RUNAKUNA NINKU: “Diosmi kay pachata kamachishan chaymi paypa huchanpi kay pachapi imaymana pasashan”, nispa.

BIBLIAN NIN: ‘Kay pachaqa saqraq munaychakusqan kashan’, nispa (1 Juan 5:19). Arí, Bibliaq nisqan hina “saqraqa” Satanasmi (Mateo 13:19; Marcos 4:15). Chaypi nisqan, ¿mana allin yuyaykuychu kanman? Kaypi yuyaykuy: Satanasqa atiyniyoq paymi runakunata tanqan payllapaq munaq kayman, munapayayman, pay hina mana allin reparaq kanankupaqpas. Chaykunata yachay, ¿manachu sut’ita rikuchiwanchis paypa huchanrayku kay pachapi imaymana pasasqanta? Askha yachaysapa runakuna ninku: “Satanasmi runakunata tanqan imaymana ruwasqanwan pacha chhaphchiykuna hukkunapas kananpaq”, nispa.

¿Imaraykun Jehová Dios hinallata qhawan Saqra kay pacha kamachinanta? Chay tapuyta allinta entiendenapaq qhawarisunchis qallariypi imachus pasasqanta. Adanwan Evawan Dios contra hatarirqanku chaymantapachan yaqa llapa runakunapas kaqllatataq ruwarqanku. Chay akllakusqankuwanmi Satanaspa makinpi churakurqanku. Chaymi Jesusqa Saqrata nirqan: “Kay pachapi kamachikuq”, nispa (Juan 14:30). Ichaqa manan unaypaqchu kamachinqa.

Jehová * Diosmi ichaqa khuyapayan Saqraq ñak’arichisqan runakunata. Bibliaq nisqan hina Diosqa Israel runakuna ‘llakisqa kashaqtinku, paypas llakisqallataq karqan’ sasachakuypi tarikuqtinku (Isaías 63:9, Diosmanta Qhelqasqa). Chaymi ancha munakuyninpi pisi tiempomanta Satanaspa kamachikuyninta ch’usaqyachinqa. Hinaspapas Jehová Diosqa ñan chanin wawan Jesucristota wiñaypaq kamachimunanpaq churanña.

¿IMATAN YACHANCHIS? Satanasqa manan runakunata pakaykurqanchu pacha chhaphchiykunamanta imaymana pasasqanmantapas, Jesusmi ichaqa pakaykurqan. Huk kutinmi Jesús kay pachapi kashaspan qatikuqninkunata lamar-qochapi kashaspanku hatun wayramanta pakaykurqan. Biblia nin: “Jesustaq hatarimuspa wayrata phiñarikurqan, hinaspan qochata nirqan: ‘¡Samp’ayay! ¡Upallay!’, nispa. Wayrataq thanirqapurqan, hinan thak kapurqan. [...] Hinan anchata mancharikuspanku ninakurqanku: ‘¿Pitaq kayri, chaytaq wayrapas, qochapas kasun?’”, nispa (Marcos 4:37-41). Chay ruwasqanmi rikuchin Jesús kay pachata kamachimuqtin llapa runakunata pakaykunanta (Daniel 7:13, 14).