IVYO ŴANJI ŴAKUYOWOYA: “Pakuti Ciuta ndiyo wakuwusa caru, wakwenera kuti ndiyo wakucitiska masoka ghacilengiwa, ntheura wakwenera kuti ngwankhaza.”

IVYO BAIBOLO LIKUYOWOYA: “Caru cose cikugona mu nkhongono za muheni.” (1 Yohane 5:19) Kasi “muheni” uyu ni njani? Baibolo likuti ni Satana. (Mateyu 13:19; Mariko 4:15) Kasi ici nchakusuzga kupulikiska? Ghanaghanirani ici: Usange Satana wakuwusa caru, ipo ndiyo wakucitiska ŵanthu kuti ŵajighanaghanirenge waka ŵekha, kuŵa ŵaryezi kweniso kusankha vinthu mwambura mwamahara. Kasi fundo iyi yingawovwira yayi kuti tipulikiske cifukwa ico ŵanthu ŵakunangira caru ico ŵakukhalamo? Nkhwantha zinandi zikucenjezga kuti kunangika kwa caru, kungacitiska kuti masoka ghacilengiwa ghacitikenge comene kweniso umoyo wa ŵanthu ŵanandi uŵe pa ngozi.

Ipo cifukwa wuli Ciuta wazomerezga Satana kuti wacite nthena? Zgoro tingalisanga pa ivyo vikacitika mu nyengo yakale apo ŵapapi ŵithu ŵakwambilira ŵakagalukira Ciuta, Muwusi wawo. Kufuma pa nyengo yira, ŵanthu ŵanandi ŵalutilira kugalukira Ciuta. Pakuti ŵanthu ŵakana kulongozgeka na Ciuta, ŵajiŵika mu mawoko gha Satana uyo ni mulwani wa Ciuta. Lekani Yesu wakati Satana ni “muwusi wa caru.” (Yohane 14:30) Kasi Satana wawusenge kwamuyirayira? Yayi.

Yehova * vikumukhwaska comene para wakuwona ŵanthu ŵakusuzgika. Nakuti citima cikumukora comene pakuwona umo ŵanthu ŵakusuzgikira. Mwaciyelezgero, apo Ŵaisrayeli ŵakasangana na masuzgo, Baibolo likuti: “Mu visuzgo vyawo vyose [Ciuta] nayeso wakasuzgika.” (Yesaya 63:9) Cakukondweska nchakuti sonosono apa, Ciuta wawuskengepo Satana uyo wakuwusa mwankhaza! Wasora Mwana wake Yesu Khristu, uyo ni murunji kuti ndiyo waŵe Themba lamuyirayira.

UMO IMWE MUKUKHWASKIKIRA: Nangauli Satana watondeka kuvikilira ŵanthu ku masoka ghacilengiwa, kweni Yesu wazamuŵavikilira. Cifukwa kale Yesu wakavikilirapo ŵasambiri ŵake ku cimphepo cakofya. Baibolo likuti: “Wakalekeska mphepo ndipo wakati ku nyanja: ‘Cetama! Khala cete!’ Ndipo mphepo yikaleka, ntheura kukaŵa bata likuru.” Ndipo ŵasambiri ŵakati: “Ni njani uyu comenecomene, cifukwa nanga ni mphepo na nyanja vikumupulikira?” (Mariko 4:37-41) Uwu mbukaboni kuti Yesu pakuŵa Themba, wazamuvikilira ŵanthu wose ŵakupulikira mu Ufumu wake.—Daniel 7:13, 14.