1, 2. Ko e heigoa he tau fakakiteaga he fakatokatokaaga ha Iehova he lagi mo e lalolagi katoatoa kua omoomoi a tautolu ke taute?

 KUA ofoofogia ke manamanatu ko tautolu ko e vala he fakatokatokaaga lahi mahaki he lagi mo e lalolagi katoatoa. Ko e tau fakakiteaga ne totou e tautolu ia Esekielu veveheaga 1 mo e Tanielu veveheaga 7 ne homo ue atu e fakamaamaaga ke he puhala ha Iehova ne gahua ke fakamooli e finagalo haana. Kua takitaki e Iesu e vala he fakatokatokaaga ha Iehova he lalolagi. Kua takitaki ai e ia ke taute e gahua fakamatala, ke fakatonu mo e fakamalolō a lautolu kua taute e gahua nei, mo e ke lagomatai falu ke eke mo tau tagata tapuaki ha Iehova. Kua fakalagalaga he mena nei a tautolu ke falanaki ke he fakatokatokaaga ha Iehova.​​—Mata. 24:45.

² Kua muitua nakai a koe ke he fakafifitakiaga he fakatokatokaaga ke hagaaki tumau ke he fekafekauaga he Atua? Liga logona hifo e koe kua kamata a koe ke galo fakahaga e fakamakutu haau. Tupu e mena nei ke he tau Kerisiano he senetenari fakamua. Ne lata he aposetolo ko Paulo ke fakamanatu ki a lautolu e fakafifitakiaga makutu ha Iesu. Ne pehē a Paulo to lagomatai he mena nei a lautolu ke nakai ‘fakalolelole mo e nakai fahia.’ (Hepe. 12:3) He vala tala fakahiku, kua fakatutala a tautolu ke he gahua homo ue atu he fakatokatokaaga ha Iehova hane taute mogonei. Tuga ni e fakafifitakiaga he Keriso ne fakamalolō e tau Kerisiano he senetenari fakamua, ko e fakafifitakiaga he fakatokatokaaga ha Iehova ka lagomatai a tautolu mogonei ke fakauka ke he fekafekauaga he Atua mo e ke fakamakutu tumau a tautolu.

3. Ko e heigoa kua lata ia tautolu ke taute ke nakai fakalolelole? Ko e heigoa ka fakatutala a tautolu ki ai he vala tala nei?

³ Ka nakai manako a tautolu ke “fakalolelole,” po ke galo e makutu he fekafekauaga ke he Atua, lata ia tautolu ke lahi e mena ke taute he nakai ni manamanatu ke he fakafifitakiaga he fakatokatokaaga he Atua. Pehē a Paulo kua lata ia tautolu ke fakatumau ke “mahani  mitaki.” (Kala. 6:9) Kia fakatutala a tautolu ke he lima e mena kua lata ke taute ke tumau e fakamakutu ha tautolu mo e ke mumui ke he takitakiaga he fakatokatokaaga ha Iehova. Ti maeke a tautolu ke fifili kua lata ia tautolu po ke tau magafaoa ha tautolu ke taute falu he tau mena nei.

4. Ko e ha ne talahau ai e tautolu ko e tau feleveiaaga ko e vala aoga tumau he tapuakiaga mooli?

⁴ Ko e tau feleveiaaga kua aoga lahi tumau ma e tau fekafekau ha Iehova. He lagi, ne feleveia a Iehova mo e tau agelu. (1 Patu. 22:19; Iopu 1:6; 2:1; Tani. 7:10) He tau vahā i tuai, ne tala age e Atua ke he tau Isaraela ke fakapotopoto auloa ke maeke ke “fanogonogo ai a lautolu, mo e ako ai e lautolu.” (Teu. 31:10-12) He senetenari fakamua, ne fakapotopoto tumau e tau Iutaia ke he tau matakavi pauaki ke totou mai he tau Tohiaga Tapu. (Luka 4:16; Gahua 15:21) Ne fakatumau e tau feleveiaaga ke aoga ka fakatū e fakapotopotoaga Kerisiano, ti aoga lahi agaia he tapuakiaga ha tautolu. Ko e tau Kerisiano mooli kua “manatu . . . ko e taha ke he taha, ke fakalagalaga ai e fakaalofa mo e tau gahua mitaki.” Kua lata ia tautolu ke fakatumau ke “fefakamafanaaki,” mua atu ha kua nonofo a tautolu he tau aho fakamui.​​—Hepe. 10:24, 25.

5. Maeke fēfē a tautolu ke fefakamafanaaki he tau feleveiaaga ha tautolu?

⁵ Taha e puhala aoga kua maeke a tautolu ke fefakamafanaaki he tau feleveiaaga ko e tau tali. Ma e fakatai, maeke ia tautolu ke tali e hūhū ma e paratafa, fai manatu ke he kupu tohi, po ke talahau e tala kū ke fakakite e puhala ne lagomatai he tau matapatu fakaakoaga he Tohi Tapu a tautolu. (Sala. 22:22; 40:9) Ko e tau tali oti ne logona e tautolu he tau feleveiaaga mai ia lautolu ne momotua mo e fuata kua fakamalolō lahi mahaki a tautolu. Mooli e mena nei pete he leva a tautolu he kupu mooli.

6. Ko e heigoa falu puhala kua lagomatai he tau feleveiaaga a tautolu?

⁶ Kua lagomatai he tau feleveiaaga, tau toloaga, mo e tau fonoaga a tautolu ke he loga foki e puhala. Ma e fakatai, kua lagomatai ai ki a tautolu ke fakamalolō ke fakamatala pete ne totoko he falu he fonua a tautolu po ke nakai manako ke fanogonogo ki a tautolu. (Gahua 4:23, 31) Ko e tau lauga mo e falu vala ne fakavē ke he Tohi Tapu kua fakamalolō e tua ha tautolu. (Gahua 15:32; Roma 1:11, 12) He fakalataha mo e tau matakainaga ha tautolu kua foaki ki a tautolu e fiafia mo e mafanatia mooli. (Sala. 94:12, 13) Ne fakatoka he Komiti Fakaako he Kau Fakatufono e fakaholoaga fakaako he tau feleveiaaga he tau tagata ha Iehova. Kua fakaaue mooli a tautolu ke he fakaakoaga mitaki lahi kua moua ai he tau feleveiaaga ha tautolu he tau faahi tapu takitaha he tau!

7, 8. (a) Ko e heigoa e kakano aoga lahi ke ha ha he tau feleveiaaga? (e) Lagomatai fēfē he tau feleveiaaga a koe?

⁷ Ka e nakai ni ō a tautolu ke he tau feleveiaaga ha ko e tau fua mitaki ne moua e tautolu. Ko e kakano aoga lahi ke ha ha he tau feleveiaaga ko e tapuaki ki a Iehova. (Totou Salamo 95:6.) Ko e lilifu mooli ke maeke ke lologo fakaheke ke he ha tautolu a Atua homo ue atu! (Kolo. 3:16) Kua fakaheke foki a tautolu ki a Iehova he tali ke he tau feleveiaaga. Kua latatonu mooli a Iehova mo e tapuakiaga kua foaki e tautolu ki a ia ke he tau puhala nei. (Fakakite. 4:11) Maeke mogoia a tautolu ke maama e kakano ne aoga lahi ke ha ha tumau ke he tau feleveiaaga ha tautolu!​​—Hepe. 10:25.

⁸ Ko e tau feleveiaaga ha tautolu ko e mena fakaalofa mai ia Iehova ke lagomatai a tautolu ke fakauka ato moumou e ia e lalolagi kelea nei. Pihia nakai e logonaaga ha tautolu? Ka pihia a tautolu, to eketaha a tautolu pete ne lavelave lahi e tau momoui, ke ha ha he tau feleveiaaga oti. (Filipi 1:10) Kia  nakai lata a tautolu ke tonoa e tau feleveiaaga ato fai kakano uho lahi.

9. Iloa fēfē e tautolu kua aoga e gahua fakamatala?

⁹ Ke muitua ke he takitakiaga he fakatokatokaaga ha Iehova, kua lata ia tautolu ke fakamatala fakamakutu. Kamata e Iesu e gahua fakamatala he haia a ia he lalolagi nei. (Mata. 28:19, 20) Tali mai he mogoia, ko e fakamatala mo e taute tutaki ko e tau matagahua kua mua e aoga ma e fakatokatokaaga katoa ha Iehova. Loga e mena tutupu ne fakakite ko e tau agelu hane lalago e gahua ha tautolu mo e lagomatai a tautolu ke kumi a lautolu ka talia e kupu mooli. (Gahua 13:48; Fakakite. 14:6, 7) Ti ko e kakano katoa he vala kitia he fakatokatokaaga ha Iehova ke fakatoka mo e lalago e gahua fakamatala. Ko e gahua nei kia ko e taha he tau gahua kua mua e aoga ke he moui haau?

10. (a) Fakatumau fēfē e malolō he fiafia he taha matakainaga ke he kupu mooli? (e) Lagomatai fēfē he gahua he fonua a koe ke tumau e malolō he fiafia ke he kupu mooli?

¹⁰ Ka fakamatala fakamakutu a tautolu, kua tumau e malolō he fiafia ha tautolu ke he kupu mooli. Pihia e logonaaga ha Mitchel, ko e motua lotomatala mo e paionia tumau. Pehē a ia: “Fiafia au he tala age e kupu mooli ke he tau tagata. Manamanatu au ke he vala tala foou he Ko e Kolo Toko po ke Awake! ti nava lahi ke he pulotu, iloilo, mo e lagotatai katoatoa he tau fufuta takitaha. Manako au ke gahua he fonua ke kitia e puhala ka tali e tau tagata, puhala ke  fakamata e au e fiafia ha lautolu.” Pehē foki a Mitchel kua lagomatai he gahua he fonua a ia ke tuku fakamua tumau e tau mena ne mua e aoga he moui haana ti fakakia e ia ke nakai fai mena ke fakatauhele aki ai. Maeke foki a tautolu ke fakauka ke he tau aho fakamui nei kaeke ke lavelave tumau a tautolu he fekafekauaga he Atua.​​—Totou  1 Korinito 15:58.

11. Ko e ha kua lata a tautolu ke totou e tau tohi ti manamanatu fakahokulo ke he tau mena ne totou e tautolu?

¹¹ Taha puhala kua foaki e Iehova e malolō ki a tautolu, ko e tau tohi loga ne moua e tautolu. Liga manatu e koe e magaaho ne totou e koe e tohi mo e manatu, ‘Ko e mena tonu ia ne lata mo au! Na tuga ni kua tohi ai e Iehova ke lata mo au!’ Fai kakano ne logona pihia a koe. Fakaaoga e Iehova e tau tohi ke fakaako mo e takitaki a tautolu. Ne pehē a ia: “To fakaako e au a koe, mo e fakakite kia koe e puhala ke fano ai a koe.” (Sala. 32:8) Eketaha nakai a tautolu ke totou oti e tau tohi kua moua mo e manamanatu fakahokulo ke he mena ne totou e tautolu? To lagomatai he mena nei a tautolu ke fakauka mo e fakatumau ha tautolu a fakamakutu ke he fekafekauaga he Atua he tau aho uka fakamui nei.​​—Totou  Salamo 1:1-3; 35:28; 119:97.

12. Ko e heigoa ka lagomatai a tautolu ke tokiofa e tau tohi ha tautolu?

¹² To tokiofa fakalahi e tautolu e tau tohi ka manatu e tautolu e gahua ke taute aki. Kua lata ke kumikumi, tohia, fakahakohako, fakatai, mo e fakaliliu e tau tohi oti ne lomi po ke tuku ke he faahi Kupega Hila ha tautolu. Ko e Komiti Tohia Tohi he Kau Fakatufono kua fakalago ki ai e gahua nei. Ko e tau la ne lomi e tau tohi ti fakafano mogoia ke he tau fakapotopotoaga loga he tau matakavi ha lautolu. Ko e ha ne taute e tau gahua oti nei? Ke maeke he tau tagata ha Iehova ke moua e fakatonuaga mo e takitakiaga kua lata mo lautolu ke tumau e fakamooli. (Isaia 65:13) Kia aoga a tautolu mai he tau tohi oti kua moua e tautolu puhala he fakatokatokaaga ha Iehova.​​—Sala. 119:27.

13, 14. Ko hai he lagi hane lalago e fakatokatokaaga ha Iehova? Maeke fēfē a tautolu ke fakakite e lalagoaga pihia?

¹³ He fakakiteaga, ne kitia e Ioane a Iesu ne heke he solofanua hina kua kautū he tau ki a lautolu kua totoko ki a Iehova. (Fakakite. 19:11-15) Ne kitia foki e ia a lautolu ne fakauku kua fakaliu tu mai ke he lagi mo e tau agelu fakamooli kua heke he tau solofanua ne mumui mai i tua ha Iesu. Fakakite he mena nei kua lalago e lautolu a Iesu ko e Takitaki ha lautolu. (Fakakite. 2:26, 27) Ko e fakafifitakiaga mitaki lahi ha lautolu kua fakaako a tautolu kua lata ke fakakite e lalagoaga ki a lautolu kua takitaki e fakatokatokaaga ha Iehova.

¹⁴ He puhala pihia, kua fakakite he moto tagata tokologa e lalagoaga katoatoa ma e gahua he tau matakainaga fakauku he Keriso kua haia agaia he lalolagi. (Totou Sakaria 8:23.) Maeke fēfē a koe ke fakakite e lalagoaga ma e fakatokatokaaga? Taha puhala ko e omaoma ki a lautolu kua takitaki. (Hepe. 13:7, 17) Ko e mena kia kua talahau e tautolu hagaao ke he tau motua he fakapotopotoaga kua fakamalolō e falu ke fakalilifu e tau motua mo e gahua ne taute e lautolu? Fakaako nakai e tautolu e tau fanau ha tautolu ke fakalilifu e tau tagata taane fakamooli nei mo e ke fanogonogo ke he fakatonuaga ha lautolu? Ha ha i ai foki e tau puhala ka lalago e tautolu e fakatokatokaaga. Ma e fakatai, pulega nakai a tautolu ko e magafaoa ke foaki e tupe ke lata mo e gahua fakamatala? (Fakatai 3:9; 1 Kori. 16:2; 2 Kori. 8:12) Kua lagomatai foki nakai e tautolu e fakameā mo e fakatumau he Fale he Kautu? Ka kitia e Iehova kua lalago e tautolu e fakatokatokaaga  he tau puhala nei, kua foaki e ia ki a tautolu e agaaga tapu haana. Ti foaki mai he agaaga haana e malolō ki a tautolu ke fakauka he tau aho fakamui nei.​​—Isaia 40:29-31.

15. Ko e ha kua lata ia tautolu ke matutaki ke eketaha fakalahi ke taute e mena kua hako?

¹⁵ Ka manako a tautolu ke fakauka mo e muitua e takitakiaga he fakatokatokaaga ha Iehova, kua lata a tautolu ke momoui he puhala kua fakafiafia a Iehova. (Efeso 5:10, 11) Ko Satani, ko e lalolagi kelea nei, mo e nakai mitaki katoatoa ha tautolu kua fakatauhele a tautolu ke taute e mena kua hako. Falu ia mutolu ko e tau matakainaga fakahele ne eketaha fakalahi he tau aho oti ke fakatumau e kapitiga haau mo Iehova. Ofania e Iehova a koe ha ko e tau laliaga ne taute e koe. Ua fakalolelole! Ka momoui a tautolu he puhala ne fakafiafia a ia, kua moua e tautolu e moui fai kakano mo e fiafia ti maeke ia tautolu ke moua e taliaaga ha Iehova.​​—1 Kori. 9:24-27.

16, 17. (a) Ko e heigoa ha tautolu ka taute kaeke ke agahala lahi mahaki a tautolu? (e) Ko e heigoa ka fakaako e tautolu mai he fakafifitakiaga ha Anne?

¹⁶ Ka ko e heigoa haau kua lata ke taute ka agahala lahi mahaki a koe? Ua lali ke ufiufi ai. Kumi fakamafiti e lagomatai. Manatu e logonaaga ha Tavita he lali a ia ke ufiufi e tau agahala haana. Pehē a ia: “Ti popo ai haku a tau huimotua he haku a fakatutu ke he aho oti.” (Sala. 32:3) Ka lali a tautolu ke ufiufi e tau agahala lahi mahaki, to galo ia tautolu e fiafia ti liga pihia mo e kapitiga ha tautolu mo Iehova. Ka fakakite ai e tautolu, to “ofania” ki a tautolu.​​—Fakatai 28:13.

¹⁷ Manamanatu ke he fakafifitakiaga ha Anne. a He fuata mui a Anne ti fekafekau ai ko e paionia tumau, ne kamata a ia ke taute e tau mena kelea. Ti ko e fua, ne agahala e loto manamanatu haana. Pehē a ia, “Ne nakai fiafia au ti fakaatukehe he tau magaaho oti.” Taha aho he feleveiaaga, ne fakatutala ai ke he Iakopo 5:14, 15. Mailoga e Anne kua lata a ia ke moua e lagomatai. Ko e heigoa ne taute e ia? Ne muitua e ia e fakatonuaga he kupu tohi nei ti tutala ke he tau motua. Nakai mukamuka ai, ka e pehē a ia, tuga kua gagao a ia ti age e Iehova e tegavai kua lata mo ia. Fakamaama e ia, “Nakai mukamuka ke folo e tegavai, ka kua fakamaulu ai.” Mogonei kua liu a Anne makai foki he fekafekau ki a Iehova mo e loto manamanatu mitaki.

18. Ko e heigoa kua lata ia tautolu ke eketaha fakalahi ke taute?

¹⁸ Kua lata ia tautolu ke manatu tumau ko e lilifu ke fakalataha ke he fakatokatokaaga ha Iehova he tau aho fakamui nei! He auloa mo e magafaoa ha tautolu, kia eketaha fakalahi ke haia tumau he tau feleveiaaga ha tautolu, ke fakamatala fakamakutu he fonua ha tautolu, mo e ke aoga mai he tau tohi oti. Kia fakakite tumau e tautolu e lalagoaga ma lautolu kua takitaki, ti momoui ke he puhala kua fakafiafia a Iehova. Ka taute e tautolu e tau mena nei, to muitua e tautolu e takitakiaga he fakatokatokaaga ha Iehova mo e to nakai lolelole a tautolu.