1, 2. U ḓivha nga ha ndangulo ya Yehova ya fhethu hoṱhe zwi ita uri ri fulufhele mini nga ho khwaṱhaho?

ZWI a ri takadza vhukuma u ḓivha uri ri tshipiḓa tsha ndangulo ya fhethu hoṱhe. Mabono a re kha Hesekiele ndima ya u thoma na kha Daniele ndima ya vhusumbe a ri sumbedza zwavhuḓi uri Yehova u khou shuma u itela u ḓadzisa ndivho yawe. Yesu u khou ranga phanḓa kha u livhisa tshipiḓa tshi re kha ḽifhasi tsha ndangulo ya Yehova uri i livhise ṱhogomelo kha u huwelela mafhungo maḓifha, na u ṱhogomela nga lwa muya vhane vha khou ita wonoyu mushumo, na u ita uri vhurabeli ha ngoho ha Yehova vhu bvele phanḓa. Zwenezwi zwi ita uri ri fulufhele nga ho khwaṱhaho ndangulo ya Yehova.—Mat. 24:45.

² Naa ri khou tshimbidzana na yeneyi ndangulo i mangadzaho? Naa u fhisetshela hashu ngoho hu khou bvela phanḓa, kana hu khou fhungudzea? Musi ri tshi haseledza dzenedzi mbudziso, ri nga kha ḓi ṱhogomela uri ro neta kana uri a ri tsha fhisea. Zwi nga itea. Ḓanani ḽa u thoma ḽa miṅwaha, muapostola Paulo o ṱuṱuwedza Vhakriste ngae uri vha edzise tsumbo ya u fhisea ya Yesu. Paulo o amba uri zwenezwo zwi ḓo vha thusa uri vha “si nete na u kulea nungo.” (Vha-Heb. 12:3) Nga hu fanaho, u ṱolisisa nga vhuronwane zwe ra zwi guda theroni yo fhiraho, ye ya sumbedza zwine zwa khou khunyeledzwa nga ndangulo ya Yehova, zwo ri thusa uri ri dzule ri tshi fhisea na u konḓelela.

3. Ndi mini zwine zwa ṱoḓea u itela uri ri songo neta, nahone ri ḓo haseledza mini kha ino thero?

³ Naho zwo ralo, Paulo o sumbedza uri hu ḓo ṱoḓea zwinzhi u itela uri ri si nete. O amba uri ri fanela u sa “litsha u ita zwo lugaho.” (Vha-Gal. 6:9) Nga zwenezwo, ri fanela u ita vhuḓidini. Kha ri haseledze masia maṱanu a mushumo washu ane a nga ri thusa uri ri dzule ri tshi tshimbidzana na ndangulo ya Yehova. Nga murahu, ri nga dzhia phetho ya uri ndi afhio masia ane riṋe na miṱa yashu ra fanela u a ṱhogomela nga maanḓa.

4. Ndi ngani ri tshi nga amba uri u kuvhangana ndi tshipiḓa tsha ndeme tsha vhurabeli hashu?

⁴ U kuvhangana ndi kale zwi zwa ndeme kha vhashumeli vha Yehova. Zwivhumbiwa zwa muya a ri zwi vhoni, fhedzi nga zwifhinga zwo teaho zwi a rambiwa uri zwi ime phanḓa ha Yehova. (1 Dzikh. 22:19; Yobo 1:6; 2:1; Dan. 7:10) Kha Isiraele ḽa kale, lushaka lwo vha lu tshi fanela u kuvhangana u itela u ‘pfa, na u ḓifunza milayo ya Mudzimu.’ (Doit. 31:10-12) Vhayuda vha ḓanani ḽa u thoma ḽa miṅwaha vho vha vha tshi anzela u ya sinagogoni u itela u vhala Maṅwalo. (Luka 4:16; Mish. 15:21) Ndeme ya miṱangano yo ombedzelwa na musi ho no vhumbwa tshivhidzo tsha Vhukriste, nahone zwi kha ḓi vha tshipiḓa tsha ndeme tsha vhurabeli hashu. Vhakriste vha ngoho vha a ‘ṱhogomelana na u ṱuṱuwedzana lufunoni na kha mishumo mivhuya.’ Ri fanela u bvela phanḓa ri tshi ‘ṱuṱuwedzana, zwihuluhulu samusi ri tshi zwi vhona uri ḓuvha ḽi khou sendela.’—Vha-Heb. 10:24, 25.

5. Ri nga ṱuṱuwedzana hani miṱanganoni yashu?

⁵ Iṅwe nḓila ya ndeme ine ra ṱuṱuwedzana na vhaṅwe ngayo ndi nga u fhindula miṱanganoni. Ri nga bvisela khagala lutendo lwashu nga u fhindula zwo ṅwalwaho, nga u sumbedza nḓila ine luṅwalo lwa shuma ngayo, na nga u ṋea tshenzhelo pfufhi ine ya sumbedza ndeme ya u tevhedza maitele a Bivhili, kana nga dziṅwe nḓila. (Ps. 22:22; 40:9) Zwi tou vha khagala uri no no zwi ṱhogomela uri hu sa londwi uri no no fhedza miṅwaha minzhi lungafhani ni tshi ya miṱanganoni ya Vhukriste, zwi kha ḓi ni ṱuṱuwedza u thetshelesa phindulo dzi bvaho mbiluni dza vhahashu vha tshinnani na vha tshisadzini, vhahulwane na vhaṱuku.

6. Miṱangano yashu i ri thusa hani uri ri dzule ro fhaṱuwa muyani?

⁶ Hu na zwifhio zwiṅwe zwiitisi zwa uri Mudzimu a dzhie u kuvhangana hashu tshifhinga tshoṱhe zwi zwa ndeme? Miṱangano yashu, maguvhangano, na mabuthano a ri thusa uri ri vhe na tshivhindi musi ri tshi amba, na uri ri kone u sedzana na milingo musi ri tshi pikiswa, kana hu na vhane vha vhenga mulaedza washu. (Mish. 4:23, 31) Ri a khwaṱhiswa lutendoni nga khaseledzo dza Maṅwalo. (Mish. 15:32; Vha-Roma 1:11, 12) Zwine ra zwi funzwa na nḓila ine ra ṱuṱuwedzana ngayo miṱanganoni yashu ya vhurabeli, i ri thusa uri ri tshenzhele dakalo ḽa vhukuma na u ri a ri ‘lamulele musi zwo vhifhá.’ (Ps. 94:12, 13) Komiti ya u Funza ya Tshigwada tshi Langaho i lavhelesa u lugiselelwa ha zwiḽiwa zwoṱhe zwa muya u itela u funza vhathu vha Yehova ḽifhasini ḽoṱhe. Ri livhuha vhukuma ndugiselelo dzenedzo dza uri ri ḓiphine nga zwiḽiwa zwa muya zwi fushaho miṱanganoni ya vhege iṅwe na iṅwe.

7, 8. (a) Ndi ifhio ndeme ya miṱangano yashu ya tshivhidzo? (b) Miṱangano i ni thusa hani nga lwa muya?

⁷ Naho zwo ralo, nga nnḓa ha nḓila ine ra vhuyelwa ngayo riṋe vhaṋe, hu dovha ha vha na tshiṅwe tshithu tsha ndeme tshine ra tshi wana miṱanganoni. Ndivho ya ndeme ya u kuvhangana hashu ndi u gwadamela Yehova. (Vhalani Psalme ya 95:6.) Ndi ndugelo yavhuḓi lungafhani u renda Mudzimu washu wavhuḓi! (Vha-Kol. 3:16) Zwo tea uri ri gwadamele Yehova tshifhinga tshoṱhe nga u vha hone na u ṱanganela maguvhanganoni ashu a lwa muya. (Nzumb. 4:11) Ndi ngazwo ri tshi dzulela u ṱuṱuwedzwa uri ri songo “litsha u kuvhangana nga tshashu, samusi vhaṅwe vho ḓowela u ita nga u ralo.”—Vha-Heb. 10:25.

⁸ Naa ri dzhia miṱangano yashu ya tshivhidzo sa ndugiselelo ine ya ri thusa u konḓelela u swika musi Yehova a tshi dzhia vhukando ha u fhelisa ano maitele mavhi a zwithu? Arali zwo ralo, ri ḓo dzhia miṱangano yashu sa “zwithu zwa ndeme vhukuma” zwine ra tea u zwi ṱhogomela, nahone ri ḓo ḓiṋea tshifhinga tsha uri naho ro farakanea ri ye khayo. (Vha-Fil. 1:10) Hu fanela u vha na tshiitisi tshi pfalaho vhukuma tsha u sa vha hone miṱanganoni yashu u itela u gwadamela Yehova nga vhuthihi na vhahashu.

9. Ri zwi ḓivha hani uri mushumo wa u huwelela ndi wa ndeme?

⁹ U ṱanganela nga vhuḓalo kha mushumo washu wa u huwelela zwi dovha zwa ri thusa u dzula ri tshi khou tshimbidzana na ndangulo ya Yehova. Yesu o thoma wonoyo mushumo musi e fhano kha ḽifhasi. (Mat. 28:19, 20) U bva tsheetsho, mushumo wa u huwelela nga ha Muvhuso na u ita vhafunziwa wo vha wone wa ndeme une ndangulo yoṱhe ya Yehova ya livhisa ṱhogomelo khawo. Tshenzhelo nnzhi dza musalauno dzi ṋea vhuṱanzi ha uri vharuṅwa vha khou tikedza mushumo washu na u ri livhisa kha vha re “na mavhonele o teaho uri vha wane vhutshilo vhu sa fheli.” (Mish. 13:48; Nzumb. 14:6, 7) Tshipiḓa tsha kha ḽifhasi tsha ndangulo ya Yehova tshi hone ṋamusi u itela u tikedza wonoyu mushumo wa ndeme vhukuma. Naa vhutshiloni hashu ro livhisa ṱhogomelo vhuḓinḓani?

10. (a) Ṋeani tsumbo ya zwine zwa nga ri thusa uri ri dzule ri na mafulufulu ngohoni? (b) Vhuḓinḓa ho ni thusa hani uri ni songo neta?

¹⁰ U fhisetshela vhuḓinḓa zwi ri thusa u dzula ri na mafulufulu ngohoni. Ṱhogomelani zwe zwa ambiwa nga Mitchel, muhulwane a re muvulanḓila wa tshifhinga tshoṱhe o no fhedzaho tshifhinga tshilapfu. O ri: “Ndi funa u vhudza vhathu ngoho. Ndi humbula nga ha thero ntswa i re kha Tshiingamo kana Awake! nda takalela vhukuma vhuṱali, luvhonela, na u linganyisela ho teaho kha khandiso iṅwe na iṅwe. Ndi mbo ḓi ṱoḓa u ya vhuḓinḓani u itela u vhona nḓila ine vhathu vha ḓo aravha ngayo, na nḓila ine nda nga vusa ngayo dzangalelo ḽavho. Vhuḓinḓa hanga vhu ita uri  ndi dzule ndo dzika. Ndi ita vhungoho ha uri a hu na tshithu tshine tsha nga thithisa tshifhinga tshe nda tshi vhetshela thungo u itela vhuḓinḓa hanga.” Nga hu fanaho, u dzula ro farakanea tshumeloni yashu khethwa zwi nga ri thusa uri ri bvele phanḓa ro khwaṱha kha ano maḓuvha a vhufhelo.—Vhalani 1 Vha-Korinta 15:58.

11. Ndi ngani ri tshi fanela u lwela u ḽa zwiḽiwa zwoṱhe zwa muya zwine ra zwi ṋewa nga Yehova?

¹¹ Yehova o ri ṋea zwiḽiwa zwinzhi zwa muya zwo gandiswaho zwine zwa ri ṋea maanḓa. A zwi timatimisi uri ni nga humbula nga ha khandiso ye musi no no i vhala na ri, ‘Hezwi ndi zwone zwine nda zwi ṱoḓa! Zwi nga Yehova o tou zwi ṅwalela nṋe!’ Zwenezwo a zwi sokou itea. Nga dzenedzi ndugiselelo, Yehova u a ri livhisa na u ri tsireledza. O ri: “Ndi ḓo U funza nda U sumbedza nḓila iné wa pfi U i fare.” (Ps. 32:8) Naa ri a lwela u ḽa zwiḽiwa zwoṱhe zwa muya zwine ra zwi ṋewa, ra dovha ra elekanya nga hazwo? U ita nga u ralo zwi ḓo ri thusa uri ri bvele phanḓa ri tshi aṋwa mitshelo yavhuḓi na u ita uri ri si fe nga lwa muya kha ano maḓuvha a vhufhelo a konḓaho.—Vhalani Psalme ya 1:1-3; 35:28; 119:97.

12. Ndi mini zwine zwa nga ri thusa uri ri si dzhiele fhasi ndugiselelo dzashu dza lwa muya?

¹² Ndi zwavhuḓi uri ri ṱhogomele uri ndi mini zwine zwa katelwa musi hu tshi lugiselelwa zwenezwi zwiḽiwa zwa lwa muya zwi fushaho tshifhinga tshoṱhe. Komiti ya Vhuṅwaleli ya Tshigwada tshi Langaho i na vhuḓifhinduleli ha u lavhelesa ṱhoḓisiso ine ya itwa, u ṅwaliwa, u vhalulula zwo ṱalutshedzelwaho, zwifanyiso zwine zwa shumiswa, na u ṱalutshedzela khandiso dzine dza gandiswa na dzine dza wanala kha Inthanethe. Madavhi ane a gandisa khandiso dzenedzo a dzi rumela zwivhidzoni zwi re tsini na zwi re mashangoni a kule. Ndi ngani hu tshi itwa wonoyo mushumo woṱhe? U itela uri vhathu vha Yehova vha ṋewe zwiḽiwa zwa muya zwo eḓanaho. (Yes. 65:13) Ungari ri nga ḓiimisela u ḽa zwiḽiwa zwoṱhe zwine ndandulo ya Yehova ya ri ṋea zwone.—Ps. 119:27.

13, 14. Ndi vhafhio vhane vha khou tikedza zwe Yehova a zwi dzudzanya ngei ṱaḓulu, nahone ri nga sumbedza hani thikhedzo i fanaho kha ḽifhasi?

¹³ Kha bono ḽe ḽa ṋewa muapostola Yohane, hu vhonala Yesu o ṋamela bere tshena a tshi khou ya u lwa na vhe vha shandukela Yehova. (Nzumb. 19:11-15) Zwi a khwaṱhisa lutendo u ḓivha uri Yesu u tikedzwa nga vharuṅwa vha fulufhedzeaho nahone u na vhaḓodzwa vhe vha kunda kha ḽifhasi, vho no wanaho malamba avho ngei ṱaḓulu! (Nzumb. 2:26, 27) Vho ri vhetshela tsumbo i swayeaho vhukuma ya u tikedza ndugiselelo dza Yehova!

¹⁴ Nga hu fanaho, vha gogo ḽihulu vha tikedza nga vhuḓalo mushumo wa vharathu vha Kristo vho ḓodzwaho vhane vha kha ḓi vha kha ḽifhasi, na vha re na vhuḓifhinduleli ha u ranga phanḓa ndangulo ṋamusi. (Vhalani Sakaria 8:23.) Muṅwe na muṅwe washu a nga sumbedza hani uri u tikedza ndugiselelo dza Yehova? Iṅwe nḓila ndi nga u ḓiṱukufhadzela vhane vha khou ranga phanḓa. (Vha-Heb. 13:7, 17) Zwenezwi zwi fanela u thoma ngomu tshivhidzoni tshashu. Naa zwine ra zwi amba nga ha vhahulwane zwi a sumbedza uri ri a vha ṱhonifha, u katela na mushumo wavho wa u lavhelesa? Naa ri a ṱuṱuwedza vhana vhashu uri vha ṱhonifhe vhenevha vhanna vha fulufhedzeaho, na uri musi vha tshi ṱoḓa nyeletshedzo i bvaho Maṅwaloni vha ye khavho? Zwiṅwe hafhu, naa ri a haseledza sa muṱa nḓila ine ra shumisa ngayo tshelede yashu u itela u tikedza mushumo wa shango ḽoṱhe nga u ṋeela? (Mir. 3:9; 1 Vha-Kor. 16:2; 2 Vha-Kor. 8:12) Naa ri zwi dzhia sa ndugelo u ṱanganela kha u ṱhogomela na u kunakisa Holo ya Muvhuso? Muya wa Yehova u shuma zwavhuḓi fhethu hu re na ṱhonifho na vhuthihi. Wonoyo muya u bvela phanḓa u tshi ri thusa uri ri si nete kha ano maḓuvha a vhufhelo.—Yes. 40:29-31.

15. Ndi ngani ri tshi fanela u lwela u tshila u tendelana na ndivho dza Yehova khulwane?

¹⁵ U itela u konḓelela na u dzula ndanguloni ya Yehova, vhutshilo hashu vhu fanela u tendelana na mulaedza une ra u ḓivhadza nga u “ita vhungoho ha uri ndi zwifhio zwine Murena a zwi ṱanganedza.” (Vha-Ef. 5:10, 11) Nga ṅwambo wa u sa fhelela hashu, vhuḓidini ha Sathane na ḽino shango ḽivhi, ri dzula ri tshi khou lwisana na ṱhuṱhuwedzo mmbi. Vhaṅwe vhahashu vha tshinnani na vha tshisadzini vha funwaho vha khou lwa ḓuvha ḽiṅwe na ḽiṅwe u itela u dzula vhe na vhushaka havhuḓi na Yehova. Zwenezwo zwi ita uri a ni fune nga maanḓa. Ni songo neta! Musi ri tshi tshila u tendelana na ndivho dza Yehova, ri ḓo fushea, nahone ri ḓo vha na khwaṱhisedzo ya uri vhushaka hashu nae a si ha fhedzi.—1 Vha-Kor. 9:24-27.

16, 17. (a) Ndi mini zwine ra fanela u zwi ita arali ro ita tshivhi tshihulwane? (b) Ri nga vhuyelwa hani nga u ṱhogomela tsumbo ya Anne?

¹⁶ Nga zwenezwo, ndi mini zwine ra fanela u zwi ita musi ro ita tshivhi tshihulwane? Ri fanela u wana thuso nga u ṱavhanya. U dzumba vhukhakhi zwi ḓo ita uri mafhungo a ṋaṋe. Humbulani uri Davida o ri musi a tshi dzumba vhuvhi hawe, ‘miraḓo yawe o pfa yó tou sina nga u ḽa mbilu ḓuvha ḽoṱhe.’ (Ps. 32:3) Vhukuma, u dzumba vhuvhi zwi ḓo ita uri ri nete kha maḓipfele na muyani, fhedzi “hu hangwelwa ane a zwi bula a zwi laṱa.”—Mir. 28:13.

¹⁷ Ṱhogomelani tsumbo ya Anne. * Musi Anne a tshi kha ḓi vha miṅwahani yawe ya u fhedza ya vhufumi, o shuma sa muvulanḓila wa tshifhinga tsho ḓalaho. Naho zwo ralo, o mbo ḓi thoma u tshila vhutshilo vhu re kavhili. Zwenezwo zwo mu vhaisa vhukuma. O ri: “Ndo vha ndi na luvalo lu re na mulandu. Ndo vha ndi songo takala nahone ndo tsikeledzea tshifhinga tshoṱhe.” O ita mini? O amba uri nga ḽiṅwe ḓuvha musi e muṱanganoni, ho haseledzwa Yakobo 5:14, 15. Anne o ṱhogomela uri o vha a tshi ṱoḓa thuso nahone a ya kha vhahulwane uri vha mu thuse. Musi a tshi humbula zwe zwa itea, o ri: “Maṅwalo eneo o vha a tshi tou nga luṅwalo lwo ṅwalelwaho nṋe nga Yehova u itela u nngalafha muyani. Mushonga we nda u wana wo vha u sa milei, fhedzi u a fhodza. Ndo thetshelesa yeneyo nyeletshedzo ya maṅwalo, nahone ya shuma.” Musi ho no fhela miṅwaha yo vhalaho, Anne o dovha a ḓipfa e na maanḓa a u shumela Yehova nga u fhisea e na luvalo lwo kunaho.

18. Ndi mini zwine ra fanela u ḓiimisela u zwi ita?

¹⁸ Ndi ndugelo yavhuḓi lungafhani u tshila kha enea maḓuvha a vhufhelo, na u vha tshipiḓa tsha ndangulo ya Yehova i mangadzaho! Kha ri ḓiimisele u sa dzhiela fhasi zwine ra vha nazwo. Nṱhani hazwo, kha ri shumisane roṱhe sa muṱa, ri vhe hone miṱanganoni tshifhinga tshoṱhe zwivhidzoni zwashu, ri fhisetshele u ṱoḓa vha faneleaho tsimuni yashu, na u takalela ndugiselelo ya zwiḽiwa zwa muya zwine ra zwi wana tshifhinga tshoṱhe. Kha ri dovhe hafhu ri tikedze vhane vha khou ri ranga phanḓa, na u tshila u tendelana na mulaedza une ra u ḓivhadza. Arali ra ita ngauralo, ri ḓo tshimbidzana na ndangulo ya Yehova, nahone ri nga si nete musi ri tshi ita mishumo mivhuya!