LI Jesús yalojbe xa onoʼox skʼoplal ta sventa li chʼulna ti mu «jbejuc ton muʼyuc bu cajal ta xcom ta sba yacʼol yan ton». Li kʼusi laj yale kʼot ta pasel kʼalal la slajesik Jerusalén ta sjabilal 70 ta jkʼakʼaliltik li soltaroetik ta Romae, ti jaʼ laj yal mantal li Titoe (Mat. 24:2). Epal sigloetik ta tsʼakale, tskʼan ox chchaʼmeltsan li chʼulna li mukʼta ajvalil Julianoe.

Chalik ti jaʼ la slajeb mukʼta ajvalil echʼ ta Roma ti maʼuk jchʼunolajel li Juliano ti jaʼ xjunichʼon li Constantino I el Grande. Akʼo mi laj yichʼ chanubtasel ta stojolal jchʼunolajeletik ta alel, pe la spʼaj ta satilal li chanubtasel akʼbat kʼalal laj yichʼ vaʼanel ta mukʼta ajvalil ta sjabilal 361 ta jkʼakʼaliltike, vaʼun jaʼ bat ta stojolal li jecheʼ yichʼel ta mukʼ yan diosetike. Jaʼ yuʼun, li livroetik ti chalbe skʼoplal sloʼil xkuxlejal krixchanoetike, xi tsbiiltas li Julianoe: «Li jvalopatinej mantale».

La spʼaj li buchʼutik xchʼunojik Cristo li Julianoe, taje jaʼ van ta skoj ti laj yil milbat stot xchiʼuk yan yutsʼ yalaltak yuʼun jchʼunolajeletik ta alel kʼalal vakib toʼox sjabilale. Jech kʼuchaʼal chal jayibuk j-al-loʼiletike, laj yal ti la stijbe yoʼonton judioetik sventa xchaʼmeltsanik li xchʼulnaike, sventa chakʼ ta ilel ti jaʼ jun jecheʼ j-alkʼop li Jesuse. *

Mu ta naʼeteluk ti tskʼan ox chchaʼmeltsan chʼulna li Julianoe. Akʼo mi jech, mu jnaʼtik lek mi la slikesik li abtel sventa xchaʼmeltsanel li chʼulnae; xchiʼuk mi jaʼ jech kʼot ta pasele, mu jnaʼtik ti kʼu yuʼun ti jecheʼ te kechel laj yiktaike. Pe li kʼusi jnaʼojtike: cham kʼalal skʼan toʼox xlokʼ chib jabil yochel ta ajvalil li Julianoe xchiʼuk te laj-o skʼoplal ta sventa li kʼusi snopoj ox tspase.