1, 2. Couma nou confiance augmenté kan nou examine l’organisation universel Jéhovah?

 LI EXTRAORDINAIRE pou pensé ki nou forme partie dan enn grand l’organisation universel. Bann vision Ézékiel chapitre 1 ek Daniel chapitre 7 decrire dan enn fason bien vivant seki Jéhovah pé faire pou realise so projet. Jésus pé dirige partie l’organisation Jéhovah ki lor la terre pou ki sa l’organisation-la concentré lor l’activité predication, prend soin bann besoin spirituel bann ki prend part dan sa l’activité-la, ek aide bann dimoune pou vinn bann adorateur Jéhovah. Sa vrai-mem pousse nou pou ena confiance dan l’organisation Jéhovah, pa vrai?​—Mat. 24:45.

² Eski personnellement nou pé marche ensam avek sa l’organisation-la? Eski nou zele pou la verité pé contigne augmenté, ou-soit li pé diminué? Kan nou examine sa bann question-la, li possible ki nou pou remarké ki nou finn commence fatigué ou-soit nou finn perdi enn tipé nou zele. Sa kapav arrivé. Dan premier siecle, l’apotre Paul ti bizin encourage so bann frere pou examine zele ki Jésus ti ena. Paul ti dire ki sa ti pou aide zot pou zot “pa fatigué ek . . . pa perdi courage.” (Héb. 12:3) Dan lartik avant, nou ti examine seki l’organisation Jéhovah pé faire zordi. Alors, pareil couma l’exemple Jésus ti encourage bann Chretien dan premier siecle, zordi aussi, l’exemple ki l’organisation Jéhovah donne nou, kapav aide nou pou enduré dan service Bondié ek pou garde nou zele.

3. Ki nou bizin faire pou ki nou pa laisse la fatigue spirituel decourage nou, ek ki nou pou examiné dan sa lartik-la?

³ Mais Paul ti dire ki nou bizin faire plus ki sa si nou pa envie ki la fatigue spirituel decourage nou. Li ti dire ki nou bizin travail pou “faire seki bien.” (Gal. 6:9) Alors, nou bizin faire bann zeffort. Anou examine cinq kitsoz ki kapav aide nou pou garde nou zele ek pou contigne marche ensam avek l’organisation Jéhovah. Apré, nou pou kapav decidé personnellement dan  ki domaine nou ek nou famille nou bizin ameliore-nou.

4. Kifer nou kapav dire ki bann reunion ena enn grand l’importance dan vrai l’adoration?

⁴ Bann reunion finn touletan ena enn grand l’importance pou bann serviteur Jéhovah. Dan le ciel, bann ange invité pou rassemblé devant Jéhovah dan certain moment. (1 Rois 22:19; Job 1:6; 2:1; Dan. 7:10) Dan le passé, nation Israël ti rassemblé “pou zot ecouté ek pou zot aprann.” (Deut. 31:10-12) Dan premier siecle, bann Juif ti ena l’habitude pou al dan bann synagogue pou lire bann l’Ecriture. (Luc 4:16; Actes 15:21) Bann reunion ti important kan congregation Chretien ti formé, ek zot toujours ena l’importance dan nou l’adoration zordi. Bann vrai Chretien ‘interesse-zot ar zot camarade, pou encourage sakenn parmi zot pou montré l’amour, ek faire bann bon action.’ Nou bizin contigne “encourage sakenn parmi nou, ek encore plus kan [nou] trouve jour-la [jour Jéhovah] pé kosté.”​—Héb. 10:24, 25.

5. Couma nou kapav encourage sakenn nou camarade pendant reunion?

⁵ Enn fason important ki nou kapav encourage sakenn nou camarade c’est kan nou participe dan bann reunion. Nou kapav reponn question enn paragraphe, faire enn commentaire lor enn verset la Bible, raconte enn ti l’experience ki montré ki li sage pou mette en pratik bann principe biblik, ou-soit dan lezot fason encore. (Ps. 22:22; 40:9) Surement ou pou d’accord ki, n’importe comié l’année nou finn assisté reunion, sa toujours encourage nou pou ecoute bann commentaire sincere nou bann frere ek soeur​—ki zot agé ou-soit zot jeune.

6. Couma nou bann reunion aide nou pou reste actif lor plan spirituel?

⁶ Pou ki lezot raison nou Bondié mette l’accent lor l’importance ki nou rassemblé regulierement? Parski bann reunion ek bann l’assemblée aide nou pou preche avek courage mem si ena l’opposition ou-soit l’indifference dan nou territoire. (Actes 4:23, 31) Bann discours ek sujet ki basé lor la Bible faire nou la foi vinn pli fort. (Actes 15:32; Rom. 1:11, 12) L’enseignement ki nou gagné ek kan nou ensam avek nou bann frere ek soeur, faire nou vrai-mem heureux ek faire nou “reste calme jour kot ena malheur.” (Ps. 94:12, 13) College Central, a travers Comité pou l’Enseignement supervise preparation tou bann programme ki concerne nourriture spirituel ki servi pou enseigne peuple Jéhovah dan le monde entier. Nou kapav vrai-mem reconnaissant pou sa bon l’enseignement ki nou gagné chaque semaine ek toute longue l’année dan bann reunion-la!

7, 8. (a) Pou ki raison principal nou assisté reunion? (b) Couma bann reunion aide ou lor plan spirituel?

⁷ Mais, a part bann bienfait ki nou gagné personnellement dan bann reunion, ena enn kitsoz ki encore plus important. Raison principal kifer nou assisté reunion c’est pou adore Jéhovah. (Lire Psaume 95:6.) C’est vrai-mem enn grand privilege pou loué nou Bondié! (Col. 3:16) Nou donne Jéhovah l’adoration ki Li merité kan nou assisté ek kan nou participe dan bann rassemblement theocratik regulierement. (Rév. 4:11) Alors, li pa etonnant ki la Bible encourage nou pou pa “neglige nou bann rassemblement, couma certain ena l’habitude”!​—Héb. 10:25.

⁸ Eski nou considere nou bann reunion couma enn disposition ki aide nou pou enduré ziska ki Jéhovah detruire sa mauvais le monde-la? Si oui, bann reunion pou parmi “bann kitsoz ki pli important” dan nou la vie, mem si nou bien occupé. (Phil. 1:10) Fodé jamais nou mank enn reunion, a moins ki nou ena enn raison bien important.

9. Couma nou koné ki l’activité predication bien important?

⁹ Kan nou preche avek zele, sa aussi aide nou pou marche ensam avek l’organisation Jéhovah. Jésus ti commence l’activité predication kan li ti lor la terre. (Mat. 28:19, 20) Depuis sa, predication la bonne nouvelle lor Royaume Bondié ek faire bann disciple, c’est bann activité ki pli important pou l’organisation Jéhovah. Beaucoup l’exemple ki ena zordi montré ki bann ange pé donne nou zot soutien ek pé guide nou vers bann ki “ena l’attitude ki bizin pou gagne la vie eternel.” (Actes 13:48; Rév. 14:6, 7) L’objectif ki partie visible l’organisation Jéhovah ena c’est pou organise ek pou soutenir l’activité predication. Eski pou nou aussi, sa l’activité-la li bien important dan nou la vie?

10. (a) Donne enn l’exemple ki montré couma nou kapav garde nou l’amour pou la verité. (b) Couma ou ministere finn aide ou pou fortifié ou l’amour pou la verité?

¹⁰ Kan nou zelé dan nou ministere, sa aide nou pou garde nou l’amour pou la verité. Guette seki Mitchel, enn ancien ki aussi enn pionnier permanent depuis longtemps, dire: “Mo content koz la verité ar bann dimoune. Kan mo lire enn nouveau lartik dan La Tour de Garde ou-soit dan Réveillez-vous ! mo impressionné par la sagesse, discernement, ek l’equilibre parfait ki ena dan chaque numero. Mo envie sorti dan predication pou guetté couma bann dimoune pou reagir, ek couma mo kapav faire zot interessé [ar nou message]. Mo  ministere aide moi pou reste stable. Mo pa laisse nanyé prend le temps ki mo’nn reservé pou mo ministere; mo faire bann lezot kitsoz soit avant soit apré.” Li pareil aussi pou nou, si nou reste bien occupé dan nou service sacré, sa kapav aide nou pou contigne enduré dan bann dernier jour.​—Lire 1 Corinthiens 15:58.

11. Kifer nou bizin lire nou bann publication ek medite lor seki nou lire?

¹¹ Jéhovah donne nou la force a travers sa quantité publication biblik ki nou gagné-la. Surement ou rappel ki, apré ki ou finn lire enn publication, ou finn dire: ‘C’est sa-mem ki mo ti bizin! C’est coumadir Jéhovah finn faire ecrire sa zis pou moi!’ Li pa enn coincidence si ou ena sa sentiment-la. A travers sa disposition-la, Jéhovah enseigne nou ek guide nou. Li ti dire: “Mo pou donne toi capacité pou comprend ek mo pou montré toi dan ki chemin to bizin marché.” (Ps. 32:8) Eski nou faire zeffort pou lire tou bann publication ki nou gagné ek pou medite lor seki ena ladan? Si nou faire sa, sa pou aide nou pou contigne enduré ek pou garde nou zele dan service Bondié dan sa lepok difficile-la.​—Lire Psaume 1:1-3; 35:28; 119:97.

12. Ki kapav aide nou pou accorde enn grand l’importance ar nou bann publication?

¹² Nou pou accorde enn grand l’importance nou bann publication, si nou reflechi ki quantité travail bizin faire pou nou gagne zot regulierement. C’est Comité Redaction College Central ki supervise preparation nou bann publication, parmi bizin faire bann recherche, ecrire bann lartik, corrige seki’nn ecrire, mette bann zimage, ek traduire chaque publication ki imprimé ou-soit ki parette lor nou site Internet. Bann filiale ki imprimé, envoye sa bann publication-la dan bann congregation ki pré ek ki loin aussi. Kifer bizin faire tou sa travail-la? Pou ki bann serviteur Jéhovah gagne l’enseignement ek direction ki zot bizin pou reste fidele. (Is. 65:13) Anou lire tou bann publication ki nou gagné a travers l’organisation Jéhovah.​—Ps. 119:27.

13, 14. Kisannla pé soutenir bann disposition ki Jéhovah prend dan le ciel, ek couma nou aussi nou kapav faire pareil lor la terre?

¹³ Dan vision ki l’apotre Jean ti gagné, li ti trouve Jésus pé monte enn cheval blanc pou gagne la victoire lor bann ki rebelle kont Jéhovah. (Rév. 19:11-15) Sa fortifié nou la foi pou aprann ki zis derriere Jésus, ena bann ange fidele ek aussi bann Chretien oint ki’nn ressuscité ek ki finn gagne zot recompense dan le ciel! Sa montré ki zot soutenir zot Chef, Jésus. (Rév. 2:26, 27) Zot bon l’exemple enseigne nou ki nou bizin soutenir bann ki prend la tête dan l’organisation Jéhovah.

¹⁴ Bann membre la grande foule aussi soutenir l’activité ki pé dirigé par bann frere oint Christ ki encore lor la terre ek ki pé prend la tête dan l’organisation zordi. (Lire Zekaria 8:23.) Couma nou kapav montré personnellement ki nou soutenir l’organisation Jéhovah? Enn fason c’est kan nou soumette-nou ar bann ki prend la tête. (Héb. 13:7, 17) Sa commence dan nou prop congregation. Eski bann commentaire ki nou faire lor bann ancien montré ki nou ena respé pou zot ek travail ki zot faire dan congregation? Eski nou encourage nou bann zenfant pou respecté sa bann zom fidele-la ek pou demann zot bann conseil ki basé lor la Bible? En plus, eski dan nou famille, nou guetté couma nou kapav soutenir travail mondial predication par nou bann donation? (Prov. 3:9; 1 Cor. 16:2; 2 Cor. 8:12) Eski nou trouve sa important pou participe dan nettoyage ek l’entretien nou la Salle du Royaume? Kan Jéhovah trouvé ki nou ena respé pou sa bann disposition-la ek ki ena l’unité parmi nou, lerla sa permette so l’esprit saint agir sans okenn obstacle. L’esprit saint donne  nou l’aide ki nou bizin pou pa laisse la fatigue decourage nou dan sa bann dernier jour-la.​—Is. 40:29-31.

15. Kifer nou bizin touletan lutté pou vive en accord avek projet Jéhovah?

¹⁵ Finalement, pou nou enduré ek pou marche ensam avek l’organisation Jéhovah, nou bizin vive en accord avek message ki nou preché. Nou pou kapav faire sa kan nou “verifié seki faire le Seigneur plaisir.” (Éph. 5:10, 11) A cause nou l’imperfection, Satan ek sa mauvais le monde-la, nou pé touletan lutté pou nou pa faire seki mauvais. Certain parmi nou bann frere ek soeur bizin lutté toulé-jour pou garde bann bon relation avek Jéhovah. Jéhovah content ou beaucoup pou sa bann zeffort ki ou faire-la. Pa baisse lé-bras! Nou pou gagne enn grand satisfaction si nou vive en accord avek projet Jéhovah ek nou ena l’assurance ki nou l’adoration pa dan vide.​—1 Cor. 9:24-27.

16, 17. (a) Ki nou bizin faire si nou finn commette enn peché grave? (b) Ki nou kapav aprann ar l’exemple Anne?

¹⁶ Mais ki nou bizin faire si nou finn commette enn peché grave? Rod l’aide pli vite ki possible. Si nou rod cachiette nou peché, nou situation pou vinn pire. Rappel seki David ti ressenti kan li ti rod cachiette so bann peché. “[So] bann lezo ti pé usé pendant ki [li] ti pé plaigné toute longue la journée.” (Ps. 32:3) Oui, si nou cachiette nou bann peché, sa pou zis fatigue nou lor plan affectif ek spirituel, mais enn kikenn ki “confesse ek arrete faire sa bann peché-la, . . . pou gagne misericorde.”​—Prov. 28:13.

¹⁷ Anou prend l’exemple Anne. a Kan li ti enn adolescent, li ti faire pionnier permanent. Selman, li ti commence amenn enn double la vie. Sa ti affecté li beaucoup. Li dire: “Mo conscience ti fatigue moi beaucoup. Mo ti malheureux ek deprimé touletan.” Ki li ti faire? Li dire ki enn jour dan reunion, ti examine Jacques 5:14, 15. Anne ti realisé ki li ti bizin l’aide ek li ti al guette bann ancien. Kan li reflechi lor la, li dire: “Sa bann verset-la zot couma l’ordonnance [enn docteur] ki Jéhovah inn faire ecrire pou nou guerison spirituel. Sa medecine-la pa facile pou avalé, mais li vrai-mem gueri nou. Mo’nn suive conseil ki trouve dan sa bann verset-la, ek sa inn marché.” Plusieurs l’année inn passé, ek zordi, Anne inn ré-gagne la force pou servi Jéhovah avek zele ek avek enn bon conscience.

18. Ki nou bizin bien decidé pou faire?

¹⁸ Li vrai-mem enn grand privilege pou forme partie dan l’organisation Jéhovah, dan sa bann dernier jour-la! Fodé jamais nou considere sa privilege-la couma enn kitsoz banal. Au contraire, anou travail dur ensam avek nou famille pou adore Jéhovah regulierement dan nou bann reunion, pou rod avek zele bann dimoune sincere dan nou territoire, ek pou apprecié nourriture spirituel ki nou gagné regulierement dan nou bann publication. Anou aussi soutenir bann ki prend la tête dan l’organisation, ek vive en accord avek message ki nou preché. Si nou faire sa, nou pa pou zis marche ensam avek l’organisation Jéhovah, mais jamais nou pou laisse la fatigue decourage nou ek nou pou faire seki bien!