UKA jisktʼar qhanañchañatakejj Biblian utjki uka pä juicionakapat yatjjatañäni: Noé tiempon Uma Juiciota ukat Diosan cananeonakar tukjatapata.

YAQHEPANAKAJJ AKHAM SAPJJE: “Uma Juicion Diosajj Noé chacharu ukat familiaparukiw qhespiyäna, ukat taqe jaqenakaruw jiwarayäna, ukham lurasajj jan sinttʼasirïtap uñachtʼayi” sasa.

BIBLIAJJ AKHAM SIWA: “Janiw nayajj qhoru jaqen jiwañapjja munkti, jan ukasti uka qhoru jakañapjja apanukpan ukatsti jakarakpan” sasaw Diosajj qhanañchi (Ezequiel 33:11). Ukhamajj Noé tiempopan jan wali jaqenakar Diosajj tukjkäna ukhajj janiw kusiskänti, ukampis ¿kunatsa tukjpachäna?

Cheqas taqe ukanak apayanisajj “qhepa urunakan jakir jan wali jaqenakan amuytʼasipjjañapataki[w]” Diosajj apayaniskäna sasaw Bibliajj qhanañchi (2 Pedro 2:5, 6). Ukampis kunjamsa Diosajj juicionakap apayani ukat kunanaks nayraqat luraraki taqe ukanakwa Bibliajj qhanañchi.

Nayraqata, Diosajj jan wali jaqenakarus juicionakapamp tukjkchejja, jan wali luratanakapatwa tukjaski, kunattejj jan sinttʼasisaw yaqhanakar tʼaqhesiyapjje, ukampis uk lurasajj Diosajj janiw kusisit jikjjataskiti. Ukat jutïrin ukhamarakiw taqe jan walinak tukjani.

Ukjjarusti, kunanaktï Diosajj nayra tiemponakan lurkäna ukanakajj wali munasirïtapwa uñachtʼayistu, cheqas janïr kuna Juicio apayankasajj jaqenakarojj yatiyapunirïnwa. Amuytʼañataki, janïr Uma Juicio apayankasajj Noé chacha toqew yatiyäna, ukampis uka jaqenakajj janiw istʼapkänti. Uka toqet Bibliajj akham siwa: ‘Janirakiw istʼapkänti kunürutejj uma juiciojj purinisin taqeniru apasjjäna ukürkama’ sasa (Mateo 24:39).

Ukampis ¿Diosajj janïr juicio apayankasin jaqenakar yanaptʼpachänti? Jïsa, yanaptʼänwa. Israelitanakarojj akham sänwa: ‘Kawkhantï jakkta uka jakʼankir markanakatjja, janiw jan wali luräwinakap yateqasipjjätati, ukhamtï lurapjjätajja, mä markaw jumanak contra saytʼasin tukjapjjätam ukat Jerusalén marksa qʼal tʼunthapini jumanakarusti preso katuntasinwa apapjjätam’ sasa. Ukampis israelitanakajj janiw uka ewjjtʼanakar istʼapkänti, uka marka jakʼankirinakjamaw jan walinak lurapjjäna, jiskʼa wawanakaparus sacrificiojam kʼari diosanakar loqtapjjäna. ¿Uka jan wali luratanakapat Jehová Diosajj juicio apayanpachänti? Jïsa,  ukampis janïr apayankasajj uka jan wali luräwinakap jaytapjjañapatakiw kutin kutin profetanakapar khitäna. Ukat akham sarakïnwa: “Tatitojj janipuniw kuns lurkaspati profeta servirinakaparu jan yatiyasajja” sasa (Amós 3:7).

KUNATSA UK YATIÑASAJJA: Kunanaktï Diosajj nayra maranakan lurkäna ukanakajj wal chuymachistu. Kunattejj jan wali jaqenakarojj tukjapuniniwa. Bibliajj akham siwa: “Ñanqha luririnakajj oraqet jaqonukutäpjjaniwa [...]. LLampʼu chuymaninakasti oraq katoqapjjani, jilarkir sumankañampiw kusisipjjarakini” sasa (Salmo 37:9-11). Kuna juiciotï Diosajj jaqenakar jan walinakat qhespiyañatak apayankani ukajj ¿jan sinttʼasirïtapatti jan ukajj khuyaptʼayasirïtapatch apanpachani?

YAQHEPANAKAJJ AKHAM SAPJJE: “Jichhürunakan chʼajjwäwinakat sipansa, cananeonakar tukjasitapaw jukʼamp sinti jan walipunïnjja” sasa.

BIBLIAJJ AKHAM SIWA: “Luräwipasa cheqaparakiwa, luratapasa cheqarakiwa. Jupasti cheqapa Diosawa, janiw jupanjja kunatejj jan cheqapäki ukajj utjkiti” sasa (Deuteronomio 32:4). Jaqenakan luratanakapat sipansa, Diosan luratanakapaw jukʼamp askejja, kunattejj jaqenakajj janiw mayninakan chuymanakapan kunas utji uk yatipkaspati ukampis Jehová Diosajj sum yati.

Amtañäni, Diosajj Sodoma ukat Gomorra markanakar tukjañ amtkäna ukhajja, Abraham chacharojj mayaw llakisiyäna. Ukatwa Diosar akham jisktʼäna: “¿Jan juchani jaqenakarojj juchaninakampi chikti tʼunjarakïta?” sasa. Taqe kun cheqapar uñjiri Diosajj janiw uk lurkaspati sasïnwa amuyäna. Wali pacienciampiw Diosajj akham säna ‘tunka aski jaqenakakis Sodoma markan utjanejja, uka tunkani laykojj janiw tʼunjkäti’ sasa (Génesis 18:20-33). Cheqas Jehová Diosajj uka jaqenakan chuymap uñjäna, ukhamatwa jan wali amtanakanïpjjatap yatïna (1 Crónicas 28:9).

Cananeonakajj ukhamarakiw sinti jan walinak lurapjjerïna, chuymanakapas jan wali amtanakamp phoqhantatarakïnwa, ukatwa Diosajj tukjañ amtäna. Cheqas jupanakajj jiskʼa wawanakaparojj jakkirpachwa diosanakapar sacrificiojam loqtapjjerïna ukat yaqha ukham jan walinakamp lurapjjarakirïna (2 Reyes 16:3). * Jupanakajj kuntï Diosajj israelitanakar uka oraq katoqapjjañapatak siskäna uk yatipjjänwa. Ukampis janiw oraq israelitanakar churañ munapkänti, ukham lurasajj khititï israelitanakar yanaptʼaskäna Jupa contraw saytʼasipkäna, mä arunjja, Jehová Dios contra.

Ukampis cananeonakat mä qawqhanejj jan wali luräwinakap jaytasajj arrepentisipjjänwa, ukat Diosan yatichäwinakaparus istʼjjapjjarakïnwa. Ukat Diosajj jupanakar khuyaptʼayänwa. Sañäni, jan wali sarnaqer Rahab warmirusa ukat familiaparusa janiw jiwayaskänti. Ukat kunaratutï Gabaón markankirinakajj ‘janikiy nanakarusa ukhamarak wawanakajarusa jiwayapjjestati’ sapkäna ukhajja, janiw jiwayapkänti (Josué 6:25; 9:3, 24-26).

KUNATSA UK YATIÑASAJJA: Cananeonakar tukjatapajj wal chuymachistu ¿kunatsa? Kunattejj jichhürunakanjja ukhamarakiw ‘jan walinak lurir jaqenakarojj tukjasini’ (2 Pedro 3:7). Jiwasatï Diosar wal munasiñäni ukat istʼarakiñäni ukhajja, kunaratutï Jehová Diosajj Reinop contra saytʼirinakar tukjkani ukhajj jan llakini, wali kusisitaw jakasjjañäni.

Awk taykanakan amtäwinakapajj waliru ukat jan waliruw wawanakapar apaspa sasaw Jehová Diosajj amtayistu. Ukatwa qollan arupan akham sistu: “Ukampis jakaña ajllisipjjam, jumanakampi, wawanakamampi jakapjjañamataki. Tatitu Diosamarusti munapjjam, istʼapjjarakim, suma iyawsañampi arkapjjarakim” sasa (Deuteronomio 30:19, 20). ¿Mä jan sinttʼasiri Diosajj uk arsuspati, jan ukajj jiwasan askis munir Diosach ukham arsuspa?