1, 2. Kumbi kuŵanaŵaniya gulu laku Yehova kungawovya wuli kuti tije ndi chigomezgu chakukho?

 NCHINTHU chakukondwesa ukongwa kuziŵa kuti nasi te mu gulu likulu laku Yehova. Chiwona cho chikulembeka pa Ezekiele chaputala 1 ndi Danyele chaputala 7, chilongo umampha mo Yehova watendese vinthu kuti wafiski khumbu laki. Yesu ndiyu walongozga gulu laku Yehova la pacharu chapasi kuti liŵikengi mtima pa nchitu yakupharazga uthenga wamampha, lisambizengi ndi kuchiska ŵanthu wo apharazga ndipuso kuti liwovyengi ŵanthu anyaki kuti aje ateŵeti aku Yehova. Ivi vititichitiska kuti tigomezgengi gulu laku Yehova.​—Mat. 24:45.

² Kumbi titende limoza ndi gulu lamampha laku Yehova lenili? Kumbi tilutirizga kuchita phamphu mu uteŵeti pamwenga tiwere vuli? Pa nyengu yo tiŵanaŵaniya mafumbu ngenanga, tiwonengi asani tayamba kuvuka pamwenga taleka kuchita phamphu. Mu nyengu ya akutumika, wakutumika Paulo wanguchiska Akhristu anyaki kuti aŵanaŵaniyengi chakuwoniyapu chaku Yesu. Paulo wangukamba kuti, ivi vatingi viŵawovyengi kuti ‘angavukanga cha, ndi kufwa chipoyu.’ (Ŵah. 12:3) Mwakuyanana ŵaka, asani tingasanda mwakuphwere nkhani yo tingusambira sabata yamala, yo yikukonkhoska vo gulu laku Yehova lifiska, vitiwovyengi kuti tilutirizgi kuchita phamphu ndipuso kukunthiyapu.

3. Kumbi tikhumbika kuchitanji kuti tileki kuvuka ndipu tikambiskanengenji m’nkhani iyi?

³ Paulo wangulongo kuti pakhumbika vinandi kuti tileki kuvuka. Iyu wangukamba kuti, tikhumbika kuŵa ndi phamphu “pakuchita cho nchamampha.” (Ŵag. 6:9) Mwaviyo, tikhumbika kuchitapu kanthu asani tikhumba kuchita cho nchamampha. Tiyeni tikambiskani vinthu vinkhondi vo vingatiwovya kuti tileki kuvuka ndipuso kuti tiyendengi limoza ndi gulu laku Yehova. Pavuli paki, isi pamwenga mabanja ngidu, tiwonengi vo tikhumbika kusintha.

4. Nchifukwa wuli tingakamba kuti kuwungana nkhwakukhumbika ukongwa pakusopa kwidu kwauneneska?

⁴ Kuwungana pamoza nyengu zosi nkhwakukhumbika ukongwa kwa ateŵeti aku Yehova. Angelu kuchanya awungana pa nyengu yo Yehova wakujalikiska. (1 Ŵaka. 22:19; Jobu 1:6; 2:1; Dan. 7:10) Kali Ayisraele nawu awungananga “alinga kuti avwengi ndi kusambira.” (Mar. 31:10-12) Ayuda a mu nyengu ya akutumika, nyengu zosi alutanga ku sinagoge kuchiŵerenga Malemba. (Luka 4:16; Mac. 15:21) Mpingu wachikhristu wati wajalikiskika, ŵanthu angulutirizga mbwenu kuwungana ndipu mpaka sonu mawunganu ngakukhumbika ukongwa pakusopa kwidu. Akhristu auneneska, aŵanaŵaniya anyawu ndipuso ‘akhuŵirizgiyana ku chanju ndi ku nchitu zamampha.’ Mwaviyo, tikhumbika kulutirizga ‘kuchiskana; ndipu ukongwa viŵi po [tiwona] kuti zuŵa [laku Yehova] lo laŵandika.’​—Ŵah. 10:24, 25.

5. Kumbi tingachita wuli kuti tichiskanengi pa maunganu?

⁵ Kumuka pa mawunganu ndi nthowa yimoza yo tichiskiyana. Tingakonkhoska za chigomezgu chidu asani timuka mafumbu nga m’nkhani yo tisambira, tikonkhoska mo tingagwiriskiya nchitu lemba, tikonkhoska mwakudumuwa vo tayanduwa chifukwa chakulondo fundu za m’Bayibolo ndipuso munthowa zinyaki. (Sumu 22:22; 40:9) Kukamba uneneska, tingazomerezga kuti asani tafika pa mawunganu tichiskika ukongwa kuvwa kwamuka kwakuchiska kwa abali ndi azichi, ŵara ndipuso anamana chinanga kuti taja tichiwungana kwa vyaka vinandi.

6. Kumbi mawunganu ngatitiwovya wuli?

⁶ Kumbi pe vifukwa vinyaki so nivi vo Chiuta wawone kuti kuwungana pafupipafupi nkhwakukhumbika ukongwa? Mawunganu ngidu nga mpingu, unganu wa dera, wapade kweniso wachigaŵa ngatitiwovya kuti tipharazgengi mu chigaŵa chidu mwambula mantha asani ŵanthu atitisuska ndipuso akana kuŵapharazgiya. (Mac. 4:23, 31) Nkhani zakutuliya m’Bayibolo zo zikambika pa mawunganu, zititiwovya kuja ndi chigomezgu chakukho. (Mac. 15:32; Ŵar. 1:11, 12) Vo tisambira ndipuso asani abali ŵidu atitichiska pa mawunganu, vititiwovya kuja ndi likondwa lenechu kweniso ‘tipumuzgika mu mazuŵa nga suzgu.’ (Sumu 94:12, 13) Komiti Yakusambiza ya Wupu Wakulongozga, ndiyu yiwonere kunozgeka kwa nkhani zo zikambika pa mawunganu nga ŵanthu aku Yehova pacharu chosi chapasi. Titenere kuwonga chifukwa cha nkhani zenizi ndipuso zo tisambira sabata yeyosi pa mawunganu.

7, 8. (a) Kumbi nchinthu chinyaki nichi chakukhumbika ukongwa cho tilutiya ku mawunganu? (b) Kumbi mawunganu ngatitiwovya wuli?

⁷ Pe chinthu chinyaki chakukhumbika ukongwa kuluska vo tiyanduwa asani te pa maunganu. Chinthu chenichi, nkhusopa Yehova. (Ŵerengani Sumu 95:6.) Te ndi mwaŵi ukulu ukongwa wakuthamika Chiuta widu wamampha! (Ŵakol. 3:16) Yehova wakhumba kuti nyengu zosi timusopengi mwakufika pa mawunganu kweniso kumukangapu. (Chiv. 4:11) Ndichu chifukwa chaki tichiskika kuti tileki “kujowo unganu waku taŵeni, uli nkharusu ka ŵanyaki.”​—Ŵah. 10:25.

⁸ Kumbi tiwona mawunganu ngidu ngachikhristu kuti ngangatiwovya kukunthiyapu mpaka po Yehova wazamubwanganduliya mugonezu wunu uheni wa vinthu? Asani ndi viyo, tiwonengi kuti mawunganu nge mu gulu la vinthu ‘vamampha’ ukongwa ndipu tiyesesengi kuchisanirikapu chinanga kuti titangwanika. (Ŵaf. 1:10) Patenere kuja chifukwa chikulu cho tingatondeke kuluta ku mawunganu.

9. Kumbi tiziŵa wuli kuti nchitu yakupharazga njakukhumbika ukongwa?

⁹ Asani tipharazga mwaphamphu ndikuti titende limoza ndi gulu laku Yehova. Yesu ndiyu wangwambisa nchitu yeniyi po wenga pacharu  chapasi. (Mat. 28:19, 20) Kutuliya pa nyengu yeniyo, gulu laku Yehova laŵika ukongwa mtima pa nchitu yakupharazga Ufumu ndi kusambiza ŵanthu. Mazuŵa nganu, pe maukaboni nganandi ngo ngalongo kuti angelu atovya nchitu yidu ndipuso atitilongozge ku ŵanthu wo ‘akutemeke [akusankhikiya] ku umoyu wamuyaya.’ (Mac. 13:48; Chiv. 14:6, 7) Nchitu yikulu ya gulu laku Yehova la pacharu chapasi, nkhulongozga kweniso kuwovya pa nchitu yakupharazga. Kumbi tiwona kuti kupharazga ndi nchitu yakukhumbika ukongwa pa umoyu widu?

10. (a) Konkhoskani mo tingachitiya kuti tilutirizgi kuja ndi phamphu mu uneneska. (b) Kumbi upharazgi wakuwovyani wuli kuti muleki kuvuka?

¹⁰ Kuchita phamphu mu uteŵeti kutiwovyengi kuti tilutengi panthazi mu uneneska. Aŵanaŵaniyani vo wangukamba Mitchel, yo waja mura ndipuso mpayiniya wa nyengu zosi kwa nyengu yitali. Iyu wangukamba kuti: “Nditanja ukongwa kupharazga. Asani ndiŵerenga nkhani yifya mu Chigongwi cha Alinda ndi mu Galamukani! ndikondwa ukongwa ndi mo atizikonkhoske. Nkhani zaki atizikonkhoska mwazeru, mwambula kusuzga kuvwa kweniso mwakuvwika umampha. Ndikhumbisiska kuluta mu upharazgi kuti nkhawoni mo ŵanthu angamukiya kweniso mo ndingachitiya kuti ayambi kuja ndi linweka. Kupharazga kutindiwovya kuti ndije wakukho. Ndizomerezga chinthu chechosi cha kuti chinditondekeski kuluta ku upharazgi.” Mwakuyanana ŵaka, asani tichita phamphu mu uteŵeti widu wakupaturika, vingatiwovya kuti tije akukho m’mazuŵa nganu ngakumaliya.​—Ŵerengani 1 Ŵakorinte 15:58.

11. Nchifukwa wuli tikhumbika kuŵerenga mabuku ngosi ngo tilonde kutuliya kwaku Yehova?

¹¹ Mabuku nganandi ngo tilonde ndiyu nthowa yimoza yo Yehova watitichiskiya. Mwambula kukayika, mungakumbuka nyengu yinyaki mwati mwaŵerenga buku, mungukamba kuti: ‘Nkhani yeniyi ndiyu ndakhumbanga nadi ndipu yaja nge kuti Yehova wakulembe ŵaka ini!’ Venivi vichitika ŵaka mwangozi cha. Yehova watitisambiza ndi kutilongozga kuziya mu mabuku ngenanga. Iyu wakukamba kuti: “Ndikurunguchizgengi ndi kukusambiza nthowa yo utenere kwendamu.” (Sumu 32:8) Kumbi titesesa kuŵerenga mabuku ngosi ngo tilonde ndi kulunguruka pa vo tiŵerenga? Kuchita viyo, kutiwovyengi kulutirizga kubala vipasu ndipuso kuti tileki kufota m’mazuŵa nganu ngakumaliya kweniso ngakusuzga.​—Ŵerengani Sumu 1:1-3; 35:28; 119:97.

12. Nchinthu wuli cho chingatiwovya kuti tileki kungawonanga mwakupepuka mabuku ngo tilonde?

¹² Tikhumbika kuŵanaŵaniya nchitu yo yiŵapu pakupanga mabuku kweniso kuti tilondiyengi mabuku ngenanga nyengu zosi. Komiti Yakulemba Nkhani ya Wupu Wakulongozga, yiwonere nchitu ya kufufuza, kulemba nkhani, kuziŵerenga so, kusankha vithuzi, kufwatuliya nkhani zo zisindikizika mu mabuku ngidu kweniso nkhani zo ziŵikika pa Intaneti. Nthambi zo ze ndi makina ngakusindikiziya mabuku, zitumiza mabuku ngenanga ku mipingu ya m’charu chawu ndipuso mu vyaru vinyaki. Nchifukwa wuli nchitu zosi izi zichitika? Yehova wakhumba kuti ŵanthu ŵaki asambizikengi kuti aje akugomezgeka. (Yes. 65:13) Tiyeni tiyesesengi kuŵerenga mabuku ngosi ngo gulu laku Yehova lititipaska.—Sumu 119:27.

13, 14. Kumbi mbayani wo atovya gulu laku Yehova la kuchanya, nanga isi tingalongo wuli kuti titovya gulu laku Yehova la pacharu chapasi?

¹³ Mu vo wakutumika Yohane wanguwona, Yesu wawonekanga kuti wakwera pa kavalu mutuŵa kuti wapundi ŵanthu wo agarukiya Yehova. (Chiv. 19:11-15) Tija ndi chivwanu chakukho asani tiziŵa kuti angelu akugomezgeka ndipuso Akhristu akusankhika kutuliya pacharu chapasi, wo alonde kali mphotu yawu kuchanya, awovyana ndi Yesu. (Chiv. 2:26, 27) Ichi nchakuwoniyapu chamampha ukongwa chakuti nasi tiwovyengi gulu laku Yehova!

¹⁴ Mwakuyanana ŵaka, mbereri zinyaki zitovya ukongwa pa nchitu yakupharazga ya Akhristu akusankhika wo ŵeche pacharu chapasi ndipuso wo alongozga gulu laku Yehova. (Ŵerengani Zekariya 8:23.) Kumbi tingalongo wuli kuti tikoleranaku ndi ulongozgi wo gulu laku Yehova lipereka? Tingachita venivi asani tivwiya ŵara wo atitilongozga. (Ŵah. 13:7, 17) Tikhumbika kuchita venivi, mu mpingu widu wo tiwungana. Kumbi vo tikamba vilongo kuti titiŵatumbika kweniso titumbika nchitu yo agwira? Kumbi tichiska ŵana ŵidu kuti atumbikengi ŵara akugomezgeka ŵenaŵa ndipuso kuti apenjengeku ulongozgi wa m’Malemba? Kusazgiyapu pa fundu zenizi, kumbi tikambiskana ndi banja lidu mo tingagwiriskiya nchitu ndalama zidu kuti ziwovyi pa nchitu yakupharazga ya pacharu chosi chapasi? (Nthanthi 3:9; 1 Ŵakor. 16:2; 2 Ŵakor. 8:12) Kumbi tiwona kuti kugwiraku nawu nchitu yakuphwere Nyumba ya Ufumu nkhwakukhumbika? Mzimu waku Yehova, ugwira nchitu umampha asani ŵanthu atumbikana ndipuso akoliyanaku. Mzimu wenuwu, utitiwovya kuti tileki kuvuka mu mazuŵa nganu ngakumaliya.​—Yes. 40:29-31.

15. Nchifukwa wuli nyengu zosi tikhumbika kuyesesa kuja mwakukoliyana ndi khumbu laku Yehova?

¹⁵ Asani tikhumba kukunthiyapu kweniso kuvwiya ulongozgi wa gulu laku Yehova, tikhumbika kuja ndi jalidu lo likondwesa Yehova.  (Ŵaef. 5:10, 11) Kuja kwakusuzga ukongwa kuchita vinthu vamampha chifukwa chaku Satana, charu chiheni ichi ndipuso kuleka kufikapu kwidu. Abali ndi azichi ŵidu anyaki, zuŵa lelosi atesesa kulutirizga kuja paubwezi ndi Yehova. Yehova watikuyanjani ukongwa chifukwa cha phamphu linu. Mungavukanga cha! Asani tija mwakukoliyana ndi khumbu laku Yehova, tijengi alikondwa kweniso kusopa kwidu, kujengi kwa ŵaka cha.​—1 Ŵakor. 9:24-27.

16, 17. (a) Kumbi tikhumbika kuchitanji asani tachita ubudi ukulu? (b) Kumbi tisambiranji pa chakuwoniyapu chaku Anne?

¹⁶ Kumbi tikhumbika kuchitanji asani tachita ubudi ukulu? Titenere kusaniya chovyu mwaliŵi. Kubisa ubudi widu, kunganangiya limu vinthu. Davidi wangukamba kuti, pa nyengu yo wangubisa maubudi ngaki, ‘liŵavu laki lenga lakonda; chifukwa cha kutamantha kwa zuŵa losi.’ (Sumu 32:3) Kukamba uneneska, kubisa maubudi kungatichitiska kuti tisuzgikengi maŵanaŵanu ndipuso ubwezi widu ndi Chiuta umali, “kweni mweniyo wazomera ndi kungareka wakarondiyanga lisungu.”​—Nthanthi 28:13.

¹⁷ Ŵanaŵaniyani chakuyeruzgiyapu chaku Anne. a Pa nyengu yo Anne wenga pafupi kukwaniska vyaka 20, ndipu wayamba kali kuchita upayiniya wa nyengu zosi. Chinanga kuti wateŵetiyanga nge mpayiniya kweni wachitanga so vinthu viheni. Ivi vingumuchitiska kuti waje ndi njuŵi yiheni. Anne wangukamba kuti: “Ndajimbanga mulandu. Ndakondwanga cha ndipuso ndasuzgikanga maŵanaŵanu nyengu zosi.” Kumbi iyu wanguchitanji? Iyu wangukamba so kuti, zuŵa linyaki pa mawunganu angukonkhoska lemba la Yakobe 5:14, 15. Anne wanguziŵa kuti wakhumbika chovyu ndipu wanguluta kuchikumana ndi ŵara kuti amuwovyi. Asani wakumbuka nyengu yakuvuli, iyu walutirizga kukamba kuti: “Malemba ngo angundikambiya ngenga nge munkhwala wakutuliya kwaku Yehova kuti ndichiri. Chinanga kuti nkhwakusuzga kumwa munkhwala, kweni uchizga. Ndingugwiriskiya nchitu ulongozgi wa m’malemba ngo angundikambiya ndipu ungundiwovya.” Sonu, Anne wateŵete so Yehova mwaphamphu ndipuso ndi njuŵi yamampha.

18. Kumbi titenere kuyesesa kuchitanji?

¹⁸ Nyengu zosi titenere kukumbuka kuti ndi mwaŵi ukulu ukongwa kuja mu gulu laku Yehova m’mazuŵa nganu ngakumaliya. Tiyeni tiyesesi kuleka kuwuwona mwakupepuka mwaŵi wenuwu. M’malu mwaki, tiyeni tosi pamoza ndi mabanja ngidu tiyesesengi kusanirika pa mawunganu kuti tikasopi, tipharazgengi mwaphamphu muchigaŵa chidu ndipuso tiŵerengengi mabuku ngosi ngo tilonde. Titenere so kuvwiya wo atitilongozga kweniso jalidu lidu likoliyanengeku ndi uthenga wo tipharazga. Asani tingachita viyo, tiyendengi limoza ndi gulu laku Yehova ndipuso tivukengi cha pakuchita cho nchamampha!