JÉSUS ti dire ki pa enn roche dan temple Jéhovah pou reste lor enn roche​—enn prophetie ki ti accompli kan l’armée Romain, enba l’ordre Titus, ti detruire Jérusalem en 70 N.L. (Mat. 24:2) Plitar, l’Empereur Julien ti decide pou ré-construire temple.

Ti appel Julien dernier empereur païen dan Rome. Julien ki ti neveu Constantin le Grand ti gagne enn l’education ar bann soi-disant Chretien dan so lepok. Pourtant, apré ki li ti vinn empereur en 361 N.L., li ti rejette dan enn fason bien clair sa l’education-la ek religion Chretien ki ti’nn corrompu, pou suive bann religion païen. Bann livre ki koz lor l’Histoire appel li “[Julien] l’Apostat.”

Julien ti detesté bann ki ti dire zot Chretien. Kitfois enn raison kifer li ti coumsa, c’est parski kan li ti ena six an, li ti trouve bann representant sa religion-la touye so papa ek so bann famille. Dapré bann historien, Julien ti encourage bann Juif pou ré-construire zot temple, parski li ti pensé ki sa ti pou prouvé ki Jésus ti enn fausse prophete. a

Pena doute ki Julien ti envie ré-construire temple. Bann historien pa d’accord entre zot si vrai-mem li ti commence travail ré-construction. Ek si li ti faire sa, kifer travail-la finn arreté? Selman, ena enn kitsoz ki nou sur. Ti touye Julien moins ki deux an apré ki li ti vinn empereur, ek so projet ti arrete la-mem.