1, 2. Mmunyi mutudi tukolesha dieyemena dietu kudi Yehowa patudi tumona bulongolodi buende bua mu diulu ne pa buloba?

BIDI bituenza disanka bua kumona ne: tudi mu tshitupa tshia bulongolodi bunene bua mu diulu ne pa buloba. Tshikena kumona tshidi mu Yehezekele nshapita wa 1 ne mu Danyele nshapita wa 7 bidi bileja mudi Yehowa wenza malu kampanda bua kukumbaja disua diende. Yezu udi ulombola tshitupa tshia bulongolodi bua Yehowa tshia pa buloba bua kutungunuja mudimu wa lumu luimpe, kuambuluisha bantu badi benza mudimu eu bua kuikalabu bimpe mu nyuma ne kutuma ntendelelu mulelela kumpala. Bualu ebu budi butusaka bua kueyemena bulongolodi bua Yehowa.​—Mat. 24:45.

² Tutuku tuenda pamue ne bulongolodi buimpe ebu anyi? Disanka diebe bua bulelela didi dienda divula anyi didi dikepela? Tuetu badiele nkonko eyi, tudi mua kumona ne: tukadi batuadije kutshioka peshi bajimije tshisumi tshituvua natshi. Bidi mua kuenzeka nanku. Mupostolo Paulo wakadimuija bena Kristo ba mu bidimu lukama bia kumpala bua kuidikija tshisumi tshivua natshi Yezu. Paulo wakamba ne: kuenza nunku kuvua mua kubambuluisha bua kubenga ‘kutshioka ne kuteketa mu mioyo yabu.’ (Eb. 12:3) Mu tshiena-bualu tshishale tuvua bakule bua malu a dikema adi bulongolodi bua Yehowa buenza lelu. Anu muvua tshilejilu tshia Yezu tshikolesha bena Kristo ba mu bidimu lukama bia kumpala, tshilejilu tshia bulongolodi bua Yehowa tshidi mua kutuambuluisha bua kunanukila mu mudimu wa kuyisha ne kuikala ne tshisumi.

3. Ntshinyi tshitudi ne bua kuenza bua kubenga kutshioka? Mmalu kayi atuamona mu tshiena-bualu etshi?

³ Kadi Paulo wakaleja ne: kudi malu a bungi atudi mua kuenza tuetu katuyi basue kutshioka. Wakamba ne: tudi ne bua kudienzeja bua “kuenza malu mimpe.” (Gal. 6:9) Nunku, tudi ne bua kuenza malu kampanda. Tukonkononayi malu atanu atudi ne bua kuenza atuambuluisha bua kushala bashindame ne kutungunuka ne kuenda pamue ne bulongolodi bua Yehowa. Nunku tudi mua kudiangatshila dipangadika mu malu atudi tuetu anyi  bena mu dîku dietu mua kuakaja mu nsombelu wetu.

4. Bua tshinyi kudisangisha ntshitupa tshinene tshia ntendelelu mulelela?

⁴ Kudisangisha mbualu bua mushinga wa bungi butu batendeledi ba Yehowa benza. Yehowa utu udisangisha ne banjelu mu diulu. (1 Bak. 22:19; Yobo 1:6; 2:1; Dan. 7:10) Mu Isalele wa kale, tshisamba tshijima tshivua ne bua kudisangisha ‘bua buonso buabu bumvue, bayile lungenyi.’ (Dut. 31:10-12) Bena Yuda ba mu bidimu lukama bia kumpala bavua badisangisha mu nsunagoga bua kubala Mifundu minsantu. (Luka 4:16; Bien. 15:21) Pakatuadija tshisumbu tshia bena Kristo, kudisangisha kuvua bualu bua mushinga wa bungi ne kutshidi kabidi ne mushinga mu ntendelelu wetu lelu. Bena Kristo balelela badi ‘batabalelangana muntu ne muntu bua kusakangana ku dinanga ne ku bienzedi bimpe.’ Tudi ne bua kutungunuka ne ‘kukankamijangana, tutamba kuenza nunku nangananga bu mutudi tumona dituku dia Yehowa dienda disemena pabuipi.’​—Eb. 10:24, 25.

5. Tudi mua kukankamijangana mu bisangilu bietu mushindu kayi?

⁵ Umue mushindu munene utudi mua kukankamijangana, nkuandamuna mu bisangilu bietu. Tudi tuleja ditabuja dietu patoke patudi tufila mandamuna adi mu tshikoso, tumvuija mvese kampanda, tufila tshilejilu mu mêyi makese tshidi tshileja lungenyi kampanda lua mu mvese peshi tuandamuna mu mishindu mikuabu. (Mus. 22:22; 40:9) Kakuyi mpata neumone ne: nansha muukadi mubuele mu bisangilu kukadi bidimu bia bungi, bidi bikukankamija bikole paudi uteleja mandamuna adi bena Kristo nebe, bana ne bakulumpe bafila ne muoyo mujima.

6. Bisangilu bietu bidi bituambuluisha mushindu kayi?

⁶ Mmalu kayi makuabu adi asaka Nzambi wetu bua kuangata bisangilu bietu ne mushinga wa bungi? Bisangilu bietu, mpuilu ne mpungilu bidi bituambuluisha bua kuikala ne dikima dia kuyisha nadi ne kutantamena buluishi anyi bantu badi kabayi batuteleja mu teritware yetu. (Bien. 4:23, 31) Miyuki ne midimu mikuabu itubu benza mu bisangilu idi miangatshila mu Bible bidi bikolesha ditabuja dietu. (Bien. 15:32; Lomo 1:11, 12) Malongesha atudi tupeta ne mushindu utudi tukankamijangana patudi tudisangisha bua kutendelela bidi bituambuluisha bua kuikala ne disanka dilelela ne bitupesha ‘ditalala mu matuku a dikenga.’ (Mus. 94:12, 13) Komite wa dilongesha wa Kasumbu Kaludiki udi utangila midimu ya kulongolola biakudia bia mu nyuma bua kulongesha bantu ba Yehowa pa buloba bujima. Tudi ne disanka dia bungi bua malu adibu balongolole bua kutuambuluisha bua kumvua malongesha mimpe mu bisangilu bietu lumingu luonso.

7, 8. a) Bisangilu bietu bitu ne tshipatshila kayi tshinene? b) Bisangilu bidi bikuambuluisha mushindu kayi?

⁷ Kadi kudi kabidi bualu bukuabu bua mushinga wa bungi pa kumbusha malu mimpe atudi tupeta mu bisangilu bietu. Tshipatshila tshinene tshitudi tudisangishila ntshia kutendelela Yehowa. (Bala Musambu wa 95:6.) Tudi ne diakalenga dinene dia kutumbisha Nzambi wetu muimpe. (Kolos. 3:16) Yehowa mmukumbane bua tuetu kumutendelela misangu yonso patudi tubuela mu bisangilu ne tufilamu mandamuna. (Buak. 4:11) Nunku, kabiena bitukemesha padibu batukankamija bua ‘kubenga kulekela kudisangisha kuetu pamue bu mudi tshilele tshia bakuabu.’​—Eb. 10:25.

⁸ Tudiku tumona bisangilu bia bena Kristo bu mushindu udi utuambuluisha bua kutantamena ntatu too ne dîba diabutula Yehowa bulongolodi bubi ebu anyi? Bikalabi nanku, bisangilu nebikale munkatshi mua “malu adi ne mushinga wa bungi” atudi tuenza mu nsombelu wetu. (Filip. 1:10) Katuena mua kupumbisha bisangilu padiku kakuyi bualu kampanda bunene menemene budi butupangisha to.

9. Bua tshinyi tudi tuamba ne: kuyisha mmudimu udi ne mushinga wa bungi?

⁹ Kuyisha ne tshisumi kudi kutuambuluisha bua kuenda pamue ne bulongolodi bua Yehowa. Yezu wakatuadija mudimu eu pavuaye pa buloba. (Mat. 28:19, 20) Katshia anu dîba adi, kuyisha Bukalenge ne kuvuija bantu bayidi nkulue mudimu munene udi bulongolodi bua Yehowa buteka pa muaba wa kumpala. Malu a bungi adi enzeka lelu adi aleja ne: banjelu badi batua mudimu wetu nyama ku mikolo ne batufikisha kudi bantu badi “badiakaje bua kupeta muoyo wa tshiendelele.” (Bien. 13:48; Buak. 14:6, 7) Tshitupa tshia bulongolodi bua Yehowa tshia pa buloba ntshidilongolole lelu bua kutua mudimu wa mushinga eu nyama ku mikolo. Tudiku petu bateke mudimu eu pa muaba wa kumpala anyi?

10. a) Fila tshilejilu tshidi tshileja mutudi mua kutungunuka ne kunanga bulelela. b) Leja mudi mudimu wa buambi mukuambuluishe bua kubenga kutshioka.

¹⁰ Kuikala ne tshisumi mu mudimu wa buambi kudi kutuambuluisha bua kunanga bulelela bikole. Mona tshiakamba muanetu Mitchel udi mukulu kukadi bidimu bia bungi ne mpanda-njila wa pa tshibidilu. Udi wamba ne: “Ntu musue kuyisha bantu. Pantu ngela meji bua tshiena-bualu kampanda tshipiatshipia tshia mu Tshibumba tshia Nsentedi anyi mu Réveillez-vous! yonso, bitu binkemesha bua meji, dimanya ne mudi malu adimu mikale anu malelela ne kabayi banekesha to. Ntu musue kuya mu buambi bua kumona tshidi bantu bandi nyisha benza, ne  bua mundi mua kubajula dijinga dia kumanya bia bungi. Mudimu wa buambi udi ungambuluisha bua kuteka malu a mushinga pa muaba wa kumpala. Ndi ngenza bua malu makuabu onso kaangatshi dîba dindi muteke bua mudimu wa buambi to.” Bia muomumue, kuikala ne bia bungi bia kuenza mu mudimu wa Nzambi nekutuambuluishe bua kutungunuka ne kuya kumpala mu matuku a ku nshikidilu aa.​—Bala 1 Kolinto 15:58.

11. Bua tshinyi tudi ne bua kubala mikanda yetu ne kuelangana meji bua bitudi tubala?

¹¹ Yehowa udi utupesha bukole ku diambuluisha dia mikanda idibu batupatuila. Kakuyi mpata, udi mua kuvuluka dimue dituku diuvua mubale mukanda kampanda, pashishe wewe kudiambila ne: ‘Ke bualu bumvua nabu dijinga menemene ebu. Bienze anu bu ne: Yehowa mmufundishe bualu ebu anu buanyi meme.’ Kabitu bienzeka nanku ku mpukapuka to. Yehowa udi utulongesha ne utulombola ku diambuluisha dia mikanda eyi. Muambe ne: ‘Nenkuyishe lungenyi, nenkuleje njila uudi ne bua kuendela.’ (Mus. 32:8) Tudiku tudienzeja bua kubala mikanda itudi tupeta ne tuelangana meji bua malu adimu anyi? Kuenza nunku nekutuambuluishe bua kutantamena ntatu ne kulama tshisumi tshietu mu mudimu wa Nzambi mu matuku makole a ku nshikidilu aa.​—Bala Musambu wa 1:1-3; 35:28; 119:97.

12. Tshidi mua kutuambuluisha bua kuangata mikanda yetu ne mushinga wa bungi ntshinyi?

¹² Netuangate mikanda yetu ne mushinga wa bungi tuetu bele meji bua mudimu udibu benza bua kuyipatula. Komite wa difunda wa Kasumbu Kaludiki udi utangila mudimu wa kuenza makebulula, kufunda, kuakajilula, kufila bilejilu ne kukudimuna malu adi mu mikanda yetu itu ipatuka ne atu mu site wetu wa Enternete. Filiale itu ipatula mikanda itu iyituma mu bisumbu bia miaba idiyi ne bia kule. Batu benza mudimu wonso eu bua tshinyi? Anu bua kudisha bantu ba Yehowa mu nyuma bimpe. (Yesh. 65:13) Tuikalayi tudia ne muoyo mujima biakudia ebi bidi bulongolodi bua Yehowa butupesha.​—Mus. 119:27.

13, 14. Badi batua malu adi Yehowa mulongolole nyama ku mikolo mu diulu mbanganyi? Tudi petu mua kutua malu aa nyama ku mikolo pa buloba mushindu kayi?

¹³ Mupostolo Yone uvua mumone mu tshikena kumona Yezu mubande pa kabalu katoke bua kutshimuna aba badi batombokele Yehowa. (Buak. 19:11-15) Ditabuja dietu didi dikola patudi tumanya ne: banjelu ba lulamatu ne bela manyi bakadi bajikije lubilu luabu pa buloba ne bapete difutu mu diulu badi balonda Yezu mu nyima. (Buak. 2:26, 27) Tshilejilu tshiabu tshimpe tshidi tshitulongesha ne: tudi ne bua kutua malu adi Yehowa mulongolole nyama ku mikolo.

¹⁴ Mu mushindu wa muomumue, musumba munene udi utua mudimu udibu benza kudi bela manyi batshidi pa buloba nyama mikolo. (Bala Zekâya 8:23.) Mmunyi muudi mua kuleja ne: udi utua malu adi Yehowa mulongolole nyama ku mikolo? Umue mushindu nkukokela bantu badi batulombola. (Eb. 13:7, 17) Dikokela ditu dituadijila mu tshisumbu tshitudi. Malu atutu tuamba bua bakulu adiku aleja ne: tudi tubanemeka bobu ne mudimu udibu benza anyi? Tutuku tulongesha bana betu bua kunemeka bakulu ne bua kubalomba mibelu anyi? Kudi kabidi mishindu mikuabu itudi mua kutua bulongolodi buetu nyama ku mikolo. Tshilejilu, tutuku tuyukila mu dîku dietu bua mushindu utudi mua kufila mapa bua kutua mudimu wetu wa kuyisha nyama ku mikolo anyi? (Nsu. 3:9; 1 Kol. 16:2; 2 Kol. 8:12) Tutuku tuangata ne mushinga diakalenga ditudi nadi dia kuenza mudimu wa kulama Nzubu wetu wa Bukalenge ne mankenda anyi? Yehowa udi upesha bantu badi mu buobumue ne badi ne kanemu ka nunku nyuma wende. Nyuma wende eu neatuambuluishe bua kubenga kutshioka mu matuku a ku nshikidilu aa.​—Yesh. 40:29-31.

15. Tudi ne bua kudienzeja bua kuenza malu adi apetangana ne disua dia Yehowa bua tshinyi?

¹⁵ Bualu bua ndekelu, tuetu basue kutantamena ntatu ne kuenda pamue ne bulongolodi bua Yehowa, tudi ne bua kutungunuka ne kuenza malu adi apetangana ne mukenji utudi tuambila bantu bakuabu patudi ‘tukeba mua kumanya malu adi Mukalenge wanyisha.’ (Ef. 5:10, 11) Bitu bitukolela bua kuenza malu mimpe bualu badi batuluisha kudi Satana, bulongolodi ebu bubi ne mubidi wetu. Bana betu, bamue ba kunudi badi badienzeja bikole dituku dionso bua kulama malanda abu ne Yehowa. Ke bualu kayi Yehowa mmununange bikole. Kanulekedi to. Kuenza malu adi apetangana ne disua dia Yehowa nekutupeteshe masanka a bungi ne netuikale bajadike ne: ntendelelu wetu ki ngua patupu to.​—1 Kol. 9:24-27.

16, 17. a) Tudi ne bua kuenza tshinyi tuetu benze bubi bunene? b) Tshilejilu tshia Anne tshidi mua kutuambuluisha mushindu kayi?

¹⁶ Kadi tudi mua kuenza tshinyi tuetu benze bubi bunene? Tukebe diambuluisha ne lukasa. Tuetu basokoke bubi ebu, netunyangakaje kabidi malu bikole. Vuluka ne: Davidi wakamba ne: pavuaye musokoke bubi buende, ‘mifuba yende yakavingutuka bualu bua kutua kuende kua mikemu dinda too ne ku dilolo.’ (Mus. 32:3) Eyowa, kusokoka malu mabi atudi benze mu musokoko nekututshiokeshe mu lungenyi ne mu nyuma, kadi muntu “udi uwatonda, uwalekela, neafuidibue luse.”​—Nsu. 28:13.

¹⁷ Tuangate tshilejilu tshia Anne. * Pavua Anne ne bidimu bipatshila ku 20, wakalua mpanda-njila wa pa tshibidilu. Kadi pashishe wakalua muena mpala ibidi. Bualu ebu buakamutonda. Udi wamba ne: “Kondo kanyi ka muoyo kavua kampisha. Mvua anu mubungame misangu yonso.” Tshiakenzaye ntshinyi? Udi uleja ne: dimue dituku tuakakonkonona Yakobo 5:14, 15 mu bisangilu. Anne wakamona ne: uvua dijinga ne diambuluisha ne wakaya kumonangana ne bakulu. Udi uvuluka wamba ne: “Mvese yakambadishabu ivua anu bu buanga buvua Yehowa mumpeshe bua kungondopa. Kabitu bipepele bua kunua buanga to, kadi butu buondopa. Ngakatumikila mibelu ayi ne malu akalongoloka.” Kukadi bidimu ndambu bidi Anne mutuadijilule kuenzela Yehowa mudimu ne tshisumi ne kondo ka muoyo kimpe.

18. Tudi ne bua kudisuika bua kuenza tshinyi?

¹⁸ Tudi ne diakalenga dinene dia kuikala ne muoyo mu matuku a ku nshikidilu aa ne dia kuikala mu tshitupa tshia bulongolodi bua Yehowa bunene. Tuikale badisuike bua kubenga kupepeja diakalenga edi. Kadi, tuenzayi mudimu pamue bu bena mu dîku dimue, tuikalayi tubuela mu bisangilu misangu yonso bua kutendelela pamue ne bena mu tshisumbu, tukebayi ne muoyo mujima bantu bimpe badi mu teritware yetu ne tunangayi bikole biakudia bia mu nyuma bitudi tupeta. Tudi kabidi ne bua kutua bantu badi batulombola nyama ku mikolo ne kuenza malu adi mu diumvuangana ne mukenji utudi tuambila bantu. Tuetu benze nunku, netuende pamue ne bulongolodi bua Yehowa ne katuakutshioka bua kuenza malu adi makane to.