1, 2. Ol visen bilong oganaisesen bilong Jehova long heven na graun i kirapim yumi long mekim wanem?

 YUMI hap lain bilong wanpela bikpela oganaisesen i stap long heven na long graun, na dispela em narakain samting yumi amamas tru long en. Stori bilong ol visen yumi bin ritim long Esekiel sapta 1 na Daniel sapta 7 i stori gut tru long ol samting Jehova i kamapim bilong inapim samting em i tingting pinis long mekim. Jisas i go pas long ol wok em oganaisesen bilong Jehova long graun i mekim. Em i stiaim dispela oganaisesen long mekim wok autim tok, na skulim na strongim ol manmeri husat i mekim dispela wok, na helpim ol narapela long kam lotuim Jehova. Dispela i kirapim yumi long trastim oganaisesen bilong Jehova.—Mat. 24:45.

² Olsem wanem? Yu bihainim pasin bilong oganaisesen na yu givim bel tru long mekim wok bilong God? Ating yu pilim olsem yu no givim bel moa long mekim dispela wok. Dispela samting i bin kamap long ol Kristen long taim bilong ol aposel. Aposel Pol i mas kirapim ol long tingim gen pasin bilong Jisas long givim bel tru long mekim wok. Pol i tok dispela bai helpim ol na bai ol i no ken “les kwik na givap.” (Hib. 12:3) Long stadi i kamap paslain long dispela, yumi bin stori long ol gutpela wok em oganaisesen bilong Jehova i wok long mekim long nau. Gutpela pasin bilong Jisas i bin strongim ol Kristen long taim bilong ol aposel, na olsem tasol, long nau pasin em oganaisesen bilong Jehova i bihainim inap helpim yumi long stap strong yet long wok bilong God na givim bel yet long mekim olsem.

3. Yumi mas mekim wanem na bai yumi no ken givap? Bai yumi stori long wanem samting long dispela stadi?

³ Sapos yumi no laik “givap” long mekim wok bilong God, orait yumi mas tingim pasin em oganaisesen bilong God i bihainim na yumi mas mekim sampela samting moa. Pol i tok yumi mas bihainim yet pasin bilong “mekim ol gutpela wok.” (Gal. 6:9) Orait nau yumi ken stori long 5-pela samting yumi inap mekim bambai yumi givim bel yet long mekim wok bilong Jehova na stap daun long oganaisesen bilong em. Dispela bai helpim yumi  long luksave sapos i gat sampela samting em yumi na famili bilong yumi i mas wok strong long bihainim.

4. Bilong wanem yumi ken tok olsem pasin bilong bung wantaim na mekim ol miting i stap olsem bikpela samting long lotu i tru kirap long bipo yet?

⁴ Kirap long bipo yet, pasin bilong bung wantaim em i bikpela samting long ol wokman bilong Jehova. Long heven, Jehova i save bung wantaim ol ensel. (1 Kin. 22:19; Jop 1:6; 2:1; Dan. 7:10) Long taim bilong ol Israel bipo, God i bin tokim ol long bung wantaim na bai ‘olgeta i ken kam na harim tok.’ (Lo 31:10-12) Long taim bilong ol aposel, oltaim ol Juda i save bung long ol ples ol i makim bilong mekim miting na bai ol i ken ritim buk bilong God. (Luk 4:16; Apo. 15:21) Pasin bilong bung na mekim miting i stap yet olsem bikpela samting taim kongrigesen Kristen i kamap nupela, na i stap yet olsem bikpela samting tru long lotu bilong yumi long nau. Ol Kristen tru “i mas tingim ol arapela namel long yumi, na kirapim ol long mekim pasin laikim na mekim ol gutpela wok.” Olsem na yumi mas wok yet long “strongim bel bilong narapela narapela,” long wanem, yumi stap long taim bilong las de.—Hib. 10:24, 25.

5. Olsem wanem yumi inap strongim narapela narapela long taim bilong miting?

⁵ Pasin bilong bekim tok long taim bilong miting em wanpela bikpela samting yumi ken mekim bilong strongim narapela narapela. Olsem, yumi inap bekim ol askim bilong paragraf, stori long wanpela skripsa, o kamapim wanpela sotpela ekspiriens bilong soim olsem wanem ol stiatok bilong Baibel i helpim yumi. (Sng. 22:22; 40:9) Long taim bilong miting, bekim bilong ol lapun na yangpela wantaim i save strongim tru yumi. Dispela samting em tru maski yumi bin stap hamas yia long tok i tru.

6. Ol miting i save helpim yumi olsem wanem?

⁶ Ol miting na ol kibung i save helpim yumi long planti rot. Olsem, yumi kisim helpim long stap strong na yumi no pret long autim tok maski ol man long teritori i birua o ol i no laik putim yau long tok yumi autim. (Apo. 4:23, 31) Ol tok na ol narapela hap bilong program we i kamapim gut ol tok bilong Baibel i save strongim bilip bilong yumi. (Apo. 15:32; Rom 1:11, 12) Taim yumi bung wantaim ol brata na sista bilong yumi, dispela i save mekim yumi i amamas tru na bel i stap isi. (Sng. 94:12, 13) Komiti Bilong Wok Tisa bilong Gavening Bodi i save oganaisim program bilong skulim ol man i bung long ol miting em lain bilong Jehova i mekim. Yumi tenkyu tru long gutpela skul yumi save kisim long ol miting bilong yumi long olgeta wik insait long yia!

7, 8. (a) Wanem nambawan as na yumi mas stap long olgeta miting? (b) Ol miting i helpim yu olsem wanem?

⁷ Taim yumi go long ol miting, i no olsem yumi tingting long helpim yumi yet tasol, nogat. Nambawan as tru em olsem, yumi laik lotuim Jehova. (Ritim Song 95:6.) Taim yumi singim ol song bilong litimapim nem bilong God, dispela em i wanpela gutpela samting tru yumi inap mekim! (Kol. 3:16) Na tu, yumi litimapim nem bilong Jehova taim yumi bekim ol tok long ol miting. I stret tru long yumi mekim ol dispela samting bilong lotuim Jehova. (Rev. 4:11) Olsem na nau yumi inap kliagut long as na em i bikpela samting tru long yumi mas stap long olgeta miting!—Hib. 10:25.

⁸ Ol miting bilong yumi i olsem presen i kam long Jehova bilong helpim yumi long sanap strong yet i go inap long taim em i pinisim ol pasin nogut bilong nau. Olsem wanem? Yumi gat kain tingting olsem long ol miting? Sapos olsem, orait maski yumi bisi, yumi bai mekim olgeta samting yumi inap mekim bilong i stap long olgeta miting. (Fili. 1:10) Sapos hevi bilong yumi i no bikpela  tru, orait yumi no ken tru lusim wanpela miting.

9. Wanem samting i mekim na yumi save olsem wok bilong autim tok em i bikpela samting?

⁹ Sapos yumi laik stap daun long oganaisesen bilong Jehova, orait yumi mas givim bel tru long autim tok. Jisas i kirapim wok bilong autim tok taim em i bin kam long graun. (Mat. 28:19, 20) Kirap long dispela taim na i kam inap long nau, nambawan bikpela wok em oganaisesen bilong Jehova i mekim em long autim tok na kamapim ol disaipel. Planti ekspiriens i kamapim klia olsem ol ensel i helpim wok bilong yumi na helpim yumi long painim ol manmeri husat i redi long kisim tok i tru. (Apo. 13:48; Rev. 14:6, 7) Oganaisesen bilong Jehova long graun i stap bilong oganaisim na sapotim wok bilong autim tok. Olsem wanem? Wok bilong autim tok i stap tu olsem bikpela samting long laip bilong yu?

10. (a) Wanpela brata i mekim wanem na bai em i laikim yet tok i tru? (b) Olsem wanem wok autim tok i bin helpim yu long laikim yet tok i tru?

¹⁰ Taim yumi givim bel long autim tok, dispela bai helpim yumi long laikim yet tok i tru. Dispela samting i bin kamap long Mitchel, em wanpela elda na painia oltaim. Em i tok: “Mi save amamas long autim tok i tru long ol manmeri. Mi save tingim nupela stori insait long Wastaua o Kirap! na mi save amamas na pilim tru olsem nius i kamapim gut savetingting, gutpela skultok, na ol tok bilong en i stret tasol. Mi laik go autim tok na lukim pasin ol man bai mekim taim mi autim tok long ol, na tu, mi laik lukim olsem  wanem mi inap kirapim laik bilong ol long harim tok.” Mitchel i tok tu olsem wok autim tok i helpim em long putim ol bikpela samting i stap namba 1 long laip bilong em, na em i no larim wanpela samting i pulim nating taim bilong em. Yumi tu inap stap strong yet long dispela taim bilong las de sapos yumi givim bel tru long mekim wok bilong God.—Ritim 1 Korin 15:58.

11. Bilong wanem yumi mas ritim ol buk na nius bilong yumi na tingim tingim ol tok yumi ritim?

¹¹ Wanpela rot Jehova i strongim yumi em long rot bilong planti buk na nius yumi save kisim. Ating yu inap tingim wanpela taim we yu ritim wanpela buk o nius na yu tingim olsem, ‘Man! Em dispela tok tasol mi nidim! I kain olsem Jehova i raitim dispela tok bilong mi stret!’ I gat as na yu pilim olsem. Jehova i mekim wok long ol buk na nius long skulim na stiaim yumi. Em i tok: “Mi laik skulim yu gut, na soim yu long rot yu mas wokabaut long en.” (Sng. 32:8) Olsem wanem? Yumi wok strong long ritim olgeta buk na nius yumi save kisim, na tingim tingim ol tok yumi ritim? Dispela bai helpim yumi long sanap strong na givim bel yet long mekim wok bilong God nau long dispela taim bilong las de we i gat planti hevi.—Ritim Song 1:1-3; 35:28; 119:97.

12. Yumi mas mekim wanem na bai yumi ken laikim moa yet ol buk na nius bilong yumi?

¹² Yumi bai laikim moa yet ol buk na nius bilong yumi sapos yumi tingim tru olgeta hatwok ol i bin mekim bilong kamapim ol dispela buk na nius. Komiti Bilong Raitim Tok bilong lain Gavening Bodi i save mekim wok painimaut, raitim na stretim ol tok, wokim ol piksa, na tanim tok bilong olgeta buk na nius yumi prinim o putim long Web-sait bilong yumi. Ol brens em ol i mekim wok bilong prinim ol dispela buk na nius, ol i save prinim na salim i go long planti kongrigesen i stap long teritori bilong ol. Bilong wanem ol i mekim ol dispela wok? Ol i mekim olsem bambai lain bilong Jehova i ken kisim ol tok bilong skulim na stiaim ol na bai ol inap stap gut long God. (Ais. 65:13) Yumi ken kisim helpim long olgeta buk na nius i kam long oganaisesen bilong Jehova.—Sng. 119:27.

13, 14. Husat lain long heven i sapotim oganaisesen bilong Jehova? Olsem wanem yumi tu inap mekim olsem?

¹³ Long wanpela visen, Jon i lukim Jisas i sindaun long waitpela hos na i go bilong winim pait na daunim lain husat i bikhet long Jehova. (Rev. 19:11-15) Jon i lukim tu ol gutpela ensel na ol Kristen God i bin makim husat i kisim laip pinis long heven, olgeta i sindaun long hos na bihainim Jisas. Dispela i soim olsem ol i sapotim Jisas olsem Gopas bilong ol. (Rev. 2:26, 27) Gutpela pasin bilong ol i skulim yumi olsem yumi mas sapotim ol lain husat i go pas long mekim ol wok insait long oganaisesen bilong Jehova.

¹⁴ Long wankain pasin, ol manmeri bilong bikpela lain i sapotim tru wok bilong ol brata bilong Krais em ol i stap yet long graun. (Ritim Sekaraia 8:23.) Yu ken mekim wanem bilong sapotim oganaisesen bilong God? Wanpela rot em long bihainim tok bilong ol lain husat i go pas long mekim wok. (Hib. 13:7, 17) Olsem wanem? Taim yumi stori long ol samting em ol elda long kongrigesen bilong yumi i mekim, dispela tok i save kirapim ol narapela long rispektim ol na wok ol i mekim? Yumi save skulim ol pikinini bilong yumi long rispektim ol dispela gutpela wokman na bihainim ol skultok ol i givim? I gat ol narapela samting tu yumi inap mekim bilong sapotim oganaisesen. Olsem, yumi famili olgeta i ken pasim tok long givim kontribiusen bilong sapotim wok autim tok. (Snd. 3:9; 1 Kor. 16:2; 2 Kor. 8:12) Na tu, yumi ken helpim wok bilong klinim na stretim Haus Kingdom. Taim Jehova i lukim olsem yumi mekim ol dispela samting bilong sapotim oganaisesen bilong em, em i save givim holi spirit long yumi. Na spirit bilong em  i save strongim yumi long karim hevi na sanap strong long dispela taim bilong las de.—Ais. 40:29-31.

15. Bilong wanem yumi mas wok strong yet long bihainim stretpela pasin?

¹⁵ Sapos yumi laik stap strong yet na stap daun long oganaisesen bilong Jehova, yumi mas bihainim pasin em Jehova i amamas long en. (Efe. 5:10, 11) Satan, pasin nogut bilong nau, na sin i stap long yumi i mekim na i hatwok tru long yumi bihainim stretpela pasin. Sampela bilong yupela ol gutpela brata na sista i save wok strong long olgeta de long holimpas pasin bilong yupela long i stap pren bilong Jehova. Jehova i laikim tru yupela long olgeta hatwok yupela i mekim. No ken givap! Taim yumi bihainim pasin em Jehova i amamas long en, yumi bai stap amamas na laip bilong yumi bai i gat as bilong en, na yumi ken bilip tru olsem Jehova bai orait long yumi.—1 Kor. 9:24-27.

16, 17. (a) Yumi mas mekim wanem sapos yumi mekim wanpela bikpela rong? (b) Yumi kisim wanem skul long stori bilong Anne?

¹⁶ Tasol yu mas mekim wanem sapos yu mekim wanpela bikpela rong? No ken haitim. Yu mas hariap long kisim helpim. Tingim Devit, em i bin pilim olsem wanem taim em i traim long haitim ol rong bilong em? Em i tok: “Mi krai nogut long san na long nait. Olsem na bodi bilong mi i slek olgeta.” (Sng. 32:3) Sapos yumi haitim ol bikpela rong, yumi bai i no stap amamas moa na ating yumi bai i no inap stap moa olsem pren bilong Jehova. Tasol sapos yumi autim ol dispela rong, “orait bai God i marimari” long yumi.—Snd. 28:13.

¹⁷ Tingim stori bilong Anne. a Taim Anne i stap tineja yet na em i bin mekim wok painia oltaim, em i kirap long mekim ol pasin i no stret. Dispela i mekim na bel bilong em i gat tok. Em i tok: “Olgeta taim mi save stap bel hevi na bel i bagarap.” Long wanpela miting, ol i bin stori long tok bilong Jems 5:14, 15. Anne i luksave olsem em i mas kisim helpim. Em i mekim wanem? Em i bihainim skultok i stap long dispela skripsa na em i toktok wantaim ol elda. I hatwok long mekim olsem, tasol em i tok dispela i kain olsem em i sik na Jehova i givim marasin em i nidim. Em i tok: “Mi pilim hatwok long daunim dispela marasin, tasol dispela marasin i bin helpim mi.” Nau bel bilong Anne i no gat tok moa na em i givim bel tru long mekim wok bilong Jehova.

18. Yumi mas wok strong long mekim wanem?

¹⁸ Oltaim yumi mas tingim olsem em i gutpela samting tru long yumi stap hap lain bilong oganaisesen bilong Jehova long dispela taim bilong las de! Yumi na famili bilong yumi i mas wok strong long go long olgeta miting, givim bel tru long autim tok long teritori bilong yumi, na kisim helpim i kam long olgeta buk na nius bilong yumi. Yumi mas sapotim ol man husat i go pas long mekim wok, na yumi mas bihainim pasin em Jehova i amamas long en. Sapos yumi mekim ol dispela samting, yumi bai stap daun long oganaisesen bilong Jehova na bai yumi no givap.