JESUSMI willakurqa Jerusalen templopi ‘mana chulla rumipas perqasqa puchunanmanta’, chay nisqanmi cumplikurqa Roma tropakuna Tito runapa kamachisqan 70 kaq watapi Jerusalenta puchukachiptinku (Mat. 24:2). Pachak watakuna pasaytam, Roma kamachiq Juliano chay templota hatarichiyta munarqa.

Kamachiq Julianoqa taytacha-mamacha yupaychaqmi karqa, payqa Constantino I el Grande sutiyoq runapa sobrinonmi karqa. “Cristiano” hina uywasqa kaspanpas, 361 kaq watapim Roma kamachiq kananpaq churaptinku runakunapa qayllanpi cristiano niqkunata qepancharurqa, chaynapi taytacha-mamachata yupaychananpaq. Chaymi ñawpaq tiempokunapi pasakusqanmanta willakuq librokuna sutichanku “Apostata”, nispa.

Julianoqa cheqnirqam cristianokunataqa, ichapas cristiano tukuqkuna soqta watachayoq kachkaptin taytantawan wakin ayllunkunata wañuchisqankuta qawasqanrayku. Ñawpaq pasakusqanmanta willakuq runakunapa nisqanman hinaqa, Julianoqa judiokunatam kallpancharqa templonkuta hatarichinankupaq, chaynapi Jesus yanqa willakuq kasqanta qawachinanpaq. *

Manamá iskayrayachwanchu templota Juliano hatarichiy munasqanmantaqa. Ichaqa manam allintachu yachanchik hatarichiyta qallaykusqanmantaqa nitaq imanasqa hatarichisqankuta saqesqankutapas. Ichaqa kaytam yachanchik: Julianoqa manaraq 2 wata kamachichkaspanmi wañukurqa, templota hatarichiy munasqanpas yanqachakururqam.