma guivéma, katuete ñañandu ñanemokyreʼỹha umi komentário omeʼẽva ñane ermanokuéra, tahaʼe imitãva térã ijedáva.

6. ¿Mbaʼéichapa umi rreunión ñanepytyvõ ñanekyreʼỹ hag̃ua jaservívo Jehovápe?

⁶ ¿Mbaʼérepa avei Jehová ndoipotaiete jafalta ni peteĩ rreuniónpe? Umi rreunión ha aty guasu ñanemokyreʼỹ japredika hag̃ua pyʼaguasúpe ha ñanemboʼe ñambohovái hag̃ua umi oñemoĩvape ñanderehe térã nañanerenduséivape (Hech. 4:23, 31). Hiʼarive ñahesaʼỹijóvo la Biblia heʼíva, ñamombarete ñande jerovia (Hech. 15:32; Rom. 1:11, 12). Umi rreunionhápe ningo ñaaprende heta mbaʼe ha ñañomokyreʼỹ, ha koʼã mbaʼe ñanembovyʼa ha ‘ñanemombytuʼu jepyʼapy vai árape’ (Sal. 94:12, 13, ÑÑB). Pe Komite de Enseñánsa oĩva Kuérpo Governánte poguýpe, omoakã entéro mbaʼe ojepreparáva oñemboʼe hag̃ua Jehová puévlope ko Yvy tuichakuére. ¡Jaagradesete ningo Jehová ñanerekomboʼe haguére umi rreunión rupive ojejapóva káda semána, káda áño!

7, 8. a) ¿Maʼerãpa jaha vaʼerã umi rreuniónpe? b) ¿Mbaʼéichapa ndéve nepytyvõ umi rreunión?

⁷ Añetehápe ningo ñane rreunionkuéra ñanepytyvõ heta mbaʼépe. Péro oĩ peteĩ mbaʼe iñimportantevéva: jaha upépe ñamombaʼeguasu hag̃ua Jehovápe (elee Salmo 95:6). ¡Ajépa tuichaite mbaʼe ñandéve g̃uarã ñambotuicha Jehovápe! (Col. 3:16.) Haʼe omerese akóinte ñamombaʼeguasu chupe, ha upéva jajapo jahávo umi rreuniónpe ha avei ñakomentávo (Rev. 4:11). Upévare Ñandejára ñanemokyreʼỹ ‘ani hag̃ua jafalta rreunionhápe, oĩramo jepe ojepokuaáva ojapo upéicha’ (Heb. 10:25, NM).

⁸ ¿Jahechakuaápa umi rreunión ñanepytyvõha ñaaguantakuaa hag̃ua og̃uahẽ meve pe ára Jehová ohunditaha ko múndo aña? Oiméramo ñapensa upéicha, ñane rreunionkuéra katuete oĩta “umi mbaʼe iñimportantevéva” apytépe ha ndajafaltamoʼãi ni mbaʼevéicharõ, ñanerembiapo hetáramo jepe (Filip. 1:10, NM). Tekotevẽ ningo ivaietereíma peteĩ mbaʼe ñandejokóva ani hag̃ua ñañembyaty ñane ermanokuéra ndive ha ñamombaʼeguasu Ñandejárape.

9. ¿Mbaʼérepa iñimportantete pe predikasión?

⁹ Ñañemeʼẽmbaitéramo japredika hag̃ua,  ñanepytyvõ ñambaʼapo meme hag̃ua Jehová organisasión ndive. Jesús voi omoñepyrũ vaʼekue ko tembiapo iporãitéva oĩrõ guare ko yvy ape ári (Mat. 28:19, 20). Upe guive Jehová organisasión oñemeʼẽmbaite ombaʼapo memévo opredika hag̃ua pe marandu porã oñeʼẽva Ñandejára Rréinore ha oipytyvõ hag̃ua opaichagua héntepe ikatu hag̃uáicha oiko chuguikuéra Jesús remimboʼe. Ñane ermanokuéra oparupigua ohasáva opredika jave, ohechauka umi ánhel ombaʼapoha ñanendive ha ñandeguerahaha “opavave oñehaʼãva ohupyty jeikove opaveʼỹva” rendápe (Hech. 13:48, NM; Revelación 14:6, 7). Ñandejára organisasión oĩva ko yvy ári oñemeʼẽmbaite ojapo hag̃ua ko tembiapo. ¿Iñimportántepa avei ndéve g̃uarã?

10. a) Ehechauka peteĩ ehémplo rupive mbaʼéichapa ikatu akóinte ñamombaʼe pe añetegua. b) ¿Mbaʼéichapa nepytyvõ pe predikasión ani hag̃ua nekaneʼõ?

¹⁰ Japredikáramo kyreʼỹme ñanepytyvõ avei javyʼa hag̃ua jaservívo Jehovápe. Peteĩ ermáno oservíva prekursór rregulár ha ansiánoramo heta áñorema, hérava Mitchel heʼi: “Avyʼaiterei añemongetávo umi hénte ndive pe añeteguáre. Alee jave Ñemañaha ha ¡Despertad!, ahecha mbaʼéichapa umi rrevísta omyesakã heta mbaʼe ha ñanemoarandu. Avei ahecharamo mbaʼéichapa opa mbaʼe oĩva pype ojehai hendápe porã ha hekoitépe. Ahaseterei voi apredika che rapichakuérape ahecha hag̃ua mbaʼépa oñandu ohendúvo pe marandu porã. Upearã aheka umi mbaʼe ointeresátava umi  héntepe. Pe predikasión chepytyvõ aiko hag̃ua hekópe porã ha amotenonde hag̃ua umi mbaʼe iñimportantevéva. Oiméramo ajapo vaʼerã ambue mbaʼe, ajapo asẽ mboyve, térã aju rire predikasióngui”. Jahechaháicha, ñambaʼapo meméramo Jehovápe g̃uarã ñanepytyvõ ñanembarete hag̃ua koʼã ára pahápe (elee 1 Corintios 15:58).

11. ¿Mbaʼérepa jaiporu porã vaʼerã umi puvlikasión Jehová ohaikáva ñandéve g̃uarã?

¹¹ Jehová omeʼẽ ñandéve heta puvlikasión ikatu hag̃uáicha ñanemombarete. Oiméne katuete ñanemanduʼa peteĩ informasión ou porãitereívare ñandéve ha jaʼe: “¡Kóva hína pe aikotevẽva! ¡Haʼete voi Jehová ohaikáva chéve g̃uarãite!”. Upéva ningo ndoikói péicha reínte. Umi puvlikasión rupive Jehová ñanemboʼe ha ohechauka ñandéve mbaʼépa jajapo vaʼerã. Haʼe opromete vaʼekue: “Rohekomboʼéta. Ahechaukáta ndéve moõrupipa reho vaʼerã” (Sal. 32:8). ¿Ñañehaʼãmbaitépa jaiporu porã umi informasión oñemeʼẽva ñandéve? ¿Jajepyʼamongetápa umi mbaʼe jaleévare? Jajapóramo upéicha, ñanekyreʼỹta ñambaʼapo hag̃ua Jehovápe g̃uarã koʼã ára pahápe ha ñande jerovia naikangymoʼãi (elee Salmo 1:1-3; 35:28; 119:97).

12. ¿Mbaʼépa ñanepytyvõta ñamombaʼe hag̃ua umi puvlikasión?

¹² Iporã ningo ñapensa umi mbaʼe ojejapóvare ojeprepara hag̃ua umi puvlikasión. Hetaiterei oñembaʼapo oñemeʼẽ hag̃ua ñandéve umi informasión ñanepytyvõtava ñaime porã hag̃ua Jehová ndive. Pe Komite de Rredaksión oĩva Kuérpo Governánte poguýpe omoakã opaichagua tembiapo ojeprepara hag̃ua umi informasión; por ehémplo, oñehesaʼỹijo porã, ojehai, ojekorrehi, ojeheka umi taʼanga, ojetradusi, oñeimprimi térã oñemoĩ Internétpe. Upéi umi sukursál oimprimíva puvlikasión omondo entéro kongregasiónpe, umi oĩva mombyry jepe. ¿Mbaʼérepa oñembaʼapo peichaite peve? Ikatu hag̃uáicha Ñandejára rembiguaikuéra omombarete ijerovia (Is. 65:13). Upévare, jaiporu porãkena entéro “hiʼupy” omeʼẽva ñandéve Jehová organisasión (Sal. 119:27).

13, 14. ¿Máva mávapa ombaʼapo meme yvágape ojejapo hag̃ua opa mbaʼe Ñandejára oipotahaichaite, ha mbaʼéichapa ikatu ñahaʼanga chupekuéra?

¹³ Peteĩ visiónpe, apóstol Juan ohecha Jesúspe peteĩ kavaju morotĩ ári osẽvo ohundi hag̃ua umi oñemoĩvape Jehováre (Rev. 19:11-15). Jesús rapykuéri oho avei umi ánhel ijeroviapýva ha umi unhído omohuʼãma vaʼekue hembiapo ko yvy ape ári ha oĩmava yvágape. Jaikuaávo koʼã mbaʼe, imbareteve ñande jerovia (Rev. 2:26, 27). ¡Ajépa ojekuaa porãite yvágape ojejapoha opa mbaʼe Ñandejára oipotahaichaite!

¹⁴ Péicha avei, pe aty guasu ombaʼapo meme umi unhído oĩvandi gueteri ko yvy ape ári ha omotenondéva Ñandejára organisasión ko yvy arigua (elee Zacarías 8:23). ¿Mbaʼéichapa jahechauka vaʼerã jarrespetaha opa mbaʼe Ñandejára omoĩva? Tekotevẽ ñaneñeʼẽrendu umi ñanemoakãvape (Heb. 13:7, 17). Upéva ikatu jahechauka ñande kongregasiónpe voi. Ñañemongeta jave umi ansiánore, ¿jahechaukápa jarrespetaha chupekuéra ha ñamombaʼeha hembiapo? ¿Ñamokyreʼỹpa ñane familiakuérape orrespeta hag̃ua koʼã ermánope ha ojerure hag̃ua chupekuéra konsého oĩva la Bíbliape? ¿Ñañemongetápa ñande rogayguakuéra ndive jahecha hag̃ua mbaʼéichapa ñameʼẽta ñane kontrivusión predikasiónpe g̃uarã? (Prov. 3:9; 1 Cor. 16:2; 2 Cor. 8:12.) ¿Jahechaukápa iñimportanteha ñandéve g̃uarã umi traváho ojejapóva oñemantene  hag̃ua pe Salón del Reino? Ñandejára espíritu ombaʼapo porã jajorrespetáramo ha ñaiméramo peteĩ ñeʼẽme. Ha upe espíritu avei ñanepytyvõ ani hag̃ua ñanekaneʼõ koʼã ára pahápe (Is. 40:29-31).

15. ¿Mbaʼérepa ñañehaʼã vaʼerã kaneʼõʼỹre jaiko hag̃ua Jehová oipotaháicha?

¹⁵ Ikatu hag̃uáicha ñaaguanta ha ñambaʼapo meme Jehová organisasión ndive, tekotevẽ avei ñakumpli umi mbaʼe ñamboʼéva. Upéva heʼise ‘jahechakuaa vaʼerãha mbaʼépa oguerohory ñande Ruvicha’ (Efes. 5:10, 11, NM). Ñande ningo ñaneimperfékto ha Satanás ha imúndo ñandejopy, upévare ñañemoĩ mbarete koʼã mbaʼére. Pende apytépe ermanokuéra, oĩ heta oñehaʼãva koʼẽ koʼẽre oime porã hag̃ua Ñandejára ndive ha upévare haʼe penderayhueterei. ¡Aníkena peñentrega! Jaikóramo Ñandejára oipotaháicha, ñañeñandu porãiterei ha jaikuaa porã Jehová oguerohoryha jajapóva guive ñamombaʼeguasu hag̃ua chupe (1 Cor. 9:24-27).

16, 17. a) ¿Mbaʼépa jajapo vaʼerã jaʼáramo peteĩ pekádo ivaietereívape? b) ¿Mbaʼépa ñanemboʼe Anne rembiasakue?

¹⁶ Péro, ¿mbaʼépa jajapo vaʼerã oiméramo jaʼa peteĩ pekádo ivaietereívape? Pyaʼe porã jaheka vaʼerã ñanepytyvõva. Ñañomíramo ñane rembiapo vai, koʼýte jajeperhudika. David ojapo vaʼekue upéva, ha upéi heʼi: “Namombeʼúi aja che [rembiapo vai] chepiru chekã vaʼekue, opa árape chepyahẽgui” (Sal. 32:3). Umi omoʼãva ipekádo ndovyʼamoʼãi ha ikangýta ijerovia, péro umi “omombeʼu ha ohejávape katu ojeporiahuverekóne” (Prov. 28:13).

¹⁷ Ñapensamína oiko vaʼekuére Anne * rehe. Haʼe ojapo iprekursorádo rregulár ikuñataĩmbotápe. Péro oñepyrũ avei ojapo mbaʼe vai ha upéva ogueru chupe heta provléma. Haʼe omombeʼu: “Añandu che konsiénsia chemyangekoiha, ndavyʼavéi ha añedeprimi”. ¿Mbaʼépa oipytyvõ chupe? Peteĩ rreuniónpe oñehesaʼỹijo Santiago 5:14, 15, ha ohechakuaa tekotevẽha ojerure ansianokuérape toipytyvõ chupe. Anne heʼi: “Umi téxto ningo peteĩ pohã Jehová voi omeʼẽva ñandéve. Hasy jaʼu hag̃ua, péro ñanemonguera. Asegi pe konsého oĩva pe téxtope ha tuicha chepytyvõ”. Ohasáma heta tiémpo ha koʼág̃a Anne kyreʼỹme oservi Jehovápe ha pyʼapy potĩ reheve.

18. ¿Mbaʼépa jajedesidi vaʼerã jajapo?

¹⁸ Tuichaite mbaʼe ningo ñaime haguére Jehová organisasiónpe koʼã ára pahápe. Jahechaukákena ñamombaʼeha ko priviléhio. Ñañehaʼãmbaitékena ñane família ndive jaha meme umi rreunionhápe, jaheka umi tapicha ipyʼaporãvape, ha jaiporu porã umi puvlikasión Jehová omeʼẽva ñandéve iñorganisasión rupive. Tekotevẽ avei jarrespeta umi ñanemoakãvape ha ñakumpli umi mbaʼe ñande voi ñamboʼéva. Jajapóramo péicha, ñambaʼapo meméta Jehová organisasión ndive ha arakaʼeve nañanekaneʼõmoʼãi jajapo hag̃ua iporãva.