SAMTING WE OL MAN OLI TALEM: “God i rulum wol ya, taswe, hem nao i mekem ol disasta oli hapen. From samting ya, hem i wan God we i stap spolem ol man.”

SAMTING WE BAEBOL I TALEM: “Olgeta man blong wol ya oli stap long paoa blong Setan.” (1 Jon 5:19) ?Yu yu bilif long samting ya? Yu traem tingbaot. Sipos Setan i gat paoa long ol man long wol, hem i save pulum ol man blong oli gat fasin olsem hem. Bambae oli tingbaot olgeta nomo, oli griri, mo oli no tingbaot fiuja nating. Ale, from we oli gat ol fasin ya, oli mekem ol samting we oli spolem wol. Plante man blong hae save oli givim woning long ol man se, sipos oli gohed blong spolem ol samting long wol ya, bambae i save gat plante disasta. Bambae oli mekem se ol disasta oli save kamaot, oli kam mowas, nao laef blong ol man i stap long denja.

?Be from wanem God i letem Setan i bos long ol man? Long stat finis, Setan i pulum fas papa mo mama blong yumi, blong tufala i agensem haefala King blong heven mo wol, hemia Jehova. * Tede, hem i stap pulum plante man blong oli sakemaot hae rul blong Jehova. Nogud desisen blong Adam mo Iv i mekem se evri man long wol ya oli stap long paoa blong enemi blong God, hemia Devel Setan. Hemia nao from wanem Jisas i singaot Setan se “masta blong wol ya.” (Jon 14:30) ?Olsem wanem? ?Setan bambae i rulum wol ya blong olwe? Nogat.

Jehova i tingbaot tingting mo filing blong ol man we oli stap harem nogud, from ol samting we Setan i mekem. Hem i sore long olgeta. Yu traem tingbaot ol man Isrel bifo. Baebol i talem se taem ol man Isrel oli stap harem nogud tumas from ol trabol blong olgeta, Jehova tu i “stap harem nogud.” (Aesea 63:9, futnot) Yumi glad tumas we God i sore long yumi. From samting ya, hem i promes se i no longtaem, bambae hem i finisim rabis rul blong Setan. Hem i jusumaot pikinini blong hem, Jisas Kraes, blong i King long wol ya blong olwe. Jisas bambae i rul long fasin we i stret.

?FROM WANEM YUMI MAS SAVE ANSA?: Rul blong Setan i no naf blong stopem ol disasta blong oli no hapen. Be taem Jisas i rul, bambae hem i finisim ol disasta. Wantaem, Jisas i mekem wan samting blong lukaotgud long ol disaepol blong hem. Hem i blokem bigfala win, nao ples i kam kwaet. Baebol i talem se: “Jisas . . . i tok long win ya, i talem se, “!Yu kwaet!” Mo i tok long wota ya we i raf tumas, i talem se, “!I naf! !Yu stap kwaet!” Nao win ya i finis, mo olgeta samting i kwaet.” Be ol disaepol oli fraet tumas, oli stap taltalem long olgeta se: “!Olgeta! ?Wanem man ya? !Nating we win mo wota, be tufala i harem tok blong hem, tufala i obei long hem!” (Mak 4:37-41) Stori ya i soemaot long yumi se, taem Jisas bambae i rul olsem King, hem i naf blong lukaotgud long olgeta man we oli obei long God.—Daniel 7:13, 14.