1, 2. Jósʼe tokoán kʼianga nikjaʼaitsjenjiaan je jtín xi tíjnale Jeobá.

NʼIO tsjoa maná nga ya tiyojinlee je jtín xi tíjnale Jeobá. Je sén xi faʼaitʼa ya kapítulo 1 xi tsʼe Ezequiel kʼoa kao kapítulo 7 tsʼe Daniel kui bakóná josʼin tíbándiaa je Jeobá nga kuitjoson jme xi tjínndajinle. Jé Jesús tíbándiaale je jtínle Jeobá xi tíjna i̱ Sonʼnde ánni nga kataʼmiyasonsíni je énnda chjotse, kʼoati títsoyale kʼoa tísínʼiojin je xi tjíotsoyason kʼoa tíbasenkao je chjota nga je Jeobá katabʼétsʼoale. Kʼianga ʼyaa xi tʼatsʼe jebi ninʼiotʼañá je jtín xi tíjnale Jeobá (Mat. 24:45).

² Tonga, a kʼoasʼin timangíntjenngiaa nga jngó jngoá jmeni xi tso je jtínle Jeobá. A ngisa tsjoa tjínná ndʼai nga ʼyaa je Niná axo tosa jekinroajen kjoatsjoaná. Kʼiatsa si̱kjaʼaitsjenjiaan kjoachjonangi jebi, tsakui nichxin jchaa tsa jetíbijtajinná kʼoa tsa tsín tinanda nindosinñáje̱ jonʼia ngasʼa. Kjoaixiní nga sakʼoa kʼoama. Nichxin kjoatse, je pastro Pablo kʼoakitsole je ndsʼe̱ nga je choa̱le Jesús katafitjenngi kʼoa kʼoakitsole anni, kitsole: “Jméni nga tsín kuijtasínio nga koa̱nʼindajin ni̱ma̱no” (Heb. 12:3). Kʼianga nda kichotʼayajiaan xomana xi jaʼato je kjoaʼmiya xi tsakakóná jmeni xi tísʼín je jtín xi tsʼe Jeobá ngisajin tsjoa kisʼe tokoán kʼoa tsakasenkaojinná nga tosi tonda si̱xálee Niná.

3. Jméni xi sʼiaan nga tsín kuijtaná, kʼoa jméni xi chótʼayá i̱ kjoaʼmiya jebi.

³ Tonga je Pablo kʼoakitso nga kʼoénelee yaoná “nga nda sʼiaan” ánni nga tsín kuijtasíniná (Gál. 6:9). Machjén nga chʼasjee nganʼio ngatsʼiaa nga kʼoasʼiaan. Aonla koya kjoatjao xi títsjoáná Jeobá kataʼyaa, xi kuinyakaoná nga kjuintjenngiaa josʼin tísíxá je naxinandále. Kui jebi xi kuinyakaoná nga jchaa tsa tjín jmeni xi si̱ndayasaa yaoná ñá kao familianá.

4. Ánni nga kʼoabixónsíñá nga nʼio machjén nga biyojtián kʼianga bʼetsʼoalee Jeobá.

⁴ Saʼnda nichxin kjoatse toxá kʼoasʼin batiojtínni je choʼndale Jeobá. Ya ngʼajmi sakʼoa kʼoaʼmile  je ánkje nga katabichókinya ngixko̱n Niná (1 Rey. 22:19; Job 1:6; 2:1; Dan. 7:10). Je chjota israelita tsakatiojtín nga kinrʼoé kʼoa nga tsakʼinyale je kjoatéxomale Niná (Deut. 31:10-12). Kʼoa je chjota judío xi tjío kʼianga siglo l (nó 1 saʼnda 100) kʼoasʼin ngale nga ya ki ya ndʼia sinagoga nga maxkia Énle Niná (Luc. 4:16; Hech. 15:21). Kʼoa kʼianga kitsʼia je jtín xi tsʼe chjotale Cristo tojo kʼoasʼin koanña. Kʼoa ndʼaibi kʼoati nʼio machjén nga biyojtián kʼianga bʼetsʼoalee Jeobá. Kui xá mañañá nga ninʼiojiaan xíngiaa, nga sʼená kjoatjaocha kʼoa nga kʼoanʼia xá xi nda. Tojo machjénná nga “kʼoénelee xíngiaa” kʼoa ngisa nga tiʼyaa “nga je nichxinbe [xi tsʼe Jeobá] nroachrian” (Heb. 10:24, 25).

5. Jósʼin si̱nʼiojinngañá xíngiaa ya kjoajtínná.

⁵ Jngo koya josʼin nga kʼoainganʼiolee xíngiaa ya kjoajtínná kʼianí nga kjoénngʼaa ndsaa kʼoa kʼoee énná. Tobʼelañá, koan kui kʼoakuixoán tsa jme xi tíkjonangi je ndsʼee, kʼoa tsamaije̱, koaan kui kʼoakuixoán jósʼin si̱chjén jngo testo, kʼoa koaan kui kʼoéyanajmiáje̱ tsa jmeni xi bakó nga nʼio nda bichótsjoá nga nitjosoán jotso kjoafaʼaitsjen xi faʼaitʼa Biblia (Sal. 22:22; 40:9). Ninga chriansʼa nga mangián kjoajtín kʼoa ninga jekjoatsená, ngatsʼiñá nga tsjoánganʼioná je én xi nchja̱ ndsʼee, ni je xi jejchínga kʼoa ni je xi sʼa xti.

6. Jósʼin binyakaoná je kjoajtín xi sʼená.

⁶ Ánni nga kjitʼa kʼoatsosíniná Jeobá nga likui nichaa je kjoajtínná. Kuinga je kjoajtínná kʼoa kao kjoajtíntse xi satíoná binyakaoná nga kao kjoanʼiojin ʼmiyasoán kʼoa nga tsínkui mangínñá ninga chjota fitjenngikená kʼoa ninga tsín nrʼoéná nga ʼmiyasonlee (Hech. 4:23, 31). Je kjoanokjoaya xi faʼa ngisa sítaja kjoamakjainná (Hech. 15:32; Rom. 1:11, 12). Je xi ʼmiyaná ya kjoajtínná kʼoa kao nga kʼoasʼin ninʼiojiaan xíngiaa nʼio tsjoa batío tokoán kʼoa sʼená kjoanyʼán kʼianga kjoa tjínná (Sal. 94:12, 13). Je Comité de Enseñanza xi tsʼe Cuerpo Gobernante kui bʼéndajin jmeni xi ʼmiyale naxinandále Niná jngo tjíjtsa Sonʼnde. Bʼaiñá kjoanda nga kʼoasʼin tíʼmiyaná ya kjoajtínná nga xki̱ xomana.

7, 8. 1) Ánni nga kʼoasʼin biyojtínsíñá. 2) Jósʼin basenkaoli ji je kjoajtínná.

⁷ Tonga ali tsa tokuijin nga tsjoánganʼioná kjoajtínná nga kʼoasʼin biyojtínñá. Kuinga biyojtínñá nga je Jeobá bʼetsʼoalee, kʼoa kui xi ngisasa nʼio chjíle (tʼexkiai Salmo 95:6). Nʼio tse kjoanda tjínná nga kʼoasʼin chʼasjengʼaa je Nináná (Col. 3:16). Je Jeobá bakinle nga kjitʼa chʼasjengʼa. Kʼoa kʼiaa chʼa̱sjengʼa nga mangián kjoajtínná kʼoa nga bʼé énná (Apoc. 4:11). Kuinga kʼoatsoniná je Jeobá nga “likui si̱kʼéjnaa nga koa̱nñaa, josʼin nga tjín kʼa xi kʼoasʼin mangale” (Heb. 10:25).

⁸ A majinná nga kui kjoajtínná xi koasenkaoná nga ska̱ná saʼnda nga kjoaʼaxin je Jeobá kjoatsʼen xi kijnajtsa sonʼnde. Kʼiatsa jaon, nʼiojin chjí jchatokoán kʼoa kʼoénejinlee yaoná nga koanngián ninga nʼio tse xá tjínná (Filip. 1:10). Alikuijin koa̱n nga toʼi̱natjín i̱natje̱n kjoa si̱chañá kjoajtínná kʼoa tsín chʼasjengʼaa Jeobá.

9. Ánni nga nʼio chjísínile nga kʼuínyasoán.

⁹ Kʼianga ʼmiyasoán jokji tje̱n bichó nganʼioná kʼoati kui xi basenkaoná nga kʼoasʼin mangíntjenngiaa josʼin tísíxá je jtínle Jeobá. Jé Jesús tsakʼétsʼiakao xá jebi kʼianga tsakʼejna i̱ Sonʼnde (Mat. 28:19, 20). Kʼoa saʼnda nga kʼia, je jtínle Jeobá kui xá tísʼín nga títsoyason je énnda chjotse kʼianga chjotale Cristo tjíosíkao  chjota. Nichxin xi tiyoaa ndʼai, nʼio nkjín mani choa̱ xi bakó kʼianga je ánkje binyakaoná kʼoa bándiaaná nga bichonrʼoé je chjota xi tjíonda nga sʼe̱le “kjoabijnachon ngantsjai” (Hech. 13:48; Apoc. 14:6, 7). Je jtínle Jeobá xi tíjna i̱ Sonʼnde kui xá tísʼín. A kʼoati kui títjon tinikʼéjnai tsanda ji xá jebi.

10. 1) Jngola choa̱ kʼoasi jmeni xi sʼiaan nga tosi tonda tsjoa sʼe̱ tokoán nga si̱xálee Niná. 2) Jósʼin tíbasenkaoli nga kʼoasʼin ʼmiyasuin kʼianga tsín tíbijtajinli jmeni xi chon ndʼaibi.

¹⁰ Kʼianga kʼoasʼin nʼio ʼmiyasoán basenkaoná nga ngisa tsjoa sʼená kʼianga nixálee Niná. Jngo ndsʼee xi Mitchel ʼmi xi jenʼio nkjín nó nga chjotajchínga sʼin tíjna kʼoa precursor regular kaoni, kitso: “Nʼio tsjoake nga fakaonajmía chjota xi tʼatsʼe énle Niná. Kotʼajinña jmeni xi faʼaitʼa je Xo̱n xi Bájinkonná kʼoa kao ¡Despertad! kʼoa ñaki tokʼoamana jokji kjoachjine nroatʼa kʼoa jokji nda tjío je rebistaná. Ñaki jemena nga kjuíxinyasonle je chjota kʼoa skoe jokuitso. Kʼianga kʼoasʼin xinyasoan kui xi basenkaona nga tsín chajinna jme xi títjon tíjna. Kʼiatsa jme xá tjínna, bʼenele yaona nga kʼia kʼoasʼian nga jefeʼeña kʼoa tsamaije̱ nga kje bitjojian”. Kʼianga kui títjon nikʼéjnaa je xá xi tsʼe Niná basenkaoná nga kaná jme xi bitjatojiaan nichxin fetʼa xi tiyoaa ndʼai (tʼexkiai 1 Corintios 15:58).

11. Ánni nga kʼoéxkiasíñá je xo̱n xi síkasénná je naxinandále Jeobá.

¹¹ Je Jeobá nʼio nkjín xo̱n tísíkasénná xi kʼoasʼin tísítaja kjoamakjainná.  Tsakui nichxin faʼaitsjenná kʼianga i̱ tsakixoán nga jetsakʼexkiaa jngo xo̱n: “Kuikjoán jebi xi machjénna. Ñaki anla kisikasénna Jeobá”. Ali tsa toxkia kʼoajin ma, kui xo̱n síchjén je Jeobá kʼianga bakóyaná kʼoa nga bándiaaná. Je Jeobá itso: “Sichoyale, kʼoa xínyale jokji ndiaa xi kʼuínyai” (Sal. 32:8). A bʼenelee yaoná nga bʼexkiaa ngayeje xo̱n xi síkasénná je naxinandále Jeobá. A nikjaʼaitsjenjin kaoñá kʼianga bʼexkiaa. Kʼiatsa kʼoanʼia tosi tonda nda si̱xálee Niná nichxin xi tiyoaa ndʼai kʼoa alikui kjuinroajen je kjoamakjainná (tʼexkiai Salmo 1:1-3; 35:28 kao 119:97).

12. Jméni xi koasenkaoná nga chjí jchatokoán je xo̱n xi bʼasje naxinandále Niná.

¹² Ndatjín nga si̱kjaʼaitsjenjiaan jokji xá tje̱nkao kʼianga tíbitjo je xo̱n xi énle Niná faʼaitʼa. Je Comité de Redacción xi tsʼe Cuerpo Gobernante jé kjinele josʼin kjimaxá nga tíbijnyisjaiya jmeni xi kuitjo, jmeni xi tíchji, josʼin tísʼendaya, nga tífaʼatoya xi kjaʼaí én kʼoa jokjoan sén xi kjoaʼaítʼa. Kʼoanikao je xo̱n xi bitjo kʼoa kao xi ya satíotʼa ya Internet. Ya sucursal jñani kjimanda je xo̱n yaa tje̱n nikasénnile je jtín xi tjío ngakjijnda, ni kjin tjío kʼoa ni chrian tjío. Ánni nga kʼoasikji tse xá kjimasíni. Kuinga tsín jme xi katachale naxinandále Niná (Is. 65:13). Kuinga ndatjínsíni nga kʼoéxkiaa ngayeje xo̱n xi síkasénná jtínle Niná (Sal. 119:27).

13, 14. ʼYáni xi kʼoasʼin tjíotsjoánganʼio ya ngʼajmi josʼin tjínndajinle Jeobá, kʼoa jósʼin chjénngilee tsanda ñá.

¹³ Je sén xi kisakole je pastro Juan jngo naxínchxoa tíjnasonle Jesús kʼianga sikinjele je xi kontra batiole Jeobá (Apoc. 19:11-15). A tsí kjoaixi nga ñaki matajasa kjoamakjainná nga ʼyaa kʼianga je ánkje xi kixi ya tsjoánganʼiole je Jesús kʼoa nga kʼoati ya tjío je xi i̱ Sonʼnde kitjoejinni nga jetsakʼaile kjoanda ya ngʼajmi (Apoc. 2:26, 27). Nʼio nda choa̱ batíoná nga tjíofitjenngi josʼin tíbándiaa je Jeobá.

¹⁴ Je chjotankjín kʼoati ñaki kao ni̱ma̱le nga tsjoánganʼiole je chjotale Cristo xi ya koai ya ngʼajmi. Jéní chjotale Cristo jebi xi tjíobándiaale jtínle Jeobá (tʼexkiai Zacarías 8:23). Jósʼin kʼoainganʼioá nga jngó jngoá josʼin tjínndajinle Jeobá. Jngo koya josʼin kʼoainganʼioá kʼianí nga si̱tjosonlee je xi tjíobándiaaná (Heb. 13:7, 17). Jolani tsa ya jtín jñani mangián. Kʼianga nikʼaxkiaa je xi chjotajchínga sʼin tjío, a kao kjoaxkóntokon nokjoañá xi tʼatsʼe kao tʼatsʼe xá xi sʼín. A kʼoaʼmilee je ʼndíxtiná nga katabakóle kjoaxkóntokon kʼoa nga katasíjéle kjoafaʼaitsjen xi tʼatsʼe Niná tínroani. A chobayañá ya niʼyaná josʼin kʼoainganʼioá kao tao̱n je xá xi kjima nga kʼoasʼin tíʼmiyason jngo tjíjtsa Sonʼnde (Prov. 3:9; 1 Cor. 16:2; 2 Cor. 8:12). A mandosinná nga katamasinle je Ndʼia jña chotʼayá. Ya jñani tjín kjoanyʼán kao kjoaxkóntokon nda síxá je nganʼiotsjele Jeobá. Kʼoa kui nganʼiotsje jebi xi koasenkaoná nga tsín kuijtajinná jmeni xi chon sonʼnde, nichxin fetʼa xi tiyoaa ndʼai (Is. 40:29-31).

15. Ánni nga tosi tonda chʼa̱sjesíñá nganʼio nga kui kʼoasʼiaan xi ndatjín.

¹⁵ Xi tofetʼani jchaa, kʼianga ska̱ná kʼoa nga tosi tonda kjuintjenngiaa josʼin tísíxá je jtínle Jeobá machjénní nga si̱tjosoán jmeni xi ʼmiyasoán. Machjénní  nga kʼoasʼin koanngínkoaa yaoná josʼin “sasénkon Nainá” (Efes. 5:10, 11). Je Na̱i kʼoa kao sonʼndele kʼoa nga chjotajée ma kaoñá kui xosíkaoná nga ñʼai maniná nga kui kʼoanʼia xi ndatjín. Tiyojin kʼao ndsʼe xi kʼoasʼin nyaon nyaon bʼenelao yaono nga nda tiyo ngixko̱n Jeobá. Je Jeobá nʼio tsjoakeno nga kʼoatinʼiao. Tosi tonda kʼoatʼiaon. Kʼianga kʼoasʼin mangínkoaa yaoná josʼin tjínndajinle Jeobá, nʼio nda sʼe tokoán kʼoa ñaki ʼyañá nga sasénle Jeobá josʼin tiʼyaxkoán (1 Cor. 9:24-27).

16, 17. 1) Jméni xi sʼiaan kʼiatsa kasokójéená. 2) Jméni xi bakóyaná jokisʼin je tichjaa xi Anne ʼmi.

¹⁶ Jméni xi sʼiaan kʼiatsa kasokójéená. Machjénní nga kjitʼanangi si̱jé nganʼio. Tongisa chʼao sʼiaan kʼiatsa kʼoéʼmaa je jéená. Kuilakji je David, kʼianga tsakʼéʼma je jée xi tsakajngi, kitso: “Kʼianga jyó tsakatejna, ñaki jejin je nindana nga kʼoasʼin títsene tsʼajnda nichxin” (Sal. 32:3). Je jée xi tosʼeʼma chʼao síkao kjoafaʼaitsjenná kʼoa likui nda síkatíoná ngixko̱n Niná, tonga “je xi bʼéjnatsen kʼoa síkʼéjna jéele sa̱kóle kjoamatokon” (Prov. 28:13).

¹⁷ Tosi̱kjaʼaitsjenla jokoan je tichjaa xi Anne ʼmi, * Kʼianga sʼa tsoti precursora sʼin kisixá, kʼoa ninga kui kʼoatísʼín xi ndatjín kui xi chʼaotjín kʼoakisʼin kaoni kʼoa tse kjoa kisikʼéjnajin nga jekoanni. Tichjaa jebi itso: “Likui jyó kisikʼéjnana kjoafaʼaitsjenna. Toba kisʼentsjaina”. Jósʼin kitjonganʼio ijngokʼanile tichjaa jebi. Ya kjoajtínná, ñandia kʼianga kui kinchja̱ni jmeni xi tso Santiago 5:14 kao 15, tichjaa jebi koanjinle nga nganʼio machjénle kʼoa tsakjákaonajmí je xi chjotajchínga sʼin tjío. I tso je tichjaa: “Jmeni xi tso je bersíkulo jebi yaa mangóson jngo xki xi tsjoáná je Jeobá kʼianga nda kuiyoaa ngixko̱n. Ninga ñʼai maná kʼianga nitjosoán, basenkaoná. Kisitjosonña jotso testo jebi kʼoa tsakasenkaona”. Jenkjín nó jaʼato nga kʼoakoan je tichjaa, kʼoa ndʼaibi ijngokʼa tísíxánile Jeobá kʼoa jendatjín ijngokʼani kjoafaʼaitsjenle.

18. Jméni xi ñaki kʼoakʼoé tokoán nga kʼoasʼiaan.

¹⁸ Nʼio tse kjoanda tjínná nga tiʼyaa nichxin xi totífikjetʼa kʼoa nga ya tiyojiaan je jtín xi tíjnale Jeobá. Chjí jchatokoán kjoanda jebi. Kʼoa kuinyakoaa xíngiaa xi tjío ya yaniʼyaná nga ntsjaintsjai koanngián kjoajtínná, nga kuijnyísjee je chjota xi ndatjío ni̱ma̱le kʼoa nga kʼoéxkiaa ngayeje xo̱n xi síkasénná je naxinandále Jeobá. Kʼoa kʼoainganʼiolee je xi tjíobándiaaná kʼoa kʼoasʼin koanngínkoaa yaoná jotso én xi ʼmiyasoán. Kʼiatsa kʼoasʼiaan, tosi tonda kjuintjenngiaa josʼin tísíxá je jtínle Jeobá kʼoa likuikʼia kuijtaná nga kui kʼoasʼiaan xi ndatjín.