TA TE TAATA E PARAU RA: “Na te Atua e faatere ra i te ao, na ˈna ïa e faatupu ra i te mau ati natura. Mea ino iho â ïa o ˈna!”

TA TE BIBILIA E PARAU RA: “Te vai noa nei to te ao atoa i raro aˈe i taua varua ino ra.” (Ioane 1, 5:19) O vai ïa “taua varua ino ra”? Ia au i te Bibilia, o Satani. (Mataio 13:19; Mareko 4:15) Mea huru ê anei te reira? A feruri na: Mai te peu e o Satani te mana ra i nia i teie ao, e turai iho â ïa o ˈna i te taata ia riro ei mea miimii, nounou e maamaa mai ia ˈna. E ere anei tera te tumu e tuino ai te taata i te natura? Ia au i te mau aivanaa, no te reira e tupu ai e e rahi roa ˈi te mau ati natura a fifi roa ˈtu ai te taata.

No te aha ïa te Atua e vaiiho ai ia Satani ia faatere i teie nei ao? No te ite i te pahonoraa, e hoˈi anaˈe i te haamataraa o te taata a orure hau ai to tatou na tupuna i te Atua. Mai reira mai, ua pee te rahiraa i to raua haerea. Ua patoi i ta te Atua faatereraa e ua farii atu i ta Satani, to ˈna enemi. Ua parau Iesu e o oia “te arii o teie nei ao.” (Ioane 14:30) E faatere anei Satani e a muri noa ˈtu? Eita!

No ta Satani mau haaraa e ati ai te huitaata. Te mauiui mau ra Iehova * ia ite i te reira. A fifihia ˈi te nunaa Iseraela, te na ô ra te Bibilia: “To ratou atoa ra mau ati aore oia i mârô atu ia ratou.” Ua aroha noa ˈtu ïa Iehova. (Isaia 63:9) Ma te hamani maitai, fatata roa oia i te haamou i te faatere ino ra o Satani! Ua maiti oia i ta ˈna Tamaiti, Iesu Mesia, ei Arii parau-tia e a muri noa ˈtu.

E NAFEA OE E FAUFAAHIA ˈI? Aita Satani i paruru i te taata i te mau ati natura, e na reira râ Iesu. O ta ˈna iho â ïa i rave no ta ˈna mau pǐpǐ a tupu ai te tahi vero. Te faatia ra te Bibilia: “Ua . . . avau atura i te mataˈi, e ua na ô atura i te are, A faaea, a mania. Pohe ihora te mataˈi, mania roa ˈtura.” Na ô aˈera ta ˈna mau pǐpǐ: “O vai hoi teie o tei faaroo te mataˈi e te moana atoa ia ˈna?” (Mareko 4:37-41) I raro aˈe i ta ˈna faatereraa, e paruru iho â ïa Iesu i te taata auraro atoa.—Daniela 7:13, 14.