LOKE HENDE SA BISA: “Ta Dios ta kousa desaster natural pasobra t’e ta goberná mundu; p’esei, lo e mester ta hopi kruel.”

LOKE BEIBEL TA BISA: “Henter mundu ta den poder di e Malbado.” (1 Huan 5:19) Ken ta “e Malbado” akí? Beibel ta yam’é Satanas. (Mateo 13:19; Marko 4:15) Esei ta un idea apsurdo? Pensa riba esaki: Si Satanas tin mundu den su poder, e ta influensiá hende pa ta mesun egoista, golos i inkapas pa mira futuro kuné. Esei no ta splika dikon hende ta daña e medio ambiente? Hopi eksperto ta atvertí ku daño na e medio ambiente por sea kousa desaster natural, hasi e efektonan mas devastador i hasi hende mas vulnerabel pa nan.

Pero dikon Dios a permití Satanas tin asina tantu influensia? Pa kontestá e pregunta ei nos tin ku bai bèk na komienso di historia humano, ora nos promé mayornan a rechasá Dios komo nan gobernante. For di e tempu ei padilanti gran parti di humanidat a sigui e mesun pasonan, esta, rechasá e gobernashon di Dios. Esaki a pone humanidat den gara di Satanas, e enemigu di Dios. Ku rason bèrdè Hesus a bisa ku Satanas ta “e gobernante di mundu.” (Huan 14:30) Satanas lo goberná pa semper? Nò!

Yehova, * di su parti, no ta sera wowo pa e sufrimentu ku Satanas ta kousa. Al kontrario, wak kiko Beibel ta bisa di Dios ora e nashon di Israel tabata pasa den tempunan difísil: “Den tur nan aflikshon e tabata afligí.” (Isaías 63:9) Den su gran miserikòrdia, Dios a disidí di kaba ku e gobernashon kruel di Satanas, i lo e hasi esei pronto! Ya kaba, el a nombra su Yu, Hesukristu, pa ta un Rei hustu pa semper.

KIKO ESAKI TA NIFIKÁ PA BO? Satanas no a protehá hende di e efektonan di desaster natural, pero Hesus sí lo hasi esaki. Tempu ku Hesus tabata riba tera, el a protehá su disipelnan di un tormenta fuerte. E relato bíbliko ta bisa: “[El] a skual bientu i a bisa laman: ‘Silensio! Keda ketu!’ I bientu a baha i a kalma kompletamente.” E disipelnan a bisa otro: “Ta ken esaki ta anto? Pasobra asta bientu i laman ta obedes’é!” (Marko 4:37-41) E suseso ei ta duna nos e konfiansa ku Hesus lo protehá henter humanidat obediente durante su reinado.—Daniel 7:13, 14.