LI KʼUSI CHALIK JLOME: «Jaʼ chakʼ kʼotuk ta pasel nikel, nojelal ta voʼ o yantik li Diose, yuʼun jaʼ ajvalil ta balumil, taje chakʼ ta ilel ti muʼyuk xkʼuxul yoʼontone».

LI KʼUSI CHAL VIVLIAE: «Oyic ta scʼob pucuj scotol li yan cristianoetic liʼ ta banamile» (1 Juan 5:​19). ¿Mi vokol van ta chʼunel taje? Jnoptik liʼe: Mi jaʼ oy ta skʼob pukuj li krixchanoetike, xuʼ yuʼun ti jaʼ xa noʼox tsnop ta stukik li krixchanoetike, ti chpichʼ oʼontavanike xchiʼuk ti makal satik kʼuchaʼal Diabloe. Taje jaʼ chakʼ jnaʼtik ti kʼu yuʼun mu lekuk tskʼel osil balumil li krixchanoetike. Ep li buchʼutik xchanojbeik lek skʼoplale chalik ti oy nikel, nojelal ta voʼ o yantik ta skoj ti mu lekuk skʼelike, o moʼoje jaʼ tsok-o batel mas yuʼunik xchiʼuk jaʼ mas chkil-o jvokoltik.

Pe, ¿kʼu yuʼun yakʼoj Dios ti x-ajvalilaj li Diabloe? Sventa jtakʼtike skʼan jnaʼtik kʼusi kʼot ta pasel ta slikebal xkuxlejal li krixchanoetike. Li baʼyel jtoj jmeʼtike la stoy sbaik ta stojolal Dios, jaʼ xkaltik, la spʼajik ti ch-ajvalilaj ta stojolalike, taje jech lik spasik ek jutuk mu skotoluk krixchanoetik. Ta skoj taje, spʼejel li Balumile och ta skʼob Satanás, li yajkontra Diose. Jaʼ yuʼun li Jesuse laj yal ti jaʼ Diablo «li banquilal jpasmantal liʼ ta banamile» (Juan 14:​30). Pe maʼuk ch-ajvalilaj ta sbatel osil.

Li Jeovae * maʼuk skʼan xal ti muʼyuk tsvul yoʼonton ta skoj li vokolil chakʼ Satanase. Yuʼun oy ta yoʼonton li buchʼutik chil svokolike. Jech kʼuchaʼal liʼe, kʼalal laj yil svokol li j-israeletike xi chal Vivlia kʼuyelan laj yaʼi sbae: «Scotol li svocolic toʼoxe jaʼ la svocolin stuc scotol» (Isaías 63:9). Jaʼ yuʼun, ta skoj ti lek snaʼ xkʼuxubinvane tslajesbe skʼoplal li ajvalilal yuʼun Satanase, taje poʼot xa xkʼot ta pasel yuʼun. Jech xtok, svaʼanoj ta ajvalil li stukʼil Nichʼone, li Jesucristoe sventa x-ajvalilaj ta sbatel osil.

TI KʼU YUʼUN TSOTS SKʼOPLAL LI STAKʼOBILE: Li Satanase muʼyuk skoltaoj krixchanoetik ti chil svokolik ta nikel, nojelal ta voʼ o yantike, pe li Jesuse chkoltavan. Kʼalal liʼ toʼox ta Balumile la spoj ta jun ikʼal tsatsal voʼ li yajtsʼaklomtake. Xi chal li Vivliae: «La spajes li iqʼue xchiʼuc li nabe. Jech laj yalbe: “Chʼabian, pajan” xut. Jech ta ora ichʼabi o li iqʼue; batsʼi lec lamal icom scotol». Labal to sba laj yil li yajtsʼaklomtake xchiʼuk xi laj yalbe sbaike: «¿Bochʼo vinical liʼi? Yuʼun cʼalal ta icʼ, cʼalal ta nab ta xchʼunbat smantal» (Marcos 4:​37-​41). Taje jaʼ tspat koʼontontik ti chchabi jchʼunej mantal krixchanoetik kʼalal ch-ajvalilaj li Jesuse (Daniel 7:​13, 14).