TUKU WANKGO MAKGAPITSIN: «Dios tlawa pi kaʼanalh tuku malakgsputunan, xlakata mapakgsi Katiyatni; wa xlakata nitlan likatsi».

TUKU WAN BIBLIA: «Kxlitliwakga Akgskgawini wilakgo, xlipaks ntachixkuwitat» (1 Juan 5:19). Chuna la wan Biblia, «akgskgawini», o tiku nitlan likatsi, wa Satanás (Mateo 13:19; Marcos 4:15). ¿Xlikana uma? Kalakpuwanti uma: komo Akgskgawini kaʼakgchipanit latamanin tlawa pi xakstukan nakapaxkikan, lhuwa tuku nakgalhiputunkgo chu ni liwana akxilhkgo xtachuna la Satanás. ¿Ni xlikana pi uma kinkamalakpuwaniyan tuku xlakata chixku ni kuenta tlawa tuku anan kKatiyatni? Lhuwa tiku lakgskgalalan lakchixkuwin wankgo pi lhuwa tuku nitlan anan uku xkuenta chixku.

¿Tuku xlakata mastanit talakaskin Dios kakgalhilh lhuwa litliwakga Akgskgawini? Xlakata nakgalhtiyaw uma takgalhskinin kilikatsitkan tuku lalh xapulana. Xapulana kinatlatnikan ni kgalhakgaxmatkgolh Dios, uma wamputun pi ni lakaskinkgolh xmapakgsinakan xlitaxtulh chu atsinu ni putum latamanin xala uku nachuna tlawakgonit. Xlakata chuna tlawakgolh, kakilhtamaku kxmakan Satanás wi, xtalatlawana Dios. Wa xlakata, Jesús limapakuwilh Akgskgawini wanti «mapakgsinan katuxawat» (Juan 14:30, Hua Xasasti Talaccaxlan, TXS, 1999). Pero ni putum kilhtamaku katimapakgsinalh.

Jehová, * nitlan limakgkatsi tapatin nema Satanás tlawama. Akgtum liʼakxilhtit, Biblia lichuwinan la makgkatsilh akxni akxilhli tuku nitlan xtitaxtuma kachikin Israel: «Putum kilhtamaku akxni lu tuwa tuku xtitaxtumakgolh na lu nitlan xlimakgkatsi» (Isaías 63:9). Xlakata Dios lu lakgalhamanan, lakpuwanit namasputu nitlan xtamapakgsin Satanás, chu nialh makgas chuna natlawa. Nachuna, mapakgsina tlawalh xKgawasa tiku tlan likatsi, Jesucristo, xlakata namapakgsinan putum kilhtamaku.

TUKU KINKAMASIYANIYAN UMA: Satanás ni kakuentajtlawanit latamanin akxni minit tuku malakgsputunan, pero Jesús nakakuentajtlawa. Akxni xlama kKatiyatni, xla kakuentajtlawalh xʼapóstoles akxni palha un xlawi. Biblia wan tuku tlawalh Jesús xlakata: «[X]takaksli un, chu chuna wanilh takgayawana: ¡Kaks katawila, chu nialh katakgayawa! Puschi yama un xawa takgayawana kaks tawilakgolh». Kaks lakawankgolh xʼapóstoles chu wankgolh: «¿Pus tu ya litliwakga kgalhiy yuma chixku, pi asta maski wa un, chu takgayawana kgalhakgaxmatkgoy?» (Marcos 4:37-41, TXS, 1999). Uma tuku tlawalh kinkamakgtayayan nalipawanaw pi Jesús nakuentajtlawa latamanin tiku nakgalhakgaxmatkgo akxni namapakgsinan (Daniel 7:13, 14).