1, 2. Kasi para tikughanaghanirapo pa gulu likuru la Yehova, cigomezgo cithu cikukura wuli?

 PARA tikughanaghanirapo fundo yakuti tili mu gulu likuru comene la Yehova tikuzizikika. Mboniwoni izo zili kulembeka mu Ezekiel cipaturo 1 na Daniel cipaturo 7 zikulongora umo Yehova wakulongozgera vinthu kuti vifiskike. Yesu wakulongozga cigaŵa ca pa caru capasi ca gulu la Yehova kuti ciŵikenge mahara pa mulimo wa kupharazga makani ghawemi, kuti cipwelelerenge mwauzimu ŵanthu awo ŵakucita mulimo uwu, ndiposo kuti cikhozgerenge kusopa kwaunenesko. Ici cikupangiska kuti tiligomezgenge comene gulu la Yehova.—Mat. 24:45.

² Kasi imwe mukwendera lumoza na gulu lakukondweska ili? Kasi mwamphu winu pa unenesko ukulutilira kukura, panji ukucepa? Panji pakughanaghanirapo mafumbo agha, mungawona kuti mwamba kuvuka panji mwamba kuŵavya mwamphu. Ivi vingacitika. Mu nyengo ya Ŵakhristu ŵakwambilira, mpositole Paulosi wakaciska Ŵakhristu ŵanyake kuti ŵaghanaghanire mwamphu wa Yesu. Paulosi wakayowoya kuti ici cingaŵawovwira kuti ŵaleke “kuvuka na kuthika lusoko mu umoyo” wawo. (Heb. 12:3) Mu nthowa yakuyana waka, usange tasanda mwakupwelelera nkhani iyo yajumpha, yeneiyo yikulongosora vinthu ivyo gulu la Yehova likufiska, tikwenera kuti tovwirika kuti tilutilire kuŵa ŵamwamphu na kuzizipizga.

3. Kasi nchivici ico cikukhumbikwa kuti tileke kuvuka, ndipo mu nkhani iyi tidumbiskanenge vici?

³ Ndipouli, Paulosi wakalongora kuti tikwenera kucita vinthu vinandi usange tikukhumba kuti tileke kuvuka. Wakati tikwenera kucita “ico nchiwemi.” (Gal. 6:9) Ntheura tikwenera kucitapo kanthu. Tiyeni tidumbiskane vinthu vinkhondi ivyo vingatovwira kuti tilutilire kuŵa ŵakukhora ndiposo kuti tilutilire kwendera lumoza na gulu la Yehova. Kufuma apo tingawona tekha usange pali cinthu cinyake ico ise panji mbumba yithu yikwenera kusintha.

4. Cifukwa wuli tingayowoya kuti kuwungana nchigaŵa cakuzirwa comene ca kusopa kwaunenesko?

⁴ Nyengo zose kuwungana pamoza nkhwakukhumbikwa comene ku ŵateŵeti ŵa Yehova. Kucanya, vilengiwa vyauzimu vikucemeka kuti viwungane kwa Yehova nyengo na nyengo. (1 Mathe. 22:19; Job 1:6; 2:1; Dan. 7:10) Mu nyengo yakale, mtundu wa Israyeli ukeneranga kuwungana ‘kuti upulike na kusambira.’ (Dute. 31:10-12) Mu nyengo ya Yesu na ya ŵapositole, Ŵayuda ŵakaŵa na kaluso ka kuwungana mu masunagoge kuti ŵaŵazge Malemba. (Luka 4:16; Mil. 15:21) Mpingo Wacikhristu ukati wapangika, nkhani ya kuwungana pamoza yikalutilira kudidimizgika, ndipo yicali kuŵa cigaŵa cikuru ca kusopa kwithu. Ŵakhristu ŵaunenesko ‘ŵakughanaghanirana yumoza na munyake na kuciskirana ku citemwa na milimo yiwemi.’ Tikwenera kulutilira ‘kukhwimiskana yumoza na munyake, ndipo comenecomene apo tikuwona zuŵa [la Yehova] likuneng’enera.’—Heb. 10:24, 25.

5. Kasi tingakhozgana wuli yumoza na munyake pa maungano ghithu?

⁵ Nthowa yimoza iyo tikukhozgerana yumoza na munyake nkhuzgorapo pa maungano ghithu. Tingalongora kuti tili na cipulikano mwa kuzgorapo para mafumbo ghakufumbika, kulongosora umo tingalondezgera lemba, panji kulongosora cakucitika cifupi ico cikulongora uwemi wa kulondezga fundo za mu Baibolo. (Sal. 22:22; 40:9) Namwe mungazomerezga kuti nangauli tawungana kwa vyaka vinandi, kweni cikulutilira kuŵa cakukhozga kutegherezga mazgoro gha ŵabali na ŵadumbu, kwali mbalara kwali mbana.

6. Kasi maungano ghithu ghakutovwira wuli kuti tilutilire kuŵa ŵamwamphu mwauzimu?

⁶ Kasi pali vifukwa wuli vinyake ivyo Ciuta withu wakuyowoyera kuti nchakukhumbikwa comene kuwungana nyengo zose? Maungano ghithu gha mpingo, gha dera, ghapadera, na gha cigaŵa ghakutovwira kuti tiŵenge na cikanga para tikupharazga, nanga ni para ŵanthu mu cigaŵa cithu ŵakutisuska panji ŵakukana kupulikizga uthenga withu. (Mil. 4:23, 31) Cipulikano cithu cikukhora comene na nkhani za mu Baibolo izo zikuyowoyeka. (Mil. 15:32; Rom. 1:11, 12) Visambizgo na cikhwimisko ivyo tikupokera pa maungano ghithu para tikusopa Ciuta, vikutovwira kuti tikondwenge zanadi, ndipo vikutipa “cipumulo mu mazuŵa gha suzgo.” (Sal. 94:12, 13) Komiti Yakusambizga ya Wupu Wakulongozga yikulaŵilira mulimo wa kunozga mapulogiramu ghauzimu ghose kuti ŵanthu ŵa Yehova pa caru cose capasi ŵasambizgikenge. Tikuwonga comene kuti sabata yiliyose mu cilimika tikuŵa na maungano, apo tikusambira visambizgo viwemi comene.

7, 8. (a) Kasi cilato cikuru ca maungano ghithu nchakuti wuli? (b) Kasi maungano ghakumovwirani wuli mwauzimu?

⁷ Ndipouli, pali cinthu cinyake cakuzirwa comene kuluska vyandulo ivyo ise tikusanga na maungano. Cilato cikuru ico tikwizira ku maungano nchakuti tisope Yehova. (Ŵazgani Salmo 95:6.) Ni mwaŵi ukuru comene wakuti tilumbire Ciuta withu. (Kol. 3:16) Yehova ngwakwenelera kumusopa nyengo zose, ndipo tikumusopa para tikwiza ku maungano na kuzgorapo. (Uvu. 4:11) Ntheura, nchakuzizika yayi kuti tikuphalirika kuti “kusulako cara kuwungana kwithu pamoza, umo kaliri kaluso ka ŵanji.”—Heb. 10:25.

⁸ Kasi tikuwona kuti maungano ghithu nchawanangwa cakuti citovwire kuzizipizga mpaka apo Yehova wazamumazgira mgonezi uheni uwu? Usange ni nthena, maungano ghaŵenge cimoza mwa “vinthu vyakuzirwa comene” ivyo tivipatulirenge nyengo nangauli tili ŵakutangwanika. (Fil. 1:10) Tikwenera cara kukhala ku maungano, pekha para pali cifukwa cikuru comene.

9. Kasi tikumanya wuli kuti mulimo wa kupharazga ngwakuzirwa comene?

⁹ Cinyakeso nchakuti para nase tikucitako mulimo wa kupharazga, vikutovwira kuti tenderenge lumoza na gulu la Yehova. Yesu ndiyo wakambiska mulimo uwu apo wakaŵa pano pa caru capasi. (Mat. 28:19, 20) Kwambira waka pa nyengo iyi, mulimo wa kupharazga Ufumu na kuzgora ŵanthu kuŵa ŵasambiri ndiwo gulu la Yehova likuŵikapo mtima comene. Vyakucitika vinandi vya mu uteŵeti mazuŵa ghano vikulongora kuti ŵangelo ŵakukhozgera mulimo withu ndipo ŵakutilongozgera ku ‘awo ŵali na maghanoghano ghakwenelera umoyo wamuyirayira.’ (Mil. 13:48; Uvu. 14:6, 7) Cilato cikuru ca cigaŵa ca pa caru capasi ca gulu la Yehova nkhunozga na kukhozgera mulimo wakuzirwa comene uwu. Kasi imwe namwe mukuŵika mahara comene pa upharazgi?

10. (a) Yowoyani ciyelezgero ico cikulongora umo tingacitira kuti tilutilire kuŵa ŵamwamphu mu unenesko. (b) Kasi uteŵeti wamovwirani wuli kuti muleke kuvuka?

¹⁰ Para tikupharazga mwamwamphu, tikulutilira kutemwa comene unenesko. Wonani mazgu agho wakayowoya Mitchel, uyo waŵa mulara kweniso mupayiniya wanyengozose kwa nyengo yitali. Wakati: “Nkhukondwa comene kuphalirako ŵanji unenesko. Nkhughanaghanirapo pa nkhani ziphya izo zikuŵa mu Gongwe la Mulinda panji Galamukani! ndipo nkhuzizwa na vinjeru, mahara, na umanyi ivyo vikuŵa mu magazini yiliyose. Nkhuŵa wakukhumbisiska kunjira mu upharazgi kuti nkhawone umo ŵanthu ŵamucitira na nkhani izi, ndiposo umo ningacitira kuti niŵawovwire kuti  ŵanweke. Uteŵeti wane ukunovwira kuti niŵe wakukhora. Nkhuwoneseska kuti nicite cinthu cinyake cilicose pambere nyengo ya uteŵeti yindakwane, panji para yajumpha.” Mwakuyana waka, para nase tikutangwanika na uteŵeti withu wakupatulika, vikutovwira kuti tiŵe ŵakukhora mu mazuŵa ghaumaliro agha.—Ŵazgani 1 Ŵakorinte 15:58.

11. Cifukwa wuli tikwenera kurya cakurya cose cauzimu ico tikupokera kufuma kwa Yehova?

¹¹ Yehova watipa cakurya cauzimu cinandi mu mabuku kuti citipe nkhongono. Tikukayika yayi kuti mukukumbuka nyengo iyo mukati mwaŵazga buku linyake, mukati: ‘Ivi ndivyo nakhumbanga! Vili nga ni para Yehova wakalembera waka ine nkhani iyi.’ Ivi vikucitika mwangozi waka yayi. Kwizira mu mabuku agha, Yehova wakutisambizga na kutilongozga. Iyo wati: “Tindikurunjikizge na kukusambizga nthowa iyo ukwenera kwendamo.” (Sal. 32:8) Kasi tikuyezgayezga kurya cakurya cose cauzimu ico tikupokera, na kughanaghanirapo? Para ticitenge nthena tovwirikenge kuti tilutilire kupambika vipambi ndipo tifotenge yayi mu mazuŵa ghakusuzga ghaumaliro agha.—Ŵazgani Salmo 1:1-3; 35:28; 119:97.

12. Kasi nchivici ico cingatovwira kuti tileke kucitolera maseŵera cakurya cauzimu ico tikupokera?

¹² Nchiwemi kughanaghanira mulimo uwo ukuŵapo kuti nyengo zose tipokerenge cakurya cauzimu. Komiti Yakulemba ya Wupu Wakulongozga yikulaŵilira mulimo wa kucita kafukufuku, kulemba, kuwoneseska kuti ivyo vyalembeka ni vyaunenesko nadi, kupeleka viyelezgero, na kung’anamura mabuku na ivyo vikuŵikika pa Webusayiti yithu. Maofesi gha munthavi agho ghakusindikizga mabuku ghakutumizga mabuku ku mipingo yapafupi na yakutali. Cifukwa wuli pakucitika mulimo wose uwu? Kuti ŵanthu ŵa Yehova ŵaryeskekenge makora mwauzimu. (Yes. 65:13) Mphanyi tafwilirapo kuti tiryenge cakurya cose cauzimu ico tikupokera kwizira mu gulu la Yehova.—Sal. 119:27.

13, 14. Kasi mbanjani awo ŵakukhozgera ndondomeko ya Yehova kucanya, ndipo ise tingakhozgera wuli ndondomeko iyi pano pa caru capasi?

¹³ Mu mboniwoni iyo yikapelekeka kwa mpositole Yohane, Yesu wakuwoneka kuti wakwera pa haci lituŵa kuti wathereske awo ŵakugalukira Yehova. (Uvu. 19:11-15) Nchakukhozga comene kumanya kuti kumasinda kwa Yesu kuli ŵangelo ŵakugomezgeka na ŵakuphakazgika awo ŵali kufuma pa caru capasi, ŵeneawo ŵali kupokera kale njombe yawo ya kucanya. (Uvu. 2:26, 27) Ici nchiyelezgero ciwemi comene ca kukhozgera ndondomeko ya Yehova.

¹⁴ Mwakuyana waka, mzinda ukuru ukukhozgera mulimo wa ŵabali ŵa Khristu ŵakuphakazgika awo ŵacali pano pa caru capasi, ŵeneawo ŵakudangilira mu gulu mazuŵa ghano. (Ŵazgani Zekariya 8:23.) Kasi tingalongora wuli kuti tikukhozgera ndondomeko ya Yehova? Nthowa yimoza ndiyo kujilambika ku awo ŵakulongozga. (Heb. 13:7, 17) Ivi vikwambira mu mpingo withu. Kasi ivyo tikuyowoya vyakukhwaskana na ŵalara vikulongora kuti tikuŵacindika ndiposo kuti tikucindika mulimo wawo wa ulaŵiliri? Kasi tikuciska ŵana ŵithu kuti ŵacindikenge ŵanalume ŵakugomezgeka aŵa na kupulikira ulongozgi wawo? Kweniso, kasi tikudumbiskana mu mbumba yithu umo tingagwiliskira nchito ndalama zithu kuti tikhozgere mulimo wa pa caru cose kwizira mu vyawanangwa vithu? (Zinth. 3:9; 1 Kor. 16:2; 2 Kor. 8:12) Kasi tikuwona kuti mwaŵi uwo tili nawo wa kunozga Nyumba ya Ufumu ngwakukhumbikwa? Mzimu wa Yehova ukugwira makora nchito para pali nchindi na umoza. Kwizira mu mzimu uwu, nyengo zose tikupokera wovwiri kuti tileke kuvuka mu mazuŵa ghaumaliro agha.—Yes. 40:29-31.

15. Cifukwa wuli nyengo zose tikwenera kurwa nkhondo kuti tikhalenge mwakukolerana na khumbo la Yehova?

¹⁵ Kuti tizizipizge na kulutilira kwendera lumoza na gulu la Yehova, tikwenera kuŵa na nkharo iyo yikukolerana na uthenga uwo tikupharazga mwa “kusanda ico nchakuzomerezgeka kwa Fumu.” (Efe. 5:10, 11) Cifukwa cakuti tili ŵambura kufikapo, kweniso pali Satana, na caru ici ciheni, nyengo zose tikulimbana na vinthu viheni ivyo vikukhumba kunanga umoyo withu wauzimu. Ŵanji ŵa imwe ŵabali na ŵadumbu ŵakutemweka mukurwa nkhondo zuŵa na zuŵa kuti mulutilire kuŵa paubwezi na Yehova. Nkhondo iyo mukurwa yikupangiska kuti Yehova wamutemwaninge comene. Kuthera cara. Para tikukhala mwakukolerana na khumbo la Yehova tiŵenge ŵakukhorwa ndipo kusopa kwithu kuŵenge kwawaka cara.—1 Kor. 9:24-27.

16, 17. (a) Kasi tikwenera kucita vici usange tacita kwananga kukuru? (b) Kasi tingasanga candulo wuli na ico wakacita Anne?

¹⁶ Kweni kasi tikwenera kucita vici para tacita kwananga kukuru? Tikwenera kupenja wovwiri mwaluŵiro. Para tabisa ndipo vinthu vinangikirengethu. Tikwenera kukumbuka kuti Davide wakayowoya kuti apo wakabisa kwananga kwake, ‘thupi lake likaghandaghanda cifukwa ca kutampha kwake muhanya wose.’ (Sal. 32:3) Enya, para tabisa zakwananga tivukenge mu maghanoghano ndiposo mwauzimu, kweni “uyo wakuzizomera na kuzileka tiwapokere lusungu.”—Zinth. 28:13.

¹⁷ Wonani ciyelezgero ca Anne. a Apo Anne wakaŵa muwukirano, wakacitanga upayiniya wanyengozose. Ndipouli, wakamba umoyo wa paŵiri. Ici cikamutimbanizga comene. Wakati: “Njuŵi yane yikanisuzganga comene. Nkhaŵa wambura kukondwa na kusuzgika maghanoghano nyengo zose.” Kasi wakacita wuli? Iyo wakalongosora kuti zuŵa linyake pa ungano, lemba la Yakobe 5:14, 15 likalongosoreka. Anne wakamanya kuti wakakhumbikwiranga wovwiri ndipo wakaluta ku ŵalara kuti ŵamovwire. Para wakulaŵiska kumanyuma, wakuti: “Malemba ghara ni munkhwala wakulembeka na Yehova kuti munthu wacire mwauzimu. Munkhwala ukusuzga pakumira kweni ukucizga. Nkhapulikira ulongozgi wa mu malemba, ndipo nkhacira mwauzimu.” Vyaka vinandi vyajumphapo sono, ndipo Anne wakuteŵeteraso Yehova na njuŵi yiwemi.

18. Kasi tikwenera kuŵikapo mtima kuti ticite vici?

¹⁸ Ni mwaŵi ukuru comene kuŵa ŵamoyo mu mazuŵa ghaumaliro agha na kuŵa mu gulu lakukondweska la Yehova. Tiyeni tiŵikepo mtima kuti tileke kuwutolera maseŵera mwaŵi uwo tili nawo. M’malo mwake, nga ni mbumba yimoza tiyeni tose tifwilirepo kuti tizenge ku maungano nyengo zose kuti tisope lumoza na mpingo withu. Tiyeni tose tifwilirepo kupenja ŵanthu awo ŵakukhumba kumanya unenesko mu cigaŵa cithu, ndiposo tizirwiskenge cakurya cauzimu ico tikupokera. Kweniso tiyeni tilutilire kukhozgera awo ŵakulongozga ndipo ticitenge vinthu mwakuyana na uthenga uwo tikupharazga. Usange ticitenge nthena, tilutilirenge kwenda na gulu la Yehova, kweniso tivukenge yayi pakucita ico nchiwemi.