Lelo Wadi Uyukile Kala?
Lelo Wadi Uyukile Kala?
Le tempelo ya mu Yelusalema yāubakulwilwe kupwa kwa mwaka wa 70 K.K.?
YESU wānene’mba, kekukashalapo dibwe nansha dimo dya ku tempelo ya Yehova ditentamine pa dikwabo—buno bupolofeto bwāfikidile kitatyi kyāile kibumbo kya basola bene Loma bādi batangidilwe na Titus, konakanya Yelusalema mu mwaka wa 70 K.K. (Mat. 24:2) Mwenda mafuku, Mbikavu Julien wātūdile’ko mpangiko ya kūbakulula tempelo.
Julien bāmutelele bu mbikavu wa mfulo mwine Loma wambulwa kwitabija. Uno mwipwa wa Constantin le Grand, wāfundijibwe bwine Kidishitu. Ino mwenda mafuku, pa kupwa kubikikwa’ye bu mbikavu mu 361 K.K., wāfutulwile patōkelela buno bufundiji ne kupela bwine Kidishitu bwa bubela bwa mu andi mafuku, mwanda wa kutweja butōtyi bwa bilezaleza. Mabuku a mānga amutelanga bu “Kapondo.”
Julien wādi ushikilwe kine Kidishitu. Padi i mwanda kitatyi kyādi na myaka isamba wāmwene bakulumpe ba kipwilo kya kine Kidishitu mobaipaile shandi ne mwanabo mwana-mulume. Befundi ba mānga ya kipwilo banena’mba, Julien wākankamikile Bayuda bobakulule tempelo yabo mwanda wa kusaka kumwekeja’mba Yesu i mupolofeto wa bubela. *
Kunena’mba Julien wākwete mpangiko ya kubakululwa kwa tempelo i ya kutatana. Befundi ba mānga i bakomenwe kuyuka senene shi bine mingilo ya kubakululwa yāshilwilwe ne shi i aye wāletele uno musoñanya, kadi ne kine kyālengeje uno mwingilo uleke kwendelela. Ino kudi kintu kimo kyabine. Julien wāipailwe kabwenye ne myaka ibidi mine mu buludiki, ne poloje yandi mine wafwa nayo.
[Kunshi kwa dyani]
^ Yesu kānenepo amba tempelo keikobakululwapo, ino aye wānene amba ikonakanibwa. Kino kyāfikidile mu mwaka wa 70 K.K.
[Kifwatulo pa paje 32]
Kifwatulo kya mwādi mumwekela tempelo mu mafuku a Yesu, pa kifuko poyadi’pa
[Diagram]
Moshiké wa Bamizilma witwa mu bulungu bu Dôme du Rocher ye ūbakilwe pa kifuko kyādi’po tempelo
[Kutambile Kifwatulo]
Foto: Todd Bolen/BiblePlaces.com
