‘Bayi Muzeyaku’
‘Bayi Muzeyaku’
“Bayi tuzeyaña nakwila mwamuwahuku.”—ŊAL. 6:9.
MUKWAKULA NENUDI?
Yumanyi yatuloñeshelañawu yatukwashaña kutwalekahu neyena dakukeña chalala?
Indi kusha muchima hakudifukula kudi Yehova kwatukwashaña ñahi kuwanikaña kukupompa?
Indi yuma yitwafuukulaña yinateli kumwekesha ñahi neyi tunateli kuumika hela kuzeya mumudimu wetu?
1, 2. Indi chikuhwelelu chetu chakolelañaku ñahi neyi tutoñojoka hakuloñesha kwaYehova kwamukaayi kejima?
CHATUHAYAMISHAÑA hama neyi tutoñojoka netu twekala mukuloñesha kweneni kwamukaayi. Yimwenu yasonekawu muEzekeli kapetulu 1 niDanyeli kapetulu 7 yamumwekeshaña chiwahi Yehova chinakuzatayi kulonda yashikiji nkeñelu yindi. Yesu nakulombola chibalu chakuloñesha kwaYehova chaheseki kulonda kusha maana kumudimu wakushimwina nsañu yayiwahi, kwakamena antu kuspiritu anakuzata iwu mudimu nikuhakwilaku kudifukula kwaYehova. Chumichi chatuleñelaña tukuhweleli chikupu mukuloñesha kwaYehova.—Mat. 24:45.
2 Komana tunakwendela hamu naniku kuloñesha kwakuwahi nankashi? Komana mpwila yetu yachalala yinakuswejelaku, tahindi yinakufunta mwishina? Hampinji yitunakushinshika hanawa malwihu, tunateli kuwana netu tunatachiki kuzeya indi kwiji mpwila yetu yinamani. Chumichi chinateli kumwekana. Muyaaka nkulakaji yakusambila, kapostolu Pawulu wakonkomweneni akwawu akwaKristu kushinshika hachakutalilahu chaYesu chakwikala wadikita. Pawulu wahosheli nindi, chumichi chikuyikwasha abuli “kuzeya nakuyekela munyichima [yawu].” (Heb. 12:3) Munjila yoyimu, kushinshika chikupu hachibaaba chinafumuhu, chinakumwekesha yuma yinakuzata kuloñesha kwaYehova, chinatukwashi kutwalekahu kwikala neyena nikuumika.
3. Chumanyi chitwatela kwila hakwila tubuli kuzeya, nawa yumanyi yitukushinshikahu muchinu chibaaba?
3 Hela chochu, Pawulu wahosheli nindi, twatela kuzata nañovu hakwila tubuli kuzeya. Wahosheli nindi twatela ‘kwila mwamuwahi.’ (Ŋal. 6:9) Dichi, twatela kuzatahu chuma chimu. Tuhanjekenu hayuma yitanu yitwatela kwila kulonda tutwalekuhu kudikita nawa nikulondela wunlomboli wakuloñesha kwaYehova. Kufumahu tukufuukulahu neyi chakwila kuduhu mumu mutwatela kuzatilahu etu halwetu hela antaña jetu.
TWAPOMPA HAMU KULONDA TUDIKOLESHEÑA WUMU NAMUKWAWU NIKUDIFUKULA
4. Muloñadi chitukuhoshela netu kupompa hamu hichuma chalema mukudifukula kwalala?
4 Kupompa hamu hichuma chalemeshawu ambuña aYehova. Muwanta wabulaña kumwekana, yileñaleña yakuspiritu ayitambikaña kwimana kumesu aYehova hampinji yatelela. (1 Anya. 22:19; Yoba 1:6; 2:1; Dan. 7:10) MuIsarela wakushankulu, munza wapompeleña hamu “kulonda atiyi nikudiza.” (Kuhit. 31:10-12) A Yudeya amuyaaka nkulakaji yakusambila adiña nachaaku chakuyaña mumasinagogi nakutaña muNyikanda yajila. (Luka 4:16; Yil. 15:21) Iku kukonkomwena kwakupompaña hamu kwatwalekeluhu kushika nimpinji yatuñiluwu chipompelu chawakwaKristu, nimakonu kuchidi kwalema mukudifukula kwetu. AkwaKristu alala ‘aditoñojokaña hamuntu hamuntu, kulonda asañumuni akwawu kukeñañana nakwila nyidimu yayiwahi.’ Twatela kutwalekahu ‘kudikolesha wumu namukwawu, chisweji nankashi nanichi chitunamoni ifuku daYehova dinakuswila kwakwihi.’—Heb. 10:24, 25.
5. Tunateli kudikolesha ñahi wumu namukwawu hakupompa kwetu?
5 Njila yimu yalema mutwadikoleshelaña wumu namukwawu yekala yakwakulahu hakupompa kwetu. Tunateli kushimuna chikuhwelelu chetu hatooka kuhitila mukwakula lwihu ludi mumukanda, kuhitila mukushimuna mwakuzatishila nsona, kuhitila mukushimuna mukwihihisha chuma chamwekeni chinakumwekesha kulema kwakulondela nshimbi jamuBayibolu, hela munjila jikwawu. (Mas. 22:22; 40:9) Eñani munateli kwiteja nenu hela twatachikili dehi kupompa, kutiyilila mazu ahoshañawu amana kwetu niahela, atwansi niakulumpi, akufuma hamuchima atukoleshaña nankashi.
6. Indi kupompa kwetu kwatukwashaña ñahi kutwalekahu akola kuspiritu?
6 Yumanyi yikwawu yaleñelaña Nzambi yetu yalemeshi chikupu kupompa kwetu hamu mpinji yejima? Kupompa kwachipompelu, kupompa kwanyanya nikupompa kwankambi kwatukwashaña kwikala ahamuka kulonda tuhosheña chakadi woma nikuumika neyi anakutudimbulula hela anakutudiwula mwiluña mutwashimwinaña. (Yil. 4:23, 31) Yuma yitwahanjekañahu yamuNsona yakoleshaña chikuhwelelu chetu. (Yil. 15:32; Rom. 1:11, 12) Yuma yitwadizaña nikudikolesha wumu namukwawu hakupompa kwetu kwakudifukula yatukwashaña kwikala namuzañalu walala nawa ‘yatunookeshaña tubuli kumona cheñi mafuku atama.’ (Mas. 94:12, 13) Kometi Yatañishaña Yezanvu Dalombolaña diyatalaña mudimu wakuloñesha maprogiramu akuspiritu ejima kulonda antu jaYehova mukaayi kejima atambwileña nshimbi. Twasakililaña chikupu hayakudya yakuspiritu yatuloñeshelañawu kulonda tudiluñisheña nantañishilu yayiwahi hakupompa kwetu kwachipompelu mulungu nimulungu muchaaka chejima!
7, 8. (a) Nkeñelwinyi yayeni yakupompa kwetu kwachipompelu? (b) Indi kupompa kwayikwashaña ñahi kuspiritu?
7 Hela chochu, kudi chuma chalema nankashi chabadika yuma yitwahetelañamu halwetu kukupompa kwetu. Nkeñelu yayeni yakupompela hamu yekala yakudifukula kudi Yehova. (Tañenu Masamu 95:6.) Tukweti kukooleka kweneni kwakuhameka Nzambi yetu wamuwahi! (Kol. 3:16) Yehova diyi wutwatela kudifukulañaku kuhitila mukupompa nikwakulahu hakupompa kwateokalatiki. (Chim. 4:11) Dimuloña watukoleshelañawu nawu “bayi tuleka kupompa neyi chelañawu amakwawuku.”—Heb. 10:25.
8 Komana twamonaña kupompa kwetu kwawakwaKristu netu hintanjikilu yakutukwasha kuumika kushika nimpinji yakajilumunayi Yehova kanu kaayi katama? Neyi dimu, kupompa kukwikala hakachi ‘kayuma yabadika kuwaha.’ (Fwi. 1:10) Bayi tujiñaña kukupompaku chiña hohu neyi kudi chuma chasweja kulema chinamwekani.
KEÑA-KEÑENU ANTU AKWETI NYICHIMA YAYIWAHI
9. Tweluka ñahi netu mudimu wakushimwina wekala walema?
9 Kudikita chikupu mumudimu wakushimwina nikwena kwatukwashaña kwendela hamu nakuloñesha kwaYehova. Yesu watachikili iwu mudimu hampinji yadiñayi hanu hamaseki. (Mat. 28:19, 20) Kufuma tuhu hayina mpinji, mudimu wakushimwina Wanta nikwilisha atumbanji dimudimu walema nankashi mukuloñesha kwejima kwaYehova. Yuma yayivulu yinakumwekana makonu yamwekeshaña nawu añelu anakukwashana mumudimu wetu nawa atulombolaña kulonda tuwani antu anakukeña kutiya chalala. (Yil. 13:48; Chim. 14:6, 7) Kuloñesha kwaYehova kwahamaseki kunakuzata makonu kulonda kutwali hambidi iwu mudimu walema chikupu. Komana twalemesha mudimu wakushimwina muchihandilu chetu?
10. (a) Lumbululenu chitunateli kutwalekahu kwikala neyena dachalala. (b) Indi mudimu wakushimwina wunayikwashi ñahi hakwila mubuli kuzeya?
10 Kwikala adikita mumudimu kwatukwashaña kutwalekahu kwikala neyena dachalala. Toñojokenu hanawa mazu ahosheliyi Mitchel, eluda wunakalakali hadi yaaka yayivulu nawa payiniya wampinji yejima. Wahosheli nindi: “Natiyaña kuwaha kutañisha antu chalala. Natoñojokaña hachibaaba chachiha muKaposhi Kakutalila hela Awake! nawa nahayamaña hamaana nihakwesekana kwansañu yekala muchibaaba chidi chejima. Nakeñaña kuya nakushimwina kulonda nimoni antu chakutambwilawu iyi nsañu, nichinateli kusañumuna mpwila yawu. Mudimu wami wakushimwina wankwashaña kutwamijaku yuma yalema muchihandilu nawa hetejaña chuma chidi chejima chimudyili mpinjuku.” Chochimu, neyi tudikitaña mumudimu wajila chikutukwashaña kutwalekahu akola munanu mafuku akukuminina.—Tañenu 1 Akorinda 15:58.
DYENUÑA YAKUDYA YAKUSPIRITU
11. Muloñadi chitwatela kudyilaña yakudya yakuspiritu yitwatambwilaña kufuma kudi Yehova?
11 Yehova nakutuloñeshela yakudya yakuspiritu yayivulu yasonekawu munyikanda kulonda yitukolesheña. Chakadi kujina, munateli kwanuka mpinji yimwelili hanyima yakutaña mukanda, muhosha nenu: ‘Iyi diyi nsañu yinnakukeña! Chidi neyi kwiji Yehova wasonekeleli ami!’ Chumichi chamwekanaña. Kuhitila muyakudya yinakutuloñeshelayi, Yehova nakutudizisha nikutulombola. Wahosheli nindi: “Nukukuleja maana, nukukuleja ninjila yeyi yiwukwenda; nukukulombola nadisu dami.” (Mas. 32:8) Komana twafwilaña kudya yakudya yakuspiritu yejima yitwatambwilaña nikutoñojokahu chikupu? Neyi twila mwenimu chikutukwasha kutwalekahu kusoña nyikabu nikubula kuzeya kuspiritu munanu mafuku akukuminina akala.—Tañenu Masamu 1:1-3; 35:28; 119:97.
12. Chumanyi chinateli kutukwasha kulonda tubuleña kuhemesha yakudya yetu yakuspiritu?
12 Chalema kushinshika hanyidimu yakalakalañawu hakwila nawu tutambwileña mpinji yejima yakudya yayiwahi yakuspiritu. Kometi Yasonekaña Yezanvu Dalombolaña yatalaña mudimu wakusandujola, kusoneka, kutaña munsañu yinasonekuwu, kuhana yimwenu nikubalumuna nyikanda yetu yapulintañawu kushilahu ninsañu yashañawu haWebu sayiti yetu. Nyitayi yapulintaña nyikanda yatwalaña nyikanda kuyipompelu yekala mukamwihi nikwakulehi. Muloñadi mudimu wejimiwu chawuzatilañawu? Kulonda antu jaYehova adyeña chiwahi kuspiritu. (Isa. 65:13) Dichi, tushenuku maana nankashi kulonda tudyeña yakudya yakuspiritu yejima yitwatambwilaña kuhitila mukuloñesha kwaYehova.—Mas. 119:27.
ZATENUÑA NYIDIMU YAMUKULOÑESHA
13, 14. Anyi anakukwasha ntanjikilu yaYehova mumawulu, nawa tunateli kukwasha ñahi munjila yoyimu hanu hamaseki?
13 Muchimwenu chamweniyi kapostolu Yowanu, Yesu amumwekesha nakwendela hakawalu katooka kulonda yashindi ejima anakudikaña naYehova. (Chim. 19:11-15) Chikuhwelelu chetu chakolaña hakwiluka nawu kunyima yaYesu kudi añelu ashinshika nawa wudi hamu nawawayishewa anashindi kufuma hamaseki nawa anatambwili dehi wuloku wawu wamwiwulu. (Chim. 2:26, 27) Hichakutalilahu chachiwahi nankashi chakukwasha ntanjikilu yaYehova.
14 Munjila yoyimu, izaza deneni dakwashaña chikupu mudimu wawamana kwaYesu awayishewa achidi hanu hamaseki nawa anakulombola kuloñesha makonu. (Tañenu Zekariya 8:23.) Tunateli kukwasha ñahi ntanjikilu yaYehova hamuntu-hamuntu? Njila yimu hikuhitila mukovwahila antu anakulombola. (Heb. 13:7, 17) Chumichi chatachikilaña muchipompelu chetu. Komana nsañu yitwahoshaña hadi aeluda yaleñelaña antu amakwawu alemesheña aeluda nimudimu wazatañawu? Komana twakoleshaña anyanetu kulemesha awa amayala ashinshika nikuya kudi wena nakutambwila kufumba kwamunsona? Kubombelahu, komana twahanjekañahu hamu nachisaka chitunateli kuzatisha mali kulonda tukwashi nachu mudimu wamukaayi kejima kuhitila mukuhana yawana? (Yish. 3:9; 1 Kor. 16:2; 2 Kor. 8:12) Komana twazatañaku mudimu wakuwahisha Itala daWanta nikudihemba chiwahi? Spiritu yajila yaYehova yahuñunukaña chachiwahi neyi hadi kalemesha nikunuñañana kwamuchidiwu. Twatwalekañahu kutambwila wukwashu kulonda tubuli kuzeya munanu mafuku akukuminina kuhitila muniyi spiritu.—Isa. 40:29-31.
CHIHANDILU CHETU CHATELA KWESEKANA NANSAÑU YITWATAÑISHAÑA
15. Muloñadi wutwatela kuzatila nañovu kulonda chihandilu chetu chesekani nankeñelu yaYehova?
15 Chakukumishaku, hakwila nawu tuumiki nikutwalekahu kwendela hamu nakuloñesha kwaYehova, twatela kwikala nachihandilu chinesekani nansañu yitwatañishaña kuhitila ‘mukushinshika yuma yamutiyishaña Mwanta kuwaha.’ (Efwes. 5:10, 11) Mpinji yejima twalwishaña nayililu yatama muchihandilu chetu, hamuloña wakubula kuwanina niñovu jaSatana nikanu kaayi katama. Enu amana kwetu niahela amakwawu mwalwishaña mafuku ejima hakwila nawu muhembi chiwahi wubwambu wenu naYehova. Chumichi chayileñelaña mwikali alema nankashi kudi Yehova. Bayi muzeyaku. Neyi chihandilu chetu chesekana nankeñelu yaYehova, tukwikala namuzañalu waweni nawa tukwiluka netu kudifukula kwetu hikwamukunkulwayuku.—1 Kor. 9:24-27.
16, 17. (a) Chumanyi chitwatela kwila neyi tunakoñi nshidi yahamesu bwi-i? (b) Indi chakutalilahu chaAnne chinateli kutukwasha ñahi?
16 Chumanyi chitwatela kwila neyi tunakoñi nshidi yahamesu bwi-i? Twatela kunyakala kutambwila wukwashu. Neyi tusweka nshidi munateli kufuma yuma yomisha mbaña. Anukenu nenu, Davidi wahosheli nindi hampinji yaswekeliyi nshidi yindi, ‘mafwaha indi ashinakajili, nachina chadiñayi nakwaba mwaana wejima.’ (Mas. 32:3) Eñani, neyi tusweka nshidi jitwakoñeli kumbadi chikutuleñela tuzeyi muyitoñojoka nikuspiritu, ilaña ‘muntu wukwiteja nindi navulumunaña, hakuyileka, wakamona kwanakena.’—Yish. 28:13.
17 Talenu chakutalilahu chaAnne. * Anne chelili hakufuma muyaaka yawukampululu, wakalakeleña wupayiniya wampinji yejima. Hela chochu, watachikili kwikala nachihandilu chakwenda munjila jiyedi. Ichi chamuluwañesheli chikupu. Wahosheli nindi: “Chinleji chami chatachikili kunkambisha. Mpinji yejima nadineñeleña hohu.” Chumanyi cheliliyi? Wahosheli nindi ifuku dimu hakupompa, atañili nikulumbulula nsona yaYakoba 5:14, 15. Anne welukili nindi wateleleli kutambwila wukwashu nawa wayili nakulomba wukwashu kudi aeluda. Chanukayi, wahoshaña nindi: “Nsona jantañililuwu jadiña neyi yitumbu yinafumi kudi Yehova yakuuka nachu kuspiritu. Yitumbu yakala hakuyinwa, ilaña yokaña. Natiyililili iku kufumba kwawanikaña haniji nsona nawa kwankwashili.” Munahiti dehi yaaka yayivulu, Anne watachika cheñi kumukalakela Yehova neyena nawa nachinleji chachiwahi.
18. Yumanyi yitwatela kufwila kwila?
18 Hikukooleka kweneni nankashi hakushakama munanu mafuku akukuminina nikwikala mukuloñesha kwaYehova kwabadika! Tudikasenu munyichima yetu kulonda tubuleña kudiwula yuma yatuloñeshelañawu mukuloñesha. Ilaña, tuzatilenu hamu nachisaka kulonda tupompeña mpinji yejima nakudifukwila hamu nachipompelu mutwekala, kukeñakeña chikupu antu akweti nyichima yayiwahi mwiluña detu, nikulemesha yakudya yakuspiritu yatuloñeshelañawu mpinji yejima yitwatambwilaña. Cheñi nawa tuzatileña hamu nawantu anakutulombola nikwikala nachihandilu chesekana nansañu yitwatañishaña. Neyi twila mwenimu, tukwendelaña hamu nakuloñesha kwaYehova nawa tukutwalekahu kwila yuma yayiwahi!
[Tumazu twaheshina]
^ Ijina anadihimpi.
[Malwihu aKuzatisha haKudiza]
