1, 2. Jehoväpa markan imanö kanqanman yarpachakunqantsik, ¿imanötaq confiakïnintsikta más miratsin?

ALLÄPA kushikïpaqmi Jehoväpa markanchö këkanqantsikqa. Ezequiel libropa juk kaq capïtulon y Daniel libropa qanchis kaq capïtulon willakunqan visionchömi, rikakurqan Jehoväqa alläpa kushikïpaq kawëman markanta dirigikanqanta. Jehoväpa Patsachö këkaq markantaqa Jesusmi dirigin alli willakïkunata mana pantëpa musyatsikuyänampaq, yachatsikoqkunata espiritual kaqchö shumaq cuidanampaq y rasumpa kaq adoración miranampaq. Tsëmi chipyëpa confiakuntsik Jehoväpa markanman (Mat. 24:45).

² Tsënö këkaptinqa, ¿Jehoväpa markan avanzanqanmannöku ëwëkantsik? ¿Jehoväpa kaqchö rurëkunata masku kuyantsik o ichikllapaqku churantsik? Kë tapukïkunaman yarpachakurninqa quizás cuentata qokurintsik utishqa këkanqantsikta o puntatanöna mana rurëkanqantsikta. Rasun kaqchöqa, llapantsiktam tsëqa pasaramashwan. Apostolkuna kawayanqan witsanchömi, cristiano mayinkunata Pablu animarqan Jesus ruranqanta qatiyänampaq. ¿Imanö? Kënömi nirqan: “Paypa tsay alli ejemplunta yarpararnin ama ni imaypis gelanar desanimacuyaytsu” (Heb. 12:3, NTCN). Tsënöllam punta kaq yachatsikïchö yachakunqantsikpis, yanapamashwan kushishqa y mana utishpa Jehoväpa rurëninkunata rurëkänapaq.

3. ¿Imatataq ruranantsik mana utinapaq, y imatataq kë yachatsikïchö yachakushun?

³ Y mana utinapaqqa, “allicuna rureta” sichikunantsik precisanqantam Pabluqa consejakurqan (Gal. 6:9). Tsëmi llapantsik kallpachakunantsik precisan. Rikärishun pitsqata Jehoväpa qarëninkunata, y tsëkunam yanapamäshun alli tsarakunapaq y markan avanzanqanmannö ëwanapaq. Jina yanapamäshunmi familiantsik kar o noqantsik karpis más alliyëta necesitanqantsikta rikänapaq.

4. ¿Imanirtaq nishwan Jehoväta adoranqantsikchöqa reunionkuna alläpa precisanqanta?

⁴ Diospa sirweqninkunapaqqa reunionkunaqa imëpis alläpam precisashqa. Ciëlochö angelkunapis ëllukäyanmi Diospa puntanman (1 Rey. 22:19; Job 1:6; 2:1; Dan. 7:10). Jina unë Israel markapis Diosta wiyakunampaq y pëpita yachakunampaqmi ëllukaq (Deut. 31:10-12). Apostolkuna kawayanqan witsan judïokunapis, yachakashqam kayaq, ëllukäyänan wayikunaman ëwëkur Diospa Palabranta leita (Luc. 4:16; Hech. 15:21). Y congregacionkuna formakäriptimpis reunionkunaqa alläpa precisaqmi karqan. Kanan witsampis Jehoväta adoranqantsikchöqa reunionkunaqa alläpam precisan. Rasumpa kaq cristiänokunaqa reunionkunaman ëwantsik “jucnintsic jucnintsic yanapanacur cuyanacur alli rureta” tïranapaqmi. Y wanantsikmi, “Jesucristu prontuna cutimunanpaq caqta” musyarnin “jucnintsic jucnintsic callpata qonacur” animanakïta (Heb. 10:24, 25).

5. ¿Imanötaq juknintsik juknintsik animanakushwan reunionkunachö?

⁵ Reunionkunachöqa comentariontsikwanmi más alliqa animanakuntsik. Këllaman pensarishun, markäkïnintsiktaqa rikätsikuntsik, juk tapukïta contestarnin, juk texto imanö yanapamanqantsikta rikätsikurnin, o juk willakïwan Bibliapa consëjonkuna wiyakï alläpa alli kanqanta rikätsikurninmi (Sal. 22:22; 40:9). Atska watapana Testigo kashqa o tsëraq qallashqapis, llapantsiktachi yanapamantsik jövenkunapa y mayorkunapa comentarionkunaqa.

6. ¿Imanötaq reunionkuna yanapamantsik?

⁶ ¿Jina imanirtaq Jehoväqa reunionkunaman ëwanata munan? Porque reunionkunawan asamblëakunaqa mana mantsapakushpa yachatsikunapaq y yachatsikushqa mana chaskikuyaptin alli tsarakunapaqmi yanapamantsik (Hech. 4:23, 31). Jinamampis Bibliapita yachatsikayämunqanmi markäkïnintsikta más miratsin (Hech. 15:32; Rom. 1:11, 12). Y juknintsik juknintsik animanakunqantsik y yachatsikïta chaskinqantsikmi yanapamantsik kushishqa kawanapaq y “problëma kanqan hörakunachö tranquilo” këta tarinapaq (Sal. 94:12, 13). Jehoväpa Testïgonkunata Pushaqkunapita Yachakunapaq Kaqta Rikaqkunam, reunionkunachö yachakunapaq kaq yachatsikïkunata alleq rikäyämun. ¡Imanö kushishqam sientikuntsik cada semana shumaq yachatsikïkunata chaskirnin!

7, 8. a) ¿Imarëkurtaq masqa reunionkunam ëwantsik? b) ¿Imanötaq qamta reunionkuna yanapashunki?

⁷ Pero tsëkunapitapis más precisaqqa reunionkunachö Jehoväta adoranqantsikmi (lei Salmo 95:6 *). ¡Diosnintsikta alabënöqa manam imapis kantsu! (Col. 3:16.) Tsëmi mana dejëta alabanantsik, y tsëtaqa rikätsikuntsik reunionkunaman ëwarnin y comentarninmi (Apoc. 4:11). Tsëmi Diospa Palabranqa animamantsik, “Diosta alabanantsic wayicho imepis ellucashun ama waquincunanoqa mana ewashpa quecashuntsu” nirnin (Heb. 10:25).

⁸ ¿Alleqku entiendintsik kë mundopa ushakënin chämunqanyaq aguantanapaq reunionkuna yanapamanqantsikta? Tsënö karqa, ‘más precisaq kaqkunachömi’ reunionkunaqa këkanqa y mana faltanarëkurqa imëkatam rurashun (Filip. 1:10, NM). Imapis alläpa grave karninllam, cristiano mayintsikkunawan reunionchö kanata perdetsimashwan.

9. ¿Imanirtaq alläpa precisan Diospita yachatsikunantsik?

⁹ Llapan puëdinqantsikmannö yachatsikunqantsikqa, Jehoväpa markan ëwëkanqanmannö ëwanapaqmi yanapamantsik. Kë yachatsikïtaqa  Patsachö këkarmi Jesus qallarqan (Mat. 28:19, 20). Tsëpita patsëmi Jehoväpa markampaqqa, Gobiernompita yachatsikï y Jesuspa qateqninkuna kayänampaq nunakunata yanapë alläpa precisashqa. Atska willakïkunam rikätsikun, tsë rurëchö angelkuna yanapakïkäyanqanta y ‘wiñe cawe munaqkunaman’ pushëkämanqantsikta (Hech. 13:48; Apoc. 14:6, 7). Jehoväpa Patsachö kaq markanmi tsë precisaq trabäjota rurëkan. ¿Qampaqpis alläpaku precisan Diospita yachatsikï?

10. a) Juk willakïwan parlakaramï rasumpa kaqta imëpis kuyëkänapaq imata ruranantsik precisanqanta. b) ¿Imanötaq Diospita yachatsikunqëki yanapashurqunki mana utinëkipaq?

¹⁰ Shonqupita patsë yachatsikunqantsikqa yanapamantsik rasumpa kaqta kuyanapaqmi. Atska watapana anciänonö y precursornö yanapakoq Mitchel wawqi ninqanta rikärishun, kënömi nin: “Rasumpa kaqpita nunakunata parlapëqa alläpam gustëkaman. Täpakoq o ¡Despertad! revistakunapa mushoq yachatsikïninkunamanmi yarparä, y alläpam espantakö revistantsikkuna shumaq yachatsikamunqanta rikar. Tsë shumaq tëmakunapitam imata pensayanqanta musyanärëkur nunakunata parlapëta munä. Diospita yachatsikïqa alli kawakunäpaqmi yanapaman. Imatapis juk cösaskunata rurëta munarqa, yachatsikoq manaraq yarqur o yachatsikïpita kutiramur-ran rurä”. Awmi, Diospita yachatsikur ocupado kanqantsikqa kë ushanan junaqkunachö alli tsarakunapaqmi yanapamantsik (lei 1 Corintios 15:58).

11. ¿Imanirtaq publicacionkunawan Jehová yachatsimanqantsikta alleq provechashwan?

¹¹ Sinchi cristiano kanata munarmi Jehoväqa, mëtsika publicacionkunawan yachatsimarquntsik. Itsa llapantsikchï yarpantsik juk publicacionchö yachatsikïta leirirnin kënö ninqantsikta: “¡Këtam necesitëkarqä! ¡Imëka noqapaq Jehová qellqatsimushqannömi!”. Tsënöqa pasakun kikin Jehová yachatsimashqam. Kikinmi kënö nir awnikurqan: “Tantiaq kënikim qoshqëki, y alli nänipa purinëkipaqmi yachatsishqëki” (Sal. 32:8). ¿Llapan publicacionkunata chaskinqantsiktaku alleq provechantsik? ¿Yarpachakuntsikku yachakunqantsikkunaman? Tsënö rurarninqa, kë ushanan junaqkunachö allitam rurashun y markäkïnintsikpis manam ushakanqantsu (lei Salmo 1:1-3 *; 35:28 * y 119:97 *).

12. ¿Imaman pensëraq yanapamäshun Jehoväpa markan qomanqantsik yachatsikïkunata alleq provechanapaq?

¹² Alläpa allim kanman, publicacionkuna ruranan alläpa trabajo kanqanman pensanantsik. Imprimikämoqpaq kaq y Internetchö yarqamunampaq kaq yachatsikïkunataqa alleq investigëkur-raqmi qellqayan, tsëpitam altsapäyan, dibüjokunatapis alleqraq rikäyan, tsëpitanam tukï idiömakunam traduciyan; tsë llapan trabäjokunatam rikäyan Jehoväpa Testïgonkunata Pushaqkunapita Publicacionkunata Qellqaqkunata Rikaqkuna. Y publicacionkunata imprimimoq sucursalkunanam, amänu kaptin o karu kaptimpis llapan congregacionkunaman apatsiyan. ¿Imarëkurtaq kë sasa o aja trabäjota rurayan? Jehoväpa markan espiritual kaqchö sinchi kananrëkurmi (Is. 65:13). Tsëmi Jehoväpa markan tukïläya yachatsikïkunata qomanqantsiktaqa alleq provechanantsik (Sal. 119:27).

13, 14. Jehová patsätsinqanchö, ¿pikunataq ciëlochö yanapakïkäyan, y imatataq pëkunapita yachakuntsik?

¹³ Juk visionchömi apóstol Juan rikarqan, Jehoväpa contran churakaq nunakunata vencinampaq yulaq cabällon montashqa Jesus ëwëkaqta (Apoc. 19:11-15). ¿Manaku markäkïnintsikta más miratsin, angelkuna y kë Patsapita ciëloman ëwashqa kaqkuna Jesuspa qepanta ëwëkanqanta musyanqantsik? (Apoc. 2:26, 27.) ¡Imanömi Jehoväpa markanta yanapëkuyan!

¹⁴ Jina tsënöllam kë Patsachö Jehoväpa markanta dirigeq Cristupa wawqinkunatapis, yupëtapis mana puëdipaq mëtsika nunakuna yanapayan (lei Zacarias 8:23 *). ¿Imanötaq cada uno yanapakushwan Jehová patsätsimunqankunachö? Tsëtaqa rurashwan dirigemänantsikpaq Jehová churamunqan nunakunata cäsokurninmi (Heb. 13:7, 17). Y congregacionnintsikchömi rikätsikur qallashwan. Anciänokunapaq parlarninqa, ¿pëkunata y trabajo rurayanqankunata respetanqantsiktaku rikätsikuntsik? ¿Wamrantsikkunata yachatsintsikku respetayänampaq y consëjonkunata mañakuyänampaq? ¿Jina familiantsikwan parlantsikku entero Patsaman yachatsikïkuna chänampaq kapamanqantsikwan imanö yanapakunapaq kaqta? (Prov. 3:9; 1 Cor. 16:2; 2 Cor. 8:12.) ¿Noqantsikpaqqa alläpaku precisan Yachatsikuyänan Wayita alleq cuidashqata katsinantsik? Respeto kaptinqa y llapantsik juknölla yanapakushqaqa Jehoväpa espïritunqa tsëchömi këkanqa. Tsë espïritum yanapamäshun  kë ushan junaqkunachö mana utinapaq (Is. 40:29-31).

15. ¿Imanirtaq mana utipa sinchikushwan Jehová munanqannö kawakïta?

¹⁵ Jina alli tsarakunapaq y Jehoväpa markan ëwëkanqanmannö ëwanapaqqa, yachatsikunqantsiknömi ‘Teyta Dios munashqanno’ kawanantsik (Efes. 5:10, 11). Satanaspa y kë mundopa tentacionninkuna kaptin y jutsasapa kënintsikrëkurmi, mana allikunachö alleq tsarakunantsik. Kuyashqa wawqilläkuna y panilläkuna, cada junaqmi alli tsarakïkäyanki Jehoväpa rikëninchö alli kayänëkirëkur, y tsënöpam pëqa alläpa kuyayäshunki. ¡Ama venciyäshunëkita permitiyëtsu! Jehová munanqannö kawakurninqa alläpa kushishqam sientikuntsik, y Jehoväta adoranqantsikqa manam envänotsu (1 Cor. 9:24-27).

16, 17. a) ¿Imatataq rurashwan jatun jutsata rurashqa karqa? b) ¿Imatataq yachakuntsik Anne ruranqampita?

¹⁶ Pero ¿imatataq rurashwan jatun jutsata rurashqa karqa? Rasmi yanapakïta ashinantsik. Mana willakurnin upällalla kakurninqa mana allimanmi chätsikun. Jutsata rurarirnin mana willakur upällalla kakunqampitam David kënö nirqan: “Upällalla kakunqäpitam tullükuna gastakärirqan, llapan junaqkuna waqar kakuptï” (Sal. 32:3). Pakëllapa jutsakunata rurayanqanqa, alläpa yarpachakïmanmi chätsikun y Diospa kaqtapis manam alleqllaqa rurëta puëdiyantsu, pero “confesakoq kaqta y dejareq kaqtaqa ankupäyanqam [llakipäyanqam]” (Prov. 28:13).

¹⁷ Joven këman chärir precursöranö yanapakoq Anne * jutiyoq shipashta pasanqanta rikärishun. Pëqa pakëllapam mana allikunata rurar qallëkurqan y tsëpitam mana allikunapa pasarqan. Pëmi kënö willakun: “Concienciäqa acucëkämaqllam. Imëpis alläpa llakishqam sientikoq kä y alläpam yarpachakoq kä”. ¿Imataq yanaparqan tsëpita yarqunampaq? Juk reunionchömi wiyarqan Santiagu 5:14, 15 texto ninqampita yachatsikayämoqta y entiendirirqanmi yanapakïta necesitanqanta, y tsënöpam congregacionninchö anciänokunata yanapayänampaq mañakurqan. Pëmi kënö nin: “Tsë versïculokunaqa espiritual kaqchö kachakänapaq Jehová qomanqantsik jampim. Upunanqa manam fäciltsu, pero kachakätsikunmi. Tsë texto consejakunqantam rurarqä y yanapamashqam”. Tsëpitaqa atska watanam pasashqa, y Anneqa Jehoväta sirwïkan mushoq kallpawan y alli concienciawanmi.

18. ¿Imata ruranapaqtaq alleq churakashwan?

¹⁸ Kë ushan junaqkunachö kawë y Jehoväpa markanchö këqa alläpa shumaqmi. Ama imëpis ichikllapaqqa churashuntsu. Tsëpa rantinqa, familiantsikwan junto kallpachakushun reunionkunachö kanapaq, alli shonquyoq nunakunata ashinapaq y Jehová qomanqantsik yachatsikïkunata alli provechanapaq. Jinamampis, pushamänapaq Jehová churamushqan nunakunata yanapashun y yachatsikunqantsikmannö kawashun. Tsënö rurarqa, manam Jehoväpa markan ëwëkanqanmannöllatsu ëwashun, sinöqa manam utishuntsu alli kaqta rurëtapis.