YESU nowacho ni onge kidi mogergo hekalu mar Jehova ma ne dhi dong’ e wi wadgi maok omukore. Weche mokorgo notimore kane jolweny mag Rumi e bwo Tito noketho Jerusalem e higa mar 70 E.N. (Math. 24:2) Bang’e, Jaloch mar Rumi miluongo ni Julian nochano gero hekaluno kendo.

Julian nong’ere kaka jaloch mogik mar Jo-Rumi ma ne lamo Nyiseche manono. Julian ne en nyathi owadgi Constantine Maduong’, kendo nodongo e od joma ne luongore ni Jokristo e kindego. Kata kamano, bang’ bedo ruoth e higa mar 361 E.N., nokwedo e lela puonj mag Jokristo. Nikech nokwedo din mar Jokristo, mano emomiyo buge mag Histori luonge ni Julian ma “Jang’anyo.”

Julian nosin gi jogo mane luongore ni Jokristo. Achiel kuom gima ne nyalo miyo osin kodgi en ni kane en jahigni auchiel, noneno ka joma ne luongore ni Jokristogo nego wuon mare kod wedene mamoko. Jogo molony gi histori mar Kanisa wacho ni Julian nojiwo Jo-Yahudi mondo oger hekalu kendo, kogeno chuth ni timo kamano ne dhi nyiso ayanga ni Yesu ne en janabi mar miriambo. *

Onge kiawa ni Julian ne dwaro ni mondo oger hekalu kendo. Kata kamano ok ong’ere kabe nochako tij gere. To ka en adier ni nochako gere, ok ong’ere gimomiyo tijno nochung’. Gimoro achiel mong’ere en ni Julian ne onegi kata kapok otieko higni ariyo chakre odonj e loch, mi hekalu ne ok otiek ger.