1, 2. Paonan-o nadudugangan an aton pagsarig ha organisasyon ni Jehova ha bug-os nga uniberso pinaagi han pamalandong hito?

MAKARURUYAG gud hunahunaon nga bahin kita han daku hinduro nga organisasyon ha bug-os nga uniberso. An mga bisyon nga nakarekord ha Esekiel kapitulo 1 ngan Daniel kapitulo 7 matin-aw nga nagpapakita kon ano an ginbubuhat ni Jehova basi matuman an iya katuyoan. Hi Jesus an nangunguna ha tunan-on nga bahin han organisasyon ni Jehova, ngan iya ito ginigiyahan nga magpokus ha pagsangyaw han maopay nga sumat, mangnoan an espirituwalidad han mga nagbubuhat hito, ngan buligan an iba nga magin mga magsiringba ni Jehova. Nagpapagios ini ha aton nga sumarig ha organisasyon ni Jehova.—Mat. 24:45.

² Sugad nga indibiduwal, nasunod ba kita ha pagpanguna hinin makaruruyag nga organisasyon? Nadudugangan ba an aton kadasig ha kamatuoran, o naiibanan ito? Kon ginhuhunahuna naton ini nga mga pakiana, bangin masantop naton nga nagtikang na kita manluya o naibanan an aton kadasig. Mahimo ito mahitabo. Ha siyahan nga siglo, kinahanglan aghaton ni Pablo an iya mga igkasi-Kristiano nga tagdon an susbaranan ni Jesus ha pagin madasigon. Hi Pablo nagsiring nga mabulig ini ha ira nga diri “kapuyon ngan diri masubo an [ira] kasingkasing.” (Heb. 12:3) Ha pariho nga paagi, an pag-usisa hin maopay ha nahiuna nga artikulo diin iginpakita an ginhihimo han organisasyon ni Jehova sadang gud makabulig ha aton nga padayon nga magin madasigon ngan mapailubon.

3. Ano an ginkikinahanglan basi diri kita manluya, ngan ano an aton hihisgotan hini nga artikulo?

³ Kondi iginpakita ni Pablo nga labaw pa hito an ginkikinahanglan basi diri kita manluya. Hiya nagsiring nga kinahanglan magpadayon kita ha “pagbuhat han maopay.” (Gal. 6:9) Salit kinahanglan may buhaton kita. Aton hisgotan an lima nga buruhaton nga makakabulig ha aton nga magpabilin nga marig-on ngan sumunod ha pagpanguna han organisasyon ni Jehova. Katapos, kita mismo mahibabaro kon hain hito an kinahanglan pauswagon naton o han aton pamilya.

4. Kay ano nga masisiring naton nga an pagkatirok importante nga bahin han tinuod nga pagsingba?

⁴ Tikang pa hadto, an pagkatirok importante gud nga buruhaton han mga surugoon ni Jehova. Ha langit, an mga anghel gin-iimbitar nga kumadto ha atubangan ni Jehova ha angayan nga mga panahon. (1 Hadi 22:19; Job 1:6; 2:1; Dan. 7:10) Ha kadaan nga panahon, an mga Israelita ginsugo nga magkatirok basi “hira makabati, ngan basi hira makatoon.” (Deut. 31:10-12) An mga Judio ha siyahan nga siglo regular nga napakadto ha mga sinagoga basi magbasa han Kasuratan. (Luc. 4:16; Buh. 15:21) Han naestablisar an Kristiano nga kongregasyon, an pagkatirok padayon nga ginpabug-atan, ngan daku pa gihapon ito nga bahin han aton pagsingba. An tinuod nga mga Kristiano ‘naghahatag hin atensyon ha usa kag usa basi mag-inaghatay ha pagpakita hin gugma ngan mag-opay nga buhat.’ Kinahanglan padayon kita nga ‘magparig-onay ha usa kag usa, labi na nga nakikita naton nga nagtitikahirani na an adlaw’ ni Jehova.—Heb. 10:24, 25.

5. Paonan-o naton mapaparig-on an usa kag usa ha aton mga katirok?

⁵ Usa nga importante nga paagi nga mapaparig-on naton an usa kag usa amo an pagkomento ha aton mga katirok. Maipapahayag naton an aton pagtoo pinaagi ha pagbaton han nakaimprinta nga pakiana, pagkomento ha usa nga teksto, pag-unabi hin halipot nga eksperyensya nga nagpapakita han kinaadman han pagsunod ha mga prinsipyo ha Biblia, o ha iba pa nga paagi. (Sal. 22:22; 40:9) Sigurado nga mauyon ka nga bisan kon damu ka tuig ka na nga natambong ha mga katirok, makaparig-on la gihapon an pagpamati ha kinasingkasing nga mga komento han aton kabugtoan—batan-on man o lagas.

6. Paonan-o an aton mga katirok nabulig ha aton nga magpabilin nga madasigon ha pag-alagad?

⁶ Ano an iba pa nga hinungdan nga ginpapabug-atan han Dios an aton regular nga pagkatirok? An aton mga katirok, asembleya, ngan kombensyon nabulig ha aton nga magkaada kaisog nga magyakan nga waray kahadlok ngan atubangon an pagkontra o kawaray interes han mga tawo ha aton teritoryo. (Buh. 4:23, 31) Napaparig-on an aton pagtoo pinaagi han mga paghisgot han Kasuratan. (Buh. 15:32; Roma 1:11, 12) An mga pagtutdo ngan pagparig-onay nga aton nakakarawat ha mga katirok nabulig ha aton nga umabat hin tinuod nga kalipay ngan naghahatag ha aton hin ‘kapahuwayan ha mga adlaw han pagkuri.’ (Sal. 94:12, 13) An Teaching Committee han Nagmamando nga Lawas an nanginginano han pag-andam han ngatanan nga espirituwal nga programa para ha pagtutdo ha katawohan ni Jehova ha bug-os nga kalibotan. Mapasalamaton gud kita han mag-opay hinduro nga mga instruksyon nga aton nakakarawat ha aton mga katirok kada semana ha bug-os nga tuig!

7, 8. (a) Ano an nangunguna nga katuyoan han aton mga katirok? (b) Paonan-o an mga katirok nakakabulig ha imo ha espirituwal?

⁷ Kondi may mas importante pa gud kay han mga kapulsanan nga aton nakakarawat ha aton mga katirok. An nangunguna nga katuyoan han aton pagkatirok amo an pagsingba kan Jehova. (Basaha an Salmo 95:6.) Daku gud nga kadungganan nga dayawon an aton harangdon nga Dios! (Col. 3:16) Hi Jehova takos han aton regular nga pagsingba pinaagi han aton pagtambong ngan pagkomento ha mga katirok. (Pah. 4:11) Salit diri urusahon nga gin-aaghat kita nga ‘diri pabay-an an aton pagkatirok, sugad han nabatasan han iba’!—Heb. 10:25.

⁸ Gintatagad ba naton an aton mga katirok sugad nga tagana basi buligan kita nga makailob tubtob nga bungkagon na ni Jehova inin maraot nga sistema? Kon amo, an mga katirok upod han “mas importante nga mga butang” nga tatagan naton hin panahon bisan kon damu an aton buruhaton. (Fil. 1:10) Diri gud kita sadang pumalya ha mga katirok labot la kon may importante hinduro nga hinungdan.

9. Kay ano nga masisiring naton nga importante an pagsangyaw nga buruhaton?

⁹ An bug-os nga pakigbahin ha pagsangyaw nga buruhaton nabulig liwat ha aton nga sumunod ha pagpanguna han organisasyon ni Jehova. Gintikangan ni Jesus ini nga buruhaton han nakanhi hiya ha tuna. (Mat. 28:19, 20) Tikang hito nga panahon, an pagsangyaw han Ginhadian ngan paghimo hin disipulo nagin usa han pinakaimportante nga mga buruhaton han bug-os nga organisasyon ni Jehova. Damu nga eksperyensya ha moderno nga panahon an nagpapakita nga an mga anghel nasuporta ha aton buruhaton ngan naggigiya ha aton ngadto ha mga “may husto nga disposisyon basi magkaada kinabuhi nga waray kataposan.” (Buh. 13:48; Pah. 14:6, 7) An katuyoan han tunan-on nga bahin han organisasyon ni Jehova amo an pag-organisa ngan pagsuporta han pagsangyaw nga buruhaton. Ini ba nga buruhaton usa liwat han pinakaimportante ha imo kinabuhi?

10. (a) Paghatag hin ehemplo kon paonan-o naton matitipigan nga marig-on an aton gugma ha kamatuoran. (b) Paonan-o an ministeryo nakabulig ha imo nga diri manluya?

¹⁰ An pagin madasigon ha ministeryo nabulig ha aton nga matipigan nga marig-on an aton gugma ha kamatuoran. Tagda an ginsiring ni Mitchel, usa nga maiha na nga tigurang ngan regular payunir. Hiya nagsiring: “Nalilipay gud ako pag-istorya ha mga tawo mahitungod han kamatuoran. Ginhuhunahuna ko an bag-o nga artikulo ha An Barantayan ngan Pagpamata! ngan nahipapausa ako han kinaadman, hilarom nga pagsabot, ngan pagin timbang gud han tagsa nga gowa. Karuyag ko magsangyaw basi makita an reaksyon  han mga tawo, kon paonan-o ko makukuha an ira interes. An akon ministeryo nabulig ha akon nga pirme unahon an pinakaimportante nga mga butang. Gintatalinguha ko nga buhaton an iba pa nga butang antes o katapos han oras nga igin-gahin ko para ha ministeryo.” Ha pariho nga paagi, an pirme pagin okupado ha pag-alagad ha Dios makakabulig ha aton nga magpabilin nga marig-on hinin kataposan nga mga adlaw.—Basaha an 1 Corinto 15:58.

11. Kay ano nga kinahanglan bug-os nga pahimulsan naton an espirituwal nga pagkaon nga aton nakakarawat tikang kan Jehova?

¹¹ Hi Jehova nagtatagana hin damu nga espirituwal nga pagkaon basi parig-unon kita. Sigurado nga may nahinunumdoman ka nga higayon nga katapos mo magbasa hin publikasyon, naghunahuna ka: ‘Ini gud an akon kinahanglan! Sugad hin iginpasurat ini ni Jehova para gud ha akon!’ Diri ito nahituman la. Pinaagi han aton mga publikasyon, gintututdoan ngan gin-gigiyahan kita ni Jehova. Hiya nagsiring: “Paglaladngan ko ikaw ngan igsusulsog ko ikaw han dalan nga imo kakadtoan.” (Sal. 32:8) Nangangalimbasog ba kita nga basahon ngan pamalandungon an ngatanan nga publikasyon nga aton nakakarawat? An pagbuhat hito mabulig ha aton nga padayon nga mamunga ngan diri malaya ha espirituwal dinhi hinin makuri nga kataposan nga mga adlaw.—Basaha an Salmo 1:1-3; 119:97.

12. Ano an makakabulig ha aton nga pabilhan an espirituwal nga pagkaon nga igintatagana ha aton?

¹² Maopay nga hunahunaon naton an ngatanan nga ginbubuhat ha pagsiguro nga makarawat naton inin regular nga suplay han masustansya nga espirituwal nga pagkaon. An Writing Committee han Nagmamando nga Lawas an nanginginano han pagsaliksik, pagsurat, pag-proofread, pagpili hin mga retrato, ngan paghubad han mga publikasyon nga gin-iimprinta o ginbubutang ha aton Web site. An mga sanga nga opisina nga nag-iimprinta han aton mga literatura nagpapadara hito ha mga kongregasyon, hirani man o hirayo. Kay ano nga ginbubuhat ini ngatanan? Basi an katawohan ni Jehova mapakaon hin maopay ha espirituwal. (Isa. 65:13) Hinaot maduruto nga kaunon naton an ngatanan nga espirituwal nga pagkaon nga aton nakakarawat pinaagi han organisasyon ni Jehova.—Sal. 119:27.

13, 14. Hin-o an nasuporta ha mga kahikayan ni Jehova ha langit, ngan paonan-o naton maipapakita an pariho nga suporta dinhi ha tuna?

¹³ Ha bisyon nga iginhatag kan apostol Juan, nakita niya hi Jesus nga nasakay ha busag nga kabayo basi makiggirra ha mga nagrirebelde kan Jehova. (Pah. 19:11-15) Makaparig-on gud han pagtoo an paghibaro nga nasunod kan Jesus an magtinumanon nga anghel ngan kaupod niya an magtinumanon nga dinihogan nga kinarawat na han ira balos nga kinabuhi ha langit! (Pah. 2:26, 27) Maopay gud ito nga susbaranan han pagsuporta ha mga kahikayan ni Jehova!

¹⁴ Ha pariho nga paagi, an daku nga panon bug-os nga nasuporta ha buruhaton han dinihogan nga kabugtoan ni Jesus nga aanhi pa ha tuna ngan nangunguna ha organisasyon yana. (Basaha an Sakarias 8:23.) Sugad nga indibiduwal, paonan-o naton maipapakita an aton pagsuporta ha mga kahikayan ni Jehova? Usa nga paagi amo an pagpasakop ha mga nangunguna ha aton. (Heb. 13:7, 17) Mahihimo naton ini ha aton mismo kongregasyon. An aton ba ginsisiring mahitungod ha mga tigurang nakakaaghat ha iba nga magkaada pagtahod ha ira ngan ha ira pribilehiyo? Gin-aaghat ba naton an aton mga anak nga tahuron inin magtinumanon nga kalalakin-an ngan sundon an ira Kasuratanhon nga mga sagdon? Dugang pa, ginhihisgotan ba naton sugad nga pamilya kon paonan-o naton magagamit an aton kwarta basi suportahan an bug-os-kalibotan nga buruhaton pinaagi han aton mga donasyon? (Prob. 3:9; 1 Cor. 16:2; 2 Cor. 8:12) Ginhuhunahuna ba naton nga importante an pribilehiyo nga bumulig ha pagmintinar han Kingdom Hall? Kon nakikita ni Jehova nga ginsusuportahan naton an organisasyon hini nga mga paagi, iya iginhahatag ha aton an iya baraan nga espiritu. Pinaagi hito nga  espiritu, padayon nga nakakakarawat kita hin bulig basi diri manluya dinhi hinin kataposan nga mga adlaw.—Isa. 40:29-31.

15. Kay ano nga kinahanglan padayon kita nga makig-away basi magkinabuhi uyon ha mahimayaon nga katuyoan ni Jehova?

¹⁵ Ha kataposan, basi makailob ngan masunod an pagpanguna han organisasyon ni Jehova, kinahanglan magkinabuhi kita uyon ha mensahe nga aton iginsasangyaw pinaagi ha ‘pagsiguro kon ano an naruruyagan han Ginoo.’ (Efe. 5:10, 11) Tungod han aton pagkadiri-hingpit ngan han mga pangalimbasog ni Satanas ngan hinin maraot nga kalibotan, padayon kita nga nakikig-away ha magraot nga impluwensya. An pipira ha iyo nga hinigugma nga kabugtoan naatubang hin makuri nga pakig-away kada adlaw basi matipigan an iyo relasyon kan Jehova. Tungod hito hinigugma gud kamo ni Jehova. Ayaw pag-undang ha pagbuhat hito! An pagkinabuhi uyon ha katuyoan ni Jehova mabulig ha aton nga magkaada mapulsanon ngan malipayon nga kinabuhi, ngan makakasiguro kita nga diri kawang an aton pagsingba.—1 Cor. 9:24-27.

16, 17. (a) Ano an sadang naton buhaton kon makabuhat kita hin daku nga sala? (b) Ano nga leksyon an aton hibabaroan ha ehemplo ni Anne?

¹⁶ Kondi ano an sadang naton buhaton kon nakabuhat kita hin daku nga sala? Pagpabulig dayon. Mas madaku la an problema kon itatago naton ito. Hinumdumi nga nagsiring hi David nga han igintago niya an iya mga sala, ‘an iya mga tul-an nagkadadaan tungod han iya paghinaroy ha bug-os nga adlaw.’ (Sal. 32:3) Oo, an pagtago han mga sala makakapaluya la han aton emosyon ngan espirituwalidad, kondi an “bisan hin-o nga magsumat ngan bumaya hini makakakuha hin kalooy.”—Prob. 28:13.

¹⁷ Tagda an ehemplo ni Anne. * Han tin-edyer hi Anne, regular payunir hiya. Kondi, nagtikang hiya pagkaada doble nga pagkinabuhi. Daku gud an nagin epekto hito ha iya. Hiya nagsiring: “Nakonsensya gud ako. Pirme ako masurub-on ngan nadidepres.” Ano an iya ginbuhat? Nagsiring hiya nga usa ka adlaw durante han katirok, ginhisgotan an Santiago 5:14, 15. Nasantop niya nga nagkikinahanglan hiya hin bulig ngan nangaro hiya hin bulig ha mga tigurang. Ha paghinumdom hito, hiya nagsiring: “Ito nga mga teksto sugad hin reseta ni Jehova basi matambal ha espirituwal. Diri masayon tunlon an medisina, pero nakakaopay ito. Ginsunod ko an sagdon hito nga mga teksto, ngan epektibo ito.” Linabay an pipira ka tuig, ngan yana hi Anne madasigon na liwat nga nag-aalagad kan Jehova nga may maopay nga konsensya.

18. Ano an sadang naton magin determinasyon?

¹⁸ Daku gud nga pribilehiyo an pagkinabuhi hinin kataposan nga mga adlaw ngan pagin bahin han organisasyon ni Jehova! Magin determinado kita nga diri gud igbalewaray ito nga aton pribilehiyo. Lugod, magburublig kita sugad nga pamilya nga magin regular ha pagtambong ha mga katirok han kongregasyon, magin maduruto ha pamiling ha aton teritoryo han mga tawo nga tangkod an kasingkasing, ngan pabilhan an regular nga mga tagana han espirituwal nga pagkaon nga aton nakakarawat. Suportahan liwat naton an mga nangunguna ha aton ngan magkinabuhi kita uyon ha mensahe nga aton iginsasangyaw. Kon bubuhaton naton ito, masusunod naton an pagpanguna han organisasyon ni Jehova ngan diri gud kita manluluya ha pagbuhat han maopay!