YESU o amba uri a hu na tombo ḽine ḽa ḓo sala ḽi nṱha ha ḽiṅwe—honoho ndi vhuporofita he ha ḓadzea musi mulangammbi wa Muroma Titus a tshi fhelisa Yerusalema nga 70 C.E. (Mat. 24:2) Nga murahu, Muvhusi Julian o dzudzanya u dovha a fhaṱulula thembele.

Hu ambiwa uri Julian ndi ene muvhusi wa u fhedza wa muhedeni ngei Roma. Onoyu muḓuhulu wa Constantine Muhulwane hu na zwe a vha o zwi funzwa nga ha Vhukriste. Naho zwo ralo, musi a tshi vhewa uri a vhe muvhusi nga 361 C.E., o landula yeneyo pfunzo ya Vhukriste ha misini yawe nga nṱhani ha uri o vha a tshi takalela pfunzo dza vhuhedeni. Musi dzi tshi ambela khae, bugu dza ḓivhazwakale dzi ri o vha e “Mugunei.”

Julian o vha a tshi nyala Vhukriste. Khamusi ndi nga nṱhani ha uri musi e na miṅwaha ya rathi, o vhona vhaimeleli vhaho vha tshi vhulaha khotsi awe na mashaka awe. U ya nga vhaḓivhazwakale vha kereke, Julian o ṱuṱuwedza Vhayuda uri vha fhaṱulule thembele, nga nṱhani ha uri o vha a tshi ṱoḓa u sumbedza uri Yesu ndi muporofita wa mazwifhi. *

A hu na ane a timatima uri Julian o vha o dzudzanya u dovha a fhaṱa thembele. Vhaḓivhazwakale vha a pikisana na fhungo ḽa uri o vhuya a thoma mushumo wa u i fhaṱulula, nahone arali o u thoma, ndi mini zwe zwa ita uri mushumo u si bvele phanḓa. Fhedzi hu na tshithu tshithihi tshine ra vha na vhungoho natsho. Julian o vhulahwa hu sa athu fhela miṅwaha mivhili o thoma u vhusa, zwa ita uri na mushumo we a u dzudzanya u si tsha bvela phanḓa.