1, 2. Fapi n’en nni guy u rarogon e ulung rok Jehovah e mang e ra k’aringdad ni ngad rin’ed?

 RI GAD ba felfelan’ ni gad bang u reb e ulung nib ga’ u ga’ngin yang e palpalth’ib. Fapi n’en nni pilyeg e changar rok boch e tapigpig rok Got ngar guyed ni bay ko Ezekiel ko guruy ni 1 nge Daniel ko guruy ni 7 e be weliy rogon ni be maruwel Jehovah ni nge lebguy e tin nib m’agan’ ngay. Jesus e ir e be pow’iy e ulung rok Jehovah u fayleng. Be pow’iy e re ulung ney ni nge rin’ fare maruwel ni machib, maku be ayuwegrad u rogon ni ngar fonownaged mi yad pi’ e athamgil nga laniyan’ e piin ni yad be rin’ e re maruwel ney, mi yad ayuweg boch e girdi’ ni ngar manged e pi tapigpig rok Jehovah. Rayog ni nge pagan’dad ko ulung rok Jehovah ni bochan e re n’ey.​—Matt. 24:45.

² Ga be folwok ko re ulung ney ni aram e ga be pigpig ngak Got ni gab pasig, fa? Sana ga be guy ni gathi ri ka gab pasig ko pigpig ni ga be tay. Ireray e n’en ni buch ko pi Kristiano ko bin som’on e chibog. Aram fan nib t’uf ni nge puguran apostal Paul ngorad ni ngar folwokgad rok Jesus nib pasig. I yog ni faan yad ra rin’ ni aram rogon ma ra ayuwegrad ni nge ‘dabi mulan’rad ngar paged yad.’ (Heb. 12:3) Fa binem e article e kad weliyed riy murung’agen e pi n’en nib fel’ ni be rin’ e ulung rok Jehovah e ngiyal’ ney. Pi n’en ni rin’ Kristus e ke pi’ e athamgil nga laniyan’ e pi Kristiano ko bin som’on e chibog, maku er rogon e pi n’en ni be rin’ e ulung rok Jehovah e ngiyal’ ney nrayog ni nge ayuwegdad ngad athamgilgad ko pigpig ni gad be tay ngak Got ma gad par ni gad ba pasig.

3. Faanra dubdad ni ngad paged gadad, ma mang e thingar da rin’ed? Mang e gad ra weliy ko re article ney?

³ Machane, faanra dubdad ni ngad “paged gadad” ara ngad malmalgad ko pigpig ni gad be tay ngak Got, ma gathi kemus ni ngad lemnaged e pi n’en ni be rin’ e ulung rok Got, ya ku bay boch ban’en nthingar da rin’ed. I yog Paul nthingar da ‘ngongliyed e ngongol nib fel’.’ (Gal. 6:9) Ere, chiney e ngad weliyed lal ban’en nthingar da rin’ed ya nge yag nda pared ni gad ba pasig ma gad be fol u rogon  ni be pow’iydad e ulung rok Jehovah. Tomuren e biney ma rayog ni ngad guyed ko bay boch ban’en nib t’uf ni ngad maruweliyed chon e tabinaw rodad fa dariy.

4. Mang fan nrayog ni nga dogned ni kab kakrom i yib ma pi muulung ni yima tay e aram ban’en nib ga’ fan ni yima rin’ ko bin riyul’ e liyor?

⁴ Kab kakrom i yib nib ga’ fan e muulung u wan’ e pi tapigpig rok Jehovah. Ku ma muulung Jehovah nge pi engel rok u tharmiy. (1 Ki. 22:19; Job 1:6; 2:1; Dan. 7:10) Kakrom e yog Got ngak piyu Israel ni ngaur muulunggad nga taabang ‘ya nge gubin e girdi’ me rung’ag ngar filed rogon ni nguur pired ma bay madgun Somol ni Got rodad u wun’rad.’ (Deut. 31:10-12) Nap’an e bin som’on e chibog ma i muulung piyu Jew nga yungi n’en ni kar mel’eged ni ngaur mada’gad ngay ni ngar beeged e thin ni bay u lan fare Babyor nib Thothup. (Luke 4:16; Acts 15:21) Ma nap’an ni sum e ulung ni Kristiano ma kub ga’ fan u wan’rad ni ngaur muulunggad nga taabang, maku er rogon e ngiyal’ ney ni muulung ni gad ma tay e aram bang ko liyor rodad. Tin riyul’ e Kristiano e ra ‘bagayad ma ma lemnag bagayad, ma ra bagayad ma ma ayuweg bagayad ma be dag ngak nib t’uf rok ma be rin’ e tin nib fel’ ngak.’ Kub t’uf ni nge “bagadad me pi’ e athamgil nga laniyan’ bagadad,” ni bochan e gad be par ko tin tomuren e rran.​—Heb. 10:24, 25.

5. Uw rogon ni nge bagadad me pi’ e athamgil nga laniyan’ bagadad u nap’an e muulung?

⁵ Reb e kanawo’ nib ga’ fan ni nge bagadad me pi’ e athamgil nga laniyan’ bagadad riy u nap’an e muulung, e aram e ngaud pied e fulweg. Bod nrayog ni ngad pied e fulweg ko deer ni kan fith u reb e paragraph, ara da weliyed reb e thin nu Bible, ara ban’en ni ke buch rok be’ ni be tamilangnag rogon nra ayuwegdad e pi kenggin e motochiyel nu Bible. (Ps. 22:22; 40:9) Gubin e pi fulweg ni gad ma rung’ag ni ma pi’ e piin ni kar piilalgad nge piin ni kab fel’ yangarrad u nap’an e muulung e ma pi’ e athamgil nga lanin’dad ni yugu demtrug n’umngin nap’an ni kad nanged e tin riyul’.

6. Mang boch e kanawo’ nrayog ni nge ayuwegdad e pi muulung ni gad ma tay?

⁶ Boor e kanawo’ nrayog ni nge ayuwegdad e pi muulung, nge pi assembly, nge pi convention ni gad ma tay. Pi muulung ney e ra ayuwegdad ni ngad machibgad ndab da rusgad ngki mada’ ko ngiyal’ ni kan togopuluw ngodad ara dabun e girdi’ ni ngar motoyilgad ngodad. (Acts 4:23, 31) Pi welthin ni yima pi’ nib puluw e thin riy ko Bible e ma gelnag e michan’ rodad. (Acts 15:32; Rom. 1:11, 12) Chag ni gad ma tay pi walagdad u taabang e ma k’aring e felfelan’ mma pi’ e toffan ngodad. (Ps. 94:12, 13) Fare Teaching Committee ara fare Ulung ni Ma Fil Ban’en e ma maruwel u tan pa’ fare Ulung ni Ma Pow’iyey. Re ulung ney e yad ma yarmiy e pi n’en ni yima fil u nap’an e muulung ni ma tay e pi tapigpig rok Jehovah. Ri gad ma felfelan’ ko pi fonow nrib manigil ni gad ma fil u nap’an e pi muulung ni gad ma tay u gubin e wik!

7, 8. (a) Mang e bin th’abi ga’ i fan ni ngaud uned ko muulung? (b) Uw rogon ni ma ayuwegem e pi muulung ni ga ma un ngay?

⁷ Machane, gathi kemus ni gad ma un ko muulung ni bochan e pi n’en ni ma yib angin riy ngodad. Ya bin th’abi ga’ i fan ni gad ma un ko muulung e bochan ni ngad liyorgad ngak Jehovah. (Mu beeg e Psalm 95:6.) Ri gad ba tow’ath ni ngaud tanggad u nap’an e muulung ni gad be pining e sorok ngak e Got rodad nrib manigil! (Kol. 3:16) Ku gad ma pining e sorok ngak Jehovah ko pi fulweg ni gad ma pi’. Riyul’ ni bay fan ni ngad liyorgad ngak Jehovah ni aram rogon. (Rev. 4:11) Ere, aram fan nrib t’uf ni ngaud uned ko muulung ni gubin ngiyal’.​—Heb. 10:25.

⁸ Muulung ni gad ma tay e aram reb e tow’ath ni ke pi’ Jehovah ni nge ayuwegdad ni ngaud athamgilgad nge mada’ ko ngiyal’ nra thang e re m’ag nib kireb ney. Aram rogon e lem rodad, fa? Faanra aram rogon, ma gad ra gay rogon ni ngaud uned ko muulung ni yugu aram rogon ni  boor pa’ u puluwdad. (Fil. 1:10) Maku reb e susun ndab ud paged e muulung ni yugu dariy fan.

9. Uw rogon ni kad nanged nib ga’ fan fare maruwel ni machib?

⁹ Ra ngad folgad u rogon ni be pow’iydad e ulung rok Jehovah, ma thingar ud machibgad ni gad ba pasig. Jesus e ir e tababnag fare maruwel ni machib u nap’an ni immoy u fayleng. (Matt. 28:19, 20) Ka aram nap’an i yib ma machib nge ngan pingeg e girdi’ ngar manged pi gachalpen Jesus e aram reb e maruwel nrib ga’ fan ni ma rin’ e ulung rok Jehovah. Boor ban’en ni ke buch rok boch e walag ni be dag ni ma ayuwegdad e pi engel ni ngad pirieged e piin ni yad ra adag e tin riyul’. (Acts 13:48; Rev. 14:6, 7) Fan ni bay e ulung rok Jehovah u fayleng e nge yarmiy me ayuweg fare maruwel ni machib. Ere, ba ga’ fan e re maruwel ney u wan’um, fa?

10. (a) Mang e ma rin’ reb e walag ni pumoon ya nge yag ni nge par nib t’uf e tin riyul’ u wan’? (b) Uw rogon ni ke ayuwegem e machib ni ga ma tay ni nga i par nib t’uf rom e tin riyul’?

¹⁰ Faanra ud machibgad ni gad ba pasig ma ra i par nib t’uf e tin riyul’ rodad. Aram rogon ni yog Mitchel ni ir be’ ni ke n’uw nap’an ni ke mang reb e piilal maku ir reb e pioneer. I gaar: “Ri gu baadag ni gu ma machibnag e tin riyul’ ko girdi’. Gu ra lemnag rogon ni kan fal’eg e pi article nib beech ni bay ko Fare Wulyang ko Damit nge Awake!, ma gu ma ngat nga rogon feni tamilang e thin riy ndariy reb nib togopuluw nga reb. Gu baadag ni nggu dag e pi n’ey ko girdi’ u nap’an e machib ya nggu nang ko yad ra adag fa danga’.” Ki yog Mitchel ni machib ni ma tay e ma  ayuweg ni nge m’oneg e tin nib ga’ fan u lan e yafas rok, ma dabi adbey e tayim rok ko tin dariy fan. Ku er rogodad nrayog ni ngad athamgilgad u nap’an e ngiyal’ ney ni gad be par riy ni faan gad ra tedan’dad ko pigpig ni gad be tay ngak Got.​—Mu beeg e 1 Korinth 15:58.

11. Mang fan ni ngaud beeged e pi babyor rodad ni yima ngongliy ma gad fal’eg i lemnag e pi n’en ni kad beeged riy?

¹¹ Pi babyor ni yima ngongliy ni fan ngodad e aram reb e kanawo’ ni ma ayuwegdad Jehovah riy. Dabisiy nra yib ngan’um ba ngiyal’ ni kam beeg ban’en u lan ba ken e babyor rodad, mag gaar u wan’um, ‘Ireray e n’en nib t’uf rog! Gowa ke yoloy Jehovah e re n’ey ni fan ngog!’ Bay fan ni kam lem ni aram rogon. Ma skulnagdad Jehovah ma ma pow’iydad u daken e pi babyor rodad. Ke yog ni gaar: “Bay gu fil ngom e kanawo’ ni ir e ngam man riy; bay gog ngom e tin ni ngam rin’ ma bay gu fonownigem.” (Ps. 32:8) Ere, gad ma guy rogon ni ngad beeged e pi babyor rodad ni yima ngongliy ma gad fal’eg i lemnag e pi n’en ni kad beeged riy, fa? Re n’ey e ra ayuwegdad ni ngaud pared ni gad ba pasig ma gad be athamgil ko pigpig ni gad be tay ngak Got ko ngiyal’ ney ko tin tomuren e rran.​—Mu beeg e Psalm 1:1-3; 35:28; 119:97.

12. Mang e ra ayuwegdad ni nge ga’ fan e pi babyor rodad u wan’dad?

¹² Faan gad ra lemnag gelngin e maruwel ni yima tay ni fan ko pi babyor rodad ma ra ga’ fan u wan’dad. Gubin e pi babyor rodad ni yima ngongliy ara tin ni yima tay ko Web site rodad e yima fal’eg i gay e machib riy, min yoloy nga babyor, min yal’uweg e thin riy, min tay e sasing ngay, ngemu’ min pi’ ko piin ni yad ma pilyeg e thin ni ngar pilyeged nga yugu boch e thin. Ireray e maruwel ko fare Writing Committee ara fare Ulung ni Ma Yoloy e Babyor ni ma maruwel u tan pa’ fare Ulung ni Ma Pow’iyey. Nap’an ni yira mu’ i ngongliy e pi babyor ney, me pi’ e pi branch ofis ko pi ulung i yan ni ngar wereged. Mang fan ni yibe rin’ e re maruwel ney? Ya nge yag ni ayuweg e pi tapigpig rok Jehovah ni ngaur pared ni yad ba yul’yul’. (Isa. 65:13) Ere, ngad guyed rogon ni nge yib angin ngodad e pi babyor ni ma ngongliy e ulung rok Jehovah.​—Ps. 119:27.

13, 14. Mini’ e piin ni yad bay u tharmiy ni yad be ayuweg e ulung rok Jehovah? Uw rogon ni ngad folwokgad rorad?

¹³ Nap’an nni pilyeg e changar rok John me guy Jesus ni ke af nga daken ba os nib wechwech ni nge yan i cham ngak e piin ni yad be togopuluw ngak Jehovah me gel ngorad. (Rev. 19:11-15) Ki guy e piin ni kan dugliyrad ni yad ba yul’yul’ ni kan fasegrad ko yam’ ka ranod nga tharmiy nge pi engel ni yad ba yul’yul’ ni kur afgad nga daken boch e os yad be lek Jesus. Re n’ey e be dag ni yad be ayuweg Jesus ni ir e Pilung rorad. (Rev. 2:26, 27) Re n’ey e gad be fil riy ni susun e ngaud ayuweged e piin ni yad ma yog e thin ko ulung rok Jehovah.

¹⁴ Ku aray e n’en ni ma rin’ fare ulung nib ga’. Yad ma ayuweg pi walagen Kristus ni kan dugliyrad ni ka yad bay u fayleng ko fare maruwel ni machib. (Mu beeg e Zekariah 8:23. *) Ere, uw rogon ni ngam ayuweg e ulung rok Jehovah? Reb e kanawo’ e aram e ngaum fol ko piin ni yad ma yog e thin u lan e ulung rok. (Heb. 13:7, 17) Ere, n’en ni gad ma weliy u murung’agen e piin piilal u lan e ulung rodad e ma pi’ e athamgil nga laniyan’ boch e girdi’ ni ngar ted farad nge maruwel ni yad ma rin’, fa? Gad ma fil ngak pi fakdad ni ngaur ted fan e pi pumoon ney ni yad ba yul’yul’ mar motoyilgad ko pi fonow rorad, fa? Ku bay boch e kanawo’ nrayog ni nge m’ug riy ni gad be ayuweg e ulung rok Jehovah. Bod ni, gad ma gay chon e tabinaw rodad rogon ni ngad pied e ayuw ko fare maruwel ni machib, fa? (Prov.  3:9; 1 Kor. 16:2; 2 Kor. 8:12) Maku reb e, gad ma pi’ e ayuw ko klin nge pi n’en ni yima  rin’ ni fan ko Kingdom Hall rodad, fa? Faanra guy Jehovah ni gad be ayuweg e ulung rok, ma ra pi’ gelngin nib thothup ni nge ayuwegdad, ma re gelngin ney e ku ra ayuwegdad ni ngad athamgilgad ko ngiyal’ ney ko tin tomuren e rran.​—Isa. 40:29-31.

15. Mang fan nthingar ud athamgilgad ni ngad rin’ed e tin nib mat’aw?

¹⁵ Faanra gad baadag ni ngaud athamgilgad ma gad be fol u rogon ni be pow’iydad e ulung rok Jehovah, ma thingar ud ngongolgad nrogon nib m’agan’ ngay. (Efe. 5:10, 11) Ba mo’maw’ ni ngad rin’ed e tin nib mat’aw ni bochan Satan, nge re fayleng nib kireb ney, nge rarogodad ndawor da flontgad. Ba mudugil ni bay boch i gimed nthingar ra athamgilgad ni ngar pared nib fel’ e tha’ u thilrad Jehovah. Ri gimed ba t’uf rok Jehovah ni bochan e athamgil ni gimed be tay. Ere dabi mulan’med, ya faanra ud ngongolgad nrogon nib m’agan’ Jehovah ngay ma ra yib fan e yafas rodad, mu ud pared ni gad ba felfelan’, ma gad ba fel’ u wan’ Jehovah.​—1 Kor. 9:24-27.

16, 17. (a) Faanra kad rin’ed reb e denen nib ubchiya’, ma mang e susun ni ngad rin’ed? (b) Mang e rayog ni ngad filed ko n’en ni buch rok Anne?

¹⁶ Machane, mang e susun ni ngam rin’ ni faanra kam rin’ reb e denen nib ubchiya’? Dab mu gay rogon ni ngam mithag. Mu gurnagem ngam ning e ayuw. Dab mu pagtalin e n’en ni lemnag David u nap’an ni i guy rogon ni nge mithag e denen rok. I yog ni gaar: “[Ke] m’ay gelngig ni bochan e meyor ni gu tay ni kadbul nge mada’ ko nep’.” (Ps. 32:3) Faan gad ra gay rogon ni ngad mithaged e denen rodad, ma dabiyog ni ngad pared ni gad ba felfelan’, maku rayog ni nge kireb e tha’ u thildad Jehovah. Machane, faan gad ra yog e denen rodad, ma ra ‘wurngan’ Got ngodad.’​—Prov. 28:13.

¹⁷ Mu lemnag e n’en ni buch rok Anne. * Nap’an nib fel’ yangaren ma ka be pioneer me tabab i rin’ boch ban’en nib kireb. Bochan e n’en ni rin’ ma i par ni be magawon e nangan’ rok. I yog ni gaar: “Ug par ni ke kireban’ug ma be tomal lanin’ug.” Reb e rran u nap’an e muulung min weliy e thin ni bay ko James 5:14, 15. Ma aram e n’en ni ayuweg Anne nge nang nib t’uf ni ngan ayuweg. Ere, mang e rin’? Ke fol ko fonow ni bay ko re thin nu Bible ney me non ko piin piilal. I yog nib mo’maw’ e n’en ni rin’, machane rayog ni ngan susunnag ni gowa ke m’ar, ma ke pi’ Jehovah e falay nib t’uf ni nge unum. Ki yog ni gaar, “Re falay nem e ba mo’maw’ ni ngan ful’, machane ra golnigey.” Chiney e ke yag rok Anne ni nge pigpig ngak Jehovah ni ke beech e nangan’ rok.

18. Mang e susun ni ngad athamgilgad ni ngad rin’ed?

¹⁸ Thingar dab da paged talin ni gad ba tow’ath ni gad bang ko ulung rok Jehovah ko ngiyal’ ney ko tin tomuren e rran! Ere, ngad athamgilgad chon e tabinaw rodad ni nge dab ud paged e muulung, ma ngaud machibgad ni gad ba pasig, ma ngad guyed rogon ni nge fel’ rogodad ko pi babyor rodad. Ngkud ayuweged e piin ni yad ma yog e thin u lan e ulung, mu ud ngongolgad nrogon nib m’agan’ Jehovah ngay. Faan gad ra rin’ e pi n’ey, ma aram e gad be fol u rogon ni be pow’iydad e ulung rok Jehovah ma aram e dab da paged gadad.