GYISƐSE hanle ye wɔ Gyihova ɛzonlenlɛ sua ne anwo kɛ, bolɛ ko bɔbɔ ɛnrɛla bolɛ zo mɔɔ bɛnrɛdwula ye aze a. Ngapezo ɛhye rale nu wɔ mekɛ mɔɔ Wulomu sogyama mɔɔ ɛnee Taetɛse a li bɛ ti la zɛkyele Gyɛlusalɛm wɔ ɛvolɛ 70 Y.M. anu la. (Mat. 24:2) Nzinlii, Amelado Julian bɔle kpɔkɛ kɛ ɔsi ɛzonlenlɛ sua ne bieko.

Ɛnee bɛfɛlɛ Julian kɛ Wulomu maanle maanle belemgbunli mɔɔ li awieleɛ mɔɔ ɛnee sonle awozonle. Bɛvale ngilehilelɛ bie mɔɔ ɛnee bɛkile kɛ ɔle Keleseɛnema ngilehilelɛ la bɛtetele Constantine Kpole ne awozoa ɛhye. Noko akee, mɔɔ bɛkpale ye kɛ amelado wɔ ɛvolɛ 361 Y.M. anu la, ɔkpole ngilehilelɛ ɛhye nee adalɛ ngilehilelɛ mɔɔ ɔwɔ Keleseɛne ɛzonlenlɛ nu la ɔluakɛ ɛnee ɔ nye die awozonle ɛzonlenlɛ nwo. Tete mbuluku ka ɔ nwo edwɛkɛ kɛ ɔle “Kpɔkyevolɛ.”

Ɛnee Julian ɛngulo Keleseɛne ɛzonlenlɛ. Ɔbayɛ kɛ deɛmɔti ɔrale ye zɔ la a le kɛ mekɛ mɔɔ ɔnyianle ɛvolɛ nsia la, ɔnwunle kɛ mgbanyima mɔɔ wɔ nu la hunle ɔ ze nee ye mbusuafoɔ. Asɔne ne tetedwɛkɛ kɛlɛvoma kile kɛ adwenle mɔɔ ɛnee Julian lɛ mɔɔ yemɔti ɔzele Dwuuma ne kɛ bɛzi ɛzonlenlɛ sua ne bieko la a le kɛ ɔmaa Gyisɛse ayɛ adalɛ ngapezonli. *

Kpolerazulɛ biala ɛnle nwolɛ kɛ Julian yɛle ngyehyɛleɛ kɛ ɔsi ɛzonlenlɛ sua ne bieko. Tetedwɛkɛ kɛlɛvoma ɛngola ɛnnwu ye saa ɔdaye a amgba ɔbɔle gyima ne abo a, na saa ɔle zɔ bɔbɔ a, duzu a manle bɛgyakyile a. Nɔhalɛ edwɛkɛ ko a le kɛ, mɔɔ Julian bɔle ye tumililɛ bo la, yeandwu ɛvolɛ nwiɔ yɛɛ bɛhunle ye a, yemɔti ye gyima ne anwo ngyehyɛleɛ ne anyɛ boɛ.