AKAKITE a Iesu e kare tetai toka o to Iehova iero e vaioia ki rungao i tetai toka​—kua akatupuia teia totou i te takore angaia a Ierusalema i te mataiti 70 T.N., e te nuku o Roma i raro i te rangatira anere ko Titus. (Mata. 24:2) Muri mai kua parani te Emepera ko Julian kia patu akaou i te iero.

Karangaia e ko Julian te emepera peikani openga o Roma. Teia tamaiti angai na Constantine Maata kua apiiia aia i roto i te akonoanga Kerititiano. E oti akera, i muri ake i te akariroia anga aia ei emepera i te mataiti 361 T.N., kua patoi pakari aia i taua apiianga ra e te tu akonoanga Kerititiano pikikaa o tona tuatau, e kua ariki i te akonoanga peikani. I roto i te au puka tuatua enua kua kapikiia aia e ko “te Apoteiti.”

Patoi pakari a Julian i te akonoanga Kerititiano. Tetai tumu penei i te taime e ono rai ona mataiti, kua kite tikai aia i tetai mata o taua akonoanga ra i te ta anga i tona papa e tetai kopu tangata ona. Karanga te aronga tuatua enua o te akonoanga e kua akamaroiroi a Julian i te ngati Iuda kia patu akaou i to ratou iero, i te irinaki anga e na teia e akapapu mai e e peroveta pikikaa a Iesu. *

Kare e ekoko e kua parani rai a Julian i te patu akaou i te iero. Kua eumiumi ra te aronga tuatua enua e me kua akamata rai aia i taua angaanga ra, e mei te mea e kua akamata aia i te reira, eaa ra te tumu i akamutu ei taua angaanga ra. Inara, e tai apinga i papu meitaki. Kua mate a Julian i raro ua ake i te rua mataiti i muri ake i tona akamata anga i te tutara, e kua akamutu atu rai tona akakoroanga kia patu akaou i te iero.