MEL̦EL̦E KO AN JET ARMEJ: “Kõnke Anij ej irooj in lal̦ in, e eo ej kõm̦m̦an bwe en wal̦o̦k jorrããn kein rel̦l̦ap. Lukkuun m̦ool ke enana im lãj.”

EKKAR ÑAN BAIBÕL̦: “Lal̦ in ej pãd ium̦win pein Ri Nana eo.” (1 Jon 5:19, UBS) Wõn ri nana eo? Baibõl̦ ej ba bwe ri nana eo ej Setan. (Matu 13:19, UBS; Mark 4:15) M̦ool ke men in? Eokwe, l̦õmn̦ak m̦õk kõn men in: Kõnke lal̦ in ej pãd ium̦win pein Setan, e eo ej kõm̦m̦an bwe armej ro ren l̦õmn̦ak kõn er make, l̦ap aer arõk, im jajel̦o̦kjen̦ ãinwõt e. Eñin unin elukkuun nana wãween an armej ro kõm̦m̦an ñan lal̦ in im pel̦aak ko pel̦aakin. Elõñ ri mãlõtlõt rej ba bwe kõn wõt an armej ro jab kõjparoke lal̦ in ad, men in ej kõm̦m̦an bwe en wal̦o̦k jorrããn ko rel̦l̦ap ãinwõt m̦akũtkũt lal̦, taibuun ak l̦añ ko rel̦l̦ap, uwetok n̦o, im men ko ãierl̦o̦kwõt. Wãween an armej ro kõm̦m̦an ñan lal̦ in ej bar kõm̦m̦an bwe en nanal̦o̦k wõt ak l̦apl̦o̦k wõt jorrããn kein im ej bar kõm̦m̦an bwe en pidodo ad iioone men kein.

Innem, etke Anij ej kõtl̦o̦k bwe armej ro ren pãd ium̦win pein Setan? Kõn wõt men eo ear wal̦o̦k ke armej ro ruo m̦oktata rar jum̦ae wãween an Anij tõl er. Jãn kar iien in tok ñan raan kein, eñin men eo armej ro rej kõm̦m̦ane. Kõn an armej ro jum̦ae wãween tõl eo an Anij, lal̦ in ej kiiõ pãd ium̦win pein Setan, ri kõjdat eo an Anij. Eñin unin Jijej ear ba bwe Setan ej “irooj in lal̦ in.” (Jon 14:30, UBS) Setan enaaj ke irooj ilo lal̦ in ñan indeeo? Eban!

El̦ap an Jeova * (Lale kõmel̦el̦e ko itulal̦.) diki aolep men kein renana me Setan ej kõm̦m̦ani ñan armej ro. Ilo m̦ool, Anij ej lukkuun bũrom̦õj ñe ej lo an armej ro eñtaan. Ñan waanjoñak, ke Ri Israel ro rar eñtaan, Baibõl̦ ej ba bwe Anij ear “bũrom̦õj bũruon kõn eñtaan an Israel.” (Ri Ekajet 10:16) M̦õttan jidik enaaj jejjet karõk eo an Anij bwe en jem̦l̦o̦k wãween an Setan irooj! Em̦õj an Anij kããlõt eo Nejin, Jijej Kũraij, bwe en ko̦kkure Setan. Jijej enaaj juon Ri Tõl em̦m̦an im enaaj irooj ñan indeeo.

WÃWEEN AN MEN IN JELÕT EOK: Setan ejjab maroñ kabõjrak an jorrããn ko rel̦l̦ap ko̦kkure armej ro. Ñe Jijej enaaj irooj, enaaj kabõjrak men in. Juon iien, Jijej ear kabõjrake juon l̦añ el̦ap bwe en maroñ kõjparok rũkal̦oor ro an. Baibõl̦ ej ba: “Ej . . . kauwe kõto im ba ñan lom̦al̦o, ‘Kwõn jab m̦akũtkũt, kwõn lur.’ Im kõto ejako, im el̦ap lur.” Men in ear kõm̦m̦an an rũkal̦oor ro ba: “Wõn armej in bwe kõto im lo̦jet rej pokake?” (Mark 4:37-41) Bwebwenato in ej kõm̦m̦an ad tõmak im lõke bwe ilo iien eo Jijej enaaj irooj, enaaj kõjparok aolep armej ro rej pokake.​—Daniel 7:13, 14.