1, 2. ¿Kʼuxi xuʼ jpat mas koʼontontik ta s-organisasion Jeova kʼalal ta jnopbetik lek skʼoplale?

 TOJ labal sba ti oyutik ta jun organisasion ti mas mukʼ ta sjunul vinajelbalumile. Li kʼusi akʼbat yilik yuʼun Dios ti te ta jtatik ta Ezequiel kapitulo 1 xchiʼuk ta Daniel kapitulo 7, te chkiltik ti kʼuyelan tsbeiltasvan Jeova sventa lek stsuts li kʼusitik ta s-organisasione. Li jvokʼ s-organisasion Dios ta Balumile jaʼ tsbeiltas Jesús, tskʼel ti jaʼuk noʼox batem ta yoʼonton xcholel li lekil aʼyeje, sventa xchabi ta mantal li jcholmantaletike xchiʼuk ti x-epaj batel li buchʼutik chichʼik ta mukʼ Jeovae. ¡Jaʼ yuʼun xuʼ jpat lek koʼontontik ta stojolal li s-organisasion Jeovae! (Mat. 24:45.)

² Vaʼun chaʼa, ¿mi jmoj chijxanav batel xchiʼuk li organisasion ti yan sba yutsile? ¿Mi yakal van ch-epaj o yantik van xjutukaj kuʼuntik skʼupinel li mantale? Kʼalal ta jnopbetik skʼoplal li kʼusitik la jakʼtike xuʼ van te xkakʼtik venta ti yantik xa xijlubtsaj o ti mu xa jechuk chkakʼbetik yipal kʼuchaʼal voʼnee. Ta melel, xuʼ me jech jnuptan jkotoltik. Li ta baʼyel sigloe, la stijbe yoʼonton yermanotak sventa jaʼ akʼo xchanbeik stalelal Jesús li jtakbol Pabloe. Xi laj yalbe batele: Sventa «mu xlaj stsatsal avoʼntonic ec li voʼoxuque, jech mu xchibaj avoʼntonic» (Heb. 12:3). Jech kʼuchaʼal li xchanobil echʼe, ti te la jchantik ti ep kʼusi yakal tspas li s-organisasion Jeovae, laj yakʼ mas ta koʼontontik skʼupinel li mantale xchiʼuk ti xkuchuk batel kuʼuntike.

3. ¿Kʼusi skʼan jpastik sventa mu xijlubtsaj, xchiʼuk kʼusi ta jkʼelbetik skʼoplal li ta xchanobil liʼe?

³ Pe laj yal Pablo ti oy to kʼusi skʼan jpastik sventa mu xijlubtsaje: skʼan xkakʼbetik yipal «ta spasel li cʼusitic leque» (Gál. 6:9). Jaʼ yuʼun, skʼan xij-abtej jkotoltik. Jkʼeltik batel voʼtos smelolal ti tskoltautik sventa tukʼ-o xkakʼ jbatike xchiʼuk ti jmojuk xijxanav batel xchiʼuk li s-organisasione. Taje jaʼ tskoltautik sventa xkakʼtik venta mi oy kʼusi skʼan jlekubtas ta jtalelaltik o ta stalelal kutsʼ kalaltik.

4. ¿Kʼuxi chakʼ ta ilel ti toj tsots skʼoplal li tsobajeletik sventa xkichʼtik ta mukʼ li Jeovae?

⁴ Jtos li kʼusi mas onoʼox tsots skʼoplal chaʼiik li stestigotak Jeovae jaʼ li tsobajeletike. Li ta vinajele oy bakʼintik ta xichʼik albel ti akʼo xbatik ta stojolal li Dios li kuxlejaletik ti mu xvinaj ta kʼelele (1 Rey. 22:19; Job 1:6; 2:1; Dan. 7:10). Li ta voʼneal Israele, li jteklume tstsob sbaik sventa chchanik xchiʼuk chaʼiik mantal (Deut. 31:10-12). Li judioetik ta baʼyel sigloe nopem xaʼiik chbatik ta nail tsobobbailetik sventa chchanik li Skʼop Diose (Luc. 4:16; Hech. 15:21). Kʼalal oy xaʼox li tsobobbail yuʼun yajtsʼaklom Cristoe jech-o toj tsots skʼoplal laj yilik li tsobajeletike. Li avi eke, toj tsots skʼoplal chichʼ ilel sventa xkichʼtik ta mukʼ li Jeovae. Li melel yajtsʼaklomutik Cristoe ta jtsob jbatik sventa «coʼol acʼo cʼuxubinvancutic xchiʼuc [ti] coʼol acʼo jpastic cʼusitic [leke]». Skʼan «jtsatsubtasbe jba coʼntontic, acʼo cacʼtic persa, yuʼun poʼot xa» li skʼakʼalil Jeovae (Heb. 10:24, 25).

5. ¿Kʼuxi xuʼ jpatbe jba koʼontontik li ta tsobajeletike?

⁵ Jtos ti kʼuxi xuʼ jpatbe jba koʼontontik ta jujuntale jaʼ ti xkakʼ jloʼiltik li ta tsobajeletike. Jech kʼuchaʼal liʼe, xuʼ xkakʼtik ta ilel xchʼunel koʼontontik kʼalal ta jtakʼtik li kʼusitik tsjakʼike, ti kʼuxi xuʼ xkakʼ ta jkuxlejaltik junuk teksto ta Vivlia o chkaltik sloʼil xkuxlejal junuk ermano ti bu chakʼ ta ilel ti oy sbalil mi laj kakʼ ta jkuxlejaltik li beiltaseletik ta Vivliae (Sal. 22:22; 40:9). Melel onoʼox ti mu ventauk sjayibal xa jabil chijkʼot li ta tsobajeletike, li sloʼil ermanoetik ti ta sjunul yoʼonton chakʼike toj ep tspat koʼontontik akʼo mi kerem tsebetik o mol meʼelik xa.

6. ¿Kʼuxi tskoltautik li jtsobajeltik sventa lekuk noʼox oyutik ta mantale?

⁶ ¿Kʼusi yan srasonal oy yuʼun Jeova ti mu xlub ta yalel ti skʼan xijbat skotol velta li ta tsobajeletike? Li tsobajeletik xchiʼuk li mukʼta tsobajeletike, jaʼ chakʼ stsatsal koʼontontik ta cholmantal, ti stsʼik kuʼuntik kontrainele xchiʼuk ti xkuch kuʼuntik kʼalal mu skʼan xaʼiik mantal li krixchanoetike (Hech. 4:23, 31). Jech noxtok, kʼalal ta jchanbetik skʼoplal li kʼusi chal Vivliae jaʼ me tstsatsubtas li xchʼunel koʼontontike (Hech. 15:32; Rom. 1:11, 12). Li chanubtasel chkichʼtik xchiʼuk ti jmoj ta jpatbe jba koʼontontik li ta tsobajeletike jaʼ chakʼ muyubajel ta melel xchiʼuk chakʼ jun oʼontonal «ti cʼalal yorail chtal vocole» (Sal. 94:12, 13). Li Komite sventa Chanubtasel yuʼun li Jtsop Jbeiltasvaneje jaʼ tskʼel ti lekuk xichʼ chapanel li veʼlil ta mantal sventa li steklumal Jeova ta spʼejel Balumile. ¡Toj echʼ noʼox ta jtojtik ta vokol ti chkichʼtik chanubtasel jujun xemana li ta tsobajeletik ta sjunul jabile!

7, 8. 1) ¿Kʼusi ti mas tsots skʼoplal kʼalal chijbat li ta jtsobajeltike? 2) ¿Kʼuxi tskoltaot ta mantal li tsobajeletike?

⁷ Pe oy to kʼusi mas tsots skʼoplal ta sventa li jtsobajeltike, ti maʼuk noʼox ti ta jtabetik sbalile, yuʼun li kʼusi mas tsots skʼoplale jaʼ ti xkichʼtik ta mukʼ li Jeovae (kʼelo Salmo 95:6). ¡Jaʼ jun mukʼta matanal ti chkichʼtik ta mukʼ li Diose! (Col. 3:16.) Li Jeovae sta-o ti jech-o xkichʼtik ta mukʼe, taje jaʼ jech ta jpastik kʼalal chijkʼot xchiʼuk chkal jloʼiltik li ta tsobajeletike (Apoc. 4:11). Jaʼ yuʼun mu labaluk sba ti chalbutik Jeova ti «mu me xijpaj ti ta jtsobilan jbatic ta yaʼyel scʼop Diose. Mu me jchantic jech chac cʼu chaʼal ti oy jayibuc nopen xa xaʼyic jeche» (Heb. 10:25).

⁸ ¿Mi xkaʼibetik smelolal ti jaʼ tskoltautik tsobajeletik li yajtsʼaklomutik Cristo sventa xkuch kuʼuntik jaʼ to mi laj yakʼbe slajeb chopol balumil li Jeovae? Mi jech ta jpastike, ta me xkakʼtik venta ti jaʼ jtos li «más tsots scʼopilal» li jtsobajeltike xchiʼuk ta me jpastik persa ta jchʼakbetik yorail akʼo mi ep kʼusitik skʼan pasel ta jkuxlejaltik (Filip. 1:10, Jaʼ ti Achʼ Testamentoe, ta skʼop Huixtán). Jaʼ noʼox me mi oy kʼusi toj tsots kʼot ta pasel ta jkuxlejaltike xuʼ smakutik sventa mu jmojuk xkichʼtik ta mukʼ Jeova xchiʼuk li kermanotaktike.

9. ¿Kʼuxi jnaʼtik ti toj tsots skʼoplal li cholmantale?

⁹ Kʼalal chkakʼtik persa xcholel li mantale, tskoltautik xtok sventa jmojuk xijxanav batel xchiʼuk li s-organisasion Jeovae. Li abtel taje jaʼ la slikes Jesús kʼalal ay ta Balumile (Mat. 28:19, 20). Jaʼ yuʼun, jaʼ te lik talel li kʼusi mas onoʼox tsots skʼoplal li ta s-organisasion Jeovae, ti jcholbetik skʼoplal li Ajvalilal yuʼun Diose xchiʼuk ti jpastik ta yajtsʼaklom Cristo li krixchanoetike. Oy ep loʼiletik ta jkʼakʼaliltik ti chakʼ ta ilel ti tskoltautik li anjeletike xchiʼuk ti tsbeiltasutik sventa jtatik «li bochʼotic scʼoplal onoʼox chcuxiic sbatel osile» (Hech. 13:48; Apoc. 14:6, 7). Li jvokʼ s-organisasion Jeova ta Balumile yakʼoj ta yoʼonton spasel li abtelal ti toj tsots skʼoplale. ¿Mi jech toj tsots skʼoplal chavil li cholmantal eke?

10. 1) Albo junuk skʼelobil ti kʼuxi xuʼ jkʼupintik-o li mantale. 2) ¿Kʼuxi skoltaojot li cholmantal sventa mu xalubtsaje?

¹⁰ Ti ta sjunul koʼontontik ta jcholtik mantale jaʼ tskoltautik sventa jkʼupintik-o li kʼusitik melele. Kalbetik skʼoplal li kʼusi laj yal jun mol ta tsobobbail, ti ep xa sjabilal chtun ta prekursor regular ti Mitchel sbie, xi laj yale: «Toj echʼ noʼox lek chkaʼi ta xcholbel mantal li krixchanoetike. Ta jnopbe skʼoplal junuk achʼ mantal li ta revista ¡Despertad! o Li Jkʼel osil ta toyole, vaʼun toj labal sba chkil li pʼijilal, ti lek nopbil xchiʼuk ti ta smelolal noʼox kʼuxi chal li mantaletike. Ta jkʼan chibat ta cholmantal sventa jkʼel kʼuyelan chaʼiik li krixchanoetike xchiʼuk ti oyuk kʼuxi xuʼ jtijbe yoʼontonike. Jaʼ chakʼ ti junuk  noʼox koʼonton ta jkuxlejal li cholmantale. Ta onoʼox jchʼakbe yorail li cholmantale, jaʼ yuʼun mi oy kʼusi yan skʼan jpase jaʼ to ta jpas ta tsʼakal o mi moʼoje jaʼ baʼyel ta jpas». Jech oxal, kʼalal jaʼ batem ta koʼontontik spasel li chʼul abtelale tskoltautik xtok sventa tukʼ-o xkakʼ jbatik li ta slajebal kʼakʼal liʼe (kʼelo 1 Corintios 15:58).

11. ¿Kʼu yuʼun skʼan jtabetik lek sbalil li veʼlil ta mantal chakʼbutik Jeovae?

¹¹ Sventa lek tsotsukutik ta mantale, toj ep yakʼoj jveʼeltik ta mantal li Jeovae, yuʼun ep ta tos vunetik yakʼojbutik. Ta melel, xvul ta joltik ti oy xi kalojtik kʼalal la jkʼeltik junuk mantal li ta jvuntike: «¡Jaʼ li kʼusi chtun onoʼox tajek kuʼune! ¡Jaʼ laj yakʼ ta tsʼibael stuk Jeova yaʼeluk sventa tskoltaun!». Taje mu labaluk sba, yuʼun jaʼ chchanubtasutik xchiʼuk tsbeiltasutik Jeova ta sventa li jvuntike. Xi onoʼox yalojbutik ta melele: «Vuʼun ta jbijubtasot; vuʼun ta jchanubtasot lec. Ta xcacʼbot lec avil bu beal tscʼan chabat» (Sal. 32:8). ¿Mi chkakʼbetik yipal sventa jtabetik lek sbalil li veʼlil ta mantal chkichʼtike? ¿Mi ta jnopbetik lek skʼoplal? Mi jech ta jpastike, ta me xij-abtej-o batel li ta slajebal kʼakʼal liʼe xchiʼuk muʼyuk me chkʼunib li xchʼunel koʼontontike (kʼelo Salmo 1:1-3; 35:28; 119:97).

12. ¿Kʼusi tskoltautik sventa oyuk-o sbalil xkiltik li veʼlil ta mantale?

¹² Toj lek me ti jnopbetik skʼoplal ti kʼu to yepal abtel yichʼoj spasilanel li veʼlil ta mantal ti toj leke. Li Komite sventa Stsʼibael vunetik li ta Jtsop Jbeiltasvaneje jaʼ oy ta sba skʼelel ti kʼuyelan chichʼ sabel smelolal, tsʼibael, chichʼ kʼelel mi lek o mi moʼoj, akʼbel slokʼoltak, sjelubtasel ta yan kʼopetik, spasel imprimir xchiʼuk ti chichʼ akʼel ta Internete. Vaʼun li jujun Betel ti tspasik vunetike tstakik batel ta skotol tsobobbailetik, akʼo mi nopol o mi nom. ¿Kʼu yuʼun chichʼ pasel skotol li abtelal taje? Jaʼ sventa oyuk lek sveʼel ta mantal li steklumal Jeovae (Is. 65:13). Jaʼ yuʼun chaʼa, jtabetik me lek sbalil li veʼlil ta mantal chakʼbutike (Sal. 119:27).

13, 14. ¿Buchʼutik yakal tskolta sbaik ta vinajel sventa spasik li kʼusitik snopoj tspas Jeovae, xchiʼuk kʼuxi xuʼ jchanbetik stalelalik?

¹³ Oy kʼusi akʼbat yil yuʼun Dios li jtakbol Juane, te laj yil ti Jesuse kajal ta sakil kaʼ sventa chbat stsal li buchʼu tstoy sba ta stojolal Jeovae (Apoc. 19:11-15). ¡Ta me stsatsubtas xchʼunel koʼontontik ti jnaʼojtik ti te tijil tal tukʼil anjeletik ta spat Jesús xchiʼuk li buchʼutik tʼujbil ti likemik ta balumile, ti kuchem xa yuʼunik xchiʼuk ti te xa oyik ta vinajele! (Apoc. 2:26, 27.) ¡Toj lek ta chanbel stalelalik ti kʼuyelan chbeiltasatik yuʼun li Diose!

¹⁴ Jaʼ jech tspasik li epal krixchanoetik eke, yuʼun ta sjunul yoʼonton tskoltaik ta yabtelik li yermanotak Cristo ti tʼujbilike, ti liʼ to oyik ta balumile xchiʼuk ti jaʼ tsbeiltasik batel li s-organisasion Jeova liʼ ta Balumile (kʼelo Zacarías 8:23). ¿Kʼuxi xuʼ jkolta jbatik ta spasel ta jujuntal li kʼusitik snopoj tspas Jeovae? Jtose jaʼ ti jchʼunbetik smantal li buchʼutik tsbeiltasutike (Heb. 13:7, 17). Jaʼ yuʼun, te skʼan xlik jchʼuntik mantal li ta jtsobobbailtike. Kʼalal chkalbetik skʼoplal li moletik ta tsobobbaile, ¿mi jaʼ sventa chkakʼtik ta ichʼel ta mukʼ xchiʼuk sventa xichʼbeik ta mukʼ li yabtelike? ¿Mi chkalbe kalab jnichʼnabtik ti akʼo xichʼik ta mukʼ li tukʼil ermanoetik taje xchiʼuk ti skʼanbeik ti x-albatik mantal ta Vivliae? Jech xtok, ¿mi chkalbetik skʼoplal ta jnatik ti kʼuxi xuʼ jkolta jbatik ta takʼin ta sventa li cholmantal ta spʼejel Balumile? (Prov. 3:9; 1 Cor. 16:2; 2 Cor. 8:12.) ¿Mi tsots skʼoplal chkaʼitik skʼelel li Salon sventa Tsobobbaile? Yuʼun lek me ch-abtej xchʼul espiritu Jeova kʼalal chkichʼ jbatik ta mukʼe xchiʼuk kʼalal jmoj oyutike. Li chʼul espiritu taje tskoltautik onoʼox sventa mu xijlubtsaj li ta slajebal kʼakʼal liʼe (Is. 40:29-31).

15. ¿Kʼu yuʼun skʼan mu jkuxtik jlikeluk sventa jech chijkuxi kʼuchaʼal chal smantal Jeovae?

¹⁵ Ta slajebale, skʼan me jpastik li kʼusi chkaltik ta cholmantal sventa xkuch kuʼuntik xchiʼuk sventa jmoj xijxanav batel xchiʼuk li s-organisasion Jeovae. Sventa jeche, skʼan me jpastik «li cʼusitic lec chil Cajvaltique» (Efes. 5:10, 11). Solel muʼyuk bu ta jkuxtik jlikeluk ta skoj li kʼusitik chopole, yuʼun muʼyuk jtukʼiltik, ep kʼusitik tspasbutik li Satanase xchiʼuk li chopol balumil liʼe. Li voʼoxuke kuni ermanotak, oy buchʼutik ti tsots chavakʼbeik yipal skotol kʼakʼale, yuʼun chakʼan ti lekuk xavil abaik xchiʼuk li Jeovae. Jech oxal skʼanojoxuk tajek. ¡Mu me xalubtsajik! Kʼalal jech chijkuxi kʼuchaʼal chal smantal li Jeovae, batsʼi solel jun koʼontontik xchiʼuk jpʼel ta koʼontontik ti oy lek sbalil ti chkichʼtik ta mukʼe (1 Cor. 9:24-27).

16, 17. 1) ¿Kʼusi skʼan jpastik mi oy bu toj tsots la jpas jmultike? 2) ¿Kʼusi chakʼ jchantik li kʼusi la snuptan Anne?

¹⁶ Pe ¿kʼusi skʼan jpastik mi oy bu toj tsots la jpas jmultike? Skʼan jsaʼtik koltael ta anil. Kʼajomal noʼox me chakʼ mas jvokoltik mi ta jmuk li jmultike. Jaʼ jech kʼuchaʼal laj yal David kʼalal la smuk li smule: «Cʼalal muʼyuc caloj ta jamal jmule, yantic noʼox chiʼalub batel laj caʼay, jaʼ ta scoj ti puru oqʼuel, ti puru jicʼ oʼnton ta jpase» (Sal. 32:3). Chopol me chaʼi sba kʼalal ta smuk smul li jun krixchanoe xchiʼuk ta me xlubtsaj-o ta mantal, yan «li bochʼo jamal chal, xchiʼuc me tscomtsane, chʼaybil chcʼot smul» (Prov. 28:13).

¹⁷ Nopbo skʼoplal avaʼi li kʼusi la snuptan Anne, * ti tun ta prekursora regular kʼalal chex toʼoxe. Chaʼtos kʼusi lik spas ta xkuxlejal, jaʼ yuʼun toj chopol kʼusitik la snuptan. Xi chal kaʼitike: «Chopol to jutuk chaʼi li jol koʼontone. Batsʼi solel chkat koʼonton xchiʼuk chi-ipaj-o xa laj kaʼi». ¿Kʼusi la spas un? Laj yaʼi ta jun tsobajel ti laj yalbeik skʼoplal li Santiago 5:14, 15, te laj yakʼ venta ti skʼan koltaele, jaʼ yuʼun bat skʼopon li moletik ta tsobobbaile. Xi chal kaʼitike: «Jaʼ poxil yakʼoj stuk Jeova li kʼusi chal versikuloetik taje, yuʼun jaʼ ta jtam-o jbatik likel yuʼun ta mantal. Mu kʼunuk ta bikʼel li poxil taje, pe chpoxtavan. La jpas li kʼusi chal li teksto taje, vaʼun lilekub yuʼun». Echʼ xa jayibuk jabil, li avi une jun xa yoʼonton chtun ta stojolal Jeova li Anne xchiʼuk lek xa li sjol yoʼontone.

18. ¿Kʼusi skʼan jpʼel ta koʼontontik spasel?

¹⁸ ¡Jaʼ jun mukʼta matanal ti kuxulutik ta slajebal kʼakʼale xchiʼuk ti te oyutik li ta s-organisasion Jeova ti toj labal xa noʼox sbae! Jtsaktik me lek ta mukʼ skotol kʼakʼal. Jech oxal, jmoj me jkolta jbatik xchiʼuk kutsʼ kalaltik sventa mu xkikta jbatik li ta tsobajeletike, ti jsaʼtik batel li krixchanoetik bu ta jcholtik mantale xchiʼuk ti jtabetik lek sbalil skotol li veʼlil ta mantal chkichʼtike. Jech xtok, jchʼunbetik me smantalik li buchʼutik tsbeiltasutike xchiʼuk jpastik me li kʼusi chkaltik ta cholmantale. Mi jech ta jpastike, maʼuk noʼox me jmoj chijxanav batel xchiʼuk li s-organisasion Jeovae, yuʼun muʼyuk me chijlubtsaj xtok ta spasel li kʼusitik leke.