HI Jesus nagsiring nga waray usa nga bato ha templo ni Jehova nga magpapabilin ha bawbaw han usa nga bato. Ito nga tagna natuman han 70 C.E. han an Jerusalem ginbungkag han Romano nga kasundalohan ha panguna ni Tito. (Mat. 24:2) Ha urhi, hi Emperador Julian nagplano pagtukod utro han templo.

Hi Julian kilala sugad nga ultimo nga pagano nga emperador han Roma. Ini nga umangkon ni Constantino nga Bantogan gintutdoan han mga nag-aangkon nga Kristiano ha iya panahon. Kondi katapos hiya iproklamar nga emperador han 361 C.E., ginpili niya an paganismo ngan iginsalikway an igintutdo ha iya ngan an sayop nga klase han Kristianidad. Ha mga libro han kasaysayan gintatawag hiya nga “an Apostata.”

Nangangalas hi Julian ha Kristianidad. Bangin an usa nga hinungdan, kay han sais anyos hiya, iya nakita nga an iya tatay ngan iba nga paryente ginpatay han mga nag-aangkon nga Kristiano. Sumala ha mga historyador han singbahan, gin-aghat ni Julian an mga Judio nga tukuron utro an ira templo, kay naghunahuna hiya nga papamatud-an hito nga buwa nga propeta hi Jesus. *

Waray ruhaduha nga nagplano hi Julian nga tukuron utro an templo. Nagdidebate an mga historyador kon natikangan gud ba niya ito, ngan kon iya ito ginbuhat, ano an hinungdan nga waray ito ipadayon. Kondi usa nga butang an sigurado. Waray pa magduha ka tuig tikang nga nagin emperador hi Julian, ginpatay hiya, ngan an templo waray na gud matukod utro.