Be Hiẹ Yọnẹn Ya?
Be Hiẹ Yọnẹn Ya?
Be tẹmpli Jelusalẹm tọn wá yin vivọgbá to owhe 70 W.M. godo wẹ ya?
JESU dọ dọ zannu tẹmpli Jelusalẹm tọn de ma na yin jijodo zannu de ji—yèdọ dọdai de he mọ hẹndi to whenue awhànpa Lomu tọn và Jelusalẹm sudo to anademẹ Titus tọn glọ to owhe 70 W.M. (Mat. 24:2) To nukọn mẹ, Ahọluigbagán Julien basi tito nado vọ́ tẹmpli lọ gbá.
Julien yin yiylọdọ kosi godo tọn he yin ahọluigbagán Lomu tọn. Tavẹ-ylọvi Constantin Daho lọ tọn ehe yin pinplọn gbọn mẹhe ylọ yede dọ Klistiani lẹ dali. Ṣigba, to whenue e lẹzun ahọluigbagán to 361 W.M. godo, e dọ to gbangba dọ emi gbẹ́ nuplọnmẹ he emi mọyi po sinsẹ̀n Klistiani tọn he ko yin hinhẹnflu to ojlẹ etọn mẹ enẹ po dai bo kẹalọyi aṣa kosi lẹ tọn. Otànwe lẹ dlẹnalọdo ewọ taidi “Atẹṣitọ lọ.”
Julien gbẹwanna sinsẹ̀n Klistiani tọn taun. Whẹwhinwhẹ́n dopo sọgan ko yindọ, to whenue e tindo owhe ṣidopo, e mọ bọ mẹhe ylọ yede dọ Klistiani lẹ hù otọ́ etọn po hẹnnumẹ etọn sunnu delẹ po. Whenuho-kantọ ṣọṣi tọn lẹ dọ dọ Julien dotuhomẹna Ju lẹ nado vọ́ tẹmpli yetọn gbá, po linlẹn lọ po dọ enẹ na do Jesu hia taidi yẹwhegán lalo. a
Matin ayihaawe, Julien basi tito nado vọ́ tẹmpli lọ gbá. Whenuho-kantọ lẹ ma sọgan dọ po nujikudo po eyin ewọ bẹ azọ́n lọ jẹeji, podọ eyin e tlẹ wàmọ, yé ma yọ́n nuhewutu azọ́n lọ do doalọte. Ṣigba, onú dopo họnwun. E ma pé owhe awe he Julien jẹ gandu ji wẹ e yin hùhù, podọ tẹmpli lọ ma yin vivọgbá gbede ba.
[Nudọnamẹ odò tọn]
a Jesu ma dọ dọ tẹmpli lọ ma na wá yin vivọgbá gbede gba, ṣigba dọ e na yin vivasudo, dile e jọ do to owhe 70 W.M.
[Yẹdide to weda 32]
Lehe tẹmpli lọ sọgan ko te to azán Jesu tọn gbè die
[Yẹdide nuyijlẹdonugo tọn]
Fihe tẹmpli lọ nọ dai wẹ maṣalaṣi ehe tin te todin
[Asisa Yẹdide tọn]
Fọto: Todd Bolen/BiblePlaces.com
