SAMPELA MAN I TOK: “God i bosim graun, na em i kamapim ol bikpela disasta, olsem na em i mas man nogut.”

BAIBEL I TOK: “Dispela graun olgeta i stap long han bilong Satan.” (1 Jon 5:19) Yu ting i hatwok long bilipim dispela tok? Tingim: Satan i bosim dispela graun, na em i kirapim ol man long tingim ol yet tasol, gridi long ol samting, tingim tasol long inapim laik bilong ol olsem em yet i save mekim. Dispela i kamapim klia as na ol man i save mekim nabaut long ol gutpela samting bilong graun na i no lukautim gut graun. Planti saveman i tok pasin bilong mekim nabaut long ol samting bilong graun ating em i wanpela as na ol bikpela disasta i save kamap, o i mekim na ol disasta i kamapim bikpela bagarap, o i mekim na ol man i no gat rot bilong abrusim ol disasta.

Sapos olsem, orait bilong wanem God i larim Satan i bosim dispela graun? Bilong bekim dispela askim, yumi ken tingim samting i bin kamap long namba 1 tumbuna papamama bilong yumi long taim tupela i bikhet long wok bos bilong God. Kirap long dispela taim na i kam, planti man i bihainim wankain pasin. Dispela disisen long sakim wok bos bilong God i mekim na olgeta manmeri bilong graun i stap aninit long wok bos bilong Satan, em birua bilong God. Jisas i kolim Satan olsem “hetman bilong dispela graun.” (Jon 14:30) Yu ting Satan bai bosim graun inap oltaim oltaim?

Jehova a i save long ol pen na hevi em Satan i kamapim. Em i pilim tru ol hevi ol man i karim. Olsem, long taim bikpela hevi i painim lain Israel, Baibel i tok long God olsem: “Long taim ol i karim pen na hevi, Bikpela tu i bin karim pen na hevi wantaim ol.” (Aisaia 63:9) Long pasin sori God i stretim pinis rot bilong pinisim wok bos bilong dispela man nogut Satan, na klostu nau em bai mekim olsem! Em i makim Pikinini bilong em Jisas Krais, long mekim wok olsem King long stretpela pasin inap oltaim bihain.

SAMTING DISPELA I MEKIM LONG YU: Wok bos bilong Satan i no lukautim ol man long ol bikpela disasta, tasol wok bos bilong Jisas bai lukautim ol man. Wanpela taim Jisas i lukautim ol disaipel bilong em long bikpela win na ren. Baibel i tok: “Em i . . . krosim win na tokim raunwara: ‘Inap nau! No ken pairap!’ Na win i dai na raunwara i stap isi tru.” Ol disaipel i tok: “Dispela man em i husat tru? Win na raunwara tu i harim tok bilong en.” (Mak 4:37-41) Dispela samting i bin kamap i helpim yumi long bilip tru olsem taim Jisas i stap King em bai lukautim gut ol manmeri i bihainim tok bilong em.—Daniel 7:13, 14.